Baokameli ni Batanga ba Bukombwa Ba Ketiwa ka Teokratiki
Baokameli ni Batanga ba Bukombwa Ba Ketiwa ka Teokratiki
“Mu itibelele, mi mu lise mutapi kaufela o mu beilwe balibeleli ba ona ki Moya o Kenile.”—LIKEZO 20:28.
1, 2. Isaya 60:22 i sweli ku talelezwa cwañi?
KALE-KALE Jehova n’a polofitile kuli mwa linako za maungulelo ne ku ka ezahala nto ye tuna. Ne ku talusizwe ka mupolofita Isaya kuli: “Mutu yo munyinyani u ka fetuha ba ba eza lule, ya nyazeha a be sicaba se si mata. Na [Muñ’a] Bupilo ni ka pakisa ku eza cwalo, mwa nako ya yona.”—Isaya 60:22.
2 Kana ku na ni se si bonisa kuli bupolofita b’o bu sweli bwa talelezwa kacenu? Kaniti luli ku na ni! Mwa ma-1870, ne ku tomilwe puteho i liñwi ya batu ba Jehova mwa Allegheny, Pennsylvania, mwa U.S.A. Ku zwelela fa makalelo a manyinyani ao, mwa lifasi kaufela se ku tomilwe liputeho ze eza mashumi a likiti-kiti, mi li eza hande. Bazibahazi ba Mubuso ba ba eza bolule-lule, ili sicaba se si m’ata, cwale ba swalisani ni liputeho ze fitelela 91,000 mwa linaha ze 235 mwa lifasi. Ku sina kuli cwañi, seo si bonisa kuli Jehova u sweli ku pakisa ku kubukanyiwa kwa balapeli ba niti pili “ñalelwa ye tuna” ye s’e li fakaufi i si ka fita kale.—Mateu 24:21; Sinulo 7:9-14.
3. Ku kolobezwa “ka Libizo la Ndate, ni la Mwana, ni la Moya o Kenile” ku talusañi?
3 Hamulaho wa ku ineela ka butu ku Jehova, ili ka ku latelela litaelo za Jesu, bona bolule-lule bao ne ba kolobelizwe “ka Libizo la Ndate, ni la Mwana, ni la Moya o Kenile.” (Mateu 28:19) Ku kolobezwa “ka Libizo la Ndate” ku talusa kuli bona batu ba ba ineezi bao ba lemuha kuli Jehova ki yena Ndat’a bona wa kwa lihalimu ni kuli ki yena Mufi wa Bupilo, mi ba ipeya mwatas’a bubusi bwa hae. Kolobezo ‘ka libizo la Mwana’ i bonisa kuli ba itumelela kuli Jesu Kreste ki yena Muliululi, Mueteleli, ni Mulen’a bona. Hape ba itebuha kalulo ye petiwa ki moya wa Mulimu o kenile, kamba ona m’ata a hae a sebeza, mwa ku zamaisa bupilo bwa bona. Seo si bonisa kuli ba kolobelizwe ‘ka libizo la moya o kenile.’
4. Likombwa za Sikreste ba sumekelwa cwañi?
4 Ha ba kolobezwa, balutiwa ba banca ba sumekelwa ku ba likombwa za Jehova Mulimu. Ya ba sumekela ki mañi? Ka nzila ye ñwi, manzwi a ñozwi kwa 2 Makorinte 3:5 a ba ama, a’ li: “Ku kona kwa luna [ku ba likombwa] ku zwa ku Mulimu.” Ha ku na mbuyoti ye ne ba ka tabela ku ba ni yona ye fita ku sumekelwa ki yena Jehova Mulimu ka sibili! Ha se ba kolobelizwe, ba ka zwelapili ku hula kwa moya ka ku ba likombwa za “taba ye nde” ibile fela ba lumela ku etelelwa ki moya wa Mulimu ni ku zwelapili ku sebelisa Linzwi la hae.—Mateu 24:14; Likezo 9:31.
