Ki Bafi Ba Bañwi Be Mu Lata?

“Lata wahenu mo u itatela.”—MATEU 22:39.

1. Haiba lwa lata Jehova, ki kabakalañi ha lu lukela ku lata ni batu ba bañwi?

JESU ha n’a buzizwe kuli mulao o mutuna ka ku fitisisa ki ufi, n’a alabile kuli: “Lata Mulena Mulimu wa hao, ka pilu ya hao kaufela, ni ka moya wa hao kaufela, ni ka kutwisiso ya hao kaufela.” Kiha n’a bulezi mulao wa bubeli o swana ni wa pili, o li: “Lata wahenu mo u itatela.” (Mateu 22:37, 39) Ee, ku lata bahabo luna ki nto ye zibahaza Mukreste. Mane, haiba lwa lata Jehova, lu lukela ku lata batu ba bañwi. Kabakalañi? Kakuli lu bonisa lilato la luna ku Mulimu ka ku utwa Linzwi la hae, mi Linzwi la hae li lu laela ku lata batu ba bañwi. Kacwalo, haiba lu sa lati mizwale ni likaizeli ba luna, lilato la luna ku Mulimu ki la sipamesho.—Maroma 13:8; 1 Joani 2:5; 4:20, 21.

2. Ki ka lilato le li cwañi lu swanela ku lata ba bañwi?

² Jesu ha n’a bulezi kuli lu swanela ku lata bahabo luna, n’a bulela nto ye fita silikani. N’a ama lilato le li shutana ni la ka sipepo le li mwahal’a mabasi kamba mwahal’a munna ni musali. N’a bulela ka za lilato leo Jehova a lata ka lona batanga ba hae ba ba ipeya ku utwa ni leo batanga bao ba mu lata ka lona. (Joani 17:26; 1 Joani 4:11, 19) Muñoli wa Mujuda—y’o Jesu n’a lemuhile kuli n’a bulela ka kutwisiso—n’a lumelelani ni Jesu kuli ku lata Mulimu ku swanela ku eziwa “ka pilu kaufela, ni ka kutwisiso kaufela, ni ka mata kaufela.” (Mareka 12:28-34) N’a nepile. Lilato leo Mukreste a hulisa ku Mulimu ni kwa batu ba bañwi li ama maikuto a luna ni ngana ya luna. Lu li utwa mwa pilu mi li etelelwa ka munahano.

3. (a) Jesu n’a lutile cwañi “muluti yo muñwi wa mulao” ku sa ba ni mubonelo wa makutelakaufi ka za ya li wahabo? (b) Swanisezo ya Jesu i sebeza cwañi kwa Bakreste kacenu?

 ³ Ka mo ku bihezwi ki Luka, Jesu ha n’a bulezi kuli lu swanela ku lata bahabo luna, “muluti yo muñwi wa mulao” a buza kuli: “Wahesu ki mañi?” (Luka 10:25-37) Jesu a alaba ka nguli. Mutu yo muñwi n’a natilwe, ku uzwezwa, ni ku siiwa a welezi kwatuko a nzila. Kwa fita batu mwa nzila yeo ili muprisita pili mi hamulaho ni Mulivi. Bubeli bwa bona ne ba si ka mu tusa. Kwa mafelelezo, kwa taha Musamaria, a bona munn’a y’o ya holofezi, mi a mu shemuba hahulu. Ku ba balalu bao wahabo ya n’a holofezi y’o ne li ufi? Kalabo ne i itunumanezi. (Luka 10:25-37) Mwendi muluti wa mulao y’o n’a kakamalile hahulu ku utwa Jesu a bulela kuli Musamaria n’a kona ku ba wahabo mutu hande ku fita muprisita ni Mulivi. Kwa iponahaza hande kuli Jesu n’a tusa munna y’o ku lata ba bañwi ka nzila ye fita mwa n’a ezeza sapili. Bakreste ni bona ba lata ka nzila ye cwalo. Mu nyakisise bao kaufela be ba lata.

