Ne Ba Tiile

KU TIYA kuli mu kone ku kutaza haki ko ku bunolo kamita. Mane, muapositola Paulusi n’a bulezi kuli nako ye ñwi, n’a kutalize ka “ndwa ye tuna.” (1 Matesalonika 2:2) Kana ku lwana “ndwa” kuli mu kutaze kwa swanela? Haki kuli kipeto ze ka zwa mwateñi ki ze ipitezi, kono batu ba Mulimu ba tabanga kamita kuli ne ba tiile. Ki ye mitala ye miñwi.

Musizana wa lilimo ze 8 ya bizwa Tara n’a teeleza ka tokomelo bo muluti ba hae kwa sikolo ha ne ba bulela kuli mwahal’a Ndwa ya Lifasi ya bubeli, Majuda be ne ba li mwa minganda ya tukufazo ne ba tinanga sisupo sa ñandatalukeke se si bizwa Star of David ili se ne si ba zibahaza. Tara ni yena a bata ku bulela se siñwi. U li, “Se ni lapela inge ni tona.” Cwale a yemisa lizoho la hae ni ku bulela kuli ni Lipaki za Jehova ni bona ne ba li teñi mwa minganda yeo, mi bona ne ba tinanga sisupo sa pulipela. Bo muluti ba hae ba tabela ni ku itumela ku yena. Z’a n’a bulezi Tara zeo ne li tisize kuli a ambolisane hape ni bo muluti ba hae, mi mane hasamulaho se ba bonisa sitopa kaufela vidio ye bizwa Jehovah’s Witnesses Stand Firm Against Nazi Assault.

Mwa Guinea, kwa West Africa, musizana y’a li muhasanyi ya si ka kolobezwa y’a bizwa Irène n’a bata ku eza zwelopili mwa bukombwa bwa hae. Mulumiwa ya n’a ituta Bibele ni yena a mu susueza ku lika ku fanga limagazini za Tora ya ku Libelela ni Awake! ku b’a kena ni bona sikolo. Irène n’a zina-zina kakuli b’a n’a kena ni bona sikolo ne ba sa tabeli. Kono kabakala susuezo ya mulumiwa y’o, Irène a lela ku atumela pili mwan’a sikolo ya n’a bonahala ku lwanisa hahulu. Irène n’a komokile kakuli musizana y’o n’a tabezi ni ku amuhela limagazini ka tabo. Ni bana ba sikolo ba bañwi se ba amuhela limagazini. Irène kweli yeo n’a file limagazini ze ñata ku fita za n’a file mwa likweli ze ketalizoho kwamulaho ha li kopanyiwa hamoho.

Mwa Trinidad, eluda yo muñwi n’a zina-zina ku atumela muzamaisi wa sikolo se siñwi kuli a mu bonise butokwa bwa tuto ye mwa magazini ya Awake! Nihakulicwalo, s’a tiya. U li: “Ha ni kena mwa komboni, se ni lapela. Ne ni komokile hahulu muzamaisi wa sikolo y’o ha n’a tabezi hahulu-hulu.” A amuhela magazini ya Awake! ye bulela kuli “What Hope for Today’s Youths?” (Ba Banca Ba Kacenu Ba Ka Ba Cwañi Kwapili?) mi mane a lumela ku itusisa yona kwa ku luta bana ba sikolo. Ku zwa yona nako yeo, s’a amuhezi limagazini ze 40 ze bulela ka za litaba ze fitana-fitana.

Kwa bwanana, Vaughn n’a fumana t’ata ku kutaza. “Ne ni sabanga, ne ni fufulelwanga kwa mazoho, ni ku bulela ka ku akufa hahulu—ne ni sa koni ku bulela ka ku iketa.” Nihakulicwalo, s’a ba sikombwa sa ka nako ye tezi. Niteñi, n’a sa fumana tat’a kamita ku bulela. Ka zazi le liñwi, ha s’a palezwi ku fumana mubeleko, a bata ku kutaza ku mutu yo muñwi mwa sitimela, “kuli ku be ni ze nde mwa lizazi leo le li maswe.” Kono a saba batu ba lipisinisi be ne ba bonahala ku kutekeha mwa sitimela seo. Kono s’a tiya mi a bulela ni munna muhulu cwana ya n’a inzi bukaufi ni yena. Ba ambolisana nako ye telele. Wa pisinisi y’o a li “Mwanana tuwe u na ni lipuzo ze nde luli,” mi a buza a li, “U muituti wa bupasita nji?” Vaughn a alaba a li, “Batili, ni yo muñwi wa Lipaki za Jehova.” Munna y’o a menya a li: “Ooh, kanti kona libaka.”

Lipaki bao kaufela—ni ba bañwi ba bañata-ñata—ba tabile kuli ne ba tiile kuli ba kutaze. Kana ni mina mu ka eza cwalo?

[Siswaniso se si fa likepe 17]

Tara

[Siswaniso se si fa likepe 17]

Vaughn