Mubuso Wa Mulimu—Puso ye Nca ya Lifasi-Mubu

“Mubuso wo, u ka ketula ni ku feza mibuso kaufela; kono ona u ka ba teñi kamita ni ku ya ku ile.”—DANIELE 2:44.

1. Lu kona ku kolwañi ka za Bibele?

LITABA ze mwa Bibele ki zeo Mulimu a patululezi batu. Muapositola Paulusi n’a ñozi kuli: “Nako ye mu amuhezi Linzwi la Mulimu le mu utwile ku luna, mu li amuhezi isi sina linzwi la mutu, kono sina Linzwi la Mulimu.” (1 Matesalonika 2:13) Mwa Bibele ku na ni ze lu tokwa ku ziba ka za Mulimu: litaba ze ama butu bwa hae, milelo ya hae, ni zeo a tokwa ku luna. I na ni likelezo ze nde ka ku fitisisa ka za bupilo bwa mabasi ni mizamao ya ka zazi. I na ni bupolofita bo ne bu talelelizwe kale, bo bu talelezwa cwale, ni bo bu ka talelezwa kwapili. Kaniti, “liñolo kamukana li tahile ka Moya wa Mulimu, mi li na ni tuso kwa ku luta, ni ku kolisa, ni ku nyaza, ni ku hulisa ka ku luka; kuli mutu wa Mulimu a petahale mi a talifele luli misebezi kaufela ye minde.”—2 Timotea 3:16, 17.

2. Jesu n’a koñomekile cwañi makanatelo a Bibele?

² Sa butokwa ka ku fitisisa mwa Bibele ki makanatelo a yona: ku boniswa kwa tukelo ya bubusi bwa Mulimu ka Mubuso wa hae wa kwa lihalimu. Jesu n’a bisize yona taba yeo makanatelo a bukombwa bwa hae. “Jesu a kala ku luta batu a li: Mu bake kakuli mubuso wa kwa lihalimu u sutelezi fakaufi.” (Mateu 4:17) N’a bonisize kuli lu swanela ku u’nga ka butokwa bufi mwa bupilo bwa luna, ka ku susueza kuli: “Mu bate pili mubuso wa Mulimu ni Ku Luka kwa Hae.” (Mateu 6:33) Hape n’a bonisize butokwa bwa ona ka ku luta balateleli ba hae ku lapela ku Mulimu kuli: “Ku tahe mubuso wa hao; se si  latwa ki Wena si ezwe mwa lifasi, mo si ezezwa kwa lihalimu.”—Mateu 6:10.

Puso ye Nca ya Lifasi-Mubu

3. Ki kabakalañi Mubuso wa Mulimu ha u li wa butokwa hahulu ku luna?

³ Ki kabakalañi Mubuso wa Mulimu ha u li wa butokwa hahulu cwalo kwa batu? Kakuli u ka tuha u eza kezo ye ka cinceleza puso ya lifasi-mubu le. Bupolofita bo bu kwa Daniele 2:44 bu li: “Mwa mazazi a malena ao [a’ busa lifasi cwale], Mulimu wa mwa lihalimu u ka tahisa mubuso [mulonga wa kwa lihalimu] o si na ku sinyeha ku ya ku ile; mi bulena bwa ona ha bu na ku shimbulukela kwa sicaba si sili. Mubuso wo, u ka ketula ni ku feza mibuso kaufela [milonga ya fa lifasi-mubu]; kono ona u ka ba teñi kamita ni ku ya ku ile.” Mubuso wa Mulimu wa kwa lihalimu ha u ka busa ka ku tala, batu ha ba sa na ku zamaisa lifasi ni kamuta. Puso ya batu ye tisa lifapahano ili ye sa ba kwanisezi hande ha i sa na ku ba teñi hape.

4, 5. (a) Ki kabakalañi Jesu ha li yena ya fitile hande ka ku fitisisa fa ku kona ku ba Mulena wa Mubuso? (b) Ki musebezi mañi wa ka ba ni ona Jesu kwapilinyana?

