‘Mulimu, U Lume Liseli la Hao’

“U ni lumele liseli la hao, ni niti ya hao; li ni zamaise.” —SAMU 43:3.

1. Jehova u patulula cwañi milelo ya hae?

JEHOVA u sishemo hahulu ka mw’a zibiseza batanga ba hae milelo ya hae. Ku fita ku patulula niti ka nako i liñwi ka lumonyi lu lu luñwi lwa liseli le li fata, u lu monyehela hanyinyani-hanyinyani. Musipili wa luna mwa nzila ya bupilo u kana wa bapanyiwa ni kasipili ka mutu ya zamaya mwa nzila ye telele. U nanuha ka mapakela mi u bona fela ze nyinyani. Lizazi ha li nze li pazula, mutu y’o u kalisa ku bona lika ze sikai ze fakaufi ni yena. Ze ñwi kaufela h’a li boni hande. Kono lizazi ha li nze li pahama, ze kwahule ni yena li fita fa ku bonahala  hande. Liseli la kwa moya l’a fa Mulimu ni lona li cwalo. U lu konisa ku utwisisa lika ze sikai ka nako ye ñwi ni ye ñwi. Jesu Kreste, Mwan’a Mulimu, n’a file monyehelo ya kwa moya ka nzila ye swana. Ha lu nyakisiseñi m’o Jehova n’a monyehezi batu ba hae kwaikale ni mw’a ba monyehela kacenu.

2. Jehova n’a monyehezi cwañi batu pili ku si ka ba kale Bukreste?

² Mwendi be ne ba ñozi Samu 43 ne li bana ba Kora. Ka ku ba Malivi, ne ba na ni tohonolo ya ku luta batu Mulao wa Mulimu. (Malaki 2:7) Nihakulicwalo, Jehova ne li yena Muluti wa bona ya Pahami, mi ne ba itinga ku yena ka ku ba yena Simbule sa butali kaufela. (Isaya 30:20, NW) Walisamu n’a lapezi kuli: “Mulimu, . . . u ni lumele liseli la hao, ni niti ya hao; li ni zamaise.” (Samu 43:1, 3) Maisilaele ha ne ba sepahala ku yena, Jehova n’a ba luta linzila za hae. Hamulaho wa lilimo ze mianda-nda, Jehova n’a ba file liseli ni niti ze ipitezi. Mulimu n’a ezize cwalo ha n’a lumile Mwan’a hae kuli a tahe fa lifasi-mubu.

3. Lituto za Jesu ne li li tiko cwañi kwa Majuda?

³ Jesu Kreste, ka ku ba yena Mwan’a Mulimu, n’e li yena “liseli la lifasi.” (Joani 8:12) N’a lutile batu “ze ñata ka linguli”—n’a ba lutile litaba ze nca. (Mareka 4:2) N’a bulelezi Ponse Pilato kuli: “Mubuso wa ka hasi wa lifasi le.” (Joani 18:36) Yeo ne li nto ye nca ku Muroma y’o, mane ni kwa Majuda be ne ba itata ka sicaba, kakuli ne ba nahana kuli Mesiya n’a ka kokobeza Mubuso wa Maroma ni ku kutiseza Isilaele m’ata a yona a kwaikale. Jesu n’a benyisa liseli la Jehova, kono za n’a bulezi ne li si ka tabisa babusi ba Majuda, be ne “ba lata ku bubekwa ki batu, ku fita ku bubekwa ki Mulimu.” (Joani 12:42, 43) Buñata bwa batu ne ba iketezi ku kumalela lizo za bona za butu ku fita ku amuhela liseli la kwa moya ni niti ya Mulimu.—Samu 43:3; Mateu 13:15.

4. Lu ziba cwañi kuli kutwisiso ya balutiwa ba Jesu ne i ka zwelapili ku ekezeha?

⁴ Nihakulicwalo, banna ni basali ba bañwi ba ba sepahala ne ba amuhezi ka tabo niti ya n’a luta Jesu. Ne ba nze ba zwelapili kamita ku utwisisa milelo ya Mulimu. Kono bupilo bwa fa lifasi-mubu bwa Muluti wa bona ha ne bu bat’o fela, ne ba sa na ni ze ñata za ku ituta. Jesu n’a ba bulelezi kuli: “Ni sa na ni ze ñata za ku mi bulelela; kono ha mu koni ku li utwisisa cwale.” (Joani 16:12) Ee, balutiwa ne ba ka zwelapili ku ekeza kwa kutwisiso ya bona ya niti ya Mulimu.

