Tumelo Ya Kona ku Cinca Bupilo bwa Mina

“MUTU kaniti luli u kona ku ba ni mikwa ye minde a sa itingi ku Mulimu.” Ki mona mwa n’a bulelezi mutu yo muñwi y’a si mulumeli. N’a bulezi kuli n’a hulisize bana ba hae ba na ni mizamao ye minde, mi ni bona ne ba hulisize bana ba bona ba na ni mizamao ye minde cwalo—niha ne ba sa lumeli ku Mulimu kaufel’a bona.

Kana seo si talusa kuli ha lu tokwi ku lumela ku Mulimu? Ku bonahala kuli mutu y’o n’a nahana cwalo. Mi ki niti haki mutu kaufela ya sa lumeli ku Mulimu y’a li mutu ya maswe. Muapositola Paulusi n’a bulezi za “bamacaba” ba ba sa zibi Mulimu kono “ba eza ka sizwalo ze laelwa ki Mulao.” (Maroma 2:14) Kaufel’a luna—mane ni ba ba sa lumeli ku Mulimu—ne lu pepilwe lu na ni lizwalo. Buñata ba likanga ku latelela lizwalo la bona niha ba sa lumeli ku Mulimu ya n’a ba file m’ata ao a ka sipepo a ku ziba bunde ni bumaswe.

Nihakulicwalo, tumelo ye tiile ku Mulimu—ye tomile fa Bibele—i na ni m’ata hahulu a ku ezisa mutu ze nde ku fita ketelelo ya lizwalo inosi. Tumelo ye tomile fa Linzwi la Mulimu, yona Bibele, i luta lizwalo, i li ezisa ku keta hande ze nde ku ze maswe. (Maheberu 5:14) Hape, tumelo i susuezanga batu ku latelela likuka ze pahami ha ba li mwa miliko ye mituna. Ka mutala, mwa lilimo za mwanda wa bu 20, linaha ze ñata ne li busiwa ki milonga ya bupolitiki ye maswe, ye ne hapelelize batu ba bande luli kuli ba eze likezo ze situhu. Kono be ne ba na ni tumelo ya niti ku Mulimu ne ba hanile ku tuhela likuka ze lukile, bupilo bwa bona niha ne bu li mwa lubeta. Hape, tumelo ye tomile fa Bibele i kona ku cinca batu. I kona ku liulula  batu ba ba bonahala ku lateha ni ku tusa batu ku pima mafosisa a matuna. Mu nyakisise mitala i sikai.

Tumelo Ya Kona ku Cinca Bupilo bwa Lubasi

“Ka tumelo ya mina mu konile ku eza nto ye sa konahali.” Ki mona mwa n’a bulelezi muatuli wa kwa England ha n’a file katulo ya hae ka za pabalelo ya bana ba bo John ni Tania. Bo John ni Tania ha ne ba zibilwe ki babusi, ne ba si ka nyalana mi ne ba na ni butata bo butuna mwa lapa. John, ya n’a na ni butata bwa ku itusisa milyani ye kola ni ku caya njuka, n’a ikezize sikebenga kuli a fumane mali a ku ezisa ze maswe zeo. N’a sa isi pilu kwa bana ba hae ni m’a bona. Kacwalo, ki ifi “makazo” ye n’e ezahezi?

Ka zazi le liñwi, John a utwa mwan’a muhabo a sweli ku bulela za Paradaisi. Ka ku bata ku ziba, John a buza bashemi ba mushimani y’o. Bashemi bao ki Lipaki za Jehova, mi se ba tusa John ku ituta ka za Bibele. Hanyinyani-hanyinyani, bo John ni Tania ba ba ni tumelo ye tomile fa Bibele ili ye ne cincize bupilo bwa bona. Ba nyalana ka mulao mi ba tuhela likezo za bona ze maswe. Babusi be ne ba tatubile lubasi lwa bona ba fumana nto ye ne sa bonahali ku konahala nakonyana kwamulaho. Ba fumana lubasi lo lu tabile mwa lapa le li kenile, le ne li li sibaka se si amuheleha mwa ku utela bana. Muatuli y’o n’a nepile ha n’a bulezi kuli “makazo” yeo ne i ezahezi kabakala tumelo ye nca ya bo John ni Tania.

