“Mutu yo Munyinyani” S’a Fetuhile “Ba Ba Eza Lule”

“Mutu yo munyinyani u ka fetuha ba ba eza lule, ya nyazeha a be sicaba se si mata.”—ISAYA 60:22.

1, 2. (a) Lififi li kwaheleziñi lifasi kacenu? (b) Jehova u pazulezi cwañi hanyinyani-hanyinyani batu ba hae?

“LIFIFI . . . li ka kwahela lifasi; lififi le lituna li kwahele macaba; kono wena, [Muñ’a] Bupilo u ka ku pazulela, mi kanya ya hae i ka bonahala ku wena.” (Isaya 60:2) Manzwi ao a talusa hande muinelo o bile fa lifasi-mubu ku kala ka 1919. Krestendomu i hanile sisupo sa ku ba teñi kwa mulena Jesu Kreste, yena “liseli la lifasi.” (Joani 8:12; Mateu 24:3) Kabakala ku ‘halifa maswe’ kwa Satani, yena muñ’a “malen’a lifasi le, le li lififi,” lilimo za mwanda wa bu 20 ne li ze situhu maswe, ili ze sinya ka ku fitisisa haisali ku simwa. (Sinulo 12:12; Maefese 6:12) Buñata bwa batu ba mwa lififi la kwa moya.

² Nihakulicwalo, liseli la benya kacenu. Jehova u “pazulela” batanga ba hae, bomasiyaleti ba ba tozizwe, bona bayemeli ba fa lifasi-mubu ba “Jerusalema” ya kwa lihalimu. (Isaya 60:1) Sihulu ba sa li ku lukululelwa mwa butanga bwa Babilona ka 1919, ba benyisize kanya ya Mulimu mi ba ‘bonisize batu liseli la bona.’ (Mateu 5:16) Mwahal’a 1919 ni 1931, liseli la Mubuso ne li benyize ka ku ekezeha ha ne ba nze ba ambuka mihupulo ya Sibabilona ifi kamba ifi ye ne ba sa na ni yona. Palo ya bona ne i ekezehile ku fita fa likiti ze mashumi-shumi Jehova ha n’a nz’a taleleza sepiso ya hae ye li: “Ni ka kubukanya masialeti a Isilaele; ni ka ba kopanya hamoho sina lingu ze mwa sakana; sina mutapi o fula mwa mafulisezo, ba ka eza lilata le lituna, kabakala buñata bwa batu.” (Mika 2:12) Ka 1931, kanya ya Jehova fahalimw’a batu ba hae ne i bonahezi hande ha ne ba amuhezi libizo la Lipaki za Jehova.—Isaya 43:10, 12.

3. Ne ku bonahezi cwañi kuli liseli la Jehova ne li ka pazulela ba bañwi kwand’a batoziwa?

³ Kana Jehova n’a ka pazulela fela “mutapinyana” o sa li teñi? (Luka 12:32) Kutokwa. The Watch Tower ya September 1, 1931 ne i bulezi za sikwata se siñwi. Ha ne i talusa hande Ezekiele 9:1-11, ne i bonisize kuli munna ya na ni lunaka lwa muñoli lwa enge ya bulezwi mwa litimana zeo u yemela bomasiyaleti ba ba tozizwe. Ki bomañi ba ba swaiwa fa lipata ki “munna” y’o? Ki “lingu ze ñwi,” ba ba sepile ku pila kamita mwa paradaisi fa lifasi-mubu. (Joani 10:16; Samu 37:29) Ka 1935, ne ku lemuhilwe kuli sikwata seo sa “lingu ze ñwi” ki bona “buñata bo  butuna bwa batu [ba] ba zwa mwa macaba kaufela” ba n’a boni muapositola Joani mwa pono. (Sinulo 7:9-14) Ku kala ka 1935, ku koñomekilwe hahulu za ku kubukanya buñata bo butuna.