Ku Ketiwa—Isi ki Batu Kono ka Teokratiki
5. Kana baokameli ni batanga ba bukombwa ba Sikreste ba ketiwa ki batu? Mu taluse.
5 Kuli butokwi bwa kwa moya bwa palo ye sweli ku ekezeha ya likombwa ba ba sebeza bu tokomelwe, ku tokwahala okamelo ya ngana ye eziwa ki baokameli ba ba fitile ku ze konisa ni tuso ye swanela ye ba fiwa ki batanga ba bukombwa. (Mafilipi 1:1) Bona banna ba ba tiile kwa moya bao ba ketiwa cwañi? Ha ba ketiwi ka miezezo ye itusiswa mwa Krestendomu. Ka mutala, baokameli ba Sikreste ha ba ketiwi ki batu, ili ka ku ketiwa ki batu ba bañata ka ku fitisisa ba ba swalisana ni puteho. Ku ketiwa k’o ku eziwa ka teokratiki. Seo si talusañi?
6. (a) Teokratiki ya niti ki nto mañi? (b) Ki kabakalañi ku ketiwa kwa baokameli ni batanga ba bukombwa ha ku li kwa ka teokratiki?
6 Ka mubulelelo o bunolo, teokratiki ki puso ya Mulimu. Lipaki za Jehova ba itakaleza ku ipeya mwatas’a puso ya hae mi ba swalisana kuli ba eze tato ya hae. (Samu 143:10; Mateu 6:9, 10) Ku ketiwa kwa baokameli ba Sikreste, kamba maeluda, ni batanga ba bukombwa ku eziwa ka teokratiki. Ku ezahala cwalo kabakala kuli ku babazwa ni ku ketiwa kwa banna ba ba fiwa buikalabelo b’o ku eziwa ka ku ya ka tukiso ya Mulimu ye filwe mwa Mañolo a Kenile. Mi ka ku ba ‘Mulena wa lika kaufela,’ Jehova u na ni tukelo ya ku lukisa mo i ka sebeleza kopano ya hae ye bonahala.—1 Makolonika 29:11; Samu 97:9.
7. Lipaki za Jehova ba busiwa cwañi?
7 Ka ku shutana ni buñata bwa likwata za bulapeli mwa Krestendomu, Lipaki za Jehova ha ba iketeli mufuta wa puso ya kwa moya y’e ba zamaisa. Bakreste ba niti bao ba lika ka t’ata ku latelela lipimo za Jehova. Baokameli mwahal’a bona ha ba fiwi litulo ki sikwata se si busa keleke. Haiba batu ba silifasi ba lika ku hakanyisa liketo zeo, batu ba Jehova ha ba lumeli ku cinca. Ka ku tiya, ba ba ni mayemo e ne ba bonisize baapositola mwa lilimo za mwanda wa pili ha ne ba bulezi kuli: “Ki swanelo kuli lu utwe Mulimu ku fita batu.” (Likezo 5:29) Ka ku eza cwalo, Lipaki ba ipeya kwatas’a Mulimu mwa linto kamukana. (Maheberu 12:9; Jakobo 4:7) Ku latelela miezezo ya lika ya teokratiki ku tahisa ku tabelwa ki Jehova.
8. Miezezo ye ketiwa ki batu ni ya teokratiki i shutana cwañi?
8 Ka ku ba batanga ba Jehova, yena Mubusi yo Mutuna wa Teokratiki, lu ka eza hande ha lu ka hupula shutano ye mwahal’a miezezo ya lika ye ketilwe ki batu ni ya teokratiki. Miezezo ya lika ye ketilwe ki batu i tokwanga kuli batu ba yemelwe ka ku likanelela mi hañata ku tokwahalanga ku ipapata kuli mutu a fiwe situlo. Hape ku ketiwa ku yanga ka ya ketilwe ki batu ba bañata. Miezezo yeo ha i itusiswangi mwa ku ketiwa ka teokratiki. Ku ketiwa k’o ha ku eziwangi ki batu; hape ha ku zwelelangi kwa kopano ye ñwi ya ka mulao. Ku bonahala kuli Paulusi n’a ama kwa ku ketiwa kwa hae ki Jesu ni Jehova ka ku ba “muapositola wa bamacaba” ha n’a bulelezi ba kwa Galatia kuli n’a ketilwe “isi ka batu kamba ka mutu, kono ka Jesu Kreste, ni ka Mulimu Ndate, ya mu zusize kwa bafu.”—Maroma 11:13; Magalata 1:1.