⁴ Mubusi yo Mutuna mwa Mubuso wa kwa lihalimu, yena Kreste Jesu, ya etelelwa ki Jehova ka sibili, ki ya kona ka ku fitisisa. Pili a si ka taha kale fa lifasi-mubu, n’a pilile kwa lihalimu ‘inze a sebeleza’ Mulimu, ka ku ba yena sibupiwa sa pili sa Mulimu. (Liproverbia 8:22-31) “Jesu ki siswaniso sa Mulimu Ya sa bonwi, mweli ku ze bupilwe kamukana. Kakuli linto kamukana li ezizwe ka yena, ze kwa lihalimu, ni ze mwa lifasi.” (Makolose 1:15, 16) Mi Jesu ha n’a lumilwe ki Mulimu fa lifasi-mubu, n’a ezize tato ya Mulimu ka linako kaufela. N’a tiyezi tiko ye t’ata ka ku fitisisa mi a shwa a nze a sepahala ku Ndat’ahe.—Joani 4:34; 15:10.

⁵ Kabakala ku sepahala kwa hae ku fitela lifu, Jesu n’a filwe mupuzo. Mulimu n’a mu zuselize kwa lihalimu ni ku mu fa tukelo ya ku ba Mulena wa Mubuso wa hae wa kwa lihalimu. (Likezo 2:32-36) Ka ku ba Mulena wa Mubuso, Kreste Jesu u ka ba ni musebezi o eshula wa filwe ki Mulimu ili wa ku etelela libupiwa za kwa moya ze tiile ze ñata-ñata. U ka li etelela mwa ku felisa puso ya batu fa lifasi-mubu ni ku yundisa bumaswe kaufela ku lona. (Liproverbia 2:21, 22; 2 Matesalonika 1:6-9; Sinulo 19:11-21; 20:1-3) Kihona Mubuso wa Mulimu wa kwa lihalimu o zamaiswa ki Kreste u ka ba ona o se u busa ili ona mulonga u nosi o ka busa lifasi-mubu kamukana.—Sinulo 11:15.

6. Lu kona ku libelela puso ye cwañi ya Mulena wa Mubuso?

⁶ Linzwi la Mulimu li bulela cwana ka za Mubusi yo munca y’o wa lifasi-mubu: “A fiwa bulena, kanya, ni mubuso, kuli ba mishobo kaufela, ni ba macaba, ni ba lipuo kaufela ba t’o mu sebeleza.” (Daniele 7:14) Bakeñisa kuli Jesu u ka likanyisa lilato la Mulimu, puso ya hae i ka tala kozo ni tabo. (Mateu 5:5; Joani 3:16; 1 Joani 4:7-10) “U ka hulisa mubuso, ni ku tiisa kozo ye sa feli . . . u ka u zamaisa ni ku u tiisa ka likatulo ni ka mulao.” (Isaya 9:7) Ki nto kwa bunde ku busiwa ki Mubusi ya busa ka lilato, likatulo ze lukile, ni mulao! Kacwalo, 2 Pitrosi 3:13 i polofita kuli: “Ka sepiso ya hae, lu talimezi lihalimu le linca [Mubuso wa Mulimu wa kwa lihalimu], ni lifasi le linca [nyangela ye nca ya fa lifasi-mubu], mo ku yahile Ku Luka.”

7. Mateu 24:14 i sweli ku talelezwa cwañi kacenu?

⁷ Luli Mubuso wa Mulimu ki yona taba ye nde ka ku fitisisa kwa batu kaufela ba ba lata ze lukile. Ki kabakaleo, ka ku ba kalulo ya sisupo sa kuli se lu pila mwa “mazazi a maungulelo” a muinelo o maswe wa linto wo, Jesu n’a polofitile kuli: “Evangeli ye ya mubuso i ka bulelwa mwa lifasi kaufela, ibe bupaki mwa macaba kamukana; kihona ku ka taha mafelelezo.” (2 Timotea 3:1-5; Mateu 24:14) Bupolofita b’o bu sweli bwa talelezwa cwale, kakuli Lipaki za Jehova ba ba bat’o ba bolule ba ba silezi mwa linaha ze 234 ba sweli ku tanda lihora ze bat’o eza bolule ba sikiti ka silimo ba nze ba bulelela ba bañwi za Mubuso wa Mulimu. Ka swanelo, ye ñwi ni ye ñwi ya miyaho ko li lapelela liputeho za bona z’e bat’o eza 90,000 mwa lifasi kamukana i bizwa Ndu ya Mubuso. Ki mwa miyaho yeo batu ba tahanga ku t’o ituta ka za mulonga o munca o sa taha.

