Kana Mwa Lata Hahulu-Hulu Likelezo za Jehova?
Kana Mwa Lata Hahulu-Hulu Likelezo za Jehova?
“Pilu ya ka i tokomela likelezo za hao; mi ni li lata hahulu-hulu.”—SAMU 119:167.
1. Ki kai sihulu ko ku kuta-kutezwi ku bulelwa za likelezo za Jehova?
JEHOVA u bata kuli batu ba hae ba be ba ba tabile. Kono kuli lu be ni tabo sakata, lu lukela ku zamaya mwa mulao wa Mulimu ni ku mamela litaelo za hae. Kuli lu eze cwalo, u lu fa likelezo. Zeo li kuta-kutezwi ku bulelwa mwa Mañolo, sihulu mwa Samu 119, yeo mwendi ne i lukisizwe ki nabi wa Mujuda Ezekiasi, ya n’a li mwanana. Pina ye munati yeo i kala ka manzwi a: “Ba filwe mbuyoti ba ba zamaya ka busepahali, ba ba ya ka mulao wa [Muñ’a] Bupilo. Ba filwe mbuyoti ba ba tokomela likelezo za hae, ba ba mu batisisa ka lipilu za bona kaufela.”—Samu 119:1, 2.
2. Likelezo za Mulimu li swalisani cwañi ni tabo?
2 Lu “ya ka mulao wa [Muñ’a] Bupilo” ka ku ikungela zibo ye nepahezi ya Linzwi la hae ni ku i sebelisa mwa bupilo. Kono bakeñisa kuli ha lu si ka petahala, lu tokwa likelezo. Linzwi la Siheberu le li tolokilwe kuli “likelezo” li bonisa kuli Mulimu u lu hupulisa milao, litaelo, ni zamaiso ya hae. (Mateu 10:18-20) Lu ka ba ba ba tabile kamita ha lu zwelapili ku mamela likelezo ze cwalo, kakuli li lu tusa ku pima malaba a kwa moya a’ tisa maziyezi a matuna ni matomola pilu.
Mu Lamatele Likelezo za Jehova
3. Ka ku toma fa Samu 119:60, 61, lu na ni sepo mañi?
3 Likelezo za Mulimu ne li za butokwa hahulu ku walisamu ya n’a opezi kuli: “Ni tukufalezwi, mi a ni isi kwapili ku eza litaelo za hao. Mihala ye ba ni teya ba ba maswe i ni tingulukile, kono ha ni libali mulao wa hao.” (Samu 119:60, 61) Likelezo za Jehova li lu tusa ku tiyela nyandiso kakuli lu kozwi kuli Ndat’a luna wa kwa lihalimu wa kona ku puma mihala ya kaniso ye li lu tateza lila. Ka nako ye swanela, u lu lukulula kwa litibelo ze cwalo ilikuli lu kone ku peta musebezi wa luna wa ku kutaza Mubuso.—Mareka 13:10.
4. Lu swanela ku eza cwañi ka za likelezo za Mulimu?
4 Fokuñwi, lu sikululwa ka likelezo za Jehova. Haike lu itebuhe kamita sikululo yeo, sina mwa n’a itebuhezi yona walisamu. N’a bulelezi Mulimu ka tapelo kuli: “Likelezo za hao, zona, ki tabo ya ka . . . Ni [lata] litemuso za hao.” (Samu 119:24, 119) Lu na ni likelezo ze ñata za Mulimu ku fita za n’a na ni zona walisamu. Litaba ze mianda-nda ze mwa Mañolo a Siheberu ili ze kutezwi ku bulelwa mwa Mañolo a Sigerike li lu hupuza litaelo zeo Jehova n’a file sicaba sa hae mwatas’a Mulao. Hape li lu hupuza ni milelo ya hae ka za puteho ya Sikreste. Mulimu h’a bona kuli kwa lukela ku lu hupuza lika ze ama milao ya hae, lwa itebuha ketelelo yeo. Mi ka ku ‘itinga fa likelezo za Jehova,’ lu pima lipepezo za sibi ze sa tabisi Mubupi wa luna ili ze lu byangula tabo.—Samu 119:31.
