Kana Mwa Hupula?

Kana mu itebuhile ku bala misulo ya cwanoñu fa ya Tora ya ku Libelela? Haiba ku cwalo, mu bone haiba mwa kona ku alaba lipuzo ze latelela:

• Kwa Maroma 5:3-5, ki kabakalañi muapositola Paulusi ha n’a beile sepo kwa mafelelezo a mukoloko?

Paulusi n’a file mukoloko wa lika ze ba fitanga ku zona Bakreste, ili manyando, ku tiiseza, ku sepahala, ni sepo. “Sepo” yeo haki sepo ya pili y’a fumana mutu mwa Bibele, kono ki sepo ye tiisizwe, ye tungisizwe, ili ye keni mwa likalulo kaufela za mubili, yeo Mukreste a kona ku ba ni yona ha se ku fitile nako.—1/1, makepe 15-17.

• Ki mukwa mañi o munca wa ku shaela ka ona taba ye nde o ne u tahisizwe mwa January ka 1914?

“Photo-Drama of Creation” ne i tahisizwe ka nako yeo. Ne i na ni likalulo z’e ne mo ne ku na ni likalulo za maswaniso a zamaya ni ma-slides a mibala-bala. Buñata bwa ona n’a boniswa ka ku zamaelela ni manzwi a’ fa matapa a n’a bapalwa fa mushini wa phonograph. Manzwi ao ne li lingambolo ze n’e talusa maswaniso ao. Ne ku lukisizwe madrama a 20 a cwalo a’ itusisizwe hahulu mwa ku luta batu lushango lwa Bibele.—1/15, makepe 8-9.

• Sitopa Se Si Busa si shutana cwañi ni kopano ye ketilwe ka mulao?

Hailif’o bazamaisi ba kopano ye ketilwe ka mulao ba ketiwanga ki lilama za yona kopano yeo, Sitopa Se Si Busa ha si ketiwangi ki mutu ufi kamba ufi, kono si ketiwanga ki Jesu Kreste. Ha ku na butokwa bwa kuli bazamaisi ba likopano ze shutana-shutana ze itusiswa ki Lipaki za Jehova ba be lilama za Sitopa Se Si Busa. Kwa mukopano wa ka silimo o ne u ezizwe cwanoñu fa wa Watch Tower Bible and Tract Society of Pennsylvania, lilama za Sitopa Se Si Busa be ne ba li bazamaisi ni baokameli ne ba itatezi ku itulula fa buikalabelo bwa bona. Buikalabelo b’o ne b’u ngilwe ki mizwale be se ba hulile kwa moya ba “lingu ze ñwi.” (Joani 10:16) Kacwalo Sitopa Se Si Busa si kona ku ba ni nako ye ñata ya ku lukisa lico za kwa moya ni ku tokomela litokwahalo ze ñwi za kwa moya za kopano ya mwa lifasi kaufela.—1/15, makepe 29, 31.

• Ki mitala mañi ye mibeli ya mwa Bibele ye lu kona ku nyakisisa kuli lu itute mwa ku tiyela ku zwafa?

O muñwi ki wa Anna, mahe Samuele. N’a kabe a ituhelezi ku zwafa muta muprisita yo muhulu wa Isilaele Eli ha n’a mu atuzi ka mafosisa. Kono a mu bulelela buniti ka ku sa pata-pata mi ili ka likute. Hape, Anna n’a si ka ba ni ndimbelela mwa pilu ka za Eli. Wa bubeli ki wa Mareka, ili y’o n’a lukela ku ba ya n’a zwafile muta muapositola Paulusi n’a hanile ku zamaya ni yena mwa musipili wa bulumiwa. Ku fita ku zwafiswa hahulu ki taba ya kuli n’a latehezwi ki yona tohonolo yeo, a zwelapili mwa sebelezo ya hae ya ka cisehelo, ili ku zamaya ni Barnabasi.—2/1, makepe 20-2.

• Ki kabakalañi Bakreste ha ba swanela ku tokomela ka za ku fa ba bañwi, kamba ku amuhela ku zwelela ku ba bañwi, likopi za litukiso ze laela kompyuta za ku eza?

Buñata bwa litukiso za fa kompyuta (ku kopanyeleza cwalo ni lipapali ze ku zona) li na ni liñolo la tumelezo le li lumeleza fela muñi kamba muitusisi ku beya tukiso yeo fa kompyuta i liñwi fela. Hañata, ku ezeza ba bañwi likopi ki ku loba mulao o ama za ku kopisa lika, niha lu fanisa likopi zeo mahala. Bakreste ba bata ku utwa mulao wa ku ‘kutiseza Sesare ze li za Sesare.’ (Mareka 12:17)—2/15, makepe 28-9.

• Bo Cyril ni Methodius ne li bomañi, mi ne ba tusize cwañi ku za tuto ya Bibele?

Ne li bo mutu ni munyan’a hae be ne ba pepezwi mwa Tesalonika, ili mwa Greece, mwa lilimo za mwanda wa bu 9. Ne ba tahisize litaku ze ñozwi za puo ya si-Slavic mi ne ba tolokile kalulo ye tuna ya Bibele ku isa mwa puo ya si-Slavonic.—3/1, makepe 28-9.

• Pulelo ye li “ku utwa za moya” i talusañi?—Maroma 8:6.

I talusa ku zamaiswa, ku busiwa, ni ku susuezwa ki m’ata a sebeza a Jehova. Lu kona ku tuhelela moya wa Mulimu ku sebeza ku luna ka ku bala ni ku ituta Bibele, ku utwa mulao wa Mulimu ka pilu kaufela, ni ka ku lapelela moya wa Mulimu.—3/15, likepe 15.

• Lu kona ku eza cwañi haiba lu ikutwa ku sa utwisiswa?

Ku butokwa ku bata ku tatulula litaba ka moya wa lilato. Haiba ku bonahala kuli nto yeo ha i sebezi, mu si zwafi. Mu kupe kutwisiso ni tuso ku Jehova, yena “ya beya pilu fa sikala ku li likanyeza.” (Liproverbia 21:2; 1 Samuele 16:7)—4/1, makepe 21-3.