Piho ya Bashaeli Ba Mubuso

Latvia I Amuhela Taba ye Nde

BIBELE i bonisa hande kuli tato ya Mulimu ki kuli “batu kamukana ba piliswe, mi ba fite fa zibo ya ku ziba niti.” (1 Timotea 2:4) Be ne ba palelisizwe ku utwa taba ye nde ka lilimo-limo cwale se ba i utwa! Mwa Latvia, sina ka mo ku inezi mwa likalulo ze ñwi mwa lifasi, ba bahulu ni banana ni ba miinelo ye fitana-fitana ba sweli ku amuhela lushango l’o, ka mo li boniseza litaba ze latelela.

• Mwa Rēzekne, ili munzi o kwa upa wa Latvia, me yo muñwi ni mwan’a hae wa musizana ya sa nonoboka b’a kupa musali cwana ye ne ba kopani ni yena fa mukwakwa kuli a ba bonise nzila. Ha s’a ba bonisize nzila, musali y’o, y’a li yo muñwi wa Lipaki za Jehova, a ba mema kwa mikopano ya Lipaki.

Ka ku ba kuli me y’o ni mwan’a hae ne ba tabela za bulapeli, ba lumela ku ya kwa mikopano. Mwa nzila, ba lumelelana kuli ha ne ba ka fumana nto ifi kamba ifi ye sa swaneli teñi k’o, ne ba ka ikema. Kono, mikopano yeo ne i bile ye tabisa hahulu kuli mane ne ba si ka nahana ni za ku funduka. Ba lumela ku ituta Bibele, mi ba kalisa ku yanga kwa mikopano kamita. Mwa likweli fela ze talu, ba talusa kuli ne ba tabela ku kalisa ku kutaza mi ne ba libelela ku kolobezwa.

• Mwa muleneñi o muñwi wa kwa wiko wa Latvia, Paki yo muñwi a kopana ni Anna wa lilimo ze 85 za buhulu, ili ya n’a bonisa kuli n’a tabela luli mi a lumela ku ituta Bibele. Mwan’a hae wa musali ni ba bañwi mwa lubasi ba mu hanyeza hahulu. Kono Anna n’a si ka tuhelela twaniso yeo kamba ku supala ni buikangulo bwa hae bo bu pongani ku mu palelwisa ku zwelapili ku ituta Bibele.

Zazi le liñwi, Anna a bulelela mwan’a hae kuli n’a ka kolobezwa. Mwan’a Anna y’o a alaba kuli: “Ha mu ka kolobezwa, ni ka mi isa kwa ndu ko ku babalelwa basupali.” Anna ni ha n’a bembilwe cwalo n’a si ka zwafa. Kabakala ku sa ikangula hande, a kolobelezwa mwa ndu ya hae.

Mwan’a Anna n’a ezize cwañi ka za seo? N’a cincize mubonelo wa hae, mi a lukiseza bom’ahe lico ze nde hahulu hamulaho wa kolobezo. Kihona a buza bom’ahe kuli: “Mu ikutwa cwañi cwale ha se mu kolobelizwe?” Anna a alaba kuli: “Ni ikutwa inge ya sa z’o pepwa!”

• Mwa December ka 1998, Lipaki ba babeli ba kopana ni munna ya n’a banga lisole mwa kalulo ye ne i li Soviet Union. Ka ku ba kuli n’a lumela kuli ku na ni Mubupi, a lumela ku ituta Bibele, mi hamulaho musal’a hae ni yena a kalisa ku ituta. Ba eza zwelopili ye tuna mi hañihañi ba ba bahasanyi ba ba si ka kolobezwa. Nako ya mbumbi ya silimo se si tatama, munna y’o ya n’a li lisole a kolobezwa. Lilato la bosinyalana bao la ku lata hahulu lika za kwa moya li susuelize hahulu bote mwa puteho. Hape, ne ba tusize hahulu mwa musebezi wa ku lukisa ndu ya fa silalanda ku i fetula Ndu ya Mubuso.