Mwa Kona ku Ikola Limbuyoti za Mubuso

MUAPOSITOLA Paulusi wa Sikreste n’a ziba hande lipuo ze ñwi ze tuna za mwa linako za hae. Na itutile ka ku likana ni mo ku kona ku itutelwa kwa yunivesiti kacenu le. N’a ikola lituso ni liswanelo kaufela za bayahi ba mwa Roma. (Likezo 21:37-40; 22:3, 28) Ze mu paka zeo ne li ka mu konisa ku ba ya fumile ni ku bubana. Kono, n’a bulezi kuli: “Ze ne ni li ki bufumu ku na, ni li talimile kuli ki sinyehelo, kabakala Kreste . . . , mi ni li talima inge matakala, kuli ni fume Kreste.” (Mafilipi 3:7, 8) Ki kabakalañi Paulusi ha n’a bulezi cwalo?

Paulusi, ya n’a zibahala kwa makalelo kuli ne li Saule wa kwa Tarese ni munyandisi wa be ne ba li “ba Tuto Yeo,” a ba mulumeli hamulaho wa ku boniswa pono ya Jesu ya n’a zusizwe kwa bafu ni ku pahamiswa. (Likezo 9:1-19) Pono yeo ya n’a bile ni yona Paulusi ha n’a li mwa nzila ya ku ya kwa Damaseka ku si na ku kakanya ni hanyinyani ne i mu bonisize kuli Jesu ki yena Mesiya ya n’a sepisizwe, kamba Kreste, yena mubusi wa mwa nako ya kwapili wa Mubuso o sepisizwe. Mi hape ne i tisize cinceho ye tuna mwa mupilelo wa Paulusi, sina ka mo ku boniselizwe mwa pulelo ya hae ye m’ata ye ñozwi fahalimu. Ka mubulelelo o muñwi, Paulusi ka ku ba ya buniti ni wa pilu ye sepahala, n’a bakile.—Magalata 1:13-16.

 Mwa Bibele linzwi le li yemela kezo la ku “baka” hañata li tolokiwanga ku zwelela kwa linzwi la Sigerike ili leo li talusa luli kuli “hamulaho wa ku ziba,” ka ku fapahana ni “ku zibela cimo.” Kacwalo, ku baka ku kopanyeleza cinceho mwa munahano wa mutu, mubonelo, kamba mulelo, ku hana mikwa ya kwamulaho ku ba ye sa kolwisi. (Likezo 3:19; Sinulo 2:5) Kwa neku la Paulusi, n’a si ka tuhelela kezahalo ya butokwa ya mwa nzila ya ku ya kwa Damaseka yeo ku ba nto ye n’e zusulusize fela maikuto, kamba mane ze ba twi ki likezahalo fela za kwa moya. Ku yena ne li ku nyangumunelwa kwa buniti bwa kuli nzila ya bupilo bwa hae ya kwamulaho, ya ku sa ba ni zibo ya Kreste, ne li ya mbango. Hape n’a lemuhile kuli n’a tamehile ku eza se siñwi ili ku kondolokisa mupilelo wa hae, kuli a kone ku tusiwa ki tumelo ya hae ya n’a sa zo fumana ka za Kreste.—Maroma 2:4; Maefese 4:24.

Cinceho Ye N’e Tisize Limbuyoti

Kwa makalelo, zibo ya Paulusi ya za Mulimu ne i zwelela sihulu kwa keleke ya Bafalisi, ili yeo n’a li yo muñwi wa yona. Litumelo za bona ne li kopanyeleza mihupulo ya batu ye miñata ni sizo. Bakeñisa saluluti sa bulapeli, tukufalelo ni m’ata za Paulusi ne li libisizwe mwa nzila ye fosahezi. Niha n’a hupula kuli n’a sebeleza Mulimu, ka buniti luli n’a lwanisana ni yena.—Mafilipi 3:5, 6.

Hamulaho wa ku amuhela zibo ye nepahezi ka za Kreste ni kalulo y’a peta mwa mulelo wa Mulimu, Paulusi n’a konile ku bona kuli n’a na ni ku eza keto: Kana n’a zwezipili ku ba Mufalisi ni ku ikola situlo ni ku kutekiwa, kamba n’a cincize mupilelo wa hae ni ku kalisa ku eza ze ne tokwahala kaufela ilikuli a fumane tumelezo ku Mulimu? Ka tabo, Paulusi a eza keto ye lukile, kakuli n’a bulezi kuli: “Ha ni swabeli Evangeli; kakuli ki mata a Mulimu a ku pilisa mutu ni mutu ya lumela, Mujuda pili, ni yena Mugerike.” (Maroma 1:16) Paulusi a ba mukutazi ya na ni tukufalelo wa taba ye nde ka za Kreste ni Mubuso.

Hamulaho wa lilimo ze ñata, Paulusi a taluseza Bakreste ka yena kuli: “Ha ni hupuli kuli ni se ni sweli; kono se ni eza ki se: Ni libala ze mwamulaho, mi ni akufela ku ze kwapili, ni matela fo ku likanyisizwe, ni fumane kwateñi mupuzo wa pizo ya kwa halimu ye zwa ku Mulimu, ka Jesu Kreste.” (Mafilipi 3:13, 14) Paulusi n’a fumani tuso kwa taba ye nde bakeñisa kuli ka ku itatela n’a tokolomohile ze n’e mu libisa kwahule ni Mulimu. A ndongwama ka pilu kaufela likonkwani ze n’e lumelelana ni mulelo wa Mulimu.

Ki Sifi Se Ne Mu ka Eza?