Lilato mwa Lubasi

4. Ki kai pili k’o Mukreste a bonisa lilato?

⁴ Bakreste ba lata ba mwa lubasi lwa bona—basali ba lata banna ba bona, banna ba lata basali ba bona, bashemi ba lata bana ba bona. (Muekelesia 9:9; Maefese 5:33; Tite 2:4) Ki niti kuli mwa mabasi a mañata litamo za lilato la ka sipepo li teñi. Kono lipiho ka za manyalo a’ shandaukile, bosinyalana ba ba nyandiswa, ni ku nyandisa bana kamba ku sa ba babalela li bonisa kuli mabasi a mwa nyewanyewa kacenu, mi maikuto a ka sipepo mwa lubasi a kana a sa kwanisi ku swalisanisa mabasi. (2 Timotea 3:1-3) Kuli ba kondise hande bupilo bwa bona bwa mwa lubasi, Bakreste ba tokwa ku ba ni mufuta wa lilato le li ku Jehova ni Jesu.—Maefese 5:21-27.

5. Bashemi ba itingile ku mañi kuli a ba tuse ku hulisa bana ba bona, mi ku bile cwañi ku ba bañata?

⁵ Bashemi ba Sikreste b’a nga bana ba bona kuli ki sanda se si filwe ki Jehova, mi ba itinga ku yena kuli a ba tuse mwa ku hulisa bana. (Samu 127:3-5; Liproverbia 22:6) Kabakala mubonelo wo, ba tahisa lilato la Sikreste, le li ba tusa ku sileleza bana ba bona kwa likukuezo ze silafaza ze ne li kana za swenya ba banca. Kacwalo, bashemi ba bañata ba Sikreste ba bile ni tabo ye swana ni ya me yo muñwi wa kwa Netherlands. Hamulaho wa ku bona mwan’a hae a kolobezwa, a li yo muñwi wa ba 575 ba ne ba kolobelizwe mwa Netherlands ñohola, me y’o n’a ñozi kuli: “Ka nako ye buikatazo bwa ka bwa mwa lilimo ze 20 ze felile ki kale bu zwala tuelo. Ki kale ni libala nako ni m’ata kaufela, hamoho ni masitapilu, buikatazo, ni maswabi kaufela.” U tabile hahulu kuli mwan’a hae, n’a iketezi isali yena ku sebeleza Jehova. Mwa palo ye tuna ya bahasanyi ba ba eza 31,089 ba ne ba biha mwa Netherlands ñohola ku na ni ba bañata ba ne ba lutilwe ki bashemi ba bona ku lata Jehova.

6. Lilato la Sikreste li kona ku tusa cwañi ku tiisa tamo ya linyalo?

⁶ Paulusi n’a bizize lilato kuli ki “tamo ye lu fa bupetehi,” mi la kona ku punyusa linyalo niha li mbalanda hahulu. (Makolose 3:14, 18, 19; 1 Pitrosi 3:1-7) Munna yo muñwi kwa sooli sa Rurutu se si li likilomita ze 700 ku zwa mwa Tahiti, ha n’a kalile ku ituta Bibele ni Lipaki za Jehova, musal’a hae n’a si ka tabela seo ni hanyinyani. Kwa nalulelule musali y’o a’ nga bana ba bona, a yubeka munna y’o, mi a tutela kwa Tahiti. Niteñi munna a bonisa lilato la hae ka ku ba lumelanga mali hañata ni ku ba lizeza luwaile kuli a buze haiba ku na ni ze ba tokwa. N’a ezize cwalo mwa konela kaufela kuli a pete buikalabelo bwa hae bwa Sikreste. (1 Timotea 5:8) A lapela kamita kuli lubasi lwa hae lu te lu kopane hape, mi kwa nalulelule musal’a hae a kuta. Musali ha n’a kutile, munna a mu bonisa “lilato, ni pilu-telele, ni musa.” (1 Timotea 6:11) Ka 1998, a kolobezwa mi hamulaho a nyakalala hahulu musal’a hae ha n’a lumezi ku ituta Bibele. Tuto yeo ne li ye ñwi ya ze 1,351 ze ne zamaisizwe ñohola mwa kalulo ye okamelwa ki mutai wa Tahiti.

