Bibele—Buka ye Luta mwa ku Pilela

“LINZWI la Mulimu ki le li pila, mi li na ni mata; kwa buhali li fita lilumo le li lozizwe kafa ni kafa, . . . mi li na ni bubebe mwa ku atula maikuto ni mihupulo ya mwa pilu.” (Maheberu 4:12) Taluso yeo ya za se li kona ku peta Linzwi la Mulimu kaniti i bonisa kuli Bibele haki buka fela ye nde.

Muñoli yo muñwi wa za bulapeli n’a ñozi ka ku nonga kuli: “Lushango lwa yona lu butokwa hahulu kwa bupilo bwa luna sina ku buyela ha ku li kwa butokwa.” Kihona a zwelapili a li: “Ha lu nyakisisa taba ya luna ya ku nyolelwa ni ku tokwa ku foliswa kacenu mi lwa bala Bibele ka mubonelo w’o, ku zwa mwateñi ze makaza.” Ka ku swana ni lumonyi lo lu benya hahulu, Bibele ya lemusa za litaba ze ñata ze zinga ni matata a mupilelo wa kacenu.—Samu 119:105.

Kaniti, butali bo bu mwa Bibele bu na ni m’ata a ku zamaisa mo lu nahanela, ku lu tusa ku tatulula matata, ku kondolokisa hande bupilo bwa luna, ni ku lu fa bunangu bwa ku talimana ni miinelo ye lu sa koni ku cinca. Sa butokwa ka ku fitisisa kikuli, Bibele i lu konisa ku fita fa ku ziba ni ku lata Mulimu.

Buka ye Kolwisa

Muñoli wa Bibele, yena Jehova Mulimu, wa ‘ziba linzila za luna kaufela.’ U ziba hahulu za butokwi bwa luna bwa kwa mubili, bwa mwa maikuto, ni bwa kwa moya ku fita mane ni mo lu zibela luna. (Samu 139:1-3) U tomile maciñekelo a’ utwahala a za batu ka ku ba beya mwa munahano. (Mika 6:8) Kwa utwahala ku bata ku utwisisa maciñekelo ni litaelo zeo ni ku ituta ku pila ka zona. U filwe mbuyoti mutu ya “tabela Mulao wa [Muñ’a] Bupilo,” ki mona mw’a bulelela walisamu. “S’a eza kaufela sa konda.” (Samu 1:1-3) Kaniti luli lu tokwa ku tatuba tibelelo ye cwalo.

Maurice, ya s’a tuhezi musebezi wa buluti, n’a lumelanga kamita kuli Bibele n’e na ni butokwa bo buñwi bwa za litaba ze ezahezi ni ze ñozwi. Kono n’a honona za kuli i buyelezwi ki Mulimu. Ha s’a ikutwezi taluso ya libaka Mulimu ha n’a file batu Linzwi la hae le li ñozwi, Maurice a tatuba bupolofita bwa Bibele bo buñata. Mwa bucaha bwa hae, n’a itutile litaba za kwaikale, libuka, sayansi, ni za mo li bupezwi lifasi. U itumelela kuli n’a ipona ku talifa hahulu kuli a lumele mitala  ye miñata ye yemela buniti bwa Bibele. “Ne ni kwecekilwe inge sibofu ki ndongwamo ya mbombolelwa, sifumu, ni minyaka ya bupilo. Ka bumai, na zwelapili ku ba cwalo ni sa zibi bunde ni buniti bwa buka ye tuna ka ku fitisisa ye kile ya ñolwa.”

Maurice, y’o cwale s’a li wa lilimo za mwa ma-70, u bulela ka buitebuho ka za taba ya Jesu fa n’a bonahalezi ku muapositola Tomasi kuli: “Ni kozwi ka ku tala kuli Bibele ki yona niti.” (Joani 20:24-29) Sina ha n’a bulezi hande muapositola Paulusi, Bibele i patulula maikuto a mwa pilu, mi i bonisa libaka le lu pilela. Kaniti luli ki buka ye luta mwa ku pilela.

