Ze U Ka Eza Mubuso wa Mulimu

“Ku tahe mubuso wa hao; Se si latwa ki Wena si ezwe mwa lifasi, mo si ezezwa kwa lihalimu.”—MATEU 6:10.

1. Ku taha kwa Mubuso wa Mulimu ku ka ama lifi?

JESU ha n’a lutile balateleli ba hae ku lapelela Mubuso wa Mulimu, n’a ziba kuli ku taha kwa ona ku ka t’o felisa puso ya batu ba ba ipanguzi ku Mulimu ye se i tandile lilimo ze likiti-kiti. Mwahal’a yona nako yeo, tato ya Mulimu ne i sa eziwi fa lifasi-mubu ka nañungelele. (Samu 147:19, 20) Kono Mubuso ha se u tomilwe kwa lihalimu, tato ya Mulimu i ka ezwa kai ni kai. Nako ya yona cinceho ye mbwetukisa yeo ya ku zwa kwa puso ya batu ku ya kwa puso ya Mubuso wa Mulimu wa kwa lihalimu se i li fa ngo ni mulomo.

2. Cinceho ya ku zwa mwa puso ya batu ku ya mwa puso ya Mubuso i ka ezahala mwa nako ye cwañi?

² Yona cinceho yeo i ka ezahala mwa nako yeo Jesu n’a bulezi kuli “ñalelwa ikaba ye tuna; la li ku simuluha lifasi, ku tisa cwale, ha ku si ka bonwa ñalelwa  ye tuna cwalo, mane ni kwapili.” (Mateu 24:21) Bibele ha i talusi butelele bo i ka tanda nako yeo, kono liziyezi ze ka ezahala ku yona li ka fita liziyezi kaufela ze se bonwi kale mwa lifasi le. Kwa makalelo a ñalelwa ye tuna, ku ka ezahala nto ye ñwi ye ka mbemukisa ba bañata fa lifasi-mubu. Nto yeo ki ku shandaulwa kwa bulapeli bwa buhata. Kono Lipaki za Jehova bona ha ba na ku mbemukiswa ki nto yeo kakuli se ba i libelezi ka nako ye telele. (Sinulo 17:1, 15-17; 18:1-24) Ñalelwa ye tuna i ka fela fa Armagedoni, Mubuso wa Mulimu ha u ka tuba za Satani kaufela.—Daniele 2:44; Sinulo 16:14, 16.

3. Jeremia u talusa cwañi mo ku ka bela ku ba ba sa ipeyi ku utwa?

³ Ku ka ba cwañi ku “ba ba sa zibi Mulimu, ni ba ba sa ipeyi kwatas’a Evangeli” ya Mubuso wa hae wa kwa lihalimu o busiwa ki Kreste? (2 Matesalonika 1:6-9) Bupolofita bwa Bibele bu lu bulelela kuli: “A mu bone! Bumaswe bu ka zwa mwa sicaba, bu yambukele mwa sicaba se siñwi; mi liñungwa le li sabisa li ka zuha li zwa kwa mafelelezo a lifasi. Kabakaleo ba ba bulailwe ki [Muñ’a] Bupilo mwa lizazi le, ba ka ba teñi ku zwa mwa neku le liñwi la lifasi ku isa mwa neku le liñwi la lifasi; ha ba na ku lilwa, kamba ku kubukanywa, kamba ku pumbekwa. I ka ba musutelo mwa lifasi.”—Jeremia 25:32, 33.

Ku Fela kwa Bumaswe

4. Ki kabakalañi Jehova ha sa swaneli ku nyaziwa ha ka felisa muinelo o’ maswe wo?

⁴ Ka lilimo ze likiti-kiti, Jehova Mulimu s’a tuhelezi bumaswe ka nako ya butelele bo bu likani kuli batu ba lipilu ze lukile ba iponele kuli puso ya mutu i fosahezi hahulu. Ka mutala, ka ku ya ka piho ye ñwi, mwa lilimo za mwanda wa bu 20 fela, batu ba ba fitelela bolule ba 150 ne ba bulailwe ki lindwa, lipetuhelo, ni mifilifili ye miñwi. Situhu sa mutu sihulu ne si bonwi mwa Ndwa ya Lifasi ya II ha ne ku shwile batu ba ba eza bolule ba 50. Ba bañata ku bona bao ne ba shwile mafu a maswe mwa minganda ya tukufazo ya ba Nazi. Sina ka mo ne i bulelezi cimo Bibele, mwa linako za luna ‘batu ba lunya, ba ba puma, ba zwezipili mwa bumaswe.’ (2 Timotea 3:1-5, 13) Kacenu, muzamao o maswe, ku loba mulao, mifilifili, likweta, ni ku nyefula lipimo za Mulimu se li atile hahulu. Kacwalo, ha ku na ya swanela ku nyaza Jehova ha ka felisa muinelo wo wa linto.