 Babusi ba Bañwi

8, 9. (a) Ba ba ka busa ni Kreste ba ka zwa kai? (b) Lu kona ku ikolwisañi ka za puso ya Mulena ni ba ba ka busa ni yena?

⁸ Ku na ni ba ba ka busa ni Kreste Jesu mwa Mubuso wa Mulimu wa kwa lihalimu. Sinulo 14:1-4 ne i polofitile kuli batu ba ba eza 144,000 ne ba ka be ba “liuluzwi mwahal’a batu” ni ku zusezwa ku yo pila kwa lihalimu. Bona bao ki banna ni basali bao, mwa sibaka sa ku sebelezwa, ne ba sebelelize Mulimu ni batu ba bañwi ka buikokobezo. “Ba ka ba baprisita ba Mulimu ni ba Kreste, mi ba ka busa ni yena myaha ye 1,000.” (Sinulo 20:6) Palo ya bona i fitelwa kwahule ki ya “buñata bo butuna bwa batu, ku si na ya kona ku ba bala; ba zwa mwa macaba kaufela, ni mwa mishobo, ni mwa masika, ni mwa lipuo kaufela” ba ba ka punyuha ku fela kwa muinelo wa linto wo. Ni bona ba “sebeleza [Mulimu] musihali ni busihu,” kono ha ba na tibelelo ya ku ya kwa lihalimu. (Sinulo 7:9, 15) Ki bona mutomo wa lifasi le linca la ba ba ka ba babusiwa ba Mubuso wa Mulimu wa kwa lihalimu.—Samu 37:29; Joani 10:16.

⁹ Jehova ha n’a keta ba ba ka busa ni Kreste kwa lihalimu, n’a ketile batu ba ba sepahala ili ba ba iponezi bupilo ni manyando a bona kaufela. Ha ku na se si tahezi batu se si si ka tahela ni bona malena bao ba ba li baprisita. Kacwalo bupilo bwa bona bwa fa lifasi-mubu bu ka ba tahiseza ku kona hande ku busa batu. Mane ni yena Jesu ka sibili “u itutile ku utwa, ka ze butuku ze mu tahezi.” (Maheberu 5:8) Muapositola Paulusi n’a bulezi ka za Jesu kuli: “Ye lu na ni yena, hasi muprisita yo mutuna ya sa koni ku lu utwela butuku mwa mifokolo ya luna; kono ki ya n’a likilwe mwa litaba kaufela, sina luna, a sa weli mwa sibi.” (Maheberu 4:15) Kwa omba-omba hakalo ku ziba kuli mwa lifasi le linca la Mulimu, batu ba ka busiwa ki malena ni baprisita ba ba lilato ili ba ba na ni makeke!

Kana Mubuso Ne U Li mwa Mulelo wa Mulimu?

10. Ki kabakalañi Mubuso wa kwa lihalimu ha ne u siyo mwa mulelo wa Mulimu kwa makalelo?

¹⁰ Kana Mubuso wa kwa lihalimu ne u li teñi mwa mulelo wa Mulimu kwa makalelo ha n’a bupile bo Adama ni Eva? Mwa taba ya za pupo ye mwa Genese, ha ku na se si bulezwi ka za Mubuso o ne u ka busa batu. Jehova ka sibili ki yena ya n’a li Mubusi wa bona, mi ha ne ba ka zwelapili ku mu utwa, ne ku si ke kwa tokwahala puso ye ñwi i sili. Genese kauhanyo ya 1 i bonisa kuli Jehova n’a sebelisana ni bo Adama ni Eva, mwendi ka Mweli wa hae wa kwa lihalimu. Taba yeo i itusisa lipulelo ze cwale ka “Mulimu a ba bulelela, a li” ni “Mulimu a li” ku bona.—Genese 1:28, 29; Joani 1:1.

