1-2. Ki kabakalañi Jehova hanaa lubupile ka nzila yetahisa kuli lube ni tabo yetuna haluba ni bufani?

 JEHOVA hanaabupile batu, naababupile ka nzila yebakonisa kuba ni tabo yetuna mwa kufana yefita ye mwa kufiwa. (Lik. 20:35) Kana taba yeo italusa kuli hakuna feela tabo yelukona kuba ni yona halufiwa? Batili. Kaufelaa luna lwabanga ni tabo halufiwa mpo. Nihakulicwalo, lubanga ni tabo yetuna hahulu halufana. Mi lwaitumela luli kuli Jehova naalubupile ka nzila yeo. Kabakalañi?

² Bakeñisa kuli Jehova naalubupile ka nzila yeo, lwakona kuekeza kwa tabo yaluna. Lwakona kuekeza kwa tabo yaluna ka kubata linzila zeñwi zelukona kubonisa ka zona bufani. Kana hakutabisi kuli Jehova naalubupile ka nzila yeo?—Samu 139:14.

3. Ki kabakalañi Jehova hakona kubulelwa kuli ki “Mulimu yatabile”?

³ Bibele ibulela kuli kufana kutahisa tabo; kacwalo, kwaswanela Bibele haitalusa Jehova kuli ki “Mulimu yatabile.” (1 Tim. 1:11) Ki yena wapili kubonisa bufani mi hakuna yamufita kwa bufani. Sina feela muapositola Paulusi mwanaataluselize, “lunani bupilo, lwazamaya, mi luteñi” kabakala hae. (Lik. 17:28) Kaniti luli, “mpo yende kaufela ni mpo yepetehile kaufela” izwa ku Jehova.—Jak. 1:17.

4. Ki lika mañi zekona kulutusa kuba hahulu ni tabo?

⁴ Kusina kukakanya, kaufelaa luna neluka tabela kuba hahulu ni tabo yetahiswa ki bufani. Lwakona kueza cwalo ka kulikanyisa bufani bwa Jehova. (Maef. 5:1) Halunze lunyakisisa taba ye, mulemuhe zelukona kueza haiba luikutwa kuli batu habaitebuhi bufani bwaluna. Likupuliso zeo lika lutusa kuzwelapili kuba ni tabo yetahiswa ki bufani, mane nihaiba kuekeza kwa tabo yeo.

 MULIKANYISE BUFANI BWA JEHOVA

5. Ki lika mañi za kwa mubili zalufanga Jehova?

⁵ Ki lifi linzila zeñwi zabonisanga ka zona bufani Jehova? Halunyakisiseñi mitala isikai. Jehova ulufanga lika za kwa mubili. Mwendi kamita haluna kupila bupilo bwa simbombo, kono lwaitumela ku Jehova, kakuli buñata bwaluna lunani zelutokwa. Ka mutala, walutusanga kufumana lico, liapalo, ni malobalo. (Samu 4:8; Mat. 6:​31-33; 1 Tim. 6:​6-8) Kana Jehova ulufanga lika zelutokwa kwa mubili ka libaka feela la kuli uikutwa kuli uswanela kueza cwalo? Kutokwa nihanyinyani! Ki kabakalañi Jehova haezanga cwalo?

6. Luitutañi kwa Mateu 6:​25, 26?

⁶ Ka bukuswani lukali, Jehova ulufanga lika zelutokwa kwa mubili bakeñisa kuli walulata. Halunyakisiseñi manzwi a Jesu a kwa Mateu 6:​25, 26. (Mubale.) Jesu uitusisa mitala ya lika zebupilwe. Jesu hanaabulela za linyunywani, naabulezi kuli: “Halicali peu kamba kukutula kamba kukubukanya mwa mabulukelo.” Nihakulicwalo, mulemuhe zanaabulezi kuzwa fo, naaize: “Ndataa mina ya kwa lihalimu walifepa.” Cwale Jesu kihona abuza kuli: “Kana mina hamu ba butokwa hahulu kufita linyunywani?” Luitutañi? Jehova uunga batu baba mulapela kuba ba butokwa hahulu kufita lifolofolo. Haiba Jehova wababalelanga lifolofolo, lwakona kuba ni buikolwiso bwa kuli uka lufa zelutokwa! Ka kuswana ni ndate yalilato, Jehova wababalelanga lubasi lwahae kabakala lilato.—Samu 145:16; Mat. 6:32.