7. Ka ku ya ka munna yo muñwi mwa Germany, ki sika mañi se ne si tiisize linyalo la hae?

⁷ Mwa Germany, munna yo muñwi n’a lwanisize hahulu musal’a hae ya n’a cisehezi niti ya Bibele mi n’a lumela hahulu kuli Lipaki za Jehova  li bata ku kwasheka musal’a hae. Kono hamulaho n’a ñolezi Paki ya n’a ambolisani ni musal’a hae lwa pili kuli: “Ni itumezi kwa ku zibisa musal’a ka Lipaki za Jehova. Pili ne ni ikalezwi kakuli ne ni utwile litaba ze ñata ze maswe ka za bona. Kono cwale, ha se ni fumanehile kwa mikopano ni musal’a ka, ni lemuha kuli ne ni bushize. Ni ziba kuli ni sweli ku utwa niti, mi i tiisize hahulu linyalo la luna.” Mabasi a Lipaki za Jehova ba 162,932 ba ba mwa Germany, ni ba 1,773 mwa lioli ze okamelwa ki mutai wa Tahiti, a swalisani ka lilato la silumeli.

Ku Lata Mizwale ba Luna ba Sikreste

8, 9. (a) Ki mañi ya lu luta ku lata mizwale ba luna, mi lilato li lu susumeza ku ezañi? (b) Mu fe mutala wa m’o lilato li kona ku tuseza mizwale kuli ba tusane.

⁸ Paulusi n’a bulelezi Bakreste ba kwa Tesalonika kuli: “Mina mu lutwa ki Mulimu ku latana.” (1 Matesalonika 4:9) Ee, “ba ba lutilwe ki Mulena” ba latana. (Isaya 54:13) Lilato la bona li boniswa ka likezo, sina mwa n’a boniselize Paulusi ha n’a ize: “Mu sebelezane ka lilato.” (Magalata 5:13; 1 Joani 3:18) Ka mutala, ba bonisa lilato ha ba potela mizwale ni likaizeli ba ba kula, ha ba susueza ba ba lembwalile, mi niha ba tusa ba ba fokola. (1 Matesalonika 5:14) Lilato la luna le li buniti la Sikreste li tusa hahulu mwa ku hula kwa paradaisi ya luna ya kwa moya.

⁹ Mwa Puteho ya Ancón—ye ñwi ya liputeho ze 544 ze mwa Ecuador—mizwale ne ba bonisize lilato la bona ka musebezi o muñwi. Ziezi ya za mali ne i ba siile ba si na mibeleko kamba tuelo, mi kacwalo bahasanyi ba ikatulela ku fumana mali ka ku lekisa lico kwa mandui ba fa sibaka ha ba omboka hamulaho wa ku yamba busihu kaufela. Mañi ni mañi a abana teñi, hamoho ni banana. Ne ba na ni ku kalisa ka 01:00hrs kuli lico li kone ku ba ze lukile ka 04:00hrs mandui ha ba kotoka. Mizwale ne ba ikabezi mali ao a ne ba fumani ka ku ya ka butokwi bwa bona. Ku tusana ko ku cwalo ne ku bonisize lilato la Sikreste le li buniti.

10, 11. Lu kona ku bonisa cwañi lilato kwa mizwale be lu sa zibi ka butu?

