Mulekisi wa Mangilasi a Meto U Cala Peu

Buikatazo bwa mulekisi wa mangilasi a meto wa mwa Lviv, kwa Ukraine, ne bu tisize cwañi kuli puteho ya Lipaki za Jehova ya si-Russia i tomiwe mwa Haifa, kwa Israel, ili sibaka se si kwanisa musipili wa likilomita ze bat’o eza 2000 ku zwa Lviv ili ku pululeza linaha ze ñata? Le ki likande le li paka pulelo ya Bibele ye kwa Muekelesia 11:6, ye li: “Cala peu ya hao isali kakusasana, mi u si ke wa pumulisa mazoho a hao ka swalala; kakuli ha u zibi kuli ku ka mela peu ifi.”

LIKANDE la luna li kala mwa 1990, Ella ha n’a pila mwa Lviv. Kalibe y’o ne li Mujuda. Ella ni lubasi lwa hae ne ba itukiseza ku tutela kwa Israel. Nakonyana pili ba si ka funduka kale, Ella n’a na ni ku bonana ni mulekisi wa mangilasi a meto ya n’a li Paki ya Jehova. Ka nako yeo, musebezi wa Lipaki za Jehova ne u kwalilwe mwa Ukraine. Kono mulekisi y’o a ikupulela ku bulelela Ella litumelo za hae  za Bibele. Ella a komoka Paki y’o ha n’a mu bulelezi kuli Mulimu u na ni libizo la ka butu. Nto yeo ne i tiselize Ella ku bata ku ziba ze ñata, mi puhisano ye nde ya Bibele ya kalisa.

Ella n’a ikozi hahulu puhisano yeo kuli mane a kupa kuli ba be ni puhisano ye ñwi viki ye tatama ni ye ñwi hape hamulaho wa f’o. N’a nz’a tabela hahulu, kono ne ku na ni butata bu li buñwi. Lubasi l’o ne lu tuha lu tutela kwa Israel. Ella n’a sa na ni ze ñata za ku ituta! Kuli a itusise hande nako ye ne sa siyezi, a kupa ku zamaisezwa tuto ya Bibele ka zazi ni zazi ku fitela ha n’a ka funduka. Nihaike kuli Ella n’a si ka yo kalisa onafo fela ku ituta hape a sa fita fela mwa Israel, peu ya niti ne se i tomile mibisi mwa pilu ya hae. Silimo si si ka fela kale, a kalisa hape ku ituta Bibele ka tukufalelo.

Ndwa ya tumbuka mwa siko sa Persian Gulf, mi Iraq ne i sweli ku kunupela limbomba kwa Israel. Batu kai ni kai ne ba bulela hahulu za butata b’o. Zazi le liñwi mwa sintolo cwana se situna, Ella a utwa lubasi lo lu bulela si-Russia lo ne lu sa zo taha inge lu ambola. Nihaike kuli n’a sa ituta Bibele, Ella a atumela lubasi l’o ni ku lu bulelela sepiso ya Bibele ya lifasi la kozo. Kabakaleo, bo Sasha (Ariel) ni Ilana ni bokukw’a bona bo Galina ni bom’a bona bo Natasha kaufela ba kalisa ku ituta Bibele hamoho ni Ella.

Sasha ne li yena wa pili mwa lubasi ku kolobezwa—niha n’a talimani ni litiko ze ñata. Nihaike kuli Sasha n’a pasanga hahulu, n’a lunduzwi kwa sikolo kakuli lizwalo la hae la Sikreste ne li sa mu lumelezi ku kalisa ku ituta busole bwa n’a tokwiwa ku ituta kwa sikolo. (Isaya 2:2-4) Taba ya Sasha ya y’o talimwa mwa Kuta Ye Tuna ya Israel ya mwa Jerusalem, mi kuta ya yo eza hande kakuli ne i atuzi kuli Sasha a kutiswe kwa sikolo kuli a y’o si feza. Taba yeo ne i bihezwi naha kaufela. Kabakaleo, ba mwa Israel ba bañata ba fita fa ku ziba litumelo za Lipaki za Jehova. *

Ha s’a felize sikolo se si pahami, Sasha a kena bukombwa bwa ka nako ye tezi bwa Lipaki za Jehova. Kacenu ki paina ya ipitezi mi hape ki eluda mwa puteho. Ilana, kaizel’a hae, ni yena u mwa sebelezo ya ka nako ye tezi. Bom’a bona ni bokukw’a bona ki Lipaki ba ba kolobelizwe. Peu ya n’a cezi mulekisi wa mangilasi a meto yani ne i sa beya miselo!