7. Ki ifi nzila yeñwi yelukona kulikanyisa ka yona bufani bwa Jehova? (Mubone ni siswaniso.)

⁷ Ka kuswana ni Jehova, ni luna lwakona kufa batu babañwi lika za kwa mubili kabakala lilato. Ka mutala, kana kunani muzwale kamba kaizeli yemuziba yatokwa kutusiwa kufumana lico kamba liapalo? Jehova wakona kuitusisa mina kuli muzwale kamba kaizeli yo afumane zatokwa. Batu ba Jehova hape bazibahala hahulu ka kubonisa sishemo hakuba ni kozi. Ka mutala, ka nako ya butuku bobuyambukela bwa COVID-19, mizwale ni likaizeli nebatusize mizwale babona bane bali mwa butokwi ka kubafa lico, liapalo, ni lika zeñwi zene batokwa. Mizwale ni likaizeli babañata hape nebabonisize bufani ka kufa linubu zetusa mwa musebezi wa mwa lifasi kaufela. Linubu zeo neliitusisizwe kwa kutusa mizwale bane baamilwe ki butuku bo mwa lifasi kaufela. Nebasebelisize manzwi a kwa Maheberu 13:​16, ali: “Musike mwalibala kueza zende  ni kuikabela ni babañwi zemunani zona, kakuli Mulimu utabiswa ki matabelo acwalo.”

8. Maata alufa Jehova alutusa ka linzila lifi? (Mafilipi 2:13)

⁸ Jehova walufanga maata. Jehova unani maata amatuna hahulu, mi utabela kufa batanga bahae maata. (Mubale Mafilipi 2:13.) Kana mukile mwalapela ku Jehova kukupa maata a kutiyela muliko kamba a kutiyela muinelo otaata? Mwendi hape nemulapezi ku Jehova kumukupa kuli amife maata anaaka mitusa kueza lika zene mutokwa kueza. Tapelo yamina ya kukupa maata hane ialabilwe, mwendi nemuikutwile sina mwanaaikutwezi muapositola Paulusi, yanaañozi kuli: “Nifumana maata mwa lika kaufela ka yena yanifa maata.”—Mafil. 4:13.

9. Lukona kulikanyisa cwañi Jehova ka kuitusisa maata aluna kuli lutuse babañwi? (Mubone ni siswaniso.)

⁹ Nihaike kuli lu batu babasika petahala, lwakona kulikanyisa Jehova ka kuitusisa maata aluna kuli lutuse babañwi. Halukoni kufa batu babañwi maata aluna luli. Kono lwakona kuitusisa maata aluna kuli lubatuse. Ka mutala, lwakona kutusa Mukreste yali musupali kamba yali siyanga ka kuyo mulekela lika zeñwi kamba kumuezeza misebezi yemiñwi ya fa lapa. Haiba miinelo yalulumeleza, lwakona kuitatela kutusa mwa musebezi wa kukenisa ni kubabalela Ndu ya Mubuso. Haluitusisa maata aluna ka nzila yeo, lutusa mizwale ni likaizeli baluna.

10. Lukona kuitusisa cwañi manzwi aluna kuli lutuse babañwi?

¹⁰ Hape muhupule kuli zemubulela zakona kususueza mutu yomuñwi. Kana kunani mutu yomuñwi yemuziba yakona kususuezwa haiba mumubabaza? Kana kunani mutu yomuñwi yemuziba yatokwa kuomba-ombiwa? Haiba ki cwalo, mueze momukonela kaufela kuli mutu yo azibe kuli mwamuisa pilu. Mwakona kupotela mutu yo, kumulizeza foni, kamba mwendi kumulumela kadi, email, kamba kashango ka fa foni. Hamutokwi kubulela litaba zeñata. Mwendi manzwi asikai feela azwelela kwatasaa pilu ki ona atokwa kuutwa muzwale kamba kaizeli kuli azwelepili kusepahala kamba kuikutwa hande mwa muinelo wali ku ona.—Liprov. 12:25; Maef. 4:29.

11. Jehova uitusisanga cwañi butali bwahae?

¹¹ Jehova walufanga butali. Mulutiwa Jakobo naañozi kuli: “Haiba yomuñwi ku mina haana butali, azwelepili kukupa Mulimu, kakuli ufanga batu kaufela ka bufani bobutuna asafumani mulatu ku mutu.” (Jak. 1:5; litaluso ze kwatasi) Sina mwaboniseza manzwi ao, Jehova haipulukelangi butali. Ubonisanga bufani ka kufa babañwi butali. Hape mulemuhe  kuli Jehova ufanga butali “asashubuli mutu,” kamba “asafumani mulatu ku mutu.” Haatahisangi kuli luikutwe bumaswe kabakala kuli lutokwa ketelelo yahae. Kono mane ulususueza kuli lukupe ketelelo yahae.—Liprov. 2:​1-6.

