Likombwa za Mulimu Ki Bomañi Kacenu?
Likombwa za Mulimu Ki Bomañi Kacenu?
“Ku kona kwa luna ku zwa ku Mulimu; hape ki Yena ya lu fa ku kona ku ba fa sebelezo ya bulikani bo bunca.”—2 MAKORINTE 3:5, 6.
1, 2. Bakreste kaufela ba mwa lilimo za mwanda wa pili ne ba na ni buikalabelo mañi, kono lika ne li cincize cwañi?
MWA lilimo za mwanda wa pili wa Linako za Luna, Bakreste kaufela ne ba na ni buikalabelo bo butuna, ili musebezi wa ku kutaza taba ye nde. Kaufel’a bona ne ba tozizwe ka moya mi ne ba li likombwa za bulikani bo bunca. Ba bañwi ne ba na ni buikalabelo bo buñwi hape, inge cwalo bwa ku luta mwa puteho. (1 Makorinte 12:27-29; Maefese 4:11) Bashemi ne ba na ni litamo ze buima mwa lubasi. (Makolose 3:18-21) Kono kaufel’a bona ne ba abana mwa musebezi o mutomo ili o butokwa hahulu wa ku kutaza. Mwa Sigerike sa kwa makalelo se si mwa Mañolo a Sikreste, buikalabelo b’o ne bu bizwa di·a·ko·niʹa, ili sebelezo, kamba bukombwa.—Makolose 4:17.
2 Nako ha ne i nze i ya, lika za cinca. Kwa zuha sikwata se ne si bizwa kuli ki ba bahulu ba bulapeli, ili bao ne ba ipile tohonolo ya ku kutaza ba nosi. (Likezo 20:30) Ba bahulu ba bulapeli bao ne li kakwatanyana fela ka batu be ne ba ipiza kuli ki Bakreste. Ba bañwi kaufela ba kala ku bizwa kuli ki batu-tu fela. Batu-tu fela bao ba lutilwe kuli ba na ni litamo ze ñwi, ze kopanyeleza ku fa linubu ze babalela ba bahulu ba bulapeli. Kono buñata bwa bona se ba bile bateelezi fela ha ku taha ku za ku kutaza.
3, 4. (a) Bakreste ka buñwi mwa Krestendomu ba banga cwañi likombwa? (b) Mwa Krestendomu ki mutu ya cwañi y’a ngiwa ku ba sikombwa, mi ki kabakalañi hakusicwalo mwahal’a Lipaki za Jehova?
3 Ba bahulu ba bulapeli ba ipala ku ba likombwa (ili linzwi le li tolokilwe ku zwa fa linzwi la si-Latin le li toloka di·aʹko·nos, ilikuli “mutanga”). * Kuli ba be likombwa, ba itutanga lituto ze luta za bulapeli kwa likolo ze pahami kamba za buprisita mi ha ba feza, ba sumekelwa. Hatiso ye bizwa The International Standard Bible Encyclopedia i li: “Ku ‘sumekela’ hañata ku talusa situlo se si ipitezi se ba fiwa likombwa kamba baprisita ka lizo ze tomilwe ki mulao. Kona ku sumekela k’o ku kopanyeleza koñomeko ya kuli ba na ni m’ata a ku shaela Linzwi kamba ku zamaisa sakramenti (sizo sa), kamba ku eza bubeli bwa zona zeo.” Ya sumekelanga likombwa ki mañi? Hatiso ya The New Encyclopædia Britannica i talusa kuli: “Mwa likeleke mo ku sa na ni bu-bishopu, sikombwa se si sumekelanga kamita ki bishopu. Mwa likeleke mo ku na ni sitopa sa baeteleli, ku sumekela ku eziwanga ki likombwa ze ku sona sitopa seo.”