Ku Tiisa Bupilo Bo bu Tezi Mifilifili

Bibele hape i fa kelezo ye tusa batu kuli ba itamulele kwa mikwa ye maswe. Daniel n’a konile ku tula mukwa o masila wa ku zuba kwai, hamohocwalo ni ku tuhela mikiti ye lilata ni bucakolwa. (Maroma 13:13; 2 Makorinte 7:1; Magalata 5:19-21) Ka mo ku inezi, ku felisa mikwa ye cwalo ni ku apala “mutu yo munca” ku tokwa buikatazo bo bu tuna. (Maefese 4:22-24) Daniel u li: “N’e li likulutendano, kakuli lu ba ba si ka petahala luli.” Kono n’a konile ku tula. Cwale Daniel s’a balanga Linzwi la Mulimu ka zazi, mi li mu suteleza ku Jehova.

Ha n’a hula, Daniel kamita n’a kuteka hahulu Bibele nihaike kuli n’a si ka i bala kale. Hape n’a lapelanga ku Mulimu busihu ni busihu. Niteñi, ne ku tondahala se siñwi. N’a sina tabo. Cinceho ne i ezahezi fa n’a bonezi libizo la Mulimu lwa pili mwa Bibele. (Exoda 6:3; Samu 83:18, NW) Ku tuha f’o, n’a itusisanga libizo la Jehova ha n’a lapelanga, mi litapelo za hae za ba hahulu za ka butu. “Jehova a ba mulikan’a ka yo mutuna ka ku fitisisa, mi u sa li mulikan’a ka yo mutuna ka ku fitisisa.”

Pili a si ka ituta kale Bibele, Daniel n’a sina hande sepo ka za kwapili. U bulela kuli: “Haku tokwahali kuli mutu a talife kuli a iponele se si ezahala mwa lifasi. Ne ni li mwa sabo, mi ne ni likile ku ipatehisa ilikuli ni si ke na nahana ka za yona.” Kihona a ituta kuli Mulimu u ka tahiseza bote ku luka mwa lifasi le li kenisizwe, ili m’o batu ba ba ipeya ku utwa ba ka ikola kozo ni tabo za kamita. (Samu 37:10, 11; Daniele 2:44; Sinulo 21:3, 4) Cwale Daniel s’a na ni sepo ye tiile. Susumezo ya Bibele ye tiisa yeo i mu konisa ku ba ni mubonelo o munde ka za bupilo.

Tuso ya ku Tula Matata a mwa Maikuto

George n’a li wa lilimo ze supile bom’ahe ha ba timela. N’a sabanga ku y’o lobala busihu, kakuli n’a sa zibi kuli n’a ka zuha lizazi le li tatama kamba cwañi. Kihona a bala za n’a bulezi Jesu ka za lifu ni zuho ya bafu kuli: “Nako ya ta, mo ba ba li mwa mabita kaufela, ba ka utwa linzwi la [Jesu], mi ba zwe.” Hape n’a nyangumuzwi ki za n’a bulezi Jesu, kuli: “Ki na zuho ni bupilo; ya lumela ku na, nih’a shwile u ka pila.” (Joani 5:28, 29; 11:25) Litaba zeo ne li utwahala ku ba ze utwahala ili ze omba-omba. George u li: “Niti yeo ha i hohi fela muhupulo, i hoha ni pilu.”

Daniel, ya bulezwi kwa makalelo, ni yena n’a na ni za n’a sabanga. Bom’ahe ne ba sa koni ku mu uta ba nosi, kacwalo a lumelwa kwa mandu a mañata ko ne a ka yo añulwa. Kamita n’a ikutwanga buzwahule mi n’a lakazanga buiketo bwa ku ba silama sa lubasi lo lu lilato. Kwa mafelelezo, a fumana za n’a bata ka ku ituta Bibele. Daniel a eza sango ni puteho ya Sikreste ya Lipaki za Jehova ni ku ba silama sa lubasi lwa kwa moya. Teñi mo, n’a ikutwile kuli n’a amuhelwa ni ku latwa ki ba bañwi. Kaniti, Bibele ya tusa mwa bupilo ni ku kolwisa mwa maikuto.