Mwendi kihona mu sa zo utwa za taba ye nde ya Mubuso. Kana sepo ya ku pila ku ya ku ile mwa paradaisi ye petehile ki ye hoha mamelelo ku mina? Ka tukelo luli ya swanela ku ba cwalo, kakuli kaufela luna ka sipepo lu na ni takazo ya ku pila ni ku ikola bupilo mwa kozo ni buiketo. Bibele i bulela kuli Mulimu u beile mwa lipulu za luna zibo ya “linako ze sa feli.” (Muekelesia 3:11) Kacwalo ki nto ya ka sipepo luna ha lu ba ni sepo ya nako ili f’o batu ba ka pila ku ya ku ile mwa kozo ni tabo. Mi seo ki sona se i fa taba ye nde ya Mubuso.

Nihakulicwalo, kuli sepo yeo i be ya luli, mu tokwa ku eza patisiso ni ku fumana seo taba ye nde i si ama. Muapositola Paulusi n’a file kalimelo y’e li: “Mu lemuhe se si latwa ki Mulimu kana ki sifi, se sinde, se si kateleha, se si petehile.” (Maroma 12:2) Kacwalo, sina Paulusi, hamulaho wa ku fumana zibo ni kutwisiso, mu lukela ku eza keto.

Kwa neku le liñwi, mwendi mu se mu na ni kale ni litumelo ze ñwi ze ama nako ya mina ya kwapili. Mu hupule kuli Saule n’a na ni litumelo za hae ka za tato ya Mulimu pili a si ka ba kale muapositola Paulusi. Kono mwa sibaka sa ku libelela patululo ya ka makazo ku zwelela ku Mulimu, mwa kona ku nyakisisa taba ka mo i inezi. Mu ipuze kuli: ‘Kana na ziba luli kuli tato ya Mulimu ka za batu ni lifasi-mubu ki ifi? Ki bupaki mañi bo ni kona ku fa ili ku tiiseza litumelo za ka? Kana bupaki bo ni na ni bona bwa kona ku siyala inze bu tiile ha bu tatubiwa ka Linzwi la Mulimu, yona Bibele?’ Ha ku na se mu ka kona ku latehelwa ki sona ha mu tatuba litumelo za mina za bulapeli ka nzila yeo.  Mane, mu lukela ku tabela ku eza cwalo kakuli Bibele i lu susueza kuli: “Mu like linto kaufela, mi mu swale ze nde.” (1 Matesalonika 5:21) Kakuli, sa butokwa luli ki tumelezo ya Mulimu.—Joani 17:3; 1 Timotea 2:3, 4.

Bahulu ba bulapeli ne ba kana ba lu sepisa nako ya kwapili ye sa feli. Kono haiba sepiso yeo ha i si ka toma fa lituto za Bibele, ha i na ku lu tusa ku fumana limbuyoti za Mubuso wa Mulimu. Mwa Ngambolo ya hae ye zibahala ya fa Lilundu, Jesu na lemusize ka m’ata kuli: “Hasi batu kaufela ba ba li ku na: Mulena, Mulena, ba ba ka kena mwa mubuso wa kwa lihalimu; kono ku ka kena ya eza se si latwa ki Ndate ya kwa lihalimu.”—Mateu 7:21.

Mu lemuhe koñomeko ya Jesu fa ku eza se si latwa ki Ndat’ahe ku ba sona sipimo sa ku amuhela ka sona limbuyoti za Mubuso wa Mulimu. Ka mubulelelo o muñwi, nto ye ne i kana ya bonahala ku ba ya silumeli mwendi haki ye amuheleha ku Mulimu. Mane, Jesu n’a zwezipili ku bulela kuli: “Ba bañata ba ka li ku na: Mulena, Mulena, ha lu li, ki luna ne lu polofita ka Libizo la hao? mi ne lu leleka balimu ka Libizo la hao? mi ne lu eza limakazo ze ñata ka Libizo la hao? Kiha ni ka ba bulelela patalaza, ni li: Ha ni si ka mi ziba haisali; mu zwe ku na, mina ba ba sebezanga ze maswe.” (Mateu 7:22, 23) Kwa bonahala hande kuli, sa butokwa kikuli lu ikolwise kuli lwa utwisisa ka ku nepahala seo taba ye nde ya Mubuso ili sona luli mi ku tuha fo ni ku eza ka ku lumelelana ni yona.—Mateu 7:24, 25.

Tuso Ya Fumaneha

Lipaki za Jehova ba kutalize taba ye nde ya Mubuso wa Mulimu ka lilimo ze fitelela 100. Ka lihatiso ni ka manzwi a ka mulomo, ba sweli ku tusa batu mwa lifasi ku fumana zibo ye nepahezi ya za seo Mubuso u li sona, limbuyoti ze u ka tisa, ni z’a lukela ku eza mutu kuli a fumane limbuyoti ze cwalo.

Lu mi susueza ku amuhela lushango lo lu sweli ku kutaziwa ki Lipaki za Jehova. Ka ku amuhela ni k’u nga muhato kwa taba ye nde, mu ka kona ku fumana limbuyoti ze tuna mwa nako ya cwale ni ya kwapili ili f’o Mubuso wa Mulimu u ka busa lifasi-mubu kaufela.—1 Timotea 4:8.

M’u nge muhato cwale, kakuli limbuyoti za Mubuso wa Mulimu li fakaufi!

[Maswaniso a fa likepe 7]

Ka lihatiso ni ka manzwi a ka mulomo, Lipaki za Jehova ba kutaza taba ye nde ya Mubuso wa Mulimu