5. Lu kona ku fita cwañi fa ku lata hahulu-hulu likelezo za Jehova?
5 Lu swanela ku lata cwañi likelezo za Jehova? Walisamu n’a opezi kuli: ‘Pilu ya ka i tokomela likelezo za hao; mi ni li lata hahulu-hulu.’ (Samu 119:167) Lu ka fita fa ku lata hahulu-hulu likelezo za Jehova haiba lu l’i nga ni ku li amuhela ku ba mamela ya Ndate ya lu tokomela luli. (1 Pitrosi 5:6, 7) Lu tokwa likelezo za hae, mi lilato la luna ku zona li ka hula ha lu nze lu bona mo li lu tuseza.
Libaka Ha Lu Tokwa Likelezo za Mulimu
6. Ki lifi libaka le liñwi ha lu tokwa likelezo za Jehova, mi kiñi se si ka lu tusa ku li hupula?
6 Libaka le liñwi ha lu tokwa likelezo za Jehova kikuli lu na ni buitibali. Buka ye bizwa The World Book Encyclopedia i li: “Hañata, batu ba ya ba libala ze ñata nako ha i nze i ya. . . . Mwendi mu kile mwa palelwa ku hupula libizo kamba taba ye ñwi ye ne mu hupula kuli mwa i ziba luli. . . . Buitibali bwa swalelele bo bu cwalo, bo bu ezahalanga hañata, bu bizwa kuli ki bupalelwi bwa ku kutisa mwa munahano. Ba sayansi ba bu bapanya kwa ku lika ku bata silo se si latehile mwa muzuzu o cicalile lika ze ñata. . . . Mukwa o munde wa ku bona ka ona kuli mwa hupula taba ye ñwi ki ku ituta yona ha se ku fitile nako ye ñata ku zwa fo mu nahanela kuli se mu i zibile hande.” Tuto ya ka tukufalelo ni ku kuta-kutela i ka lu tusa ku hupula likelezo za Mulimu ni ku li latelela kuli lu tusehe.
7. Ki kabakalañi likelezo za Mulimu ha li tokwahala kacenu ku fita lili kaufela?
7 Lu tokwa hahulu likelezo za Jehova kacenu ku fita haisali kakuli bumaswe se bu fitile fa sipimo se situna hahulu ku fita lili kaufela. Ha lu isa pilu kwa likelezo za Mulimu, lu ipumanela temuho ye tokwahala mwa ku picuka ku hohelwa mwa mikwa ye maswe ya lifasi. Walisamu n’a ize: “Ni fita ba ba ni lutile kaufela kwa kutwisiso; kakuli ni nahanile likelezo za hao. Ni fita ni ba ba hulile kwa zibo; kakuli ni tokomela litemuso za hao. Ni fapusize mautu a ka mwa nzila ye maswe, kuli ni mamele linzwi la hao.” (Samu 119:99-101) Ka ku mamela likelezo za Mulimu, lu ka ambuka “nzila ye maswe” mi lu ka pima ku ba sina silundwamanje sa batu bao “kutwisiso ya bona i fifalile, mi ba kwahule ni bupilo bwa Mulimu.”—Maefese 4:17-19.
8. Lu kona ku tusiwa cwañi ku ba ni buikoneli bwa ku tula litiko za tumelo?
8 Likelezo za Mulimu hape za tokwahala kakuli za lu tiisa ku tiyela miliko ya luna ye miñata mwa “nako ya maungulo” ye. (Daniele 12:4) Ha ne ku si ke kwa ba ni likelezo zeo ne lu ka ba ‘bautwi fela ba ba libala.’ (Jakobo 1:25) Kono ku tukufalelwa tuto ya Mañolo ya ka butu ni ka puteho ka ku itusisa lihatiso za “mutanga ya sepahala, ya na ni kutwisiso” ku ka lu tusa ku tula litiko za tumelo. (Mateu 24:45-47) Litukiso za kwa moya ze cwalo li lu konisa ku lemuha ze lu lukela ku eza kuli lu tabise Jehova ha lu ipumana lu li mwa miliko.
