Ku Pazula Ku Si Na ku Pompela Mali Ki “Mualafelo O S’o Tuma Hahulu”

MAGAZINI ye bizwa Maclean’s ne i hatisize taba ye li “Ku Pazula ‘Ku Si Na ku Pompela Mali.’” Taba yeo ne i bihile kuli madokota mwa Canada se ba patehile “ku tahisa mialafelo ye minca. Mwa lilimo ze ketalizoho ze felile, mialafelo yeo i tisize kuli ye twi ki kalafo ya ku pazula ku si na ku pompela mali i be ona mualafelo o s’o tuma hahulu.” Yo muñwi wa madokota bao ki Brian Muirhead wa kwa Winnipeg’s Health Sciences Centre ya li dokota wa za ku mbumbisa mubili mutu ha pazulwa. Kiñi se ne si tisize kuli a batisise mualafelo u sili o sa tokwi ku pompela mali?

Ka 1986, Dokota y’o, Muirhead a ituma pilu ka ku pazula munna-muhulu wa lilimo ze 70 ya n’a na ni sitombo se si zweta mali. Munna-muhulu y’o n’a kupile kalafo ye sa tokwi ku pompela mali kabakala litumelo za hae ze tomile fa Bibele za n’a na ni zona ka ku ba Paki ya Jehova. (Likezo 15:28, 29) Magazini ya Maclean’s i biha kuli Muirhead “n’a itusisize mualafelo o n’o itusiswa ka siwela wa ku pompela mukuli mezi a na ni lizwai kuli a ekeze kwa m’ata ao mali a buba ka ona mwa mubili wa hae. Mualafelo w’o n’o kondile, mi n’o matafalize sinca tumelo ya Muirhead ye ne i hula ya kuli ‘ne lu itusisa hahulu mualafelo wa ku pompela mali. Ne ni bona kuli nako ya ku fetuhela kwa mialafelo i sili ne i se i fitile.’”

Takazo ya ku bata mipazulelo ya ku sa pompela mali ne i “tiiselizwe ki ku ikalelwa kuli mali a’ filwe a ka suhana a fukuzeha kwapili ni sabo ya bakuli ya kuli ne ba ka yambula tukokwani twa butuku mwa mali a’ pompezwi.” Kabakala lipatisiso za madokota ba ba ikupulela, kwand’a Lipaki za Jehova, ba bañata ba bañwi ba fumani tuso. Magazini ya Maclean’s i li: “Kwand’a ku feza tokwahalo ya ku pompa mali ka linako ze ñata, ku pazula ku si na ku pompela mali ku fukuza kozi—i be bunyinyani i mane—ya ku yambula butuku mwa mali a’ si ka kena.” Kono nihaiba mali a’ twi a kenile a kona ku yambulisa butuku ka ku fipeza ka swalelele tuka twa mwa mibili ya bakuli to tu i konisa ku lwanisa matuku.

Ki afi matomelo a tumelo ye tiile ya Lipaki za Jehova ka za likalafo li sili ze si za ku pompela mali? Mwendi ne mu ka tabela ku bala bukanyana ye li Mali a Kona ku Punyusa Cwañi Bupilo bwa Mina? Lipaki za Jehova ne ba ka tabela ku mi fa yona.