4 Kacwalo mwa likeleke za Krestendomu, tohonolo ya ku ba sikombwa ki ya batu ba banyinyani fela. Kono mwahal’a Lipaki za Jehova hakucwalo. Kabakalañi? Kakuli ne ku si cwalo mwa puteho ya Sikreste ya mwa lilimo za mwanda wa pili.
Likombwa za Mulimu Ki Bafi Luli?
5. Ka ku ya ka Bibele, likombwa ba kopanyeleza bomañi?
5 Ka ku ya ka Bibele, balapeli ba Jehova kaufela—ba mwa lihalimu ni ba ba fa lifasi-mubu—ki likombwa. Mangeloi n’a kombwekezi Jesu. (Mateu 4:11; 26:53; Luka 22:43) Mangeloi hape a “sebeleza ba ba ka yola sanda sa bupilo.” (Maheberu 1:14; Mateu 18:10) Jesu n’a li sikombwa. N’a ize: “Mwan’a mutu [n’a] si ka taha kuli a sebelezwe, kono ili ku sebeleza.” (Mateu 20:28; Maroma 15:8) Kacwalo, ka ku ba kuli balateleli ba Jesu ba lukela ku ‘hata mwa n’a hatile,’ ha ku komokisi kuli ni bona ba lukela ku ba likombwa.—1 Pitrosi 2:21.
6. Jesu n’a bonisize cwañi kuli balutiwa ba hae ba lukela ku ba likombwa?
6 Nakonyana pili a si ka kambamela kale kwa lihalimu, Jesu n’a bulelezi balutiwa ba hae kuli: “Mu ye . . . , mu lute macaba kaufela, mu ba kolobeze ka Libizo la Ndate, ni la Mwana, ni la Moya o Kenile; mu ba lute ku mamela ze ni mi laezi kaufela.” (Mateu 28:19, 20) Balutiwa ba Jesu ne ba lukela ku tahisa balutiwa—ne ba lukela ku ba likombwa. Balutiwa ba banca be ne ba ka tahisa ne ba ka ituta ku mamela lika kaufela za n’a laezi Jesu, ku kopanyeleza ni taelo ya ku tahisa balutiwa. Ibe munna kamba musali, yo muhulu kamba mwanana, mulutiwa wa niti wa Jesu Kreste kaufela n’a ka ba sikombwa.—Joele 2:28, 29.
7, 8. (a) Ki mañolo mañi a bonisa kuli Bakreste kaufela ba niti ki likombwa? (b) Ki lipuzo mañi ze buziwa ka za ku sumekela?
7 Ka ku lumelelana ni seo, fa lizazi la Pentekonta ya 33 C.E., balutiwa ba Jesu be ne ba li teñi kaufela, banna ni basali, ba swalisana mwa ku bulela litaba “ze tuna za Mulimu.” (Likezo 2:1-11) Hape, muapositola Paulusi n’a ñozi kuli: “Mutu u lumela ka pilu, kuli a beiwe ya lukile; mi u paka ka mulomo, kuli a piliswe.” (Maroma 10:10) Paulusi n’a si ka ñolela manzwi ao sitopa sa batu ba banyinyani fela sa ba bahulu ba bulapeli, kono n’a ñolezi “kaufela [be ne ba] ina mwa Roma, ba ba latwa ki Mulimu.” (Maroma 1:1, 7) Ka nzila ye swana, ‘balumeli kaufela be ne ba li mwa Efese ni be ne ba lumezi ku Jesu Kreste’ ne ba na ni ku ‘apala kwa mautu a bona za ku itukiseza ku isa Evangeli ya kozo.’ (Maefese 1:1; 6:15) Hape kaufela be ne ba utwile liñolo le ne li ñolezwi Maheberu ne ba na ni ku ‘swala ka tata buipulelo bwa sepo ya bona, ba sa zikinyehi.’—Maheberu 10:23.
8 Kono mutu u kona ku ba lili sikombwa? Kamba lu buze kuli, u kona ku sumekelwa lili? Mi ki mañi ya swanela ku mu sumekela?