Ku Ketiwa ki Moya O Kenile
9. Likezo 20:28 i bulelañi ka za ku ketiwa kwa baokameli ba Sikreste?
9 Paulusi n’a hupulisize baokameli be ne ba pila mwa Efese kuli ne ba ketilwe ki Mulimu ka moya o kenile. N’a ize: ‘Mu itibelele, mi mu lise mutapi kaufela o mu beilwe balibeleli ba ona ki Moya o Kenile, ku uta Keleke ya Mulimu ye a itekezi ka mali a hae luli, a mwa mubili wa hae.’ (Likezo 20:28) Baokameli ba Sikreste bao ne ba tokwa ku zwelapili ku etelelwa ki moya o kenile ha ne ba nze ba peta misebezi ya bona ka ku ba balisana ba mutapi wa Mulimu. Haiba mutu ya n’a na ni buikalabelo n’a s’a palelwa ku fita fa lipimo za Mulimu, nako ha i nze i ya, moya o kenile ne u ka sebeza ni ku mu zwisa fa buikalabelo bwa hae.
10. Ku taha cwañi kuli moya o kenile u pete kalulo ye tuna mwa ku eza liketo za ka teokratiki?
10 Ku taha cwañi kuli moya o kenile u pete kalulo ye tuna? Sapili ki kuli, ze ñozwi ze bonisa ze tokwahala mwa ku eza okamelo ya kwa moya ne li buyelezwi ka moya o kenile. Paulusi ha n’a ñolela Timotea ni Tite, n’a kolohanyize lipimo ze swanela ku fitiwa ku zona ki baokameli ni batanga ba bukombwa. Litokwahalo kaufela za n’a pundile ne li ze 16. Ka mutala, baokameli ne ba swanela ku sa ba ni se si nyazahala, ku ba ni buiswalo, ni kutwisiso, ni ku ikuteka, ku lata ku amuhela baenyi, ku kona ku luta batu, ni ku ba mutala o munde wa ku busa ba ndu ya bona hande. Ne ba sa swaneli ku ba banwi ba bucwala ba ba fitelezi, ni ku lata mali, mi ne ba na ni ku ba ni buiswalo. Ka nzila ye swana, banna be ne ba bata ku ketiwa ku ba batanga ba bukombwa ni bona ne ba tomezwi mayemo a pahami.—1 Timotea 3:1-10, 12, 13; Tite 1:5-9.
11. Ki lifi ze ñwi ze ba tokwa ku fita ku zona ba ba bata ku ketiwa ku ba ni buikalabelo mwa puteho?
11 Ku tatubisisa lisupo zeo ku bonisa kuli ba ba etelela mwa bulapeli bwa Jehova ba swanela ku ba mutala o munde mwa muzamao wa Sikreste. Banna ba ba bata ku fita fa ku fiwa buikalabelo mwa puteho ba swanela ku bonisa kuli moya o kenile wa sebeza ku bona. (2 Timotea 1:14) Ku lukela ku bonahala kuli moya wa Mulimu u sweli ku tahisa ku bona banna bao miselo ya “lilato, ni tabo, ni kozo, [ni] pilu-telele, ni musa, ni bunde, [ni] busepahali, ni ku ishuwa, ni buiswalo.” (Magalata 5:22, 23) Miselo ye cwalo i kona ku bonahala ka mo ba sebelisanela ni balapeli ba bañwi ni batu ba bañwi. Ki niti kuli miselo ye miñwi ya moya i kana ya bonahala hahulu ku ba bañwi, kono ba bañwi bona ba kana ba kwanisa hande hahulu ze ñwi hape ze tokwahala za ku ba baokameli. Kono mwa bupilo bwa bona kaufela, ba ba bata ku ketiwa kaufela ku ba baokameli kamba batanga ba bukombwa ba swanela ku bonisa kuli ki banna ba ba tiile kwa moya, ba ba kwanisa litokwahalo za Linzwi la Mulimu.