11. Batu ba bile ni makalelo a petehile cwañi?

¹¹ Bibele i li: “Mulimu a bona kaufela z’a ezize kuli li lukile hahulu.” (Genese 1:31) Lika kaufela mwa simu ya Edeni ne li lukile hande-nde. Adama ni Eva ne ba pila mwa paradaisi. Minahano ni mibili ya bona ne i petehile. Ne ba kona ku ambolisana ni Mubupi wa bona. Ha ne ba ka zwelapili ku sepahala, ne ba ka pepa bana ba ba  petehile. Ne ku si ke kwa tokwahala ku ba ni mulonga o munca wa kwa lihalimu.

12, 13. Batu ba ba petehile ha ne ba ka be ba ekezeha, ki kabakalañi Mulimu ha n’a ka zwelapili ku kona ku ambolisana ni bona?

¹² Batu ha ne ba ka ekezeha, Mulimu n’a ka ambolisananga cwañi ni bona kaufela? Mu nyakisise linaleli ze mwa halimu. Li fumaneha ka tukwata-kwata. Tukwata to tuñwi tu na ni linaleli ze eza bilioni iliñwi (1,000,000,000). To tuñwi tu na ni ze bat’o eza trilioni iliñwi (1,000,000,000,000). Mi basayansi ba kabangisa kuli ku na ni tukwata-kwata twa linaleli to tu kona ku fita fa libilioni ze mwanda (100,000,000,000) mwa kalulo ya pupo ye kona ku bonahala kwa batu! Niteñi, Mubupi u li: “A mu talime lihalimu, mu buhe: Ya ezize linto zeo ki mañi? Ki Yena ya zamaisa limpi za zona ka mulao, ya li biza kaufela ka mabizo; ka butuna bwa mata a hae ni kabakala bulena bwa hae bo bu tiile, ha ku na ye tokwahala.”—Isaya 40:26.

¹³ Bakeñisa kuli Mulimu wa ziba za linaleli zeo kaufela, luli ne ku si ke kwa mu bela t’ata ku ziba za batu kaufela kakuli ki ba banyinyani hahulu ha ba bapanyiwa kwa linaleli. Mane ni cwale, batanga ba hae ba ba eza bolule ba lapelanga ku yena ka zazi. Litapelo zeo li fita ku Mulimu li sa bulelwa fela. Kacwalo ku ambolisana ni batu kaufela ba ba petehile ne ku si ke kwa mu kangela mbinga. N’a si ke a tokwa Mubuso wa kwa lihalimu kuli u talime za bona. Ki tukiso kwa bunde—ya ku busiwa ki Jehova, ku kona ku ambolisana ni yena luli, ni ku ba ni tibelelo ya ku sa shwa ni kamuta, ili ku pila ku ya ku ile fa lifasi-mubu le li li paradaisi!

‘Mutu H’a Koni ku Izamaisa’

14. Ki kabakalañi batu ha ba ka tokwa puso ya Jehova kamita?

¹⁴ Kono batu—nihaike ba ba petehile—ne ba ka tokwa puso ya Jehova ku ya ku ile. Kabakalañi? Kakuli Jehova n’a si ka ba bupa ku ba ni buikoneli bwa ku kondisa lika ku si na puso ya hae. Yeo ki ndombondombo ya batu, sina mwa n’a lumelezi mupolofita Jeremia kuli: “Wena [Muñ’a] Bupilo, na ziba kuli nzila ya mutu ha i yo mwa mata a hae; mutu nih’a zamaya, h’a koni ku izamaisa ili yena. Wena [Muñ’a] Bupilo u ni utwise butuku.” (Jeremia 10:23, 24) Neikaba butoto batu ha ne ba ka nahana kuli ba kona ku zamaisa hande nyangela ba sa busiwi ki Jehova. Neikaba ku lwanisana ni mo ba bupezwi. Ku fulalela puso ya Jehova, kuye-kuye, ne ku ka tisa buitati, sitoyo, situhu, mifilifili, lindwa, ni lifu. ‘Mutu n’a ka ba ni mata fahalimu a yo muñwi, ku mu eza maswe.’—Muekelesia 8:9.