Ku Sumekelwa Kuli Mutu A Be Sikombwa ku Kona ku Eziwa Lili?
9. Jesu n’a sumekezwi lili, mi ki mañi ya n’a mu sumekezi?
9 Kuli lu zibe kuli mutu u kona ku sumekelwa lili ni kuli ya mu sumekela ki mañi, lu boneñi mutala wa Jesu Kreste. N’a si na liñolo la bupaki bwa ku sumekelwa kamba le ne li bonisa kuli u felize lituto za bulapeli le ne li zwa kwa sikolo se siñwi ili le ne li bonisa kuli n’a li sikombwa. Hape ha ku na mutu wa fa lifasi ya n’a mu sumekezi. Kono cwale, ki kabakalañi ha lu kona ku bulela kuli n’a li sikombwa? Kakuli manzwi a Isaya a buyelezwi n’a talelelizwe ku yena a’ li: “Moya wa Mulena u fahalimw’a ka, kakuli u ni tozize, kuli ni [bulele] . . . Evangeli.” (Luka 4:17-19; Isaya 61:1) Manzwi ao a bonisa hande-nde kuli Jesu n’a filwe musebezi wa ku bulela Evangeli. Ki mañi ya n’a mu file musebezi w’o? Ka ku ba kuli moya wa Jehova ki ona o ne u mu tozize kuli a eze musebezi, kwa bonahala hande kuli Jehova Mulimu ki yena ya n’a sumekezi Jesu. Seo ne si ezahezi lili? Moya wa Jehova ne u shetumukezi ku Jesu ha n’a kolobelizwe. (Luka 3:21, 22) Kacwalo, n’a sumekezwi ka nako ya n’a kolobezwa.
10. Ki mañi ya fitisa sikombwa sa Sikreste fa “ku kona”?
10 Balateleli ba Jesu ba mwa lilimo za mwanda wa pili bo? Mayemo a bona a ku ba likombwa ni ona n’a zwelela ku Jehova. Paulusi n’a ize: “Ku kona kwa luna ku zwa ku Mulimu; hape ki Yena ya lu fa ku kona ku ba fa sebelezo ya bulikani bo bunca.” (2 Makorinte 3:5, 6) Jehova u konisa cwañi balapeli ba hae ku ba likombwa? Mu nyakisise mutala wa Timotea, y’o Paulusi n’a bulezi kuli ki “sikombwa sa Mulimu mwa Evangeli ya Kreste.”—1 Matesalonika 3:2.
11, 12. Timotea n’a ezize cwañi zwelopili kuli a fite fa ku ba sikombwa?
11 Manzwi a’ latelela a n’a ñolezwi Timotea a lu tusa ku utwisisa mwa n’a bezi sikombwa: “Haili wena u tiyele ku z’o itutile, ze ku kolisize, u nz’o ziba y’o itutile zona ku yena. Ku zwa kwa bwanana u ziba Mañolo a kenile, a’ kona ku ku talifisa kuli u piliswe ka ku lumela ku Jesu Kreste.” (2 Timotea 3:14, 15) Tumelo ya Timotea ne i tomile fa zibo ya Mañolo, mi ki yona ye ne i ka mu ezisa ku eza zibahazo ya fa nyangela. Kana ki ku bala fela kwa ka butu kwa n’a tokwa kuli a eze cwalo? Kutokwa. Timotea n’a tokwa tuso ya kuli a be ni zibo ye nepahezi ni kutwisiso ya lika za kwa moya za n’a bala. (Makolose 1:9) Kacwalo Timotea n’a ‘kolisizwe.’ Ka ku ba kuli n’a zibile Mañolo “ku zwa kwa bwanana,” ku lukela ku ba kuli baluti ba hae ba pili ne li bom’ahe ni bokukw’a hae, kakuli ku bonahala kuli bondat’ahe ne ba si balumeli.—2 Timotea 1:5.