Liseli Li Zwelapili ku Benya

5. Ki ifi puzo ye ne zuhile mwa lilimo za mwanda wa pili, mi ki bomañi be ne ba na ni buikalabelo bwa ku i alaba?

⁵ Hamulaho wa lifu ni zuho ya Jesu, liseli la Mulimu ne li benyize hahulu ku fita haisali. Mwa pono ye n’e filwe Pitrosi, Jehova n’a patuluzi kuli Balicaba ba ba si ka ya kwa mupato ku kala ka yona nako yeo ne ba kona ku ba balateleli ba Kreste. (Likezo 10:9-17) Yeo ne li nto ye nca! Nihakulicwalo, hamulaho ne ku zuhile puzo ye li: Kana Jehova n’a tokwa kuli Balicaba bao ba ye kwa mupato ha se ba bile Bakreste? Puzo yeo ne i si ka alabiwa mwa pono, mi Bakreste ne ba pihile kañi ye tuna mwahal’a bona kabakala taba yeo. Taba yeo ne i na ni ku tatululwa, hakusicwalo ne ba ka latehelwa ki buñwi bwa bona bwa butokwa. Kacwalo mwa Jerusalema, “baapositola ni ba bahulu ba kopana ku tatuba taba yeo.”—Likezo 15:1, 2, 6.

6. Ki ufi muezezo o ne ba latelezi baapositola ni ba bahulu ha ne ba nyakisisa taba ya za mupato?

⁶ Be ne ba li fa mukopano w’o ne ba ka ziba cwañi tato ya Mulimu ka za Balicaba ba balumeli? Jehova n’a si ka luma lingeloi kuli li zamaise lipuhisano zeo, mi hape n’a si ka fa pono ye ñwi ku be ne ba li teñi. Nihakulicwalo, baapositola ni ba bahulu ne ba na ni ketelelo ye ñwi. Ne ba nyakisisize bupaki bwa Bakreste ba bañwi ba Majuda be ne ba boni m’o Mulimu n’a kaliselize ku ezeza batu ba macaba, ili ku sululela moya wa hae fahalimw’a Balicaba ba ba si ka ya kwa mupato. Hape ne ba tatubisisize Mañolo kuli a ba etelele. Kabakaleo, mulutiwa Jakobo a fa katulo ye tomile fa liñolo le li monyehela fa taba. Ha ne ba nze ba  nyakisisa bupaki, tato ya Mulimu se i zibahala. Ba macaba ne ba sa tokwi ku ya kwa mupato kuli ba amuhelwe ki Jehova. Baapositola ni ba bahulu honaf’o fela ba ñola katulo ya bona ilikuli Bakreste ba bañwi ba kone ku etelelwa ki yona.—Likezo 15:12-29; 16:4.

7. Bakreste ba mwa lilimo za mwanda wa pili ne ba zwelapili ka mukwa ufi?

⁷ Ka ku fapana ni ba bahulu ba bulapeli bwa Sijuda be ne ba kumalezi lizo za bokukw’a bona, buñata bwa Bakreste ba Majuda ne ba tabile ha ne ba filwe kutwisiso ye nca ye ipitezi yeo ya mulelo wa Mulimu ka za batu ba macaba. Ne ba ezize cwalo nihaike kuli ku i amuhela ne ku tokwa kuli ba cince mubonelo wa bona ka za Balicaba. Jehova n’a fuyauzi moya wa bona wa buikokobezo, mi “likeleke ne li tiiseza mwa tumelo; mi balumeli ne ba ekezeha ka zazi ni zazi.”—Likezo 15:31; 16:5.

8. (a) Lu ziba cwañi kuli liseli le liñwi ne li ka libelelwa hamulaho wa lilimo za mwanda wa pili? (b) Lu ka nyakisisa lipuzo lifi ze swanela?

⁸ Liseli la kwa moya ne li zwezipili ku benya mwahal’a lilimo kaufela za mwanda wa pili. Kono Jehova n’a si ka patulula milelo ya hae kaufela kwa Bakreste ba kwa makalelo. Muapositola Paulusi n’a bulelezi balumeli ba bañwi ba mwa lilimo za mwanda wa pili kuli: “Ka nako ye, lu bona ka siiponi, mwa simbwi.” (1 Makorinte 13:12) Siiponi seo ne si sa koni ku bonisa lika hande hahulu. Kacwalo kwa makalelo, kutwisiso ya liseli la kwa moya neikaba ye nyinyani. Baapositola ha se ba shwile, liseli ne li undile nakonyana, kono mwa miteñi ye, zibo ya Mañolo i ekezehile. (Daniele 12:4) Jehova u monyehela cwañi batu ba hae kacenu? Mi lu swanela ku ikutwa cwañi h’a ekeza kwa kutwisiso ya luna ya Mañolo?