5, 6. Mu taluse bumaswe bo ne bu li mwa Kanana ya kwaikale.

⁵ Muinelo cwale se u swana ni o n’o li mwa Kanana lilimo ze 3,500 kwamulaho. Bibele i li: “Ze masila kaufela z’a toile [Muñ’a] Bupilo, ba macaba ao ki zona ze ba ezelize milimu ya bona; mbali ni bana ba bona ba bashimani ni ba basizana ba ba ciseza milimu ya bona!” (Deuteronoma 12:31) Jehova n’a zibisize sicaba sa Isilaele kuli: “Ki kabakala bumaswe bwa macaba ao, [Muñ’a] Bupilo Mulimu wa hao h’a ka a lundula fapil’a hao.” (Deuteronoma 9:5) Henry H. Halley, caziba wa litaba za mwa miteñi ya Bibele, a kile a li: “Bulapeli bwa Baale, Ashitaroti, ni milimu ye miñwi ya Kanana ne bu ama mikiti ya butahwa mo ku si na buiswalo ni hanyinyani; litempele za bona ne li libaka za bumaswe bo butuna bwa muzamao.”

⁶ Halley n’a bonisize mo ne bu bezi butuna bufosi bwa bona kakuli mwa sibaka se siñwi, mi libaka ze cwalo ne li ze ñata, bapumbuli ba za kwaikale “ne ba fumana linkwana ze ñata mo ne ku na ni likalulo za litupu za banana be ne ba tabezwi Baale.” N’a ize: “Sibaka kaufela ne li fela matutaeti a limbututu ze sa z’o pepwa. . . . Makanana ne ba lapela, ka buikezezi mwa muzamao, ka ku ba mikiti ya bulapeli, fapil’a milimu ya bona; mi hape, ni ka ku bulaya bana ba bona ba baeli, ka ku ba sitabelo ku yona milimu ye swana yeo. Ku bonahala kuli, fa sipimo se situna, naha kaufela ya Kanana ne se i bile inge Sodoma ni Gomora . . . Kana muinelo wa masila ni situhu ze swabisa cwalo ne li sa na ni tukelo ya ku zwelapili ku ba teñi? . . . Bapumbuli ba za kwaikale ba ba yepa mwa matota a mileneñi ya Kanana b’a  komoka kuli Mulimu n’a si ka ba sinya kale-kale kwamulaho wa nako ya n’a tilo ba sinya ka yona.”

Ku Ca Sanda sa Lifasi

7, 8. Mulimu u ka kenisa cwañi lifasi-mubu?

⁷ Ka ku swana ni mwa n’a keniselize Kanana, Mulimu u ka tuha a kenisa lifasi kaufela ni ku li fa ku ba ba eza tato ya hae. “Ba ba eza niti ba ka yaha mwa naha, ba ba sa nyazahali ba ine ku yona. Kono ba ba maswe ba ka kauhelwa mwa lifasi.” (Liproverbia 2:21, 22) Mi walisamu u li: “Ku sa na ni nakonyana ye nyinyani, mi ya maswe h’a sa na ku ba teñi . . . Kono ba ba ishuwa ba ka luwa naha, ba ka ikola kozo ye tuna.” (Samu 37:10, 11) Satani ni yena u ka zwiswa, kuli “a tuhele ku puma macaba, mane ku fite myaha ye 1,000.” (Sinulo 20:1-3) Ee, “lifasi la fela, ni takazo ya lona; kono ya eza tato ya Mulimu u ina ku ya ku ile.”—1 Joani 2:17.

⁸ Ka ku bulela fela ka bukuswani sepo ye tuna ya ba ba bata ku pila ku ya ku ile fa lifasi-mubu, Jesu n’a ize: “Mbuyoti ki ya ba ba ishuwa, kakuli ba ka ca sanda sa lifasi.” (Mateu 5:5) Ku bonahala kuli n’a ama kwa Samu 37:29, ye ne i polofitile kuli: “Ba ba na ni niti ba ka yola sanda sa naha, ni ku yaha mwateñi ku ya ku  ile.” Jesu n’a ziba kuli Jehova n’a lelile kuli ba lipilu ze lukile ba pile fa lifasi-mubu le li li paradaisi ku ya ku ile. Jehova u li: “Ki Na ya ezize lifasi ni batu ni lifolofolo mwa butuna bwa lifasi, . . . mi ni li fa ye ni lata ku mu fa.”—Jeremia 27:5.

