Lipaki za Jehova—Ba Ya Kwapili ka Tumelo Ye Tiile!

Piho Ya Mukopano Wa Ka Silimo

MWA miteñi ye ya buhononi ni ku sa lumela lika, Lipaki za Jehova ba ikemezi ka ku ba Bakreste ba ba na ni tumelo ye tiile. Taba yeo ne i taluhanyizwe hande kwa mukopano wa ka silimo wa Watchtower Bible and Tract Society of Pennsylvania, o n’o ezelizwe kwa Ndu ya Mukopano ya Lipaki za Jehova ye kwa tolopo ya Jersey City, mwa New Jersey. Leo ne li la Mukibelo, October 7, 2000. *

Mwa lipulelo za hae za makalelo, muina-situlo, yena John E. Barr, ya li silama sa Sitopa Se Si Busa sa Lipaki za Jehova, n’a ize: “Ku bolule-lule ba ba ba pila fa lifasi-mubu, lu ziba mi lu lumela kuli Mwan’a Jehova, ya latwa, yena Kreste Jesu, cwale u fa lubona mwa lihalimu, mi u busa mwahal’a lila za hae.” Bupaki bwa tumelo ye tiile cwalo ne bu filwe ka lipiho ze silezi ze nyakalalisa ze zwa kwa libaka ze ñwi mwa lifasi.

Ku Tula Tumelo ya Balimu ka Niti ya Bibele mwa Haiti

Tumelo ya balimu i atile hahulu mwa Haiti. Muzamaisi wa Katengo ka Mutai John Norman n’a kandekile kuli: “Hañata, batu ba kenanga mwa bulapeli bwa balimu kuli ba isileleze.” Ñaka yo muñwi n’a kalile ku shungula bona bulapeli b’o ha n’a lobehile lihutu mwa kozi. N’a kakanyize kuli, ‘Nto ye, ne i ka ni wela cwañi haiba ni silelelizwe ki balimu?’ Sina ba bañwi ba bañata, munna y’o n’a lutilwe niti ki Lipaki za Jehova mi n’a tusizwe ku iposhola ku za mioya. Nto ye bonisa kuli kwa kona ku ba ni kulo mwa Haiti ki taba ya kuli la April 19, 2000, palo ya be ne ba fumanehile kwa Kupuzo ya lifu la Kreste mwa naha yeo ne i minahanyize hane palo ya bahasanyi ba Mubuso.

Tukufalelo mwa Kalulo Ye Tuna-Tuna ya Korea

Mwa Korea, ibat’o ba licika la Lipaki za Jehova ba mwa sebelezo ya ka nako ye tezi. Muzamaisi wa Katengo ka Mutai, Milton Hamilton, n’a ize: “Ka mpi ye tuna-tuna yeo, kalulo ya luna ya batu ba ba fitelela 47 milioni ya potelwanga ibat’o ba hañwi ka kweli.” Mwa liputeho za puo ya bosusu, kulo ki ye tuna luli. Mwa mupotoloho o muñwi wa puo ya bosusu, ku zamaiswa lituto za Bibele za mwa mandu ze 800. Palo yeo ha ne i ka alulwa ka ku likanelela, muhasanyi ni muhasanyi n’a ka ba ni tuto i liñwi. Ka bumai, mizwale ba mitangana ba sa lengiwanga mwa tolongo kabakala buikambuso bwa bona. Nihakulicwalo, Bakreste ba ba sepahala bao ba ezwanga hande, mi hañata ba fiwanga misebezi ye tokwa mutu ya sepahala.

 Ku Taleleza Litokwahalo ze Tiswa ki Kulo mwa Mexico

Palo ye tuna ka ku fitisisa ya bashaeli ba Mubuso b’a 533,665 ne ba bihile sebelezo ya mwa simu mwa Mexico ka August ya 2000. Palo ya batu ye minahanya halalu palo yeo ne ba fumanehile kwa Kupuzo. Muzamaisi wa Katengo ka Mutai, Robert Tracy, n’a ize: “Mulelo wa luna wa munomwaha ki ku yaha Mandu a Mubuso a manca a’ 240.” N’a ekelize kuli: “Niteñi, lu sa tokwa a mañwi a mañata.”

Mikulwani ba ba li Lipaki za Jehova mwa Mexico ki mitala ye minde. Muprisita yo muñwi wa Katolika n’a bulezi se ka za mwanana yo muñwi a li: “Ne ni ka tabela ku ba ni a li muñwi fela ya swana ni yena kwa balateleli ba ka. Ni ikumbuta batu ba, kakuli ba na ni tundamo mi ba itusisa hande Bibele. Ba lwanezi Mulimu, mane ku eza cwalo niha ku batile ku ba bulaisa.”