Liseli La Ekezeha Hanyinyani-Hanyinyani

9. Ki ufi muitutelo wa Bibele o ipitezi ili o buanyu o ne ba itusisize Baituti ba Bibele ba makalelo?

⁹ Mwa miteñi ye, liselinyana la luli ne li kalile ku bonahala kwa mafelelezo a lilimo za mwanda wa bu 19. Ka yona nako yeo, sikwata sa banna ni basali ba Bakreste ne ba kalile ku ituta Mañolo ka tukufalelo. Ne ba lukisize muitutelo wa Bibele o tusa. Yo muñwi n’a buza puzo; mi cwale sikwata mutumbi ne si tatubisisa Mañolo kaufela a’ ama taba yeo. Timana ye ñwi ya Bibele ha ne i bonahala ku lwanisana ni ye ñwi, Bakreste ba niti bao ne ba likanga ka t’ata ku nyalanisa litimana zeo. Ka ku fapana ni ba bahulu ba bulapeli ba mwa miteñi yeo, Baituti ba Bibele (ka mo ne ba zibahalela Lipaki za Jehova  mwa linako zeo) ne ba ikatulezi ku tuhelela Mañolo a Kenile ku ba etelela, isi lizo kamba lituto za batu. Ha se ba nyakisisize bupaki kaufela bo bu mwa Mañolo, ne ba ñolanga likatulo ze ba fitile ku zona. Ka nzila yeo, ne ba konile ku utwisisa hande lituto ze ñata za Bibele za matatekelo.

10. Ki lifi libuka ze tusa ze tomile fa Bibele za n’a ñozi Charles Taze Russell?

¹⁰ Mwahal’a Baituti ba Bibele, ya n’a zibahala hahulu ki Charles Taze Russell. N’a ñozi libuka ze silezi za ka ku tatamana ze tomile fa Bibele ze bizwa Studies in the Scriptures. Muzwale Russell n’a bata ku ñola volyumu ya busupa, ye n’e ka talusa libuka za Bibele za Ezekiele ni Sinulo. N’a ize: “Ha ni ka fumana kutwisiso, ni ka ñola Volyumu ya Busupa.” Kona hape a li: “Haiba Mulena a fa kutwisiso ku yo muñwi, wa kona ku i ñola.”

11. Nako i ama cwañi kutwisiso ya luna ya milelo ya Mulimu?

¹¹ Za n’a bulezi C. T. Russell zeo li bonisa sisupo sa butokwa ka za mo lu konela ku utwisisa likalulo ze ñwi za Bibele—sisupo seo ki nako. Muzwale Russell n’a ziba kuli n’a sa koni ku hapeleza liseli ku monyehela fa buka ya Sinulo sina mutu ya bata ku zamaya musipili mw’a sa koneli ku kukueza lizazi ku pazula pili nako ya lona i si ka fita kale.

Ku Patuluha—Kono ka Nako ya Mulimu

12. (a) Bupolofita bwa Bibele bu utwisiswa hande lili? (b) Ki ufi mutala o bonisa kuli ku kona ku utwisisa bupolofita bwa Bibele ku itingile fa nako ya tomile Mulimu? (Mu bone litaluso za kwatasi.)

¹² Baapositola ne ba utwisisize bupolofita bo buñata ka za Mesiya hamulaho wa lifu ni zuho ya Jesu. Ni Bakreste kacenu ba utwisisa ka ku tala bupolofita bwa Bibele ha se bu talelelizwe. (Luka 24:15, 27; Likezo 1:15-21; 4:26, 27) Sinulo ki buka ya bupolofita, kacwalo lu swanela ku libelela ku i utwisisa hande muta ze i bulela li ezahala. Ka mutala, C. T. Russell n’a si ke a utwisisa hande taluso ya sibatana se si fubelu sa swanisezo se si bulezwi kwa Sinulo 17:9-11, kakuli likopano ze si swaniseza sibatana seo, ona kopano ya League ni Kopano ya ba Macaba, ne li siyo. Ne li tomilwe hamulaho wa lifu la hae. *