4. Ki bomañi “malena” ni “macaba” a bulezwi kwa Isaya 60:3?

⁴ Bupolofita bwa Isaya bu bulezi za musebezi wa ku kubukanya w’o kuli: “Ba macaba ba ka ta kwa liseli la hao, malena ba te kwa mataseli a hao a’ benya.” (Isaya 60:3) “Malena” ba ba bulelwa f’a, ki bomañi? Ki b’a 144,000 ba ba sa li teñi ili bao, hamoho ni Jesu Kreste, ba ka busa hamoho mwa Mubuso wa kwa lihalimu mi ba etelezi musebezi wa ku kutaza. (Maroma 8:17; Sinulo 12:17; 14:1) Kacenu, palo ya bomasiyaleti ba ba tozizwe ye eza likiti ze sikai i fitelwa kwahule ki ya “macaba,” ba ba sepile ku pila fa lifasi-mubu ili ba ba taha ku Jehova ku t’o lutiwa ni ku mema ba bañwi ku t’o lutiwa ni bona.—Isaya 2:3.

Batanga ba Jehova Ba Ba Tukufalezwi

5. (a) Ki lifi litaba ze bonisa kuli tukufalelo ya batu ba Jehova ha i si ka fela? (b) Ki lifi linaha ze n’e na ni likekezeho ze tuna mwa 1999? (Mu bone mukoloko fa makepe 27 ku isa 30.)

⁵ Lipaki za Jehova ba cwale ne ba bonisize tukufalelo ye tuna mwahal’a lilimo kaufela za mwanda wa bu 20! Mi ku si na taba ni matata a ekezeha, tukufalelo ya bona ne i si ka fela silimo sa 2000 ha ne si nze si atumela. Ne ba sa utwa hahulu taelo ya Jesu ye li: “Mu lute macaba kaufela.” (Mateu 28:19, 20) Bahasanyi ba ba tiile ba taba ye nde mwa silimo sa sebelezo sa mafelelezo mwa lilimo za mwanda wa bu 20 ne ba fitile fa palo ye nca ya 5,912,492. Ne ba itusisize lihora ze ñata-ñata ze 1,144,566,849 mwa ku ambola ni ba bañwi ka za Mulimu ni milelo ya hae. Ne ba ezize misipili ya makutisezo ye 420,047,796 kwa batu ba ba tabela ni ku zamaisa lituto za Bibele za fa mandu ze sa lifelwi ze 4,433,884. Yeo luli ki sebelezo ya ka tukufalelo ye nde hahulu!

6. Ki ifi tukiso ye nca ye n’e ezelizwe mapaina, mi ne i amuhezwi cwañi?

⁶ Ñohola mwa January, Sitopa se si Busa ne si zibisize cinceho ya lihora ze tokwahala kwa mapaina. Kabakaleo, ba bañata ne ba iñolisize bupaina bwa kamita kamba bwa ku tusa. Ka mutala, mwahal’a likweli za pili z’e ne mwa 1999, ofisi ya mutai ya Netherlands ne i amuhezi palo ya likupo za bupaina bwa kamita ye fitelela hane ya mwa likweli ze swana ñoholatula. Ghana i biha kuli: “Palo ye nca ya lihora za mapaina i sa li ku tomelwa, se lu sweli ku ba ni mapaina ba kamita ba bañata.” Mwa silimo sa sebelezo sa 1999, palo ya mapaina lifasi kaufela ne i fitile fa 738,343—ili nto ye bonisa hande ku “tukufalelwa misebezi ye minde.”—Tite 2:14.

7. Jehova u fuyauzi cwañi ku mbindana kwa batanga ba hae?

⁷ Kana Jehova u fuyauzi ku mbindana k’o? Ee luli. Ka Isaya u li: “Talima kafa ni kafa, u itemune mi u bone: Kaufela ba kubukana hamoho mi ba taha ku wena bana ba hao ba bashimani ba ba zwa kwahule, ni ba basizana ba ambekilwe fa noka.” (Isaya 60:4) “Bashimani” ni “basizana” ba ba tozizwe ba ba kubukanyizwe ba sa sebeleza Mulimu ka tukufalelo. Mi cwale, lingu ze ñwi za Jesu ba sweli ku kubukanyezwa kwa “bashimani” ni “basizana” ba Jehova ba ba tozizwe mwa linaha ni lioli za mwa liwate ze 234.