Likilomita ze likiti-kiti ku zwa kwa England, kalibe yo muñwi kwa Near East n’a tuha a eza nto ye maswe ye atile. N’a lela ku felisa linyalo la hae sina mo ba ezezanga bolule-lule ka silimo. N’a na ni mwana, kono munn’a hae ne li yo muhulu hahulu ku yena. Kabakaleo, bahabo ne ba mu susueza ku kauhana ni munn’a hae, mi mane n’a sa kalisize kale ku eza litukiso ze cwalo. Nihakulicwalo, n’a ituta Bibele ni yo muñwi wa Lipaki za Jehova. Paki y’o ha n’a zibile za butata b’o, a talusa ze i bulela Bibele ka za linyalo—ka mutala, i bulela kuli linyalo ki mpo ye zwa ku Mulimu mi haki nto y’a kona ku felisa mutu ka mw’a latela. (Mateu 19:4-6, 9) Musali y’o a nahanisisa a li, ‘Kwa komokisa kuli musali y’o, mutu-tu fela, u lika ku swalisanisa lubasi lwa luna kono bahabona ba bata ku lu shandaula.’ Tumelo ya hae ye nca ne i mu tusize ku bukeleza linyalo la hae.

Nto ye ñwi ye maswe ye atile ili ye ama bupilo bwa lubasi ki ku sulula limba. Piho ya Kopano ya ba Macaba ne i akalelize kuli ka silimo limba ze fitelela 45 milyoni za sululwanga ka bomu. Ku sululwa kaufela kwa mba ki kozi ye tuna. Zibo ya Bibele ne i tusize musali wa kwa Philippines ku sa ekeza kwa palo ya ba ba sulula limba.

Musali y’o n’a atumezwi ki Lipaki za Jehova, a amuhela broshuwa ya tuto ya Bibele ye bizwa Ki Sifi Seo Mulimu A Tokwa ku Luna?, * mi a kala ku ituta Bibele. Ha se ku fitile likweli, a talusa libaka la n’a itutela. Musali y’o n’a itwezi ha n’a potezwi lwa pili ki Lipaki, kono n’a lelisani ni munn’a hae ku sulula mba. Niteñi, siswaniso sa mbututu ye mwa mba se si fa likepe 24 la broshuwa yeo ne si amile hahulu maikuto a musali y’o. Manzwi a’ ñozwi fa likepe leo a’ tomile fa Bibele ili a’ bulela kuli bupilo ki bwa butokwa kakuli ‘liwelu-welu la bupilo li ku Mulimu’ ne a mu susuelize ku pilisa mwan’a hae. (Samu 36:9) Cwale se li m’ahe mbututu ye nde, ye ikanguzi hande.

Tumelo Ya Tusa Ba Ba Kendiwa

Mwa Ethiopia, banna ba babeli be ne ba si ka tina hande ne ba ile kwa mukopano wa Lipaki za Jehova. Kwa mafelelezo a mukopano, Paki yo muñwi a italusa ku bona ka silikani. Banna bao ba kupa tuso. Paki y’o n’a si ka ba fa mali, kono a ba fa nto ye fita mali. A ba susueza ku ba ni tumelo ku Mulimu, ye li “ya butokwa ku fita gauda.” (1 Pitrosi 1:7) Yo muñwi ku bona a utwa mi a kalisa ku ituta Bibele. Seo sa cinca bupilo bwa hae. Tumelo ya hae ha ne i nze i hula, a tuhela ku zuba, butahwa, buhule, ni ku itusisa khat (mulyani o kola). A ituta ku ipilisa ku fita ku n’o kupanga mi cwale u pila bupilo bo bunde, bo bu kolwisa.

 Mwa Italy, munna cwana wa lilimo ze 47 n’a atulezwi lilimo ze lishumi mwa tolongo mi kuta ya mu beya mwa sipatela sa lipulumuki. Yo muñwi wa Lipaki za Jehova y’a lumelelizwe ku n’o fanga tuso ya kwa moya mwa litolongo a ituta Bibele ni yena. Munna y’o a eza zwelopili ka bubebe. Tumelo ya cinca hahulu bupilo bwa hae kuli mane mapantiti ba bañwi cwale ne ba mu kupa kelezo ya mwa ku tatululela butata bwa bona. Kabakala tumelo ya hae ye tomile fa Bibele, a kutekiwa ni ku sepiwa ki bazamaisi ba tolongo.

Mwa lilimo za cwanoñu fa mitende i bihile za lindwa za ku itwanisa kwa bayahi mwa Africa. Taba ya kuli bashimani ba ba sa li banana ba lutiwa ku ba masole ya sabisa luli. Banana bao ba fiwanga milyani ye kola, ku nyandiswa, ni ku hapelezwa ku eza likezo ze situhu ku bahabobona ilikuli ba bonise kuli ba sepahala kwa sikwata se ba lwanela. Kana tumelo ye tomile fa Bibele ki ye tiile hahulu kuli i kone ku cinca bupilo bwa banana ba ba cwalo? Kwa banana ba babeli, ne i konile.

