Taba Ye Nde ya Mubuso—Ki Nto Mañi?

Ñohola mwa linaha ze eza 235 mwa lifasi kaufela, batu ba ba eza 6,035,564, ba bahulu ni banana, ne ba ambozi ku ba bañwi ka za yona ka lihora ze fita fa 1,171,270,425. Kwand’a ku i fitisa ka manzwi a ka mulomo, ne ba file lihatiso ze fitelela 700 milioni kwa nyangela ili ku i zibahaza ni ku i talusa. Hape ne ba hasanyize likiti-kiti za makaseti a mulumo ni makaseti a maswaniso ili ku i zibahaza. Ki nto mañi yona yeo?

KI TABA ye nde ya Mubuso wa Mulimu. Ka niti luli, “evangeli ye ya Mubuso” ya li ku ba, mwa litaba za batu, i sa kutaziwi ka ku fita fa sipimo se lu iponela kacenu le.—Mateu 24:14.

Bao kamukana ba ba sweli musebezi wa ku kutaza ni ku luta mwa lifasi kaufela ki baitateli. Ka mubonelo wa silifasi, ne ba kana ba bonahala ku sa fita ku ze konisa za ku eza musebezi w’o. Kacwalo, ki lika mañi ze ba konisa ku ba ni bundume ni ku kondisa? Libaka le lituna ki m’ata a taba ye nde ya Mubuso, kakuli ki taba ye ama limbuyoti ze ka taha kwa batu. Zeo ki limbuyoti ze ba nyolelwa batu kaufela—ili tabo, tukuluho kwa masitapilu a ka za mali, puso ye nde, kozo ni buiketo, mane ni nto ye ñwi ili yeo buñata b’a nga kuli ha i konahali—ili bupilo bo bu sa feli! Ye luli ki taba ye nde kwa batu ba ba sweli ku bata taluso ni mulelo wa bupilo. Ee, limbuyoti zeo ni ze ñwi li kona ku ba za mina haiba mu amuhela taba ye nde ya Mubuso ye sweli ku shaelwa, ni k’u nga muhato o munde ka za yona.

Mubuso ki Sika Mañi?

Kono Mubuso o sweli ku zibahazwa kuli ki taba ye nde ki sika mañi? Ki Mubuso ili wo bolule-lule se ba lutilwe ku u lapelela ka manzwi a zibahala a li: “Ndat’a luna ya kwa lihalimu, Libizo la hao a li be le li kenile; ku tahe mubuso wa hao; se si latwa ki wena si ezwe mwa lifasi, mo si ezezwa kwa lihalimu.”—Mateu 6:9, 10.

Ki ona Mubuso wo mupolofita wa Siheberu Daniele na bulezi ka za ona lilimo ze mianda ye 25 kwamulaho ha n’a ñozi kuli: “Mulimu wa mwa lihalimu u ka tahisa mubuso o si na ku sinyeha ku ya ku ile; mi bulena bwa ona ha bu na ku shimbulukela kwa sicaba si sili. Mubuso wo, u ka ketula ni ku feza mibuso kaufela; kono ona u ka ba teñi kamita ni ku ya ku ile.”—Daniele 2:44.

Kacwalo, taba ye nde ki ya za Mubuso, kamba mulonga wa Mulimu o ka zwisa bumaswe kamukana ni ku busa lifasi kaufela ka kozo. U ka ezisa kuli mulelo wa Mulimu wa pili ka za batu ni ka za lifasi-mubu u petahale.—Genese 1:28.

 “Mubuso wa kwa Lihalimu S’o Li Fakaufi”

Ibat’o ba lilimo ze 2,000 kwamulaho, taba ye nde ya Mubuso ne i zibahalizwe lwa pili fa nyangela ki munna ya n’a ineezi ili yo ponahalo ni muinelo wa hae ne li mu ezisa ku ba ya teelezwa ki batu. Munna yo ne li Joani Mukolobezi, mwan’a muprisita wa Sijuda Zakaria ni musal’a hae, Elizabeta. Joani n’a apezi kubo ya boya bwa kamele, mi n’a itamile lukanda lwa litalo mwa teka, sina mwa n’a ezezanga mupolofita Elia ili ya n’a mu swaniselize. Kono ne li lushango lwa hae lo ne lu hohile mamelelo ya ba bañata. A shaela kuli, “mu bake, kakuli mubuso wa kwa lihalimu s’o li fakaufi.”—Mateu 3:1-6.