12. Ki kolo mañi yelukona kuitusisa kuli lutaluseze babañwi zeluziba?

¹² Luna bo? Kana lwakona kulikanyisa Jehova ka kuikabela zibo ni babañwi? (Samu 32:8) Batu ba Jehova banani linzila zeñata za kutaluseza ka zona babañwi zebaitutile. Ka mutala, hañata lwalutanga bahasanyi babanca mwakukutaleza. Baana-bahulu batusanga ka pilu-telele likombwa za puteho ni mizwale babakolobelizwe kuli bazibe mwakupetela buikalabelo bwabona mwa puteho. Mi babanani yeloseli mwa musebezi wa kuyaha ni kubabalela miyaho ya kopano balutanga babasina yeloseli mwa musebezi wo.

13. Lukona kulikanyisa cwañi mwafelanga butali Jehova, haluluta babañwi?

¹³ Babalutanga babañwi musebezi bakaeza hande haiba balikanyisa mwafelanga butali Jehova. Muhupule kuli Jehova ubonisanga bufani ka kufa babañwi butali. Kacwalo, ni luna luswanela kuikabela litaba kaufela zeluziba ni batu boluluta musebezi. Haluswaneli kupata litaba zeñwi ka kusaba kuli mutu yeluluta musebezi ukafiwa buikalabelo bwaluna. Mi haluswaneli kuba ni mubonelo wa kuli: ‘Na hakuna yanaa nilutile musebezi! Uswanela kuituta isali yena.’ Batu ba Jehova habaswaneli kuba ni mubonelo ocwalo. Kono lutabela kuikabela litaba kaufela zeluziba ni batu boluluta, “mane cwalo ni [kubafa] bupilo bwaluna.” (1 Mates. 2:8) Lunani sepo ya kuli ni bona ‘bakakona hande kuliluta babañwi.’ (2 Tim. 2:​1, 2) Haiba kaufelaa luna lubonisa bufani ka kuikabela ni babañwi litaba zeluziba, luna ni batu bao lukaba hahulu ni butali ni tabo.

HAIBA KUBONAHALA KULI BATU HABAITEBUHI BUFANI BWALUNA

14. Batu babañata baezanga cwañi haluba bonisa bufani?

¹⁴ Halubonisa bufani, sihulu kwa mizwale ni likaizeli baluna, hañata babonisanga buitumelo. Bakona kululumela kadi yenani manzwi a buitumelo kamba kubonisa buitumelo bwabona ka nzila yeñwi. (Makolo. 3:15) Hababonisa kuli baitumela ku luna, lukaba hahulu ni tabo.

15. Ki lika mañi zeluswanela kuhupula haiba batu babañwi basabonisi buitumelo?

¹⁵ Kono niti kikuli, ka linako zeñwi batu babañwi habana kubonisa buitumelo bwabona ku luna. Ka linako zeñwi lwakona kuitusisa nako yaluna, maata aluna, kamba lika zeñwi zelunani kuli lutuse babañwi, kono hasamulaho, kukona kubonahala inge kuli batu bao habaitebuhi zelu baezelize. Haiba kuba cwalo, lukona kueza cwañi kuli lusike lwafelelwa ki tabo yaluna kamba kuli lusike lwanyema? Muhupule manzwi a mwa liñolo la Likezo 20:​35, foitomile taba ye. Tabo yaluna yetahiswa ki bufani haisika itinga fa lika zebaeza batu belubonisa bufani. Lwakona kubonisa bufani nihaikaba kuli batu babañwi hababonisi buitebuho. Ka mukwa ufi? Halunyakisiseñi linzila lisikai.

16. Ki lika mañi zekona kulutusa kuzwelapili kufana inze lutabile?

¹⁶ Muise hahulu pilu kwa kulikanyisa Jehova. Ufanga lika zende kwa batu kaufela ibe kuli babonisa buitebuho kamba kutokwa. (Mat. 5:​43-48) Jehova usepisa kuli ni luna haiba lufa ‘lusalibeleli kukutelwa ki sesiñwi, mupuzo waluna ukaba omutuna.’ (Luka 6:35) Pulelo yeli, “sesiñwi” ikona kukopanyeleza manzwi a buitumelo. Ibe kuli batu baitebuha kamba kutokwa, Jehova ukazwelapili kulukutiseza kabakala lika zende zelueza kuli lutuse  babañwi, ni kabakala ‘kufana inze lutabile.’—Liprov. 19:17; 2 Makor. 9:7.

17. Ki lifi libaka la butokwa hahulu haluswanela kubonisa bufani? (Luka 14:​12-14)

¹⁷ Nto yeñwi yelukona kueza kuli lulikanyise Jehova halufana, ki kusebelisa zanaabulezi Jesu kwa Luka 14:​12-14. (Mubale.) Hakusika fosahala kubonisa moya wa kuamuhela baenyi kamba kubonisa bufani ka linzila zeñwi kwa batu babakona kulukutiseza. Nihakulicwalo, kucwañi haiba lulemuha kuli lusweli kubonisa bufani kabakala kuli lubata kuli ni bona balutuse ka nzila yeñwi. Lukaeza hande kusebelisa zanaabulezi Jesu. Lwakona kubonisa moya wa kuamuhela baenyi ku mutu yeluziba kuli hakuna saka lukutiseza. Mi lukaba ni tabo kabakala kuli lulikanyisa Jehova. Mubonelo oswana wo hape uka lutusa kuzwelapili kuba ni tabo haiba batu babañwi basabonisi buitebuho.

