Lu Ba Ba Tiiseza mwa Tumelo

Ku Shaela Taba ye Nde mwa Taiwan mo ku Limiwa Laisi

TAIWAN hañata i banga ni pula ye ñata, ye konahalisanga kuli ku be ni kutulo ye nde ya laisi habeli ka silimo. Kono fokuñwi, pula ha i tahangi ka nako ye swanela, mi licalo za shwanga. Kana mulimi wa itulelanga ku lima ha ku ezahala cwalo? Kutokwa. Wa ziba kuli ku tokwahala tundamo. Wa cala licalo ze nca ni ku calulula masimu. Mi haiba miinelo i ba hande, mulimi u ba ni kutulo ye nde. Ku cala ni ku kutula kwa kwa moya ni kona fokuñwi ku ba nga hahulu cwalo.

Ku Tundamena mwa Kutulo ya kwa Moya

Mwahal’a lilimo ze fitile, Lipaki za Jehova mwa Taiwan ba sebelize ka t’ata mwa ku cala ni ku kutula peu ya niti ya ka Mañolo mwa libaka ze ñwi ze n’e bonahala kuli ha ku na ze li ka tahisa. Mutala wa sibaka se si cwalo ki Silalo sa Miao-li. Buikatazo bwa ku kutaza ka linako ze ñwi mwa sibaka seo ne bu si ka peta ze ñata. Kacwalo ka 1973, bosinyalana be ne ba li mapaina ba ba ipitezi ne ba lumilwe ku yo sebeleza teñi ka ku ba bashaeli ba Mubuso ba ka nako ye tezi. Kwa makalelo ba bañwi ne ba bonisize ku tabela taba ye nde. Kono hamulahonyana cisehelo yeo ya fela. Mapaina ba ba ipitezi bao ne ba lumezwi kwa sibaka si sili.

Ka 1991, mapaina ba bañwi ba ba ipitezi ne ba lumezwi ku sona sibaka seo. Kono hape ze n’e ezahezi ne li bonisize kuli kulo ya kwa moya ne i sa konahali teñi. Hamulaho wa lilimonyana, mapaina ba ba ipitezi bao ne ba lumezwi kwa sibaka se ne si bonahala kuli mwendi ne si ka tahisa se siñwi. Kacwalo kwa fita nako sibaka se ne ba zwile ku sona si sa sebelezwi.

Buikatazo bo Bunca Bu Tahisa Se Siñwi

Ka September 1998, ne ku atuzwi kuli ku eziwe buikatazo bwa ku fumana libaka mo ku kona ku zwa se siñwi mwa kalulo ye tuna ya simu ya mwa Taiwan ye n’e sa sebelezwi. Nto yeo ne i ka petiwa cwañi? Ka ku luma mapaina ba ba ipitezi b’a 40 ku yo sebeleza ka nako ye kuswani mwa libaka ze sa sebelezwi mo ku na ni batu ba bañata.

Minzi ye mibeli ye ngungani ya Silalo sa Miao-li ne li ye miñwi ya libaka ze n’e ketilwe ku sebelezwa teñi. Likaizeli ba ba si ka nyalwa ba bane ne ba ka sebeleza teñi ka likweli ze talu kuli ba bone se ne si ka ezahala. Hamulahonyana ku zwa fo ne ba fitezi, ba ñola lipiho ze tabisa hahulu ka za palo ya batu ba ba tabela be ne ba sweli ku fumana. Ka nako ye ne ba feza ku eza bupaina bwa bona bwa likweli ze talu mwa sibaka seo, ne ba zamaisa lituto za Bibele za fa mandu ze ñata. Hape ka tuso ya eluda wa mwa puteho ye n’e li bukaufi, ne ba tomile sikwata sa tuto ya buka.