12. Ki bomañi ba ba kona ku bulelwa kuli ba ketilwe ki moya o kenile?
12 Paulusi ha n’a susuelize ba bañwi ku mu likanyisa, n’a konile ku eza cwalo ka ku lukuluha kakuli yena n’a likanyisa Jesu Kreste, ya na ‘lu siyezi mutala, kuli lu hate mw’a n’a hatile.’ (1 Pitrosi 2:21; 1 Makorinte 11:1) Kacwalo, ba ba kwanisa ze tokwahala mwa Mañolo ha ba ketiwa ku ba baokameli ni batanga ba bukombwa ba kona ku bulelwa kuli ba ketilwe ki moya o kenile.
13. Moya o kenile u tusa cwañi ba ba eza lipabazo ka za banna ba ba ka sebeza mwa puteho?
13 Ku na ni sisupo se siñwi se si bonisa mo u sebeleza moya o kenile mwa ku babazwa ni ku ketiwa kwa baokameli. Jesu n’a bulezi kuli ‘Ndate ya kwa lihalimu u fa Moya o Kenile ku ba ba u kupa ku yena.’ (Luka 11:13) Kacwalo maeluda mwa puteho ya fa sibaka ha ba kopana ni ku babaza banna ba ba kona ku ketiwa kuli ba fiwe buikalabelo mwa puteho, ba lapelanga kuli moya o kenile u ba etelele. Ba tomanga lipabazo za bona ku ze bonisizwe mwa Linzwi la Mulimu le li buyelezwi. Mi moya o kenile u ba tusa ku bona haiba mutu ya nyakisiswa kuli a ketiwe wa fita ku ze tokwahala za ka Mañolo. Ba ba eza lipabazo ha ba swaneli ku kukuezwa ki ponahalo ya mutu, sikolo s’a keni, kamba buikoneli bwa ka sipepo. Sihulu ba lukela ku tatubisisa haiba mutu y’o u tiile kwa moya, ili mutu y’o lilama za puteho ba kona ku kupa tuso ya kwa moya ku yena ba sa zina-zini.
14. Liñolo la Likezo 6:1-3 li lu lutañi?
14 Hailif’o litopa za maeluda ba swalisananga ni baokameli ba maeto mwa ku eza lipabazo za mizwale ba ba kona ku ba maeluda ni batanga ba bukombwa, ku ketiwa ku eziwanga ka ku latelela muezezo wa mwa lilimo za mwanda wa pili. Ka nako ye ñwi, ne ku bile ni tokwahalo ya banna be ne ba fitile ku ze konisa kwa moya kuli ba pete musebezi o muñwi wa butokwa. Sitopa se si busa ne si file ketelelo ye: “A mu kete ku mina banna ba ba 7, ba ba sepahala, ba ba tezi Moya ni butali; mi lu ba beye mwa musebezi wo.” (Likezo 6:1-3) Banna be ne ba talima za muinelo w’o niha ne ba file lipabazo, ku ketiwa ne ku ezizwe ki banna be ne ba na ni buikalabelo b’o be ne ba li mwa Jerusalema. Muezezo w’o ki ona o latelelwa kacenu.