Lifasi Le Linca Le Linde Hahulu

9. Mubuso wa Mulimu u ka tisa lifasi le li cwañi?

⁹ Hamulaho wa Armagedoni, Mubuso wa Mulimu u ka tisa ‘lifasi le linca mo ku ka yaha Ku Luka.’ (2 Pitrosi 3:13) Ba ba ka punyuha Armagedoni ba ka imululwa hakalo ha ku si ke kwa ba ni muinelo wa linto wo o’ hatelela! Ba ka taba hakalo kuli ba keni mwa lifasi le linca la ku luka ili le li zamaiswa ki mulonga wa Mubuso wa kwa lihalimu, ba nze ba libelezi limbuyoti ze makalisa ni bupilo bo bu sa feli!—Sinulo 7:9-17.

10. Ki lika lifi ze maswe ze ka tuhela ku ba teñi mwa puso ya Mubuso?

¹⁰ Batu ha ba sa na ku sabiswa ki lindwa, bukebenga, tala, kamba mane libatana ze ca nama. “Ni ka iswala ni [sicaba sa ka] bulikani bwa kozo; ni ka feza libatana ze maswe, li fele mwa naha; . . . Kota ye calilwe mwa simu i ka na i beya za yona, mi lifasi li ka na li beya za lona, mi zona lingu li ka pila mwa buiketo mwa naha ya zona.” “Ka mikwale ya bona ba ka tula mihuma, mi ka malumo a bona ba ka tula licekesi; sicaba se siñwi ha si sa na ku lwanisa se siñwi ka lilumo, mi ha ba sa na ku ituta ndwa. Kono ba ka ina, mutu ni mutu mwa kota ya hae ya veine ni mwa kota ya hae ya feiga, ku si na ya ba sabisa.”—Ezekiele 34:25-28; Mika 4:3, 4.

11. Ki kabakalañi ha lu kona ku ikolwisa kuli mapongo a ka fela?

¹¹ Makulano, masitapilu, mi mane ni lifu li ka feliswa. ‘Ha ku na mutu ya yahile teñi ya ka ipulela kuli: Na kula. Sicaba se si yahile mwateñi si swalezwi libi za sona.’ (Isaya 33:24) “[Mulimu] u ka takula miyoko kaufela kwa meto a bona; mi lifu ha li sa na ku ba teñi; nihaiba ku tahelwa ki maswabi ni ku lila, ni ku utwa butuku; kakuli za pili li felile. . . . A mu bone, linto kaufela ni li eza ze nca.” (Sinulo 21:4, 5)  Jesu ha n’a li fa lifasi-mubu n’a bonisize kuli n’a kona ku eza lika zeo ka m’ata a n’a mu file Mulimu. Ka ku tusiwa ki moya o kenile, Jesu a ya mwa naha kaufela a nze a folisa liyanga ni bakuli.—Mateu 15:30, 31.

12. Ki sepo mañi ye li teñi kwa neku la bafu?

¹² Jesu mane n’a si ka feleza f’o. N’a zusize bafu. Batu ba ba ikokobeza ne b’a ngile cwañi seo? Ha n’a zusize kasizana ka lilimo ze 12, bashemi ba kona “ba kala ku [taba, NW] hahulu luli.” (Mareka 5:42) W’o ki o muñwi wa mitala ya z’a ka eza Jesu mwa lifasi-mubu kaufela mwa puso ya Mubuso, kakuli ka nako yeo “ku zuha kwa bafu ku ka ba teñi, kwa ba ba lukile ni ba ba si ka luka.” (Likezo 24:15) Mu nahane butuna bwa tabo ye ka ba teñi likwata za bafu ha li nze li zuha ni ku kopana hape ni balatiwa ba bona! Ku si na kakanyo ku ka ba ni musebezi o mutuna wa tuto o ka zamaiswa ki Mubuso kuli mane “lifasi li ka tala zibo ya [Muñ’a] Bupilo, sina mezi mw’a kwahelezi liwate.”—Isaya 11:9.