13. Fokuñwi ki sifi se si ezahalanga liseli ha li monyehezi fa taba ye ñwi ya Bibele?

¹³ Bakreste ba kwa makalelo ha ne ba zibile kuli Balicaba ba ba si ka ya kwa mupato ni bona ne ba kona ku ba balumeli, cinceho yeo ne i tahisize puzo ka za haiba batu ba macaba ne ba tokwa ku ya kwa mupato. Seo ne si tisize kuli baapositola ni ba bahulu ba tatubisise hape taba mutumbi ya za mupato. Muezezo o swana wa latelelwa kacenu. Lumonyi lwa liseli lo lu monyehela fa taba ye ñwi ya Bibele fokuñwi lu tahisanga kuli batanga ba Mulimu ba ba tozizwe, yena “mutanga ya sepahala, ya na ni kutwisiso,” ba tatubisise sinca lituto ze zamaelela ni yona. Mutala wa cwanoñu fa o’ latelela u bonisa seo.—Mateu 24:45.

14-16. Cinceho ya mubonelo wa luna ka za tempele ya kwa moya ne i amile cwañi kutwisiso ya luna ya Ezekiele likauhanyo 40 ku isa 48?

¹⁴ Ka 1971, taluso ya bupolofita bwa Ezekiele ne i hasanyizwe mwa buka ye bizwa “The Nations Shall Know That I Am Jehovah”—How? Kauhanyo ye ñwi ya buka yeo ne i bulezi hanyinyani ka za pono ya Ezekiele ya za tempele. (Ezekiele, likauhanyo 40-48) Ka nako yeo, ne ku bulelwa za m’o pono ya Ezekiele ya za tempele ne i ka talelezwa mwa lifasi le linca.—2 Pitrosi 3:13.

¹⁵ Niteñi, litaba ze peli ze n’e hasanyizwe mwa The Watchtower ya December 1, 1972, ne li amile kutwisiso ya luna ya pono ya Ezekiele. Ne li bulezi za tempele ye tuna ya kwa moya ye talusizwe ki muapositola Paulusi kwa Maheberu kauhanyo 10. The Watchtower yeo ne i  talusize kuli sibaka se si Kenile ni lapa la mwahali la tempele ya kwa moya li talusa muinelo wa batoziwa ha ba sa li fa lifasi-mubu. Muta Ezekiele likauhanyo 40 ku isa 48 ne li nyakisisizwe sinca hamulaho wa lilimo-limo, ne ku lemuhilwe kuli sina tempele ya kwa moya ha i li teñi kacenu, tempele ya n’a boni Ezekiele mwa pono ni yona i lukela ku ba teñi kacenu. Ka mukwa ufi?

¹⁶ Mwa pono ya Ezekiele, baprisita ba bonwa ba zamaya-zamaya mwa malapa a tempele ba nze ba sebeleza masika a si a buprisita. Bona baprisita bao ba swaniseza “buprisita bwa silena,” bona batanga ba Jehova ba ba tozizwe. (1 Pitrosi 2:9) Nihakulicwalo, ha ba na ku sebeleza mwa lapa la tempele la fa lifasi-mubu mwahal’a nako kaufela ya Lilimo ze Sikiti za Puso ya Kreste. (Sinulo 20:4) Mwahal’a buñata bwa nako yeo, kamba mane kaufel’a yona, batoziwa ba ka sebeleza Mulimu mwa Sibaka se si Kenile Hahulu sa tempele ya kwa moya, lona “lihalimu luli.” (Maheberu 9:24) Bakeñisa kuli baprisita ba bonwa ba nze ba kena ni ku zwa mwa malapa a tempele ya Ezekiele, pono yeo i lukela ku ba ye sweli ku talelezwa kacenu, batoziwa ba bañwi ha ba sa li fa lifasi-mubu. Ka ku lumelelana ni seo, musulo wa March 1, 1999 wa magazini ye ne u bonisize kutwisiso ye nca ya taba ye. Kacwalo, ku t’o fita mane kwa mafelelezo a lilimo za mwanda wa bu 20, liseli la kwa moya ne li monyehela bupolofita bwa Ezekiele.