12 Niteñi, ku ba sikombwa kwa Timotea ne ku amile ze ñata. Taba i liñwi kikuli tumelo ya hae ne i tiisizwe ki ku swalisana ni Bakreste be ne ba li mwa liputeho ze n’e li bukaufi. Lu ziba cwañi seo? Kakuli Paulusi ha n’a boni Timotea lwa pili, mutangana y’o “n’a pakwa ki balumeli ba ba mwa Listra ni Ikone.” (Likezo 16:2) Hape, mwa mazazi ao, mizwale ba bañwi ne ba ñolelanga liputeho mañolo a ku li tiisa. Mi baokameli ne ba li potelanga kuli ba li yahise. Litukiso ze cwalo ne li tusanga Bakreste sina Timotea kuli ba hule kwa moya.—Likezo 15:22-32; 1 Pitrosi 1:1.
13. Timotea n’a sumekezwi lili kuli a be sikombwa, mi ki kabakalañi ha mu kana mwa bulela kuli zwelopili ya hae ya kwa moya ne i si ka felela f’o?
13 Ka ku ya ka taelo ya Jesu ye ñozwi kwa Mateu 28:19, 20, lwa kona ku kolwa kuli ka nako ye ñwi, tumelo ya Timotea ne i mu ezisize ku likanyisa Jesu ni ku kolobezwa. (Mateu 3:15-17; Maheberu 10:5-9) Seo ne li sisupo sa kuli Timotea n’a ineezi ka pilu kaufela ku Mulimu. H’a kolobezwa, Timotea a ba sikombwa. Ku zwelela honaf’o, bupilo bwa hae, m’ata a hae, ni lika kaufela za n’a na ni zona za ba za Mulimu. Yeo ne li kalulo ye tuna ya bulapeli bwa hae, ili “ku sebeleza Mulimu.” Niteñi, Timotea ha s’a ezize zeo n’a si ka nama fela wa toze. A zwelapili ku hula kwa moya, ili ku ba sikombwa wa Sikreste ya hulile. Seo ne si ezahezi kabakala kuli Timotea n’a swalisana hahulu ni Bakreste ba ba hulile ba ba cwale ka Paulusi, n’a ezanga tuto ya hae ya ka butu, ni ku kutaza ka cisehelo.—1 Timotea 4:14; 2 Timotea 2:2; Maheberu 6:1.
14. Kacenu, mutu ya “ketezwi bupilo bo bu sa feli” u kona ku eza cwañi zwelopili kuli a fite fa ku ba sikombwa?
14 Kacenu, ku sumekelwa kuli mutu a eze bukombwa bwa Sikreste ni kona ku cwalo. Mutu ya “ketezwi bupilo bo bu sa feli” u tusiwa ku ituta ka za Mulimu ni milelo ya hae ka tuto ya Bibele. (Likezo 13:48) Mutu y’o u ituta ku itusisa likuka za Bibele mwa bupilo bwa hae ni ku fitisa litapelo za ngana ku Mulimu. (Samu 1:1-3; Liproverbia 2:1-9; 1 Matesalonika 5:17, 18) U swalisana ni balumeli ba bañwi ni ku itusisa hande litukiso ze eziwa ki “mutanga ya sepahala, ya na ni kutwisiso.” (Mateu 24:45-47; Liproverbia 13:20; Maheberu 10:23-25) Kacwalo u eza zwelopili ka nzila ye lukisizwe hande ya tuto.