Tukelo ya Bubusi bwa Jehova ya Boniswa

13. Ku luka kwa puso ya Mulimu ku ka boniswa cwañi?

¹³ Lilimo ze sikiti za puso ya Mubuso ha li ka yo unguka, minahano ni mibili ya batu se i ka be i kutiselizwe kwa bupetehi. Lifasi-mubu kaufel’a lona li ka ba simu ya Edeni, ili paradaisi. Kozo, tabo, buiketo, ni nyangela ya batu ye lilato li ka be li bile teñi. Batu ba samba ku bela teñi, kwa li ku ba ku bonwe nto ye cwana pili puso ya Mubuso i si ka taha kale. Ki shutano kwa butuna ye ka be i bonisizwe ka nako yeo mwahal’a puso ya batu ye tezi maswenyeho ya lilimo ze likiti-kiti ni puso ye nde luli ya Mubuso wa Mulimu wa kwa lihalimu ya lilimo ze sikiti! Ku ka be ku bonisizwe ka nzila kaufela kuli puso ya Mulimu ka Mubuso wa hae i fitela ya batu kwahule-hule. Tukelo ya Mulimu ya ku busa i ka be i bonisizwe ka ku tala kuli ki ya niti.

14. Ki sifi se si ka ezahala kwa bakwenuheli lilimo ze sikiti ha li ka fela?

¹⁴ Kwa mafelelezo a lilimo ze sikiti, Jehova u ka tuhelela batu ba ba petehile kuli ba sebelise tukelo ya bona ya ku iketela ye ba bata ku sebeleza. Bibele i bonisa kuli “Satani u ka lukululwa, a zwe mwa tolongo ya hae.” Hape u ka lika ku yaulula batu, mi ba bañwi ku bona ba ka keta ku ipangula ku Mulimu. Kuli ‘ñalelwa i si ke ya lu swala habeli,’ Jehova u ka silaha Satani, madimona a hae, ni bao kaufela ba ba ka kwenuhela puso ya Jehova. Ha ku na ya ka kona ku bulela kuli batu ba ba ka timezwa ku ya ku ile ka nako yeo ne ba si ka ba ni kolo hande ya ku pila kamba kuli bufosi bwa bona ne bu tisizwe ki ku sa petahala. Ikaba batu ba ba petehile si na mo ne ba inezi bo Adama ni Eva, ba ne ba iketezi ku kwenuhela puso ya Jehova ye lukile.—Sinulo 20:7-10; Nahumi 1:9.

15. Basepahali ba ka ba ni swalisano mañi ni Jehova?

¹⁵ Kwa neku le liñwi, mwendi buñata bwa batu ba ka keta ku yemela bubusi bwa Jehova. Bakwenuheli kaufela ha se ba timelizwe, ba ba lukile ba ka yema fapil’a Jehova, ba tulile tiko ya mafelelezo ya busepahali. Bona basepahali bao kiha ba ka amuhelwa ki Jehova kuli ki bana ba hae. Kacwalo ba kuta mwa swalisano yeo bo Adama ni Eva ne ba swalisani ka yona ni Mulimu pili ba si ka ipangula kale. Kiha ku ka talelezwa Maroma 8:21, ye li: “Ze bupilwe [batu] li ka lukululwa kwa butanga bwa ku bola, kuli li fiwe tukuluho ya kanya ya bana ba Mulimu.” Mupolofita Isaya u polofita kuli: “[Mulimu] u mizize lifu ku ya ku ile; Mulena [Muñ’a] Bupilo u ka takula miyoko kwa lipata kamukana.”—Isaya 25:8.

Sepo ya Bupilo bo Bu Sa Feli

16. Ki kabakalañi ha ku li ko ku lukile ku libelela mupuzo wa bupilo bo bu sa feli?

¹⁶ Ki tibelelo kwa bunde ye libelezi ba ba sepahala! Ba ziba kuli Mulimu u ka ba kapweka kamita lituso za kwa moya ni za kwa mubili! Walisamu n’a nepile ha n’a ize: “U fumbutulula sata sa hao, mi ze pila kaufela za kula.”  (Samu 145:16) Jehova u susueza ba ba libelezi ku pila fa lifasi-mubu kuli ba be ni sepo yeo ya bupilo mwa Paradaisi ka ku ba kalulo ya tumelo ya bona ku yena. Hailif’o taba ya bubusi bwa Jehova ki ya butokwa ni ku fita, ha bati kuli batu ba mu sebeleze ba sa libeleli mupuzo. Mwa Bibele kaufela, taba ya busepahali ku Mulimu ni ya sepo ya bupilo bwa kamita li zamaelela hamoho ka ku ba likalulo za butokwa za tumelo ya Mukreste ku Mulimu. “Ya taha ku Mulimu u swanezi ku lumela kuli Mulimu u teñi, ni kuli ki Yena ya fa ba ba mu bata mupuzo.”—Maheberu 11:6.