Za Butokwa Ze I Peta Mikopano ya Luna
9. “Batu ba ba li limpo” ki bomañi, mi ba tusa cwañi balumeli ba bañwi?
9 Butokwi bwa luna bwa likelezo za Mulimu bu talelezwa ka nzila ye ñwi kwa mikopano ya Sikreste, k’o mizwale ba ba ketilwe ba fa lituto. Muapositola Paulusi n’a ñozi kuli Jesu ha n’a “kambamezi kwa lihalimu, u isize lihapwa ku y’o ba luwa, mi u file batu [ba ba li, NW] limpo.” Paulusi n’a ekelize kuli: “[Kreste] isali yena ya file ba bañwi kuli ba be baapositola, ba bañwi ba be bapolofita, ba bañwi ba be babuleli, ba bañwi ba be balisana ni baluti; ili ku hulisa balumeli mwa bupetehi, ku eza sebelezo ya bulisana, ni ku yahisa mubili wa Kreste.” (Maefese 4:8, 11, 12) Luli lwa kona ku itumela hahulu kuli “batu ba ba li limpo” bao—bona maeluda ba ba ketilwe—ba libisa mamelelo ya luna kwa likelezo za Jehova ha lu putehanela ku lapela!
10. Ki sifi sisupo se situna sa Maheberu 10:24, 25?
10 Buitumelo kwa litukiso za Mulimu bu ka lu susumeza ku fumaneha ka viki ni viki kwa mikopano ya luna ye ketalizoho yote ya puteho. Paulusi n’a koñomekile butokwi bwa ku kopana hamoho kamita. N’a ñozi kuli: “A lu babalelane, kuli lu susumezane mwa lilato ni mwa misebezi ye minde. Lu si ke lwa tuhela liputeho za luna, mo ba ezeza ba bañwi; kono lu kutazane, sihulu ka ku bona kuli lizazi le lituna li sutelezi.”—Maheberu 10:24, 25.
11. O muñwi ni o muñwi wa mikopano ya luna ya ka viki ni viki i lu tusa cwañi?
11 Kana mwa itebuha tuso ye i lu fa mikopano ya luna? Tuto ya ka viki ya Tora ya ku Libelela i tiisa tumelo ya luna, i lu tusa ku latelela likelezo za Jehova, mi i lu sileleza kwa “moya wa lifasi.” (1 Makorinte 2:12; Likezo 15:31) Kwa Mukopano wa Nyangela, babuleli ba fanga lituto ze zwa mwa Linzwi la Mulimu, hamoho ni likelezo za Jehova ni “manzwi a bupilo bo bu sa feli” a mande hahulu a bulezwi ki Jesu. (Joani 6:68; 7:46; Mateu 5:1–7:29) Bukwala bwa luna bwa ku luta bwa bolosolwa ka Sikolo sa Bukombwa sa Teokratiki. Mukopano wa Sebelezo u lu tusa hahulu-hulu ku bolosola mutahisezo wa luna wa taba ye nde fa ndu ni ndu, fa misipili ya makutisezo, kwa lituto za Bibele za mwa mandu, ni mwa likalulo ze ñwi za bukombwa bwa luna. Sikwata se sinyinyani kwa Tuto ya Buka ya Puteho si lu fa kolo ye tuna ya ku bulela litaba zeo hañata li na ni likelezo za Mulimu.
12, 13. Batu ba Mulimu mwa naha ye ñwi ya kwa Asia ba bonisize cwañi kuli ba itebuha mikopano ya Sikreste?