¹⁰ Kono lilato la luna ha li boniswi fela kwa Bakreste be lu ziba ka butu. Muapositola Pitrosi n’a ize: “Mu late kopano kaufela ya mizwale.” (1 Pitrosi 2:17, NW) Lu lata mizwale ni likaizeli za luna kaufela kakuli kaufel’a bona ba lapela Jehova Mulimu hamoho ni luna. Linako  za maziezi li kana za lu fa kolo ya ku bonisa lilato leo. Ka mutala, mwa silimo sa sebelezo sa 2000, mwa Mozambique ne ku bayuzi miunda ye zieza, mi ndwa ye sa feli ya mwa Angola ne i shebisize ba bañata. Likezahalo zeo li amile palo ye tuna ya mizwale ba 31,725 mwa Mozambique ni ba 41,222 mwa Angola. Kacwalo, Lipaki ba mwa naha ye li bukaufi ya South Africa se ba lumezi lika ze ñata za ku tusa ku imulula butata bwa mizwale ba bona mwa linaha zeo. Ku itatela kwa bona ku fana ‘bufumu’ bwa bona kwa mizwale ba bona ba ba mwa butokwi ne ku bonisize lilato la bona.—2 Makorinte 8:8, 13-15, 24.

¹¹ Hape lilato la bonwa mwa linaha ze ñata mizwale ha ba fa linubu za ku yahisa Mandu a Mubuso ni Mandu a Mikopano mwa linaha ze shebile. Mutala wa seo ne u bonwi mwa Solomon Islands. Niha ne ku na ni misunga, lioli za Solomon Islands ñohola ne li bile ni kekezeho ya bahasanyi ya 6 pesenti, mi palo ya bona ye tuna ne li 1,697. Ne ba tokwa Ndu ya Mukopano. Nihaike kuli bayahi ba lioli zeo ba bañata ne ba sweli ku baleha mwa naha yeo, baitateli ne ba tile ku zwa kwa Australia ku t’o tusa mwa ku yaha muyaho w’o. Ka nako yeo baitateli bao ne ba funduka, ne se ba lutile mizwale ba mwa sibaka seo mwa ku feleza mutomo wa muyaho. Misumo ni miambeso ya lisipi ya muyaho w’o ne i lumelelizwe ku zwa kwa Australia inze i ngunganyizwe kale, mi ku fezwa kwa ona muyaho o munde wo wa ku lapelela teñi ku ka paka hande libizo la Jehova ni lilato la mizwale, mwa nako yeo miyaho ye miñata i li ye yubekilwe.

Lwa Lata Lifasi Mwa Li Latela Mulimu

12. Lu likanyisa cwañi Jehova mwa mubonelo wa luna wa be lu sa lapeli ni bona?

¹² Kana lu lata fela lubasi lwa luna ni mizwale ba luna? “Ba ba likanyisa Mulimu” ha ba lati bao fela. Jesu n’a ize: “Mulimu u latile lifasi hahulu, mane u li file Mwan’a hae wa libanda, kuli mutu ufi kamba ufi ya lumela ku yena a si ke a shwa, kono a be ni bupilo bo bu sa feli.” (Maefese 5:1; Joani 3:16) Ka ku swana sina Jehova Mulimu, lu eza bote ka lilato—mane ni be lu sa lapeli ni bona. (Luka 6:35, 36; Magalata 6:10) Ka lona lilato leo, lu kutaza taba ye nde ya Mubuso ni ku bulelela ba bañwi ka za kezo ye tuna ye bonisa lilato yeo Mulimu a ba ezelize. Seo si kona ku punyusa ya teeleza kaufela.—Mareka 13:10; 1 Timotea 4:16.

13, 14. Ki lifi ze ñwi ze bonwi za mizwale ba ne ba bonisize lilato kwa batu ba ba si Lipaki, niha ne ku si ko ku bunolo ku eza cwalo?

