1-2. Ki lika mañi zetahisa kuli batanga ba Mulimu babe ni tabo? (Jakobo 1:​22-25)

 JEHOVA ni Mwanaa hae babata kuli lube ni tabo. Muñoli wa Samu 119:2 naabulezi kuli: “Tabo ki ya babamamela likupuliso zahae, baba mubata ka lipilu zabona kaufela.” Jesu ni yena naabulezi kuli: “Babatabile mane ki babautwa linzwi la Mulimu ni kulimamela!”—Luka 11:28.

² Ka kuba batanga ba Jehova, lu batu babatabile. Libaka? Lunani mabaka amañata halutabile, kono libaka la butokwa kikuli lubalanga Linzwi la Mulimu kamita ni kuikataza kusebelisa zeluituta.—Mubale Jakobo 1:​22-25.

3. Kusebelisa zeluituta mwa Linzwi la Mulimu kukona kulutusa cwañi?

³ Kuba “baezi ba linzwi” kulutusa ka linzila zeñata. Ka mutala, halusebelisa zeluituta mwa Linzwi la Mulimu, lutabisa Jehova, mi taba yeo ilutahiseza tabo. (Muek. 12:13) Hape kusebelisa zeluituta mwa Linzwi la Mulimu kulutusa kuswalisana hande ni ba mwa lubasi lwaluna ni mizwale ni likaizeli mwa puteho. Mwendi mane muiponezi buniti bwa taba yeo. Kutuha fo, lukaambuka butata bobakopananga ni bona batu babasa mameli milao ya Jehova. Kaniti luli, lwalumelelana ni zanaabulezi Mulena Davida. Hamulaho wa kuopela ka za milao, litaelo, ni likatulo za Jehova, naafelize ka kubulela kuli: “Kulimamela kufumanisa mupuzo omutuna.”—Samu 19:​7-11.

4. Ki kabakalañi hakukona kulubela taata kuba baezi ba Linzwi la Mulimu?

⁴ Ka linako zeñwi kukona kulubela taata kuba baezi ba Linzwi la Mulimu. Kusina taba ni mipateho yaluna, luswanela  kulukisa nako ya kubala ni kuituta Bibele, ilikuli luutwisise zabata Jehova kuli lueze. Kacwalo, halunyakisiseñi liakalezo lisikai zekona kulutusa kubalanga Bibele kamita. Hape lukanyakisisa zekona kulutusa kunahanisisa zelubala ni kuziba molukona kulisebeliseza mwa bupilo bwaluna.

MULUKISANGE NAKO YA KUBALA LINZWI LA MULIMU

5. Ki lifi lika zelupatehisanga hahulu?

⁵ Buñata bwa batu ba Jehova bapatehile hahulu. Lutandanga nako yeñata kupeta buikalabelo bobushutana-shutana bwa ka Mañolo. Ka mutala, buñata bwaluna luezanga misebezi ya kwa mubili kuli lubabalele lubasi lwaluna. (1 Tim. 5:8) Bakreste babañata bababalela bahabo bona babali bakuli kamba basupali. Mi kaufelaa luna luswanela kuisa pilu kwa buikangulo bwaluna bwa kwa mubili, mi kueza cwalo kutokwa nako. Kwandaa buikalabelo bo, kunani misebezi yemiñwi yeluswanela kupeta mwa puteho. Musebezi wa butokwa hahulu oluswanela kueza ki kukutaza taba yende ka tukufalelo. Kusina taba ni buikalabelo bo kaufela bomunani bona, ki lika mañi zekona kumitusa kuba ni nako ya kubalanga Bibele kamita, kunahanisisa zemubala, ni kusebelisa zeibulela?