Mwa Liberia, Alex n’a sebezanga ni baprisita mwa Keleke ya Katolika. Kono ha n’a li wa lilimo ze 13, a ikenya mwa sikwata se ne si lwana mi a ba lisole la mwanana ya tumile. Kuli a be ni bundume mwa lindwa, a itusisa buloi. Balikani ba Alex ba bañata ne ba bulailwe, kono yena n’a nza punyuha. Ka 1997 a kopana ni Lipaki za Jehova mi a fumana kuli ne ba sa mu kendi. Kono ba mu tusa ku ituta ze i bulela Bibele ka za mifilifili. Alex a tuhela busole. Tumelo ya hae ha ne i kalile ku hula, a utwa taelo ya Bibele ye li: “A kauhane ni bumaswe mi a eze bunde; a bate kozo, mi a itundamene.”—1 Pitrosi 3:11.

Ka nako ye swana, Samson ya n’a banga lisole la mwanana a fita mwa tolopo mwa n’a pila Alex ka nako yeo. N’a banga muopeli mwa keleke kono ka 1993 a ba lisole mi a kala ku itusisa maswe milyani ye kola, ku lapela milimu, ni ku eza buhule. Ka 1997 a tuheliswa busole. Samson n’a ya kwa Monrovia kuli a yo kena busole bo buñwi mulikan’a hae yo muñwi ha n’a mu susuelize ku ituta Bibele ni Lipaki za Jehova, mi kabakaleo, a ba ni tumelo ye tomile fa Bibele. Seo ne si mu file bundume bwa ku tuhela bulwani bwa hae. Bo Alex ni Samson cwale ba pila ka kozo mi ba na ni mizamao ye minde. Kana ku na ni nto ye ñwi, kwand’a tumelo ye tomile fa Bibele, ye ne ka cinca batu be ne ba sinyehile cwalo?

Tumelo ye Lukile

Yeo ki ye sikai fela kwa mitala ye miñata-ñata ye liteñi ye bonisa m’ata a tumelo ya niti ye tomile fa Bibele. Kono haki mutu kaufela ya ipapata ku lumela ku Mulimu y’a latelela likuka ze pahami za Bibele. Mane, ba bañwi ba ba sa lumeli ku Mulimu ba kana ba pila bupilo bo bunde ku fita ba bañwi ba ba ipiza Bakreste. Libaka kikuli tumelo ye tomile fa Bibele i ama ze ñata isi fela ku ipapata ku lumela ku Mulimu.

Muapositola Paulusi n’a bulezi kuli tumelo ki “ku sepa ka ku tiya ze lu libelezi, ni ku kolwa ze sa bonwi.” (Maheberu 11:1) Kacwalo, tumelo i ama sepo ye tiile—ye tomile fa bupaki tota—mwa lika ze sa bonwi. Sihulu i ama ku sa honona ni hanyinyani kuli Mulimu u teñi, ni kuli w’a lu isa pilu, mi u ka fuyaula ba ba eza tato ya hae. Muapositola y’o hape n’a ize: “Ya taha ku Mulimu u swanezi ku lumela kuli Mulimu u teñi, ni kuli ki Yena ya fa ba ba mu bata mupuzo.”—Maheberu 11:6.

Ki tumelo ye cwalo ye ne cincize bupilo bwa bo John, Tania, ni ba bañwi ba ba bulezwi mwa taba ye. Ne i ba ezisize ku bata ka pilu kaufela ketelelo ya mwa ku ezeza likatulo ye mwa Linzwi la Mulimu, yona Bibele. Ne i ba tusize ku itombola lika ze ñwi ka swalelele kuli ba si ke ba eza ze maswe, niha ne ba li tabela. Niha ne li fapana-fapana, ze ne ezahezi zeo kaufela ne li kalisize ka nzila ye swana. Yo muñwi wa Lipaki za Jehova n’a itutile Bibele ni batu bao, mi se ba iponela buniti bwa ze i bulela Bibele kuli: “Linzwi la Mulimu ki le li pila, mi li na ni mata.” (Maheberu 4:12) M’ata a Linzwi la Mulimu ne a tusize yo muñwi ni yo muñwi ku ba ni tumelo ye tiile ye ne bisize hande bupilo bwa hae.

Lipaki za Jehova ba sebeleza mwa linaha ni lioli za mwa liwate ze fitelela 230. Ba mi susueza ku ba ni tuto ya Bibele. Libaka? Kakuli ba lumela kuli tumelo ye tomile fa Bibele ya kona ku kondolokisa hahulu bupilo bwa mina.

[Litaluso za kwatasi]

[Maswaniso a fa likepe 3]

Tumelo ye tomile fa Bibele i bisanga hande bupilo bwa batu