15. Ki sifi se si ezahala mutu h’a kolobezwa? (Mu bone ni litaluso za kwatasi.)
15 Kwa mafelelezo, muituti wa Bibele, ha s’a hulisize lilato la ku lata Jehova Mulimu ni ku ba ni tumelo ye tiile mwa sitabelo sa tiululo, u lakaza ku ineela ka ku tala ku Ndat’ahe wa kwa lihalimu. (Joani 14:1) U eza buineelo b’o mwa tapelo ya ka butu mi kuli kezo yeo ye ezizwe kwa mukunda i zibahale kwa batu, wa kolobezwa. Kolobezo ya hae ki ona mukiti wa hae wa sumekelo kakuli ki fona f’a zibahalela kuli ki mutanga ya ineezi luli, ili di·aʹko·nos, wa Mulimu. U lukela ku zwelapili ku ikauhanya kwa lifasi. (Joani 17:16; Jakobo 4:4) U fanile mubili wa hae kaufela ku ba “sitabelo se si pila, se si kenile, se si kateleha ku Mulimu” ku si na ku kata-kata kamba ku eza inge kuli ku itingile fa nto ye ñwi. (Maroma 12:1) * U likanyisa Kreste mwa ku ba sikombwa sa Mulimu.
Bukombwa bwa Sikreste Ki Nto Mañi?
16. Ye miñwi ya misebezi ya Timotea ka ku ba sikombwa ne li ifi?
16 Bukombwa bwa Timotea ne bu kopanyeleza lika mañi? N’a na ni misebezi ye ipitezi ya n’a ezanga ka ku ba ya n’a zamayanga ni Paulusi. Mi ha n’a til’o ba eluda, Timotea a sebeza ka t’ata mwa ku luta ni ku tiisa Bakreste ba bañwi. Kono kalulo ye tuna ya bukombwa bwa hae, sina mo ne ku bezi ku Jesu ni Paulusi, ne li ku kutaza taba ye nde ni ku tahisa balutiwa. (Mateu 4:23; 1 Makorinte 3:5) Paulusi a taluseza Timotea kuli: “Kono wena u iswale mwa linto kaufela; u itiise mwa butata; u eze musebezi wa mubuleli wa Evangeli; u feleleze za bukombwa bwa hao.”—2 Timotea 4:5, litaku li siyamisizwe ki luna.
17, 18. (a) Bakreste ba abana mwa bukombwa mañi? (b) Musebezi wa ku kutaza ki wa butokwa cwañi ku sikombwa sa Sikreste?
17 Ki nto ye swana ni kwa likombwa za Sikreste kacenu. Ba ezanga bukombwa bwa fa nyangela, ili musebezi wa ku bulela evangeli, o bonisa ba bañwi kuli ba kona ku fumana puluso ka ku itinga fa sitabelo sa Jesu mi hape ba luta ba ba ishuwa ku biza fa libizo la Jehova. (Likezo 2:21; 4:10-12; Maroma 10:13) Ba bonisa ku zwelela mwa Bibele kuli Mubuso ki yona fela sepo ya batu ba ba nyanda. Hape ba bonisa kuli nihaiba ka nako ye, lu ka pima butata bo buñata ha lu pila ka ku latelela likuka za silumeli. (Samu 15:1-5; Mareka 13:10) Kono sikombwa sa Sikreste h’a kutazi kuli likuka za Sikreste li kona ku tatulula butata bwa nyangela. S’a luta kikuli ‘bulapeli bu filwe sepiso ya bupilo bwa cwale ni ya bo bu sa taha.’—1 Timotea 4:8.
18 Ki niti kuli likombwa ba bañata ba na ni linzila ze ba sebeza ka zona, ili ze shutana-shutana ku Mukreste ni Mukreste. Ba bañata ba na ni litamo za mwa lubasi. (Maefese 5:21–6:4) Maeluda ni batanga ba bukombwa ba na ni misebezi mwa puteho. (1 Timotea 3:1, 12, 13; Tite 1:5; Maheberu 13:7) Bakreste ba bañata ba tusa mwa ku yaha Mandu a Mubuso. Ba bañwi ba na ni tohonolo ye tuna ya ku ba baitateli ba ba sebeza ku ye ñwi ya Libetele za Watch Tower Society. Niteñi, Bakreste kaufela ba abana mwa ku kutaza taba ye nde. Ha ku na ya zwisiwa teñi. Ki ku abana ku ona musebezi wo ko ku zibahaza mutu fa nyangela ku ba sikombwa sa Sikreste sa niti.