 ¹³ Mu nyakisise litaba za mapaina ba ba ipitezi ba bane mwa Nepal. Bona bao ne ba filwe ku sebeleza mwa tolopo ye ñwi ye kwa Mboela-Wiko wa naha yeo, mi ka lilimo ze ketalizoho ze felile, ba bonisize lilato la bona ka ku kutaza ka pilu-telele mwa tolopo yeo ni mwa minzi ye li mabapa ni yona. Kuli ba feze kalulo ya bona, hañata ba zamayanga ka lihora ze ñata ka linjinga ili mwa sibaka m’o mufutumala u fitelela 40°C. Lilato la bona ni ku “tundamena ku eza hande” kwa bona ne ku tusize muta sikwata sa tuto ya buka ne si tomilwe ku o muñwi wa minzi yeo. (Maroma 2:7) Mwa March 2000, batu ba 32 ne ba til’o teeleza kwa ngambolo ya muokameli wa mupotoloho ya n’a pota. Nepal ne i bile ni palo ye tuna ya bahasanyi ba 430 ñohola—ili kekezeho ye eza 9 pesenti. Kwa iponahaza hande kuli Jehova u sweli ku fuyaula cisehelo ni lilato la mizwale mwa naha yeo.

¹⁴ Mwa Colombia mapaina ba ba ipitezi ba swalelele ne ba il’o kutaza mwahal’a batu ba ba bizwa ma-Wayuu. Kuli ba eze cwalo, ne ba tokwa ku ituta puo ye nca, kono cisehelo ya bona ya ka lilato ne i fumani mupuzo batu ba 27 ha ne ba fumanehile kwa ngambolo ya nyangela nihaike kuli pula ne i nela hahulu. Tukufalelo ya ka lilato ye swana ni ye ne ba bonisize mapaina bani ne i petile se siñwi mwa kekezeho ya 5 pesenti ni palo ye tuna ya bahasanyi ba 107,613 yeo naha ya Colombia ne i bile ni yona. Mwa Denmark kaizeli wa musupali n’a bata ku abana taba ye nde ni ba bañwi, kono n’a li siyanga. Ka ku sa zwafa, a fumana ba ba tabela ka ku ñolanga mañolo. Cwale s’a ñolelana ni batu ba 42 mi u zamaisa lituto za Bibele ze 11. Ki yo muñwi wa bahasanyi ba palo ye tuna ye eza 14,885 ba ne ba bihile mwa Denmark ñohola.

Mu Late Lila za Mina

15, 16. (a) Jesu n’a bulezi kuli ba bañwi be lu swanela ku lata ki bomañi? (b) Mizwale ba ba na ni buikalabelo ne ba sebelisani cwañi ni mutu ya n’a bulezi buhata ka za Lipaki za Jehova?

¹⁵ Jesu n’a bulelezi muluti wa Mulao kuli Musamaria n’a kona k’u ngiwa ku ba wahabo. Mwa ngambolo ya hae ya fa Lilundu, Jesu n’a ekelize fa muhupulo w’o ha n’a ize: “Mu utwile kuli ne ku bulezwi cwana: Lata wahenu, mi u toye ya ku toile. Kono na, na mi bulelela, ni li: Mu late be ili lila ku mina, mu fuyole ba ba mi lwaha, ba ba mi toile mu ba eze hande, mi mu lapelele ba ba mi eza maswe, ba ba mi nyandisa; kuli mu be bana ba Ndat’a mina ya kwa lihalimu.” (Mateu 5:43-45) Mutu niha lu lwanisa, lu lika ku ‘tula bumaswe ka bunde.’ (Maroma 12:19-21) Ha ku konahala, lu abana ni yena liluo la luna la butokwa ka ku fitisisa, yona niti.