Mu Late ku Cinca Mubonelo wa Mina

17. Ki lifi licinceho ze mu ezize ka butu ku zwa fo mu fumanezi zibo ya niti, mi li mi tusize cwañi?

¹⁷ Mañi ni mañi ya lakaza ku ziba niti u lukela ku lata ku “tama mihupulo kaufela, kuli i ipeye ku utwa Kreste.” (2 Makorinte 10:5) Nto yeo haki ye bunolo kamita, sihulu haiba mibonelo i tibisize mibisi mwa pilu. Ka mutala, pili mu si ka ituta kale niti ya Mulimu, mwendi ne mu ikolanga mikiti ye miñwi ya bulapeli hamoho ni lubasi lwa mina. Ha se mu kalile ku ituta Bibele, mwa lemuha kuli mikiti yeo luli i simuluzwi ki bahedeni. Pili mwendi ne mu kata-katile ku sebelisa ze ne mu ituta. Kono lilato la mina ku Mulimu ne li le lituna ku fita mihupulo ya bulapeli, mi kwa mafelelezo se mu tuhela ku ezanga mikiti ye sa tabisi Mulimu. Kana Jehova ha si ka fuyaula katulo ya mina?—Mu bapanye Maheberu 11:25.

18. Lu swanela ku eza cwañi muta kutwisiso ya luna ya niti ya Bibele i cinciwa?

¹⁸ Lwa tusehanga kamita ha lu eza lika ka mw’a latela Mulimu. (Isaya 48:17, 18) Kacwalo kutwisiso ya luna ka za taba ye ñwi ya Bibele ha i cinciwa, lu tabele niti yeo ye ekezehile! Ka niti, ku zwelapili ku monyehelwa ku bonisa kuli lu mwa nzila ye lukile. Nzila yeo ki “nzila ya ba ba lukile,” ye “swana sina liseli la lizazi, le li ya li ekezeha, mane ku y’o fita fa musihali o mutuna.” (Liproverbia 4:18) Ki niti kuli ka nako ya cwale likalulo ze ñwi za mulelo wa Mulimu lu li bona “mwa simbwi.” Kono nako ya tomile Mulimu ha i ka fita, lu ka bona niti kaufel’a yona, ibile fela mahutu a luna a tiyela mwa “nzila.” Ka nako ya cwale, lu tabele liniti za utwahalize Jehova, lu nze lu libelezi ku monyehelwa ku ze ñwi ze lu sa utwisisi hande.

19. Ki ifi nzila ye ñwi ya ku bonisa ka yona kuli lwa lata niti?

¹⁹ Lu kona ku bonisa cwañi luli kuli lu lata liseli? Nzila ye ñwi ki ka ku bala Linzwi la Mulimu kamita—ha ku konahala, ka zazi ni zazi. Kana mwa latelela tomahanyo ya kamita ya ku  bala Bibele? Tora ya ku Libelela ni Awake! ni zona li lu kapweka lico za kwa moya ze nde. Hape mu nahane libuka, libroshuwa, ni lihatiso ze ñwi ze lukiselizwe ku lu tusa. Mu nahane hape lipiho ze susueza za misebezi ya ku kutaza Mubuso ze hasanyiwa mwa Yearbook of Jehovah’s Witnesses.

20. Liseli ni niti ya Jehova li zamaelela cwañi ni ku fumaneha kwa mikopano ya Sikreste?

²⁰ Ee luli, Jehova u alabile ka makazo tapelo ye ñozwi kwa Samu 43:3. Kwa mafelelezo a timana yeo, lu bala kuli: “[Liseli ni niti ya hao] li zibe ku ni tiseza fa lilundu la hao le li kenile, mwa Ndu ya hao.” Kana mu lata ku lapela Jehova, hamoho ni ba bañwi ba bañata-ñata? Tuto ya kwa moya ye fiwa kwa mikopano ya luna ki nzila ya butokwa yeo Jehova a lu monyehela ka yona kacenu. Lu kona ku ezañi kuli lu tungise buitebuho bwa luna kwa mikopano ya Sikreste? Lu mi mema ku nyakisisa hahulu nto yeo mwa taba ye tatama.

[Litaluso za kwatasi]

Kana Mwa Kona ku Alaba?

• Ki kabakalañi Jehova ha patululanga milelo ya hae hanyinyani-hanyinyani?

• Baapositola ni ba bahulu mwa Jerusalema ne ba tatuluzi cwañi taba ya za mupato?

• Baituti ba Bibele ba kwa makalelo ne ba itusisize muitutelo ufi wa Bibele, mi ki kabakalañi ha ne u li o ipitezi?

• Mu fe mutala wa ka m’o liseli la kwa moya li monyehelwa ka nako ya tomile Mulimu.

[Lipuzo za Tuto]

[Siswaniso se si fa likepe 10]

Charles Taze Russell n’a zibile kuli liseli ne li ka monyehela fa buka ya Sinulo ka nako ya tomile Mulimu