12 Ku fumaneha kamita kwa mikopano ya puteho ku lu tusa ku hupula litaelo za Mulimu ni ku tiya kwa moya ha ku na ni ndwa, butata bwa masheleñi, ni litiko ze ñwi za tumelo ya luna. Butokwa bwa mikopano ne bu lemuhilwe hahulu ki Bakreste ba ba bat’o eza 70 ba mwa naha ye ñwi ya kwa Asia. Bona bao ne ba tunuzwi mwa mandu a bona mi ne ba si na mwa ku ezeza kwand’a ku y’o pila mwa mushitu o mutuna. Kakuli ne ba na ni tundamo ya ku zwelapili ku kopana hamoho kamita, ne ba kutezi kwa munzi wa bona o n’o shandauzwi ki ndwa, ba pangutula ze ne siyezi kwa Ndu ya Mubuso, mi ba i yaha sinca mwa mutemwa.
13 Hamulaho wa ku tiyela ndwa ye ne tandile lilimo mwa kalulo ye ñwi ya naha ye swana yeo, batu ba Jehova ba sa sebeza ka tukufalelo. Yo muñwi wa maeluda mwa silalanda seo n’a buzizwe kuli: “Ki nto mañi ye ne i tusize hahulu mwa ku swalisanisa mizwale?” N’a alabile kuli: “Ha lu si ka kansula mukopano ka lilimo ze 19. Fokuñwi bakeñisa ku tunyiswa kwa limbomba kamba butata bo buñwi, mizwale ba bañwi ne ba sa koni ku fita kwa sibaka sa mukopano, kono ni kamuta ne lu si ka kansula mukopano.” Mizwale ni likaizeli ba ba lateha bao kaniti ba utwisisa butokwa bwa ku ‘sa tuhela liputeho za bona.’
14. Lu kona ku itutañi kwa mukwa wa Anna wa musupali?
14 Mbelwa wa lilimo ze 84, yena Anna, “n’a sa zwi mwa Tempele.” Kabakaleo, n’a li teñi mbututu Jesu ha n’a isizwe kwateñi hamulahonyana wa ku pepwa kwa hae. (Luka 2:36-38) Kana mu ikatulezi ku sa shuta mikopano? Kana mwa lika hahulu ku fumaneha kwa kalulo ni kalulo ya mikopano ya luna ye mituna ni ye minyinyani? Lituto ze tusa kwa moya ze fiwanga kwa mikopano yeo li lu fa bupaki tota bwa kuli Ndat’a luna wa kwa lihalimu wa tokomela batu ba hae. (Isaya 40:11) Linako zeo hape li hulisa mwangalwa, mi ha lu fumaneha teñi, lu paka kuli lwa itebuha likelezo za Jehova.—Nehemia 8:5-8, 12.
Ku Taluhanywa ki Likelezo za Jehova
15, 16. Ku mamela likelezo za Jehova ku ama cwañi muzamao wa luna?
15 Ku mamela likelezo za Mulimu kwa lu taluhanya kwa lifasi le li maswe le. Ka mutala, ku utwa likelezo za Mulimu ku lu ambusa kwa buhule. (Deuteronoma 5:18; Liproverbia 6:29-35; Maheberu 13:4) Muliko wa ku bata ku puma, ku sa sepahala, kamba ku uzwa wa kona ku fenyiwa ka ku latelela likelezo za Mulimu. (Exoda 20:15, 16; Livitike 19:11; Liproverbia 30:7-9; Maefese 4:25, 28; Maheberu 13:18) Ku mamela likelezo za Jehova hape ku lu hanisa ku lombota, ku ba ni sikoto mwa pilu, kamba ku sawana mutu yo muñwi.—Livitike 19:16, 18; Samu 15:1, 3.