¹⁶ Mwa Ukraine taba ye ne li mwa mutende wa Kremenchuk Herald ne i bulezi kuli Lipaki ki kakopano ka bulapeli ka ka keluhile ili ka ka lubeta. Yeo ne li taba ye tuna kakuli kwa Yurope ba bañwi ba bulelanga cwalo ka za Lipaki za Jehova kuli ba susueze batu, ku tibela kamba ku kwalela misebezi ya Lipaki. Kacwalo muñoli yo mutuna wa mutende wo n’a atumezwi ni ku kupiwa ku hasanya taba ye otolola taba ya pili yani. A lumela ku eza cwalo kono mwa taba ya bubeli yeo, a hatisa pulelo ya kuli taba yani ya pili ne i tomilwe fa lisupo ze buniti. Kacwalo mizwale ba ba na ni buikalabelo ba mu atumela hape ba na ni litaba ze ñwi. Kwa nalulelule, muñoli yo mutuna y’o a lemuha kuli taba ya pili yani ne i fosahezi, mi a hasanya buinyazo. Ku sebelisana ni yena ka ku sa pata-pata litaba ili ka sishemo ne li yona nzila ye lilato ya ku talima ka yona muinelo wo, mi kacwalo lika ne li zamaile hande.

Lu Kona ku Hulisa Cwañi Lilato?

17. Ki sifi se si bonisa kuli ku kana kwa sa ba bunolo kamita ku eza ba bañwi ka lilato?

¹⁷ Mbututu ha i pepwa, bashemi ba yona ba kala ku i lata kapili-pili. Ku lata batu ba bahulu kona ha ku itaheli fela cwalo. Mwendi ki kabakaleo Bibele ha i kuta-kutela ku lu bulelela kuli lu latane—ki nto ye lu swanela ku satalala ku i eza. (1 Pitrosi 1:22; 4:8; 1 Joani 3:11) Jesu n’a ziba kuli lilato la luna li ka likiwa ha n’a bulezi kuli lu swanela ku swalela ba bañwi “ha 70 ha i taimiswa ka 7.” (Mateu 18:21, 22) Paulusi ni yena n’a lu susuelize kuli lu “ezane hande.”  (Makolose 3:12, 13) Ku swanezi ha lu bulelezwi kuli: “Mu tundamene lilato.” (1 Makorinte 14:1) Lu kona ku eza cwañi seo?

18. Ki sifi se si ka lu tusa ku hulisa lilato la luna ku ba bañwi?

¹⁸ Nzila ya pili ki ku kona ku hupula kamita lilato leo lu lata Jehova Mulimu ka lona. Lilato leo li lu susueza hahulu ku lata ba bañwi. Kabakalañi? Kakuli ha lu eza cwalo, kezo yeo i bonisa kuli Ndat’a luna wa kwa lihalimu ki yo munde mi ya mu tompehisa ni ku tahisa kuli a lumbekwe. (Joani 15:8-10; Mafilipi 1:9-11) Nzila ya bubeli ki ku lika ku bona lika mwa li bonela Jehova. Nako kaufela ye lu eza sibi, lu foseza Jehova; kono yena wa lu swalelanga ka ku kuta-kutela mi u zwelapili ku lu lata. (Samu 86:5; 103:2, 3; 1 Joani 1:9; 4:18) Haiba lu ba ni mubonelo wa Jehova, ku lata ba bañwi ni ku ba swalela ha ba lu foseza ku ka lu nolofalela. (Mateu 6:12) Nzila ya bulalu ki ku lika ku eza ba bañwi ka mo lu batela kuli bona ba lu ezeze. (Mateu 7:12) Kabakala kuli ha lu si ka petahala, kamita lu tokwa ku swalelwa. Ka mutala, ha lu bulela lika ze utwisa ba bañwi pilu butuku, lu sepa kuli ba ka hupula kuli mañi ni mañi wa fosanga ka lilimi la hae ka linako ze ñwi. (Jakobo 3:2) Haiba lu bata kuli ba bañwi ba lu eze ka lilato, ni luna lu swanela ku ba eza ka lilato.