Haili Ella yena, n’a nz’a zwelapili kwa moya mi ku si ka fita nako, a kalisa ku kutaza fa ndu ni ndu. Fa ndu luli ya makalelo, Ella a katana Faina, ya n’a sa zo zwa kwa Ukraine. Faina n’a zwafile maswe. Hamulaho Ella a talusezwa kuli nakonyana pili a si ka taha kale fa ndu ya Faina, musali y’o ya n’a ziyelehile maswe n’a lapezi ku Mulimu kuli: “Ha ni ku zibi, kono haiba wa ni utwa, u ni tuse.” Ella ni Faina ba ba ni likande le li tabisa. Faina a buza lipuzo ze ñata ni ku nahanisisa likalabo za n’a filwe. Hasamulaho, a lumela kuli Lipaki za Jehova ba luta niti ya mwa Bibele. A cinca tomahanyo ya lituto za hae za kwa yunivesiti kuli a bange ni nako ye ñata ya ku swalisana ni puteho ni ku eza musebezi wa ku kutaza. Mwa May ya 1994, Faina a kolobezwa. Ni yena a kena mwa sebelezo ya bupaina, inz’a ipilisa ka ku eza musebezi wa likompyuta wa ku sebeza nakonyana mwahal’a lizazi.

 Mwa November ya 1994, Ella ha n’a nz’a kutaza, ka sipundumukela a ikutwa ku fokola maswe. A ya kwa sipatela mi tatubo ya yo bonisa kuli n’a na ni sitombo fa mala se ne si zwa mali. Ha ku to ba manzibwana, sipimo sa kalulo ya mali a Ella ye lwala moya wa ku buyela (hemoglobin) sa fukuzeha ku fita fa 7.2. Eluda wa mwa puteho ya habo Ella, ya n’a li muina-situlo wa Katengo ka Kutwano ni ba Sipatela (HLC), a fa baalafi litaba ka za mialafelo ye miñwi ye miñata-ñata ye ne sa tokwi ku itusisa mali. * Ella a pazulwa hande ku si na ku pompelwa mali, mi a fola hande-nde.—Likezo 15:28, 29.

Karl, Mujuda ya n’a pepezwi mwa Germany, ya n’a li mualafi wa Ella, n’a tabisizwe hahulu. Mi a hupula kuli bashemi ba hae, be ne ba punyuhile Pulao ye tuna ye ne ba ezize ba Nazi, ne ba zibile Lipaki za Jehova mwa minganda ya tukufazo. Karl a buza lipuzo ze ñata. Nihaike kuli n’a patehile hahulu ni bualafi bwa hae, Karl n’a fumananga nako ya ku ituta Bibele kamita. Silimo se si tatama ha si t’o fitanga, n’a se a yanga kwa mikopano ya Sikreste ya ka viki.

Ki sifi se si zwile mwa peu ya n’a cezi mulekisi yani wa mangilasi a meto? Lu se lu boni ze ne ezahezi ku Sasha ni lubasi lwa hae. Haili kaizeli Ella yena, ki paina ya ipitezi. Eina, mwan’a hae wa musizana, kona a sa zo feza sikolo se si pahami, mi s’a kalisize musebezi wa hae wa bupaina. Faina ni yena ki paina ya ipitezi. Haili Karl, mualafi wa Ella, se li Paki ya kolobelizwe mi hape ki mutang’a bukombwa, mi u talusezanga bakuli ba hae ni ba bañwi za niti ya Bibele ye kona ku folisa.

Sikwatanyana sa bazwahule ba ba bulela si-Russia, seo pili ne li kalulo ya Puteho ya Haifa ya Siheberu, se si fetuhile puteho ya si-Russia ye mafulofulo ye na ni bahasanyi ba Mubuso ba ba fitelela 120. Luli se si siñwi sa ze tisize kekezeho yeo kikuli mulekisi wa mangilasi a meto wa mwa Lviv n’a ikupulezi ku cala peu!

[Litaluso za kwatasi]

[Mapa ye fa likepe 29]

(Kuli mu bone mo i hatiselizwe luli, mu bone hatiso)

UKRAINE

ISRAEL

[Manzwi a bañi ba siswaniso]

Mountain High Maps® Copyright © 1997 Digital Wisdom, Inc.

[Maswaniso a fa likepe 30]

Ella ni mwan’a hae Eina

[Siswaniso se si fa likepe 31]

Sikwata se si tabile sa Lipaki ba ba bulela si-Russia mwa Haifa. Ku kala kwa nzohoto ku ya ku la bulyo: Sasha, Ilana, Natasha, Galina, Faina, Ella, Eina, ni Karl