“Misebezi Kaufela ye Minde”

8. Lipaki za Jehova ba patehile mwa ‘misebezi ye minde’ ifi?

⁸ Bakreste ba na ni buikalabelo bwa ku kutaza taba ye nde ya Mubuso ni ku tusa ba ba tabela kuli ba be balutiwa. Kono ba ‘talifezi luli misebezi kaufela ye minde.’ (2 Timotea 3:17) Kacwalo, ba babalela ka lilato mabasi a bona, ba amuhela baenyi, ni ku potela bakuli. (1 Timotea 5:8; Maheberu 13:16) Mi baitateli ba patehile mwa misebezi ye cwale ka ku yaha Mandu a Mubuso—mi w’o hape ki musebezi o fa bupaki. Mwa  Togo, muyaho o muñwi ha se u felizwe, ba bahulu ba keleke ye tiile teñi k’o ne ba bata ku ziba libaka Lipaki za Jehova ha ne ba kona ku icahela miyaho hailifo keleke ne i batanga batu ba ku ba yahela! Togo i biha kuli Mandu a Mubuso a mande a’ yahiwa a susueza hahulu batu teñi k’o kuli mane ba bañwi ba lika ku lifela mandu kamba ku a yahela mwa libaka mo ku ka yahiwa Ndu ya Mubuso.

9. Lipaki za Jehova ba ezizeñi ha ku bile ni maziyezi?

⁹ Fokuñwi, musebezi o muñwi o munde wa tokwahalanga. Mwa linaha ze ñata mwahal’a silimo sa sebelezo sa ñohola ne ku na ni maziyezi, mi hañata ba pili ku tusa mwa libaka ze cwalo ne li Lipaki za Jehova. Ka mutala, kalulo ye tuna ya naha ya Honduras ne i sinyizwe ki liñungwa le li bizwa Hurricane Mitch. Kapili-pili, mutai wa toma tutengo twa ka sipundumukela kuli tu talime za ku fa lituso. Lipaki mwa Honduras ni linaha ze ñwi ze ñata ne ba zwisize liapalo, lico, milyani, ni lika ze ñwi za butokwa. Tutengo twa Miyaho ya mwa Silalanda ne  tu itusisize bucaziba bwa tona kwa ku yaha sinca mandu. Hañihañi, mizwale ba luna be ne ba tezwi ki ziyezi yeo ne ba tusizwe ku kutela kwa misebezi ya bona ya kamita. Mwa Ecuador, Lipaki za Jehova ne ba tusizwe ki mizwale ba bona munda o mutuna ha ne u sinyize mandu a mañwi. Mubusi yo muñwi ha s’a iponezi mo ne ba tuselize hande, a li: “Kambe ne ni ka sebelisa batu ba, ne ni ka eza limakazo! Batu ba ba swana sina mina ba swanela ku ba mwa lifasi kaufela.” Misebezi ye minde ye cwalo i tisa tumbo ku Jehova Mulimu mi i bonisa kuli “bulapeli bu tusa mwa linto kamukana.”—1 Timotea 4:8.

Ba “Fufa Sina Lilu”

10. Palo ya batoziwa niha i fela, ki kabakalañi libizo la Jehova ha li zibahazwa hahulu haisali?

¹⁰ Jehova cwale u buza kuli: “Ki bo mañi bani ba ba fufa sina lilu, sina linkwilimba ze y’o lula kwa minyako ya ndu ya zona? Kakuli lioli li ni libelezi, mi lisepe za kwa Tareshishi li zamaya kwapili ku tisa bana ba hao ba ba kwahule . . . Bana ba macaba ba ka yaha sinca makwakwa a hae, mi malen’a bona ba ka ku sebeleza.” (Isaya 60:8-10) Ba pili ku itebuha ku ‘pazulelwa’ ki Jehova ki “bana” ba hae, bona Bakreste ba ba tozizwe. Kihona ku taha “bana ba macaba,” ona buñata bo butuna, ba ba sebeleza mizwale ba bona ba batoziwa ka busepahali, ku latelela ketelelo ya bona mwa ku kutaza taba ye nde. Kacwalo, palo ya batoziwa niha i fela, libizo la Jehova li sweli la zibahazwa hahulu mwa lifasi-mubu kaufela haisali.