15. Sitopa Se Si Busa si amiwa cwañi mwa ku ketiwa kwa banna?
15 Sitopa Se Si Busa sa Lipaki za Jehova ki sona luli se si ketanga lilama kaufela za Tutengo twa Mitai. Ha si nyakisisa kuli ba ba ka fiwa buikalabelo bo butuna b’o ki bafi, Sitopa Se Si Busa si hupulanga manzwi a Jesu a’ li: “Mutu kaufela ya filwe hahulu, ku ka batwa hahulu ku yena; mi ya siyezwi ze ñata, ku ka buziwa hahulu ku yena.” (Luka 12:48) Kwand’a ku keta lilama za Tutengo twa Mitai, Sitopa Se Si Busa hape si ketanga maeluda ba fa Betele ni baokameli ba maeto. Kono hape ba fanga mizwale ba bañwi ba ba swanela kuli ba ba ezeze liketo ze ñwi. Ku eza cwalo ni kona ki ku latelela mutala o fumaneha mwa Mañolo.
‘U Beye ba Bahulu, Mo ne Ni ku Laelezi’
16. Paulusi n’a siyeziñi Tite mwa Kreta, mi seo si bonisañi ka za liketo za ka teokratiki kacenu?
16 Paulusi n’a bulelezi Tite, ya n’a sebeza ni yena kuli: “Libaka le ne ni ku siyezi mwa Kreta, neli kuli u feleleze litaba ze ne si ka lukiswa, mi u beye ba bahulu mwa minzi kaufela, mo ne ni ku laelezi.” (Tite 1:5) Paulusi cwale kih’a taluseza Tite za n’a lukela ku tatuba kwa banna be ne ba ka kona ku ketiwa. Kacwalo, kacenu Sitopa Se Si Busa si keta mizwale ba ba fitile ku ze konisa mwa mitai kuli ba si yemele mwa ku keta maeluda ni batanga ba bukombwa. Ku eziwanga ka tokomelo kuli ba ba yemela Sitopa Se Si Busa ba utwisisa ni ku latelela liketelelo za ka Mañolo za ku eza liketo zeo. Kacwalo, ki ka ketelelo ya Sitopa Se Si Busa banna ba ba fita ku ze konisa ha ba ketiwa ku sebeza mwa liputeho za Lipaki za Jehova mwa lifasi kaufela.
17. Ofisi ya mutai i ezanga cwañi ka za lipabazo ka za ku ketiwa kwa baokameli ni batanga ba bukombwa?
17 Lipabazo ka za ba ba kona ku ketiwa ku ba baokameli ni batanga ba bukombwa ha li lumelwanga kwa ofisi ya mutai wa Watch Tower Society, banna ba ba na ni yeloseli ba itinganga fa moya o kenile kuli u ba etelele mwa ku eza liketo. Banna bao ba ikutwa ku ba ni buikalabelo, ili ku lemuha kuli ha ba lukeli ku akufela ku beya mutu mazoho a bona, hakusicwalo ba ka abana mwa libi za hae.—1 Timotea 5:22.
18, 19. (a) Liketo ze ñwi li lumelwanga cwañi? (b) Muezezo kaufela wa ku babaza ni ku keta u eziwanga cwañi?
18 Liketo ze ñwi li kana za lumelwa ka liñolo le li na ni sitempe sa kopano ya ka mulao. Liñolo le li cwalo li kona ku itusiswa kwa ku keta mizwale b’a sikai mwa puteho.
19 Liketo za ka teokratiki li zwelelanga ku Jehova ka Mwan’a hae ni ka nzila ya Mulimu ye bonahala ya fa lifasi-mubu, yena “mutanga ya sepahala, ya na ni kutwisiso” ni Sitopa sa hae Se Si Busa. (Mateu 24:45-47) Muezezo kaufela wa lipabazo ni liketo ze cwalo u zamaiswanga, kamba ku etelelwa, ki moya o kenile. Ku cwalo kabakala kuli ze tokwahala li bonisizwe mwa Linzwi la Mulimu, le li buyelezwi ka moya o kenile, mi mutu ya ketiwa u bonisa kuli u tahisa miselo ya ona moya w’o. Kacwalo, liketo li swanela k’u ngiwa kuli li ezizwe ka moya o kenile. Sina mo ne ba ketezwi baokameli ni batanga ba bukombwa ka teokratiki mwa lilimo za mwanda wa pili, ni kacenu ku cwalo.