15. Ki lifi ze ne zwile mwa keto ye maswe ye ne ba ezize bashemi ba luna ba pili?

¹⁵ Ka bumai, bashemi ba luna ba pili ne ba ikatulezi kuli ne ba sa tokwi ku busiwa ki Mulimu, mi ba keta ku mu fulalela. Kacwalo, Mulimu a tuhela ku ba bukeleza mwa bupetehi. Cwale ne se ba li sina sibyana sa malaiti se si comozwi kwa magesi. Kacwalo nako ha i nze i ya, ne ba ka londa ni ku tuhela ku sebeza—ili lifu. Ba swana sina sikombole se si fosahezi, mi bana ba bona ba hoza muinelo o fosahezi wo. (Maroma 5:12) “[Muñ’a Bupilo] ki Yena Licwe; musebezi wa hae u lukile; kakuli linzila za hae kaufela li lukile; . . . Ba isinyize fapil’a hae, haki bana ba hae, ki ona mulatu wa bona.” (Deuteronoma 32:4, 5) Ki niti kuli bo Adama ni Eva ne ba coelizwe ki sibupiwa sa kwa moya se ne si kwenuhile ili se ne si til’o ba Satani, kono ne ba petehile mwa minahano mi ne ba ka be ba konile ku hana liakalezo za hae ze fosahezi.—Genese 3:1-19; Jakobo 4:7.

16. Ze ezahezi li paka cwañi ze zwile mwa ku ipangula ku Mulimu?

¹⁶ Litaba ze ezahezi li bonisa fo ku sweu ze zwile mwa ku ipangula ku Mulimu. Ka lilimo ze likiti-kiti, batu ba likile milonga ye fitana-fitana, misebelisezo ya sifumu sa naha ni mipilelo ye fitana-fitana. Kono bumaswe bu zwelapili “mwa bumaswe.” (2 Timotea 3:13) Lilimo za mwanda wa bu 20 ne li pakile taba ye. Ne li tezi litoyo, mifilifili, lindwa, lukupwe, bubotana, ni manyando a maswe-maswe ze fita za nako ifi kamba ifi ya kwamulaho. Mi ku si na taba ni lizwelopili ze ezizwe ku za likalafo, mañi ni mañi kwa mafelelezo wa shwa. (Muekelesia 9:5, 10) Ka ku lika ku izamaisa, batu ba ikezize hahulu mbuya ya Satani ni badimona ba hae, kuli mane Bibele i biza Satani kuli ki “mulimu wa lifasi le.”—2 Makorinte 4:4.

 Mpo ya Tukuluho ya ku Iketela

17. Mpo ya Mulimu ya tukuluho ya ku iketela ne i swanela ku itusiswa cwañi?

¹⁷ Jehova n’a tuheleziñi batu ku ipangula ku yena? Ki kabakala kuli ha n’a ba bupile, n’a ba file mpo ye makaza ya tukuluho ya ku iketela. Muapositola Paulusi n’a ize: “Fo ku na ni moya wa Mulena, ku inzi tukuluho.” (2 Makorinte 3:17) Ha ku na ya lata ku zamaiswa ka nako kaufela ku z’a bulela ni ku eza, inge sipupe. Kono Jehova n’a tokwa kuli batu ba itusise hande mpo yeo ya tukuluho ya ku iketela, ilikuli ba bone butali bwa ku eza tato ya hae ni ku zwelapili ku ipeya kwatas’a hae. (Magalata 5:13) Kacwalo tukuluho ya bona ne i si ka lelwa ku ba ye si na maciñekelo, kakuli tukuluho ye cwalo ne i ka tisa kuli ku si ke kwa ba ni milao. Tukuluho yeo neikaba ni maciñekelo a’ li milao ya Mulimu ye tusa.