6. Ki buikatazo mañi bomuswanela kueza kuli mubalange Bibele? (Mubone ni siswaniso.)

⁶ Kubala Bibele ki yeñwi ya “lika za butokwa hahulu” ku luna Bakreste; kacwalo, luswanela kuikataza kuezanga cwalo. (Mafil. 1:10) Samu yapili ibulela cwana ka za mutu yanani tabo: “Utabela mulao wa Jehova, mi waubala ni kuunahanisisa, musihali ni busihu.” (Samu 1:​1, 2) Kusina kukakanya, taba yeo ibonisa kuli luswanela kubanga ni nako ya kubala Bibele. Ki ifi nako yende ya kubala Bibele? Mañi ni mañi waluna wakona kuketa nako yebonahala kuba hande ku yena. Kono sa butokwa kikuli, luswanela kuketa nako yeka lukonisa kubalanga Bibele kamita. Muzwale yabizwa Victor utalusa kuli: “Nitabela kubala Bibele kakusasana. Nihaike kuli hanitabeli hahulu za kupakela, nilemuhile kuli kakusasana hakubangi ni lika zeñata zekona kuniyaulula. Niikutwanga  kukatuluha mwa munahano mi nakona kuisa hahulu pilu kwa lika zenibala.” Mwendi ki mona momuikutwela ni mina? Muipuze kuli, ‘Ki ifi nako yende yenikona kubalanga Bibele?’

MUNAHANISISE LITABA ZEMUBALA

7-8. Ki lika mañi zekona kutahisa kuli lusike lwatusiwa hahulu ki litaba zelubala? Mufe mutala.

⁷ Kono niti kikuli, lwakona kubalanga litaba zeñata kamita lusabi ni nako ya kulinahanisisa. Kana mukile mwabala taba yeñwi kono nakonyana kuzwa fo nemukona feela kuhupula litaba lisikai? Kaufelaa luna lukile lwaba ni butata bo. Ka bumai, nto yeswana yakona kuezahala halubala Bibele. Mwendi luitomezi sikonkwani sa kubalanga likauhanyo lisikai mwa Bibele zazi ni zazi. Ki kwa butokwa kueza cwalo. Luswanela kuitomela likonkwani ni kuikataza kulipeta. (1 Makor. 9:26) Nihakulicwalo, kubala Bibele ki makalelo feela, mi ki makalelo amande. Kunani lika zeñwi zeluswanela kueza kuli kubala Linzwi la Mulimu kulutuse ka kutala.

⁸ Halunyakisiseñi mutala wo: Mezi, sihulu a pula, ki a butokwa mwa bupilo. Kono haiba pula yeñata isuluha mwa nako yekuswani feela, kukona kuba ni mezi amañata hahulu mwa mubu. Haiba kuba cwalo, pula yeñata yeo haina kulutusa. Mubu utokwa nako kuli uanye mezi a pula ni kuli aitusiswe ki limela. Ka nzila yeswana, ni luna haluswaneli kubalanga Bibele ka kumata-mata, fo kikuli, kubala ka kuakufa kuli mane lwapalelwa kuba ni nako ya kunahanisisa zelubalile, kulihupula, ni kulisebelisa.—Jak. 1:24.

9. Ki lika mañi zeluswanela kueza haiba lulemuha kuli lunani mukwa wa kubalanga Bibele ka kumata-mata?

⁹ Kana mulemuhile kuli ka linako zeñwi mubalanga Bibele ka kumata-mata feela? Ki lika mañi zemuswanela kueza? Mubale ka kuiketa. Muikataze kunahanisisa zemusweli kubala kamba zemusazo bala. Taba yeo haiswaneli kuba yetaata. Haiba muikutwa kuli kukona kumibela taata kubanga ni nako ya kunahanisisa, mwendi kwakona kutusa kuunga taba yeo sina feela kunahana ka za litaba zemubalile. Mwakona kuketa kuekeza kwa nako  yemuitutanga kuli mubange ni nako ya kunahanisisa kamba kuyeya. Kamba mwakona kuketa kubalanga litimana lisikai feela ilikuli muitusise nako yesiyezi kwa kunahanisisa zemubalile. Bo Victor, bababulezwi kwamulaho batalusa kuli: “Nibalanga litaba lisikai feela mwa Bibele, fokuñwi mane nibalanga kauhanyo iliñwi feela. Bakeñisa kuli nibalanga Bibele kakusasana, nakona kuzwelapili kunahanisisa zenibalile lizazi kaufela.” Kusina taba ni muezezo omukona kuketa, ki kwa butokwa kubala ka nzila yekatahisa kuli mutusiwe hahulu ki litaba zemubala.—Samu 119:97; mubone mbokisi yeli, “ Lipuzo Zemukona Kunyakisisa.”