16 Ka ku utwa likelezo za Mulimu, lu zwelapili ku ba ba ba keniselizwe kamba ku kauhanyezwa sebelezo ya hae. Mi ki kwa butokwa hakalo ku kauhana ni lifasi le! Jesu ha n’a lapela ku Jehova mwa busihu bwa mafelelezo bwa bupilo bwa hae fa lifasi-mubu, n’a kupezi balateleli ba hae taba ye: “Ni ba bulelezi Linzwi la hao; mi lifasi li ba toile, kakuli bona hasi ba lifasi, sina na, ha ni si wa lifasi. Ha ni ku lapeli kuli u ba zwise mwa lifasi, kono kuli u ba sileleze kwa bumaswe. Hasi ba lifasi, sina na ha ni si wa lifasi. U ba fe ku ikenisa ka niti ya hao; kakuli Linzwi la hao ki yona niti.” (Joani 17:14-17) Haike lu zwelepili ku itebuha Linzwi la Mulimu, le li lu kauhanyeza ku eza sebelezo ya hae ye kenile.
17. Ne ku ka ezahalañi ha ne lu ka itibaza likelezo za Mulimu, kacwalo lu swanela ku ezañi?
17 Bakeñisa kuli lu batanga ba Jehova, lu bata ku zwelapili ku amuhelwa ki yena mwa sebelezo ya hae. Kono ha ne lu ka itibaza likelezo za Mulimu, ne lu ka kona ku komiwa ki moya wa lifasi le, o fuzelelwa mwa buñata bwa lipulelo, lihatiso, za ku itabisa ka zona, ni muzamao wa lona. Mi kaniti ha lu bati ku ba ba ba lata mali, ba ba itumbaeta, ba ba ikuhumusa, ba ba si na buitumelo, ba ba hana za Mulimu, ba ba na ni buhali, matanya, ba ba inuneka, ba ba lata minyaka isi Mulimu. T’o ki tu sikai twa tulemeno to ba bonisa ba ba ikauhanyize ku Mulimu. (2 Timotea 3:1-5) Bakeñisa kuli se lu keni ka butungi mwa mazazi a mafelelezo a muinelo wa linto wo, o maswe, haike lu zwelepili ku lapelela tuso ya Mulimu ilikuli lu kone ku zwelapili ku mamela likelezo za Jehova mi kacwalo ni ku ‘itemuhela ka ku ya ka linzwi la hae.’—Samu 119:9.
18. Ku mamela likelezo za Mulimu ku ka lu ezisa lika mañi ze nde?
18 Likelezo za Jehova ha li lu talusezi fela lika ze lu lukela ku ambuka ku eza. Ku mamela likelezo za hae ku ka lu ezisa lika ze nde, ili ku lu susumeza ku sepa Jehova ka ku tiya ni ku mu lata ka pilu, moyo, kutwisiso, ni m’ata a luna kaufela. (Deuteronoma 6:5; Samu 4:5; Liproverbia 3:5, 6; Mateu 22:37; Mareka 12:30) Likelezo za Mulimu hape li lu susumeza ku lata batu ba bañwi. (Livitike 19:18; Mateu 22:39) Sihulu lu bonisa kuli lwa lata Mulimu ni batu ba bañwi ka ku eza tato ya Mulimu ni ku taluseza ba bañwi zibo ye pilisa ya “ku ziba za Mulimu.”—Liproverbia 2:1-5.
Ku Mamela Likelezo za Jehova Kw’a Pilisa!
19. Lu kona ku bonisa cwañi ba bañwi kuli ku utwa likelezo za Jehova ki kwa ngana mi kwa tusa?
19 Ha lu mamela likelezo za Jehova ni ku tusa ba bañwi ku li mamela, lu ka ipilisa ni ku pilisa ba ba lu utwa. (1 Timotea 4:16) Lu kona ku bonisa cwañi ba bañwi kuli ku utwa likelezo za Jehova kaniti ki kwa ngana mi kwa tusa? Ka ku sebelisa likuka za Bibele mwa bupilo bwa luna beñi. “Ba ba ketezwi bupilo bo bu sa feli” kacwalo ba ka ba ni bupaki bwa kuli mupilelo o talusizwe mwa Linzwi la Mulimu luli ki ona o munde ka ku fitisisa wa ku pila ka ona. (Likezo 13:48) Hape ba ka bona kuli ‘luli Mulimu u mwateñi ku luna’ mi ba ka susumezwa ku t’o swalisana ni luna mwa ku lapela Jehova Muambakani ya Pahami.—1 Makorinte 14:24, 25.