18. Mulimu u bonisizeñi ka ku tuhelela batu ku sebelisa m’ata a ku iketela?

¹⁸ Ka ku tuhelela batu ku ipangula, Mulimu u bonisize kuli lu tokwa puso ya hae, mi poniso yeo ki bupaki bwa kamita. Puso ya hae ki yona fela ye lukile. I tisa tabo, ku kolwa, ni ku konda ko kutuna ka ku fitisisa. Ku ba cwalo kabakala kuli minahano ni mibili ya luna ne i lukisizwe ki Jehova kuli i kone ku sebeza hande ka ku fitisisa ha i lumelelana ni milao ya hae. “Ki Na [Muñ’a] Bupilo Mulimu wa hao, ni ku luta se si ku swanela, ni ku zamaisa ka nzila yo lukela ku zamaya ku yona.” (Isaya 48:17) Tukuluho ya ku iketela ha i ciñekela fa milao ya Mulimu ne i si ke ya imeza batu kono ne i ka tisa ku shutana-shutana ko ku tabisa kwa lico, mandu, ze pangiwa, ni lipina. Ha ne i ka itusiswa hande, tukuluho ya ku iketela ne i ka be i tisize bupilo bo bu tabisa, ili bo bu makalisa kamita fa lifasi-mubu le li li paradaisi.

19. Ki sisebeliso mañi sa itusisa Mulimu mwa ku kutisa batu ku yena?

¹⁹ Kono bakeñisa keto ya bona ye maswe, batu ba ikauhanya ku Jehova, mi kacwalo ba zwa mwa bupetehi, ba pongana, ni ku shwa. Kacwalo ne ba ka tokwa ku liululwa mwa muinelo o maswe wo ni ku kutiswa mwa ku swalisana hande  ni Mulimu ka ku ba bana ba hae. Sisebeliso s’a ketile ku itusisa Mulimu mwa ku peta nto yeo ki ona Mubuso, mi Muliululi ki Jesu Kreste. (Joani 3:16) Ka yona tukiso yeo, ba ba bakile luli ba ka kutiswa ku Mulimu ni ku amuhelwa kuli ki bana ba hae—ka ku swana sina mo ne ku bezi ku imayumba-yumba wa mwa swanisezo ya Jesu.—Luka 15:11-24; Maroma 8:21; 2 Makorinte 6:18.

20. Mulelo wa Mulimu u ka talelezwa cwañi ki Mubuso?

²⁰ Ku si na kuli cwañi kamba cwañi, tato ya Jehova i ka petiwa fa lifasi-mubu. (Isaya 14:24, 27; 55:11) Ka Mubuso wa hae o zamaiswa ki Kreste, Mulimu u ka bonisa ka ku tala tukelo ya hae ya ku ba Mubusi wa luna. Mubuso u ka felisa puso ya batu ni badimona fa lifasi-mubu fa, mi ona u nosi u ka busa u nze u li kwa lihalimu ka lilimo ze sikiti. (Maroma 16:20; Sinulo 20:1-6) Kono mwahal’a nako yeo, mayemo a’ pahami a puso ya Jehova a ka boniswa cwañi? Mi hamulaho wa lilimo ze sikiti, Mubuso u ka peta kalulo mañi? Taba ye latelela i ka nyakisisa zona lipuzo zeo.

Lisupo za Lundululo

• Makanatelo a Bibele ki afi?

• Ki bomañi ba ba ka ba babusi ba banca ba lifasi-mubu?

• Ki kabakalañi puso ya batu ya ka buipanguli ku Mulimu ha i sa koni ku kondisa lika ni kamuta?

• M’ata a ku iketela a lukela ku itusiswa cwañi?

[Lipuzo za Tuto]

[Siswaniso se si fa likepe 8]

Za n’a lutile Jesu ne li koñomekile puso ya Mulimu ka Mubuso

[Maswaniso a fa likepe 10]

Mwa linaha kaufela, Lipaki za Jehova ba bisa Mubuso ku ba yona tuto ya bona ye tuna

[Maswaniso a fa likepe 12]

Litaba ze ezahezi li paka ze maswe ze zwile mwa ku ipangula ku Mulimu

[Manzwi a bañi ba siswaniso]

Masole ba WWI: Siswaniso sa U.S. National Archives; munganda wa tukufazo: Oświęcim Museum; mwanana: UN PHOTO 186156/J. Isaac