11. (a) Ku sa ezahalañi mi ki sifi se si zwile mwateñi ka 1999? (b) Ki lifi linaha ze na ni lipalo ze tuna za be ne ba kolobelizwe ka 1999? (Mu bone mukoloko fa makepe 27 ku isa 30.)

¹¹ Kacwalo, bolule-lule ba taha “sina linkwilimba ze y’o lula kwa minyako ya ndu ya zona,” ku t’o silelezwa mwa puteho ya Sikreste. Ka silimo ku ekezwa ba ba eza likiti-kiti ze mianda, mi munyako u sa kwalulezwi ba ba bañwi ba bañata. Isaya u li: “Minyako ya hao i ka be i kwaluluzwi kamita, ha i na ku kwalwa musihali ni busihu; ilikuli u tisezwe maluwo a ba macaba.” (Isaya 60:11) Ñohola b’a 323,439 ne ba kolobelizwe ili ku bonisa kuli ba ineezi ku Jehova, mi ha si ka kwala kale minyako. “Bufumu bwa macaba kamukana,” ona ba buñata bo butuna, ba sa zwelapili ku kena ku yona. (Hagai 2:7) Ha ku na ya bata ku zwa mwa lififi ya haniwa. (Joani 12:46) Haike ba ba cwalo ba si felelwi ki buitebuho bwa bona kwa liseli!

Bundume Mwahal’a Twaniso

12. Ba ba lata lififi ba likile cwañi ku tima liseli?

¹² Ba ba lata lififi ba toile liseli la Jehova. (Joani 3:19) Ba bañwi mane ba lika ku tima liseli leo. Lu libelela nto yeo. Nihaiba Jesu, yena “Liseli la niti le li bonisa mutu kaufela,” n’a sheunuzwi, ku lwaniswa, mane ni ku bulaiwa ki batu ba sicaba sa habo. (Joani 1:9) Mwa lilimo kaufela za mwanda wa bu 20, Lipaki za Jehova ni bona ba sheunzwi, ku tamiwa, ku kwalelwa, mane ni ku bulaiwa, ha ne ba nze ba benyisa liseli la Jehova ka busepahali. Mwa lilimo za cwanoñu fa, balwanisi ba hasanyize mwa litaba za makande buhata ka za babenyisi ba liseli la Mulimu. Ba bañwi ba bata kuli batu ba lumele kuli Lipaki za Jehova ba lubeta mi ba swanela ku haniswa kamba ku kwalelwa. Kana balwanisi bao ba konile?

13. Ku zwileñi mwa ku bulelela bahasanyi ba makande ka butali ka za musebezi wa luna?

¹³ Ha ba si ka kona. Fo ku swanela, Lipaki za Jehova ne ba bonani ni bahasanyi ba makande ku ba taluseza litaba za niti. Kabakaleo, libizo la Jehova li hasanyizwe hahulu mwa mitende ni limagazini ni fa wayalesi ni televishini. Seo si tisize ze nde mwa musebezi wa ku kutaza. Ka mutala, mwa Denmark, fa TV ya naha ne ku bulelwa taba ye li “Libaka tumelo ya ba mwa Denmark ha i fokola.” Lipaki za Jehova ni ba bulapeli bo buñwi ne ba buzizwe. Hasamulaho, musali yo muñwi ya n’a buhile tukiso yeo a li: “Ne ku iponezwi hande ba ba na ni moya wa Mulimu.” Tuto ya kaliswa ku yena.

