“Mulyani kwa Mubili wa Hao”

KU LUMELWA kuli matuku a mañata a batu a tahiswanga ki lika ze kataza mwa maikuto ze cwale ka sabo, maswabi, muna, ndimbelela, sitoyo, ni ku ikutwa ku ba ni mulatu. Kacwalo, manzwi a’ mwa Bibele a’ omba-omba luli a’ li ku ‘saba Jehova’ ki “mulyani kwa mubili [“mukubu,” mwa Siheberu sa kwa makalelo] wa hao, ni mooko mwa masapo a hao.”—Liproverbia 3:7, 8.

Masapo ki fona fo u tiyezi mubili. Kacwalo, Bibele i itusisa linzwi la “masapo” ka swanisezo kwa ku talusa mutu luli—sihulu ili ku ama kwa maikuto a hae a matuna. Kono ku taha cwañi kuli ku saba Jehova ibe mulyani kwa mukubu wa hao?

Baituti ba Bibele ba na ni mihupulo ye shutana-shutana ka za ku taluswa kwa “mukubu” mwa taba ye. Mutalusi yo muñwi u li, kabakala kuli “mukubu” u “fahal’a mubili,” u yemela lilama kaufela za butokwa. Muituti yo muñwi u akaleza kuli linzwi la “mukubu” li kona ku talusa kakoo, ka mo ka itusiselizwe kwa Ezekiele 16:4. Haiba ku cwalo, Liproverbia 3:8 mwendi i koñomeka butokwa bwa ku itinga kwa luna ka ku tala ku Mulimu, sina mwana ya mwa mba ya si na s’a kona ku eza mw’a itingela ka ku tala fa ku fepiwa ki mahe. Muhupulo o muñwi hape ki wa kuli mwendi “mukubu” u yemela misifa ya mubili. Mwa taba mo i itusisizwe timana ye, ku kana kwa ba kuli likalulo zeo li likanyezwa kwa “masapo,” ili likalulo ze tiile za mubili.

Taluso ibe ifi kamba ifi, taba i liñwi ki ye buniti: Ku saba Jehova ka nzila ye swanela ki nto ye butali. Ku latelela lipimo za Mulimu ku kona ku ekeza kwa ku iketa kwa luna mwa mubili ka nako ye. Mi hape, ku kona ku tisa kuli Jehova a lu tabele, ili nto ye ka tahisa bupilo bo bu sa feli ni buikangulo bo bunde, mwa mubili ni mwa maikuto. Zeo li ka ezahala mwa lifasi la hae le linca le li taha.—Isaya 33:24; Sinulo 21:4; 22:2.

[Manzwi a bañi ba siswaniso fa likepe 32]

Dr. G. Moscoso/SPL/Photo Researchers