Lu Lukela ku Belañi ni Kalemeno ka Bunde?

MUNNA wa kwa Japan wa lilimo za buhulu za mwahal’a 40 ni 60 ya bizwa Kunihito n’a tutezi kwa United States cwanoñu fa. * Liviki fela ze sikai ku zwa fa n’a fitezi teñi k’o, a talimana ni muinelo o ne u ka be u mu sinyelize musebezi wa hae. Kunihito u li: “Mubelekisi wa ka ha n’a ni kupile ku eza musebezi o muñwi, na ikutwa kuli ne ni kona ku u eza. Kono, ka ku ba kuli ne ni hulisizwe ni na ni mubonelo wa kuli buikokobezo ki kalemeno ka bunde, na li: ‘Ha ni zibi hande kuli na kona ku u eza, kono ni ka lika mo ni konela kaufela.’ Ku mubelekisi wa ka yo wa mu-America, ne ku bonahezi inge kuli ne ni sa koni ku u eza mi ne ni si na hande buikolwiso. Ha ni to lemuha seo, na bona kuli ne ni tokwa ku eza licinceho.”

Maria, ya pila mwa New York City, n’a li muituti ya na ni ngana hahulu, ili ya n’a tabelanga ku tusa ba n’a kena ni bona sikolo. Juan n’a li mwa sitopa se si swana mi fokuñwi n’a tusiwanga ki Maria. Kono mucaha yo hape a ba ni maikuto a lilato la za linyawe ku Maria mi a lika ku mu tabisa. Maria niha n’a bata ku zwelapili ku ba ni muzamao o kenile, a tulwa ki linyawe la Juan mi a eza buhule.

Ku ba ni kalemeno ka bunde mwa lifasi la kacenu mo ku na ni lizo ze fitana-fitana ni mizamao ye maswe ki likulutendano luli. Ki kabakalañi he ha lu lukela ku ba ni kalemeno ka bunde? Kakuli ku ba ni muzamao o munde ku tabisa Mulimu, mi kaniti luli buñata bwa luna lu lakaza ku shemubiwa ki yena.

Linzwi la Mulimu, yona Bibele, li eleza babali ba lona ku ba ni kalemeno ka bunde. Ka mutala, muapositola Paulusi u ñola kuli: “Kaufela ze li ze nde, ni ze lukela ku lumbwa, ibe zona ze mu nze mu hupula.” (Mafilipi 4:8, NW) Ni muapositola Pitrosi u lu susueza ku ‘ikataza hahulu kuli kwa tumelo ya luna lu ekeze bunde.’ (2 Pitrosi 1:5, NW) Kono kalemeno ka bunde ki nto mañi? Kana ka kona ku lutwa mwa sikolo? Lu kona cwañi ku ba ni kalemeno ka bunde?

[Litaluso za kwatasi]