10. Mufe mutala obonisa momukona kuitusiseza litaba zemuituta. (1 Matesalonika 5:​17, 18)

¹⁰ Kusina taba ni fomuketela kubala Bibele ni nako yemutanda, mubone teñi kuli mwabata linzila za kusebelisa ka zona litaba zemubala. Hamunze mubala litaba zeñwi mwa Bibele, muipuze kuli, ‘Nikona kusebelisa cwañi litaba ze ka nako ya cwale kamba kwapili?’ Ka mutala, luunge kuli hane mubala Bibele nemubalile ni 1 Matesalonika 5:​17, 18. (Mubale.) Hamulaho wa kubala litimana zepeli zeo, mwakona kutuhela hanyinyani kubala ni kunahana kuli muzibe haiba mwalapelanga kamita ni kueza cwalo kuzwelela kwatasaa pilu. Hape mwakona kunahana ka za lika zemuitebuha. Mwendi mwakona kuatula kuli mukaitumela ku Jehova ka kunonga kabala lika zetaalu zamiezelize. Nihaiba kubanga feela ni mizuzu yelikani yeo ya kunahanisisa ka tokomelo litaba zemubala, kwakona kumitusa kuba muutwi ni muezi wa Linzwi la Mulimu. Munahane feela momuka tusehela haiba zazi ni zazi muba ni nako ya kunahanisisa zemubala! Kusina kukakanya, kueza cwalo kuka mitusa hahulu kuba muutwi ni muezi wa Linzwi la Mulimu. Kono kucwañi haiba mulemuha kuli munani bufokoli bobuñata fomuswanela kubelekela?

MUITOMELE LIKONKWANI ZEMUKONA KUPETA

11. Ki kabakalañi hamukona kuikutwa kuzwafa ka linako zeñwi hamubala Bibele? Mufe mutala.

¹¹ Ka linako zeñwi mwakona kuikutwa kuzwafa hamubala Bibele ni kubata linzila za kusebelisa ka zona ketelelo yayona. Halunyakisiseñi mutala wo: Kacenu hane mubala Bibele nemubalile ni kelezo ka za kusabonisa ketululo. (Jak. 2:​1-8) Mulemuha kuli muswanela kuezanga hande babañwi, mi muikatulela kueza licinceho. Ki kwa butokwa hahulu kueza cwalo! Mi habusa mubala taba yebonisa butokwa bwa kuketa hande lipulelo. (Jak. 3:​1-12) Mulemuha kuli ka linako zeñwi nemusa itusisangi lipulelo zende. Kacwalo, muikatulela kuli mukaitusisanga lipulelo  zende ili zeyahisa. Habusa hamubala Bibele, mubala ni litimana zebonisa butokwa bwa kusaba mulikanaa lifasi. (Jak. 4:​4-12) Mulemuha kuli muswanela kuba ni tokomelo yetuna hamuketa za kuitabisa ka zona. Hamukayo fita fa lizazi labune, mwakona kuikutwa kuzwafa kabakala kulemuha kuli hamuezi hande mwa lika zeñata.

12. Ki kabakalañi hamusa swaneli kuzwafa haiba hamubala Bibele mulemuha kuli mutokwa kueza licinceho? (Mubone ni litaluso ze kwatasi.)