Ba balalu ku bona likaizeli bao ne ba zibahalize hande kuli ne ba bata ku zwelapili ku babalela zona “licalo” ze n’e hula hande zeo. Kacwalo, ba babeli ku bona ne ba ketilwe ku inelela teñi k’o ni ku ba mapaina ba ba ipitezi, mi wa bulalu yena a zwelapili ku ba paina wa kamita teñi k’o. Eluda wa mwa puteho ye fakaufi a tutela mwa sibaka seo kuli a to ba tusa. Batu ba ba fitelela 60 ne ba fumanehile kwa ngambolo ya nyangela ya pili ye kile ya fiwa mwa sibaka seo. Cwale puteho ye fakaufi i sweli ku tusa sona sikwata se sinca seo mwa ku eza mikopano ya kamita la Sunda kwand’a lituto za buka li sikai ze si ba nga ni zona. Mwendi honafa puteho ye nca i ka tomiwa mwa sibaka seo.

 Tundamo I Tahisa Limbuyoti mwa Likalulo ze Ñwi za Taiwan

Ni mwa likalulo ze ñwi ne ku bile cwalo. Mwa Silalo sa I-lan se si kwa mutulo-upa wa sioli sa Taiwan, ne ku tomilwe Tuto ya Buka ya Puteho ye nca mwa sibaka mo ne ba til’o sebeleza mapaina ba ba ipitezi ka nako ye kuswani.

Manzibwana a mañwi, paina ya ipitezi ya n’a iz’o sebeza ka nako ye kuswani ha n’a nze a kutaza fa ndu ni ndu, a katana mutangana yo muñwi, mi a mu bonisa kapampili ka ka bonisa mikopano ya puteho. Honafo mutangana a buza a li: “Kana na kona ku taha kwa mikopano kamuso manzibwana? Haiba na kona, ni apale liapalo ze cwañi?” Paina y’o a kala ku zamaisa lituto za Bibele ze 8 ka viki ni viki kwa batu ba ba tabela. Ku si ka fita nako, baituti ba Bibele b’a sikai ne se ba kalile ku eza litukiso za ku ba bahasanyi ba taba ye nde, ka mulelo wa ku kolobezwa.

Mutu yo muñwi mwa tolopo ye swana ka lilimo-limo n’a ya nga kwa keleke kono n’a sa koni ku fumana mutu wa ku mu luta Bibele. Ha n’a utwile ka za tukiso ya ku ituta Bibele, a shiukela kolo yeo. N’a susuelizwe ku itukiseza tuto ya hae. Paina ya ipitezi ya n’a sebeza ka nako ye kuswani ha n’a tile ku to zamaisa tuto, a to fumana kuli musali y’o u ezize “musebezi” wa hae. Musali y’o n’a lekile bukanyana mw’a n’a ñozi lipuzo ze ñozwi mwa taba ya n’a lukela ku to ituta. Mi hape n’a ñozi likalabo kwa lipuzo kaufela. Mona mwa buka m’o hape n’a ñozi mwateñi mañolo kaufela a n’a bonisizwe mwa buka. Kaizeli fa n’a iz’o tela kuli a to zamaisa tuto ya pili, musali y’o na s’a itukiselize lituto ze talu za pili!

Ne ku ezahezi ze swana mwa tolopo ya Dongshih ye fahal’a Taiwan. Mwa likweli ze talu ze ne ba iz’o sebeleza teñi, mapaina ba ba ipitezi be ne ba yo sebeza ka nako ye kuswani ne ba hasanyize mabroshuwa a fitelela 2,000. Mwa kweli ya bulalu, ne ba zamaisa lituto za Bibele za fa mandu ze 16. Tolopo yeo ne i sinyizwe hahulu ki zikinyeho ye n’e ezahezi fahal’a Taiwan la September 21, 1999, kono ba bañwi ba ba tabela ba sa zwelapili ku eza zwelopili, nihaike kuli, kuli ba yo fumaneha kwa mikopano kwa Ndu ya Mubuso ye fakaufi ka ku fitisisa, ba na ni ku zamaya musipili o tanda hora. Ee, kuli ku be ni kutulo ye nde, ibe kutulo ya lico kamba ya kwa moya, ku tokwahala tundamo.

[Mapa ye fa likepe 8]

(Kuli mu bone mo i hatiselizwe luli, mu bone hatiso)

CHINA

Taiwan Strait

TAIWAN

[Manzwi a bañi ba siswaniso]

Mountain High Maps® Copyright © 1997 Digital Wisdom, Inc.