Moya wa Sikombwa sa Sikreste
19, 20. Likombwa za Sikreste ba lukela ku hulisa moya mañi?
19 Buñata bwa likombwa za mwa Krestendomu ba libelelanga ku fiwa likute le li ipitezi, mi ba banga ni malumbatina a cwale ka “revurendi” ni “father.” Kono sikombwa sa Sikreste wa ziba kuli ki Jehova a nosi ya lukela ku fiwa likute le li cwalo. (1 Timotea 2:9, 10) Ha ku na sikombwa sa Sikreste ya bata likute le li pahami cwalo kamba ya bata malumbatina a’ ipitezi. (Mateu 23:8-12) Wa ziba kuli taluso ye mutomo ya linzwi la di·a·ko·niʹa ki “sebelezo.” Linzwi le li talusa kezo le li swalisani ni lona leo fokuñwi li itusiswanga mwa Bibele kwa ku ama kwa sebelezo ya ka butu, ye cwale ka ku eza buweta ha ku ciwa. (Luka 4:39; 17:8; Joani 2:5) Nihailikuli ku itusiswa kwa lona linzwi leo ha ku amiwa ku sikombwa sa Sikreste ki ko ku pahami, di·aʹko·nos isali mutanga.
20 Kacwalo, ha ku na sikombwa sa Sikreste ya lukela ikankabeka. Likombwa za Sikreste za niti ki batanga ba ba ikokobeza, mane ku kopanyeleza ni ba ba na ni buikalabelo bo bu ipitezi mwa puteho. Jesu n’a ize: “Ya lata ku ba yo mutuna ku mina, ibe yena mutang’a mina; mi ya lata ku ba wa pili, ibe yena muzike wa mina.” (Mateu 20:26, 27) Jesu ha n’a bonisize balutiwa ba hae moya o munde wa ku ba ni ona, n’a ba tapisize kwa mautu, ili ku eza musebezi wa yo munyinyani ka ku fitisisa kwa batanga. (Joani 13:1-15) Yeo ne li sebelezo ye kokobezi luli! Kacwalo, likombwa za Sikreste ba sebeleza Jehova Mulimu ni Jesu Kreste ka buikokobezo. (2 Makorinte 6:4; 11:23) Ba bonisa buikokobezo ha ba sebelezana. Mi ha ba kutaza taba ye nde, ka ku sa itata ba sebeleza batu ba bañwi ba ba si balumeli.—Maroma 1:14, 15; Maefese 3:1-7.
Mu Tiye mwa Bukombwa
21. Paulusi n’a filwe mupuzo mañi kabakala ku tiya mwa bukombwa?
21 Paulusi n’a tokwa ku tiya mwa ku ba sikombwa. N’a taluselize Makolose kuli n’a nyandile hahulu kuli a kutaze taba ye nde ku bona. (Makolose 1:24, 25) Kono kabakala kuli n’a tiile, ba bañata ne ba amuhezi taba ye nde ni ku ba likombwa. Ne ba tahisizwe ku ba bana ba Mulimu ni banyani ba Jesu Kreste, mi ba ba ni sepo ya ku ba libupiwa za moya ni ku yo pila ni yena mwa lihalimu. W’o ne li mupuzo o mutuna luli o ne u tisizwe ki ku tiya!
22, 23. (a) Ki kabakalañi likombwa za Sikreste kacenu ha ba tokwa ku tiya? (b) Ki siselo mañi se sinde se si zwa mwa ku tiya kwa Sikreste?