14. Ka maswabi, balwanisi ba ka tuha ba hapelezwa ku lemuhañi?

¹⁴ Lipaki za Jehova ba ziba kuli ba bañata ba ka ba lwanisa mwa lifasi le. (Joani 17:14) Kono ba tiiswa ki bupolofita bwa Isaya, bo bu li: “Bana ba banyandisi ba hao ba ka t’o ikokobeza  ku wena; mi bao kaufela ba ba ne ba ku kenda, ba ka inamela kwa lingandi za mautu a hao; mi ba ka ku biza: munzi wa [Muñ’a] Bupilo, Sione wa Ya-Kenile wa Isilaele.” (Isaya 60:14) Ka maswabi, balwanisi ba ka tuha ba lemuha kuli kanti ye ne ba lwanisa ki Mulimu ka sibili. Ki mañi ya kona ku wina ndwa ye cwalo?

15. Lipaki za Jehova ba ‘anya cwañi mabisi a macaba,’ mi seo si bonahezi cwañi mwa musebezi wa bona wa ku luta ni ku kutaza?

¹⁵ Jehova hape u sepisa kuli: “Ni ka ku eza munzi wa bunde bo bu sa feli . . . U ka anya mabisi a macaba, u anye mazwele a malena; u ka ziba kuli Na, [Muñ’a] Bupilo, ki Na Mupilisi . . . wa hao.” (Isaya 60:15, 16) Kaniti, Jehova ki Mupilisi wa batu ba hae. Ha ba itinga ku yena, ba ka ba ni bupilo “bo bu sa feli.” Mi ba ka “anya mabisi a macaba,” ka ku itusisa lituso ze li teñi kuli ba zwisezepili bulapeli bwa niti. Ka mutala, ku itusisa hande likompyuta ni litukiso za ku fitisa ka zona litaba ku tisize kuli Tora ya ku Libelela i hasanyiwe ka nako ye swana mwa lipuo ze 121 ni Awake! mwa lipuo ze 62. Ku na ni tukiso ya fa kompyuta ye lukiselizwe fela ku tusa ku toloka Bibele ya New World Translation mwa lipuo ze ñwi, mi yona toloko yeo i tisa tabo ye tuna. Toloko ya si-Croatia ya Mañolo a Sigerike a Sikreste ha ne i zwisizwe ka 1999, b’a likiti-kiti ne ba lotisize miyoko ya tabo. Muzwale yo muñwi wa musupali n’a ize: “Ni litezi Bibele ye ka nako ye telele. Cwale na kona ku shwa ka kozo!” Libibele ze fitelela 100 milyoni za New World Translation mutumbi kamba kalulo fela ya yona li hasanyizwe mwa lipuo ze 34.

Likuka za Muzamao Ze Pahami

16, 17. (a) Niha ku li t’ata, ki kabakalañi ha ku li kwa butokwa ku latelela likuka za Jehova ze pahami? (b) Ki ifi piho ye bonisa kuli ba banca ba kona ku pima ku silafazwa ki lifasi?

¹⁶ Jesu n’a ize: “Mutu kaufela ya eza se si maswe u toya liseli.” (Joani 3:20) Kono ba ba mwa liseli ba lata likuka ze pahami za Jehova. Jehova, ka Isaya, u li: “Sicaba sa hao ikaba sa ba ba lukile fela.” (Isaya 60:21a) Ku kona ku ba t’ata ku latelela likuka ze lukile mwa lifasi mo ku tezi buhule, buhata, mukwañuli, ni buikuhumusi. Ka mutala, mwa linaha ze ñwi, sifumu si sweli sa ata mi ku bunolo ku yaulukela kwa ku bata maluo. Kono Paulusi n’a lemusize kuli: “Ba ba lata ku fuma ba wela mwa miliko ni mwa malaba, ni mwa litakazo ze ñata ze sa utwahali, ze sinya, ze tibiseza batu mwa ku y’o sinyeha ni ku latehelela.” (1 Timotea 6:9) Ki bumai luli mutu h’a ikenya hahulu mwa lipisinisi kuli mane u tuhela za butokwa luli, ze cwale ka swalisano ya Sikreste, sebelezo ye kenile, likuka za muzamao, ni ku babalela lubasi lwa hae!