 Mu si libali kuli Jehova wa bona se si mwa pilu ya luna mi wa ziba se lu bata. Mulimu u “beya lipilu fa sikala ku li likanyeza” ni ku ‘kutiseza mutu ni mutu ka mizamao ya hae.’—Liproverbia 21:2; Jeremia 17:10.

Kelezo ye Sebeza kwa Bupilo bwa Lubasi

Bibele i fa kelezo ye sebeza ka za litaba za liswalisano za butu. George u li: “Lifapano za ka butu ni ku sa utwana ki ze ñwi za miinelo ye swenya hahulu ka ku fitisisa mwa bupilo. U talimananga cwañi ni yona? “Ha ni ikutwa kuli mutu yo muñwi u ni nyemezi, ni sebelisa kelezo ye nongile fa taba ye kwa Mateu 5:23, 24 ye li: ‘Mu kutisane pilu ni mwanahenu.’ Taba ye bunolo ya kuli na kona ku ambola za fapano yeo i tahisa ze nde. Na kona ku ikola kozo ya Mulimu ye bulelwa mwa Bibele. Ya sebeza. Hape ya tusa.”—Mafilipi 4:6, 7.

Munna ni musali ha ba shelana, ba tokwa ku ba ba ba ‘teeleza kapili, ba ba liyeha kwa ku bulela, ba ba liyeha kwa ku halifa.’ (Jakobo 1:19) Kelezo ye cwalo i kondolokisa ku ikambota. George u zwelapili kuli: “Ha ni sebelisa kelezo ya ku lata musal’a ka ni ku mu eza sina mo ni ikezeza, na bona ze nde ze zwa mwateñi ka bubebe. Ku mu bela bunolo ku ni kuteka.” (Maefese 5:28-33) Ee, Bibele i lu luta mwa ku itumelela ku sa petahala kwa luna ni mo lu kona ku talimanela ni kona. Hape i lu luta mwa ku konela ku talimana ni ku sa petahala kwa ba bañwi.

Kelezo Ye Inelela

Salumoni Mulena ya butali n’a ize: “U sepe [Muñ’a] Bupilo ka pilu ya hao kaufela, mi u si ke wa tiyela fa butali bwa hao; u beye [Muñ’a] Bupilo mwa milelo ya hao kaufela, mi Yena u ka lukisa linzila za hao.” (Liproverbia 3:5, 6) Manzwi ao ki a bunolo-nolo, kono ki a fita mwa maikuto luli!

Bibele i susumeza mutu ku eza ze nde. Ba ba lata Mulimu i ba konisa ku pila ka ku lumelelana ni tato ya hae ni ku fumana tabo mwa ku “ya ka mulao wa [Muñ’a] Bupilo.” (Samu 119:1) Ku sina taba kuli lu talimana ni miinelo ifi, Bibele i na ni ketelelo ni kelezo ze lu tokwa. (Isaya 48:17, 18) Mu i balange ka zazi, mu nahanisise ze mu bala, mi mu li sebelise. I ka twekisa mihupulo ya mina mi i ka libisa tokomelo ya mina kwa lika ze kenile ni ze yahisa. (Mafilipi 4:8, 9) Mu ka ituta mwa ku pilela ni mwa ku ikolela bupilo. Hape mu ka ituta ku lata Mubupi wa bupilo.

Ka ku latelela nzila ye cwalo, mu ka fumana, sina mo ba fumanezi bolule-lule ba bañwi, kuli Bibele haki buka fela ye nde. Kaniti luli i ka ba buka ye luta mwa ku pilela!

[Siswaniso se si fa likepe 6]

Bibele i kona ku tiisa katulo ya mina ya ku tula mikwa ye lubeta

[Siswaniso se si fa likepe 7]

Bibele i mi luta mwa ku sutelela ku Mulimu