22 Ba ba li likombwa za Mulimu luli kacenu ba tokwa hahulu ku tiya. Ba bañata ka zazi ba katazwa ki ku kula kamba ki butuku bo bu tiswa ki busupali. Bashemi ba sebeza ka t’ata mwa ku hulisa bana, mi buñata bwa bona ba eza cwalo ba si na sinyalana ni bona. Banana ha ba li kwa likolo, ka bundume ba tiyela likukuezo ze maswe z’e ba potolohile. Bakreste ba bañata ba mwa butata bo butuna bwa mali. Mi ba bañata ba nyandiswa kamba ba ipumana mwa butata kabakala “linako ze tata” za kacenu. (2 Timotea 3:1) Ee, likombwa za Jehova kacenu ba ba bat’o eza 6 milioni ba kona ku bulela ni muapositola Paulusi kuli: “Mwa litaba kaufela lu ipaka kuli ki luna batanga ba Mulimu, ka ku tiya pilu hahulu.” (2 Makorinte 6:4) Likombwa za Sikreste ha ba zwafi. Kaniti ba lukela ku babazwa kabakala ku tiya kwa bona.
23 Hape, sina mo ne ku bezi ku Paulusi, ku tiya ku tahisa miselo ye minde hahulu. Ha lu tiya, lu bukeleza sango sa luna se si tiile ni Jehova mi lwa tabisa pilu ya hae. (Liproverbia 27:11) Lu tiisa tumelo ya luna ni ku tahisa balutiwa, ili ku ekeza kwa sizwale sa Sikreste. (1 Timotea 4:16) Jehova u babalezi likombwa za hae ni ku fuyaula bukombwa bwa bona mwa mazazi a, a mafelelezo. Kabakala seo, ba mafelelezo ku b’a 144,000 se ba kubukanyizwe, mi ba bañwi ba ba eza bolule-lule ba na ni sepo ye tiile ya ku ikola bupilo bo bu sa feli mwa paradaisi fa lifasi-mubu. (Luka 23:43; Sinulo 14:1) Kaniti, bukombwa bwa Sikreste bu bonisa sishemo sa Jehova. (2 Makorinte 4:1) Haike kaufel’a luna lu bu tokomele hahulu ni ku itebuha kuli siselo sa bona si ka ina ku ya ku ile.—1 Joani 2:17.
[Litaluso za kwatasi]
^ para. 3 Linzwi la Sigerike la di·aʹko·nos ki fona fo ku simuluha linzwi la “dikoni,” ili yo muñwi wa ba bahulu ba keleke. Mwa likeleke m’o basali ba kona ku ba madikoni, ba kana ba bizwa kuli ki madikonesi.
^ para. 15 Hailif’o Maroma 12:1 i ama sihulu Bakreste ba ba tozizwe, sikuka se si ku yona sa sebeza ni kwa “lingu ze ñwi.” (Joani 10:16) Bona bao ba ‘kumalezi Muñ’a Bupilo, ku mu sebeleza ni ku lata Libizo la hae kuli ba be batanga ba hae.’—Isaya 56:6.
Kana mwa Kona ku Talusa?
• Bakreste kaufela ba mwa lilimo za mwanda wa pili ne ba na ni buikalabelo mañi?
• Sikombwa sa Sikreste u sumekelwa lili mi ki mañi ya mu sumekela?
• Sikombwa sa Sikreste u swanela ku hulisa moya mañi?
• Ki kabakalañi sikombwa sa Sikreste h’a lukela ku tiya ha ku na ni butata?
[Lipuzo za Tuto]
[Maswaniso a fa likepe 15]
Kolobezo i bonisa buineelo ku Mulimu mi yona nako yeo ki fona f’a sumekelwa mutu ku ba sikombwa
[Siswaniso se si fa likepe 17]
Timotea n’a lutilwe Linzwi la Mulimu ku zwa kwa bwanana. N’a bile sikombwa se si sumekezwi ha n’a kolobelizwe
[Siswaniso se si fa likepe 18]
Likombwa za Sikreste ba lata ku sebeza