Ku Itebuha Ketelelo ya Jehova
20. Ki kabakalañi ha lu bulela sina mwa n’a bulelezi Davida ka mo ku ñolezwi kwa Samu 133:1?
20 Mwa nako ye ya mbombolelwa ya kwa moya ni kekezeho ya teokratiki mwa musebezi wa ku kutaza za Mubuso, lwa itebuha kuli Jehova ki yena luli ya keta baokameli ni batanga ba bukombwa. Tukiso ya ka Mañolo yeo i tusa kwa ku buluka mayemo a pahami a ku luka a Mulimu mwahal’a luna ka ku ba Lipaki za Jehova. Hape, moya wa Sikreste ni buikatazo bo butuna bwa bona banna bao bu ekeza hahulu kwa kozo ni swalisano ye nde ye lu na ni yona ka ku ba batanga ba Jehova. Kacwalo, sina Davida walisamu, lu makala kuli: “A mu bone, ku munati cwañi mi ku kateleha cwañi, batu ni banabahabo bona ha ba pila hamoho, mwa buñwi.”—Samu 133:1.
21. Isaya 60:17 i sweli ku talelezwa cwañi kacenu?
21 Lwa itebuha hakalo ketelelo ya Jehova ka Linzwi la hae ni moya wa hae o kenile! Mi kaniti manzwi a’ ñozwi kwa Isaya 60:17 a na ni taluso, a’ li: “Bakeñisa kopa ni ka tisa gauda, mi bakeñisa sipi ni ka tisa silivera, bakeñisa kota ni tise kopa, mi bakeñisa macwe ni tise sipi; mi hape ni ku fa babusisi kuli ba ku pilise mwa kozo, ni bazamaisi kuli ba ku zamaise ka ku luka.” Miezezo ya lika ya teokratiki ha i bile ye sebeliswa ka ku tala ni ku fita mwahal’a Lipaki za Jehova, lu bile ni yona miinelo ye minde ye mwa kopano kaufela ya Mulimu ya fa lifasi-mubu.
22. Ka ku swanela, lu itebuha kwañi, mi ki lifi ze lu swanela ku tundamena ku eza?
22 Lu itebuha hahulu litukiso za teokratiki ze li teñi mwahal’a luna. Mi hape lu itebuha hahulu musebezi o mutuna kono ili o munde o eziwa ki baokameli ni batanga ba bukombwa ba ba ketilwe ka teokratiki. Ka pilu kaufela lu lumbeka Ndat’a luna wa kwa lihalimu ya lilato, ya lu file mbombolelwa ya kwa moya ni ku lu fuyaula hahulu. (Liproverbia 10:22) Kacwalo he, lu tundamene ku zamaelela ni kopano ya Jehova. Mi sihulu lu zwelepili ku sebeza hamoho ka swalisano ili ku tahisa tumbo ni kanya fahalimw’a libizo la Jehova le linde, le li kenile.
Ne Mu Ka Alaba Cwañi?
• Ki kabakalañi ha lu kona ku bulela kuli ku ketiwa kwa baokameli ni batanga ba bukombwa ki kwa ka teokratiki, isi ka batu?
• Banna ba Sikreste ba ba na ni buikalabelo ba ketiwa cwañi ka moya o kenile?
• Sitopa Se Si Busa si amiwa cwañi mwa ku ketiwa kwa baokameli ni batanga ba bukombwa?
• Ki kabakalañi ha lu swanela ku itumela ku Jehova ka za liketo za ka teokratiki?
[Lipuzo za Tuto]
[Maswaniso a fa likepe 15]
Maeluda ni batanga ba bukombwa ba na ni tohonolo ya ku sebeza ka ku ketiwa ka teokratiki