17. Jesu n’a bonisize cwañi kuli ku tiiswa ki sepo ya luna ki nto ye swanela?

¹⁷ Jesu n’a ize: “Bupilo bo bu sa feli, kikuli ba ku zibe, Wena, Mulimu a nosi wa niti, ni y’o lumile, yena Jesu Kreste.” (Joani 17:3) Fa, n’a bonisize swalisano ye mwahal’a ku ziba Mulimu ni milelo ya hae ni mupuzo o’ tiswa ki seo. Ka mutala, sifosi yo muñwi ha n’a kupile ku hupulwa ki Jesu ha ka taha mwa Mubuso wa hae, Jesu n’a ize: “U ka ba ni na mwa [Paradaisi].” (Luka 23:43) N’a si ka bulelela munna y’o kuli a be ni tumelo nih’a si ke a fiwa mupuzo. N’a ziba kuli Jehova u bata kuli batanga ba hae ba be ni sepo ya ku pila ku ya ku ile fa lifasi-mubu le li li paradaisi. Sepo yeo i ka ba tiisa ha ba nze ba talimana ni litiko ze fitana-fitana mwa lifasi le. Kacwalo, ku libelela mupuzo ki nto ya butokwa hahulu ili ye tusa mwa ku zwelapili ku ba Mukreste.

Nako ya Kwapili ya Mubuso

18, 19. Ki sifi se si ka ezahala ku Mulena ni Mubuso kwa mafelelezo a Puso ya Lilimo ze Sikiti?

¹⁸ Bakeñisa kuli Mubuso ki mulonganyana w’o Jehova a itusisize ku petehisa lifasi-mubu ni batu ba ba pila ku lona ni ku ba kutiseza ku yena, Mulena Jesu Kreste ni malena ba ba li baprisita ba 144,000 ba ka ba ni misebezi mañi hamulaho wa Lilimo ze Sikiti? “Kiha ku ka taha maungulelo, nako y’a ka beya mubuso mwa mata a Mulimu Ndate, h’a sa felisize bulena kaufela, ni mibuso kaufela, ni mata kaufela. Kakuli u swanezi ku busa ku isa f’a ka beela lila za hae kaufela mwatas’a mautu a hae.”—1 Makorinte 15:24, 25.

¹⁹ Bakeñisa kuli Kreste u ka beya Mubuso mwa m’ata a Mulimu, lu ka utwisisa cwañi mañolo a’ bulela kuli Mubuso w’o u ka busa ku ya ku ile? Ka kutwisiso ya kuli zeo Mubuso u ka peta li ka ba teñi ku ya ku ile. Kreste u ka kutekiwa ku ya ku ile kabakala zeo a petile mwa ku bonisa tukelo ya bubusi bwa Mulimu. Kono bakeñisa kuli sibi ni lifu li ka be li felizwe ka ku tala, mi batu ba ka be ba liuluzwi, seo si ka feza tokwahalo ya hae ya ku ba Muliululi. Puso ya Mubuso ya Lilimo ze Sikiti i ka be i petilwe ka ku tala; kacwalo ha ku sa na ku ba ni tokwahalo ya mulonganyana o ka zwelapili ku talima za batu ba ba ipeya ku utwa, ka ku yemela Jehova. Kacwalo, “Mulimu a [be] linto kamukana kwa batu kamukana.”—1 Makorinte 15:28.

20. Lu kona ku ziba cwañi ze ka ezahala kwapili ku Kreste ni ba 144,000?

²⁰ Puso ya Lilimo ze Sikiti ha se i felile, Kreste ni b’a ka busa ni bona ba ka ba ni misebezi mañi? Bibele ha i buleli. Kono lwa kona ku kolwa kuli Jehova u ka ba fa matohonolo a mañwi a sebelezo a mañata mwa pupo ya hae kamukana. Haike kaufel’a luna kacenu lu yemele bubusi bwa Jehova ni ku fiwa bupilo bwa kamita, ilikuli kwapili, lu te lu be teñi ku t’o ziba milelo ya Jehova ku Mulena ni baprisita ba ba busa hamoho ni yena, hamohocwalo ni kwa pupo ya hae kamukana ye komokisa!

Lisupo za Lundululo

• Lu sweli ku atumela cinceho ifi ku za puso?

• Mulimu u ka atula cwañi ba ba maswe ni ba ba lukile?

• Ki miinelo mañi ye ka ba mwa lifasi le linca?

• Tukelo ya bubusi bwa Jehova i ka boniswa cwañi ka ku tala?

[Lipuzo za Tuto]

[Maswaniso a fa likepe 15]

“Ku zuha kwa bafu ku ka ba teñi, kwa ba ba lukile ni ba ba si ka luka”

[Siswaniso se si fa likepe 16]

Basepahali ba ka kutela mwa ku swalisana hande ni Jehova