19. Lu kona ku bata cwañi tuso ya moya o kenile ha lu nze lu hulisa lilato?

¹⁹ Nzila ya bune ki ku bata tuso ya moya o kenile kakuli lilato ni lona ki muselo wa moya. (Magalata 5:22, 23) Bulikani, ku lata be mu pepwa ni bona, ni lilato la mwa libato hañata li itahela ka sipepo. Kono lu tokwa tuso ya moya wa Jehova kuli lu hulise lilato leo Jehova a na ni lona, lilato le li li tamo ye petehile. Lwa kona ku kupa tuso ya moya o kenile ka ku bala Bibele ye buyelezwi. Ka mutala, haiba lu ituta bupilo bwa Jesu, lu ka bona mwa n’a ezeza batu ba bañwi, mi lwa kona ku ituta ku mu likanyisa. (Joani 13:34, 35; 15:12) Hape, lwa kona ku kupa Jehova moya o kenile, sihulu mwa miinelo ye lu tatafaleza ku eza ka lilato. (Luka 11:13) Nzila ya mafelelezo ki ya kuli lwa kona ku zwelapili ku ba ni lilato ka ku kumalela kwa puteho ya Sikreste. Ku ba ni mizwale ni likaizeli ba ba lilato ku lu tusa ku hulisa lilato.—Liproverbia 13:20.

20, 21. Mwa silimo sa sebelezo sa 2000, Lipaki za Jehova ne ba bonisize cwañi lilato ka nzila ye zwile mubano?

²⁰ Ñohola palo ye tuna ya bahasanyi ba taba ye nde mwa lifasi kaufela ne li 6,035,564. Lipaki za Jehova ne ba itusisize palo hamoho ya lihora ze 1,171,270,425 ba nze ba bata batu kuli ba ba bulelele ka za taba ye nde yeo. Ki lilato le ne li ba konisize ku tiyela kalengelenge, pula, ni silami ha ne ba nze ba peta musebezi wo. Ki lilato le ne li ba susumelize ku bulela ku be ba kena ni bona sikolo ni be ba beleka ni bona ni ku atumela batu be ba sa zibi mwa mikwakwa ni mwa libaka ze ñwi. Buñata bwa ba ne ba potezwi ki lipaki ne ba si na cisehelo, ba sikai ne ba hanyeza. Kono ba bañwi ne ba bonisize cisehelo, kuli mane misipili ya makutisezo ye 433,454,049 ne i ezizwe mi ne ku zamaisizwe lituto za Bibele ze 4,766,631. *

²¹ Zeo kaufela ne li bonahaza lilato leo Lipaki za Jehova ba na ni lona ku Mulimu wa bona ni kwa batu ba bañwi! Lilato leo ha li na ku kuyuka ni kamuta. Lu sepa kuli mwa silimo sa sebelezo sa 2001 bupaki bo bu ka fiwa kwa batu ikaba bo butuna ni ku fita. Haike limbuyoti za Jehova li zwelepili kwa balapeli ba hae ba ba sepahala ni ku cisehela, ‘litaba za bona kaufela ha li nze li ezwa ka lilato.’—1 Makorinte 16:14.

[Litaluso za kwatasi]

Kana Mwa Kona ku Talusa?

• Lu likanyisa mañi ha lu lata ba bañwi?

• Ki bomañi ba bañwi be lu swanela ku lata?

• Ki lifi ze bonwi ze ñwi ze bonisa lilato la Sikreste?

• Lu kona ku hulisa cwañi lilato la Sikreste?

[Lipuzo za Tuto]

 [Chati fa likepe 28-31]

PUHO Y AMWA SILIMO SA SEBELEZO SA 1996 YA LIPAKI ZA JEHOVA MWA LIFASI KAMUKANA

 (Mu bone muputo o tiile)

[Maswaniso a fa likepe 25]

Lilato la Sikreste la kona ku swalisanisa lubasi

[Maswaniso a fa likepe 26]

Lilato li lu susumeza ku abana ni ba bañwi sepo ya luna