18. Ki lika mañi zelusa swaneli kueza, mi ki kabakalañi?

¹⁸ Muambuke kunahana kuli babañwi habana buitumelo. (1 Makor. 13:7) Haiba batu babañwi hababonisi buitebuho, luswanela kuipuza kuli: ‘Kana luli habana buitebuho, kamba mwendi nebalibezi feela kubonisa buitebuho?’ Mwendi kunani mabaka amañwi atahisize kuli basike babonisa buitebuho sina mone lulibelelela. Babañwi bakona kuitebuha hahulu mwa pilu kono kukona kubabela taata kubonisa buitebuho bwabona. Bakona kuikutwa maswabi kutusiwa, sihulu haiba kwamulaho neli bona bane batusanga babañwi. Kono haiba lwalata luli mizwale ni likaizeli baluna, haluna kunahana kuli habana buitebuho mi lukazwelapili kufana inze lutabile.—Maef. 4:2.

19-20. Ki kabakalañi kuba ni pilu-telele hakuli kwa butokwa halubonisa bufani? (Mubone ni siswaniso.)

¹⁹ Mube ni pilu-telele. Mulena yabutali Salumoni naabulezi cwana ka za bufani kuli: “Nepela sinkwa sahao fa mezi, kakuli hamulaho wa mazazi amañata ukasifumana hape.” (Muek. 11:1) Manzwi ao aluluta kuli ka linako zeñwi batu bakona kubonisa buitebuho “hamulaho wa mazazi amañata.” Halunyakisiseñi zeneezahezi ku kaizeli yomuñwi zebonisa buniti bwa taba yeo.

²⁰ Lilimo zeñata kwamulaho, musalaa muokameli  wa mupotoloho yomuñwi naañolezi liñolo kaizeli yomuñwi yanaasazo kolobezwa, ili kumususueza kuli azwelepili kusepahala. Ibato ba hamulaho wa lilimo ze 8 kuzwa fo, kaizeli yo naañolezi musalaa muokameli wa mupotoloho yo, mi naaize: “Niikutwa kuli niswanela kumiñolela ni kumitaluseza kuli munitusize hahulu mwahalaa lilimo zefelile nihaike kuli nemusa zibi cwalo.” Naaekelize kubulela kuli: “[Liñolo lamina] neli nisusuelize hahulu, kono timana ya mwa Bibele yene mubeile mwateñi ki yona yene inifitile hahulu kwa pilu, mi nizwezipili kuihupula.” a Hasaatalusize miinelo yetaata yanaakopani ni yona, kaizeli yo naabulezi kuli: “Ka linako zeñwi nenibatanga kuzwafa ni kutuhela kusebeleza Jehova. Kono nenizwezipili kuhupula timana ya mwa Bibele yene mubeile mwa liñolo lamina, mi timana yeo neinitusize kuli nisike nazwafa.” Naaekelize kuli: “Nto yenee nisusuelize hahulu mwa lilimo ze 8 ze kaufela ki liñolo lamina ni timana yene mubeile mwateñi.” Munahane feela tabo yanaabile ni yona musalaa muokameli wa mupotoloho yo hanaaamuhezi liñolo leo “hamulaho wa mazazi amañata”! Ni luna, batu bakona kubonisa buitebuho niha sekufitile nako yetelele kuzwa fone lubatuselize.

21. Ki kabakalañi hamuikatulezi kuzwelapili kulikanyisa bufani bwa Jehova?

²¹ Sina mokutaluselizwe, Jehova ulubupile ni buikoneli bobuipitezi. Nihaike kuli lwabanga ni tabo halufiwa, lubanga ni tabo yetuna hahulu halufa babañwi. Luikutwanga hande halutusa mizwale ni likaizeli baluna. Mi lwatabanga hababonisa buitebuho. Niteñi, ibe kuli mutu yelutusize wabonisa buitebuho kamba kutokwa, lwakona kuba ni tabo kakuli luezize sesilukile. Kamita muhupulange kuli “Jehova wakona [kumifa] zeñata hahulu” kufita zemukona kufana. (2 Makol. 25:9) Halukoni feela kufita Jehova kwa bufani! Mi hakuna nto yekona kulutahiseza tabo yetuna, kufita kukutisezwa ki Jehova kasibili. Kacwalo, haike luikatulele kuzwelapili kulikanyisa Ndataa luna ya kwa lihalimu yanani bufani.