¹² Musike mwazwafa haiba mutokwa kueza licinceho zeñata. Taba yeo ibonisa kuli mwaikokobeza mi munani milelo yeminde. Mutu yaikokobeza ili yanani niti, habala Bibele, mulelo wahae ki kulemuha faswanela kubelekela. a Hape muhupule kuli ‘kuapala butu bobunca’ ki nto yeluswanela kuzwelapili kueza. (Makolo. 3:10) Ki lika mañi zeka mitusa kuzwelapili kuba muezi wa Linzwi la Mulimu?

13. Mukona kuitomela cwañi likonkwani zemukona kupeta? (Mubone ni siswaniso.)

¹³ Kufita kulika kusebelisa litaba zemuituta kaufelaa zona ka nako iliñwi, muitomele likonkwani zemukona kupeta. (Liprov. 11:2) Mwakona kulika muezezo wo: Mube ni mukoloko wa lika fomuswanela kubelekela, mi mukete nto iliñwi kamba zepeli fomuka kala kusebeleza, mi zesiyezi mukabelekela ku zona hasamulaho. Muswanela kukalela kai?

14. Ki lifi likonkwani zemuswanela kupeta pili?

¹⁴ Mwakona kukala ka sikonkwani semukona kupeta ka bunolo. Kamba mwakona kuketa kubelekela fa bufokoli bomubona kuli butokwa hahulu kuiswa mamelelo. Hase muketile sikonkwani, mueze lipatisiso mwa lihatiso zaluna, zecwale ka Watch Tower Publications  Index kamba Buka ya Lipatisiso ya Lipaki za Jehova. Mulapele ka za sikonkwani seo mi mukupe Jehova kuli amife “takazo ni maata a kuunga muhato.” (Mafil. 2:13) Kihona mukasebelisa zemuitutile. Haiba mueza zwelopili yende kulikana ni sikonkwani samina sapili, mwakona kususuezwa kubelekela fa sikonkwani sesiñwi. Mane niti kikuli, haiba mueza zwelopili mwa kalulo yeñwi ya kupila sina Mukreste kamba kubonisa kalemeno kakañwi ka Sikreste, kukona kumibela bunolo kueza hande mwa likalulo zeñwi.

MUTUHELELE LINZWI LA MULIMU ‘KUSEBEZA KU MINA’

15. Batu ba Jehova bashutana cwañi ni batu babañata bababalanga Bibele? (1 Matesalonika 2:13)

¹⁵ Batu babañata babulelanga kuli babalile Bibele hañata-ñata. Kono kana balumela luli litaba zeiluta Bibele? Kana baikatalize kupila ka kulumelelana ni zeiluta Bibele kamba kuilumeleza kubaetelela mwa bupilo? Ka bumai, hañata kalabo kwa lipuzo zeo ki batili. Kono batu ba Jehova bona bashutanela kwahule ni batu bao! Ka kuswana ni Bakreste ba mwa linako za baapositola, ni luna luunga Bibele ‘sina ka moiinezi luli, sina linzwi la Mulimu.’ Luikatazanga kubonisa kuli Linzwi la Mulimu lasebeza mwa bupilo bwaluna.—Mubale 1 Matesalonika 2:13.

16. Ki lika mañi zekona kulutusa kuba baezi ba Linzwi?

¹⁶ Haki nto yebunolo kubala Linzwi la Mulimu ni kusebelisa zeluituta. Kukona kulubela taata kufumana nako ya kubala. Kamba lwakona kuba ni mukwa wa kubala ka kumata-mata ni kupalelwa kunahanisisa litaba zelubalile. Kamba lukona kuikutwa kuzwafa kabakala licinceho zeñata zelutokwa kueza. Kusina taba ni butata bomukopana ni bona, musike mwaikutwa kuli ki bobutuna hahulu kuli mane habukoni kufeliswa. Ka tuso ya Jehova, mwakona kufelisa butata bo. Haike luikatulele kuamuhela tuso yalufa kuli lusike lwaba bautwi babalibala, kono lube baezi ba Linzwi. Kusina kukakanya, kubalanga hahulu Linzwi la Mulimu ni kusebelisa zeluituta, kuka lutahiseza tabo yetuna.—Jak. 1:25.