Busepahali mwa Nako ya Kalilabule mwa Sierra Leone

Ku zwa April ya 1991 fo ne i tumbukezi ndwa ya bayahi ba mwa Sierra Leone, likiti-kiti za batu ba bulailwe, ku holofazwa, kamba ku ezwa buhole. Muzamaisi wa Katengo ka Mutai, Bill Cowan, n’a bihile kuli: “Ndwa ni manyando li kalelwisize hahulu batu. Ba bañata be ne ba sa isi pilu kwa lushango lwa luna cwale se ba teeleza ka ku tabela. Hañata batu ba yabukanga mwa makululu ni ku itela mwa Mandu a luna a Mubuso ku t’o kopana lwa pili. Mizwale hañata ba yemiswanga mwa makululu ki batu ba ba kupa ku lutiwa Bibele.” Naha niha i sa na ni butata cwalo, musebezi wa ku kutaza za Mubuso u sweli ku tahisa miselo mwa Sierra Leone.

Mungendenge O Mutuna wa Buyahi mwa South Africa

Ka nako ya cwale, ku tokwahala likitinyana za Mandu a Mubuso mwa kalulo ye tokomelwa ki ofisi ya mutai ya South Africa. Miyaho ye mianda-nda se i yahilwe kale. Silama sa Katengo ka Mutai, John Kikot, n’a ize: “Ku fita ku kopanela mwa sibulututu kamba mwatas’a kota, sina mo ne ku ezezwanga sapili, mizwale ba luna ba kona ku kopanela mwa sibaka sa ngana se si na ni lipula ze nde.” Nihaike kuli buñata bwa Mandu a Mubuso ao a yahilwe ka mukwa o itikanelezi, hañata a banga yona miyaho ye buheha ka ku fitisisa mwa lilalanda mo a fumaneha. Mwa libaka ze ñwi, se ku fumanwi kuli hamulaho wa ku yaha Ndu ya Mubuso, puteho i minahana ku fitelela habeli mwahal’a silimo se si tatama.”

Lusika lo Lunca lwa Lipaki mwa Ukraine

Mwahal’a silimo sa sebelezo sa 2000, naha yeo ne i bile ni palo ye tuna ka ku fitisisa ya bahasanyi b’a 112,720. Ba ba fitelela 50,000 ku bao ba itutile niti ya Bibele mwahal’a lilimo ze ketalizoho ze felile. Muzamaisi wa Katengo ka Mutai, John Didur, n’a bulezi kuli: “Kaniti, Jehova u zusize lusika lo lunca, lwa mitangana ni likalibe ba ba li Lipaki kuli ba shaele libizo la hae!” N’a zwezipili kuli: “Mwahal’a lilimo ze peli ze fitile, lu file limagazini ze fitelela 50 milioni. Palo yeo i likana ni palo ya bayahi ba naha. Ka kweli ni kweli, hañata lu amuhelanga mañolo a’ likiti a’ zwelela kwa batu ba ba tabela ba ba kupa litaba ze ñwi.”

Likalulo Ze Ñwi ze Nyakalalisa za Mukopano

Daniel Sydlik, silama sa Sitopa Se Si Busa, n’a file ngambolo ye hapa. Taba ye li “M’o Sitopa Se Si Busa Si Shutanela ni Kopano Ye Ketilwe ka Mulao,” ye mwa magazini ye, i tomile fa ngambolo ye luta yeo.

Theodore Jaracz wa Sitopa Se Si Busa n’a file ngambolo ye nyangumuna munahano ya toho ya taba ye li “Baokameli ni Batanga ba Bukombwa Ba Ketiwa ka Teokratiki.” Ye ñwi ya litaba ze mwa magazini ye i tomile fa taba yeo.

Mukopano wa ka silimo hape ne u na ni ngambolo ye pasumuna ye ne i filwe ki David Splane, silama sa Sitopa Se Si Busa. Ne i nyakisisa liñolo la silimo la 2001. Li tomile fa manzwi a muapositola Paulusi, mi li li: “Mu yeme mu li ba ba petehile, mi mu ipeye ku feleleza kwa tato kaufela ya Mulimu.” (Makolose 4:12) Lipaki za Jehova mwa lifasi kaufela ba ikatulezi ku eza cwalo ha ba nze ba kutaza ka busepahali taba ye nde ya Mubuso wa Mulimu mwa lifasi kaufela.—Mateu 24:14.

[Litaluso za kwatasi]