20, 21. Likelezo za Mulimu ni moya wa hae li ka lu konisa ku ezañi?
20 Ka ku zwelapili ku ituta Mañolo, ku sebelisa ze lu ituta, ni ku itusisa ka ku tala litukiso za Jehova za kwa moya, lu ka fita fa ku lata hahulu-hulu likelezo za hae. Ha lu li utwa, likelezo zeo li ka lu tusa ku apala “mutu yo munca ya bupwa ka siswaniso sa Mulimu mwa ku luka, ni mwa ku kena kwa niti.” (Maefese 4:20-24) Likelezo za Jehova ni moya wa hae o kenile li ka lu konisa ku bonisa lilato, tabo, kozo, pilu-telele, musa, bunde, busepahali, buishuwo, ni buiswalo—ili mikwa ye fapana hahulu ni tulemeno twa lifasi le li lapalezi mwa m’ata a Satani! (Magalata 5:22, 23; 1 Joani 5:19) Kacwalo, lwa kona ku itumela ha lu hupuzwa z’a tokwa Jehova ki ku eza tuto ya luna ya ka butu ya ku ituta Bibele, ki maeluda ba ba ketilwe, ni ha lu li kwa mikopano ya luna, ye mituna ni ye minyinyani.
21 Bakeñisa kuli lu mamela likelezo za Jehova, lwa kona ku nyakalala niha lu nyandela ku luka. (Luka 6:22, 23) Lu itingile ku Mulimu kuli a lu banduse mwa miinelo ye t’ata maswe. Nto yeo ki ya butokwa sihulu ka ku bona kuli macaba kaufela a sweli ku kopanyezwa “ndwa ya lizazi le lituna la Mulimu Ya-Mata-Kaufela” fa Harmagedoni.—Sinulo 16:14-16.
22. Lu swanela ku ba ni tundamo ya ku ezañi ka za likelezo za Jehova?
22 Kuli lu fiwe mpo ye si ka libelelwa ya bupilo bo bu sa feli, lu lukela ku lata hahulu-hulu likelezo za Jehova ni ku li mamela ka pilu kaufela. Haike he lu be ni moya wa walisamu ya n’a opezi kuli: “Likelezo za hao ki za niti ku ya ku ile; u ni fe kutwisiso, mi ni ka pila.” (Samu 119:144) Mi haike lu bonise tundamo ye boniswa ki manzwi a walisamu a’ li: “Ni biza ku Wena [Jehova]; u ni pilise, mi ni ka tokomela likelezo za hao.” (Samu 119:146) Ee, ka manzwi ni ka likezo, haike lu bonise bupaki bwa kuli luli lu lata hahulu-hulu likelezo za Jehova.
Ne Mu Ka Alaba Cwañi?
• Walisamu n’a nga cwañi likelezo za Jehova?
• Ki kabakalañi ha lu tokwa likelezo za Mulimu?
• Mikopano ya luna i petañi ha ku taha ku za likelezo za Mulimu?
• Likelezo za Jehova li lu taluhanya cwañi kwa lifasi le?
[Lipuzo za Tuto]
[Siswaniso se si fa likepe 25]
Walisamu n’a lata hahulu-hulu likelezo za Jehova
[Maswaniso a fa likepe 26, 27]
Ka ku likanyisa mutala wa Anna, kana mu ikatulezi ku sa shuta mikopano?
[Siswaniso se si fa likepe 28]
Ku utwa likelezo za Jehova ku lu taluhanya kuli lu kenile mi lwa lumelezwa mwa sebelezo ya hae