Bateelezi ba Joani ne li Majuda, be ne ba ipala ku ba balapeli ba Mulimu wa niti, Jehova. Ka ku ba sicaba, ne se ba amuhezi Mulao wa bulikani ka Mushe ibat’o ba lilimo ze 1,500 kwamulaho. Tempele ye tuna ne i sa li teñi mwa Jerusalema, ili mo matabelo n’a felwa ka ku ya ka Mulao. Majuda ne ba na ni buikolwiso bwa kuli bulapeli bwa bona ne bu lukile mwa meto a Mulimu.

Nihakulicwalo, ha se ba teelelize ku Joani, ba bañwi ba kalisa ku lemuha kuli bulapeli bwa bona ne bu si seo ne ba bu nahanezi ku ba sona. Lizo ni mihupulo ya batu za Sigerike ne se li keni mwa lituto za bulapeli za Sijuda. Mulao o ne u kile wa amuhelwa ku zwelela ku Mulimu ka Mushe ne se u zwakilwe, mane ni ku biswa o si na tuso, ka litumelo ni lizo ze ne ba ipangezi batu. (Mateu 15:6) Ka ku libiswa mwa nzila ye fosahezi ki ba bahulu ba bulapeli ba ba lunya ni kutokwa sishemo, buñata ba tuhela ku lapela Mulimu ka nzila ye amuheleha. (Jakobo 1:27) Ne ba tokwa ku bakela libi ze ne ba ezize ka ku foseza Mulimu ni ka ku loba Mulao wa bulikani.

Ka nako yeo, Majuda ba bañata ne ba libelela ku bonahala kwa Mesiya ya n’a sepisizwe, kamba Kreste, mi ba bañwi ne ba nze ba ipuza ka za Joani kuli: “Kuli mwendi Joani ki yena Kreste?” Kono Joani a itatula kuli n’a si yena mi a ba libisa ku yo muñwi, ili yo ka za yena a bulela kuli: “Ye ni sa lukeli ku tamulula litamiso za likatulo za hae.” (Luka 3:15, 16) Ka ku tahisa Jesu kwa balutiwa ba hae, Joani n’a zibahalize kuli: “Ki yo Ngunyan’a Mulimu ya zwisa sibi sa lifasi!”—Joani 1:29

Yeo ne ibile taba ye nde luli, kakuli Joani na supelize batu kaufela nzila ye isa kwa bupilo ni tabo—ili Jesu, yena ya “zwisa sibi mwa lifasi.” Ka ku ba ba ba simuluhile ku bo Adama ni Eva, batu kaufela ba pepilwe mwatas’a luswenyo lwa sibi ni lifu. Maroma 5:19 i talusa kuli: “Ba bañata sina ha ba beilwe baezalibi ka ku sa utwa kwa mutu a li muñwi [Adama], kamukwaocwalo ka ku utwa kwa mutu a li muñwi [Jesu], ba bañata ba ka beiwa ba ba lukile.” Sina ngu ya sitabelo, Jesu n’a na ni ku ‘zwisa sibi’ ni ku felisa muinelo o maswe w’o batu ba li ku ona. Bibele i talusa kuli, “mupuzo wa sibi ki lifu; kono mpo ya sishemo sa Mulimu ki bupilo  bo bu sa feli ka Jesu Kreste Mulen’a luna.”—Maroma 6:23.

Ka ku ba mutu ya petehile—mane, ili mutu yo mutuna ka ku fitisisa ya kile a pila fa lifasi-mubu—Jesu a zwisezapili musebezi wa ku kutaza taba ye nde. Taba ye mwa Bibele kwa Mareka 1:14, 15 i lu taluseza kuli: “Joani h’a s’a kenyizwe mwa tolongo, Jesu a ya kwa Galilea inz’a bulela Evangeli ya Mulimu, a li: Linako li felile, ni mubuso wa Mulimu u sutelezi fakaufi. A mu bake, mi mu lumele Evangeli.”

Be ne ba utwile lushango lwa Jesu ni ku bonisa tumelo kwa taba ye nde ne ba fuyauzwi hahulu. Joani 1:12 i bulela kuli: “Bona ba ba mu amuhezi [Jesu], u ba file mata a ku fetuha bana ba Mulimu, bona ba ba lumela libizo la hae.” Ka ku ba bana ba Mulimu, ne ba ka amuhela mupuzo wa bupilo bo bu sa feli.—1 Joani 2:25.

Kono haki batu ba mwa lilimo za mwanda wa pili fela be ne ba na ni tohonolo ya ku amuhela limbuyoti za Mubuso. Sina mo ku bulelezwi kwa makalelo, kacenu taba ye nde ya Mubuso wa Mulimu i sweli ku shaelwa ni ku lutiwa mwa lifasi kaufela. Kacwalo limbuyoti za Mubuso li sa fumaneha. Ki sifi se mu lukela ku eza kuli mu amuhele limbuyoti ze cwalo? Taba ye tatama i ka talusa.