 ¹⁷ Ku latelela likuka ze lukile ku kona ku ba t’ata sihulu ku ba banca, kakuli litaka za bona ba bañata ba itusisa maswe milyani ye kola ni ku eza buhule. Mwa Suriname, musizana wa lilimo ze 14 n’a atumezwi ki mushimani y’a buheha fa sikolo mi a mu shemba kuli a lobale ni yena. Musizana a hana, mi a talusa kuli Bibele i hanisa lika ze cwalo ku ba ba si ka nyalana. Basizana ba bañwi fa sikolo seo ba mu seha maswe ni ku lika ku mu hapeleza ku lumela, ba mu bulelela kuli mañi ni mañi n’a lakaza ku lobala ni mushimani y’o. Kono musizana y’o a zwelapili ku hana. Hamulaho wa livikinyana, mushimani y’o a fumanwa ni butuku bwa AIDS mi a kala ku kula hahulu. Musizana y’o n’a tabile kakuli n’a utwile taelo ya Jehova ya ku ‘itima kwa buhule.’ (Likezo 15:28, 29) Lipaki za Jehova ba tabela hahulu ba banca ba ba mwahal’a bona ba ba tiyela ze lukile. Tumelo ya bona, ni ya bashemi ba bona, i ‘lumbekisa’ libizo la Jehova Mulimu.—Isaya 60:21b.

Jehova U File Kekezeho

18. (a) Ki ifi nto ye tuna yeo Jehova a ezelize batu ba hae? (b) Ki sifi se si bonisa kuli palo i ka ekezeha, mi ba ba zwelapili mwa liseli ba na ni sepo ifi ye nde?

¹⁸ Kaniti, Jehova u pazulela batu ba hae, ku ba fuyaula, ku ba etelela, ni ku ba tiisa. Mwa lilimo za mwanda wa bu 20, ne ba boni talelezo ya manzwi a Isaya, a li: “Mutu yo munyinyani u ka fetuha ba ba eza lule, ya nyazeha a be sicaba se si mata. Na [Muñ’a] Bupilo ni ka pakisa ku eza cwalo, mwa nako ya yona.” (Isaya 60:22) Ku kala ka ba sikai fela ka 1919, “mutu yo munyinyani” s’a fitelezi “ba ba eza lule.” Mi mane ba sa ekezeha! Ñohola b’a 14,088,751 ne ba fumanehile kwa mukiti wa Kupuzo ya lifu la Jesu. Ba bañata ku bao ne si Lipaki ba ba tiile. Lu tabile kuli ne ba tile kwa mukiti wa butokwa w’o, mi lu ba kupa ku zwelapili ku sutelela kwa liseli. Jehova u sa pazulela hahulu batu ba hae. Nzila ya kwa kopano ya hae i sa kwaluhile. Kacwalo haike bote ba tundamene ku ba mwa liseli la Jehova. Seo si lu tiseza limbuyoti ze tuna luli cwale! Mi seo si ka tisa tabo kwapili ze bupilwe kaufela ha li ka lumbeka Jehova ni ku tabela bunde bwa kanya ya hae!—Sinulo 5:13, 14.

Kana Mwa Kona ku Talusa?

• Ki bomañi ba ba benyisize kanya ya Jehova mwa mazazi a, a maungulo?

• Ki sifi se si bonisa kuli tukufalelo ya sicaba sa Jehova ha i si ka fela?

• Ki ifi misebezi ye miñwi ye ba patehile ku eza Lipaki za Jehova?

• Ku si na taba ni twaniso ye tuna, lu sepileñi?

[Lipuzo za Tuto]

 [Chati fa likepe 27-30]

PUHO YA MWA SILIMO SA SEBELEZO SA 1999 YA LIPAKI ZA JEHOVA MWA LIFASI KAMUKANA

 (Mu bone muputo o tiile)

[Maswaniso a fa likepe 25]

Batu ba sa kamuhela kwa kopano ya Jehova

[Siswaniso se si fa likepe 32]

Lu tabile kuli Jehova u siile munyako u kwaluhile ku ba ba lata liseli