“Jehova U Bile Yo Munde Hakalo ku Na!”

MANZIBWANA a lizazi le liñwi le linde hahulu mwa March, ka 1985, banna ni basali ba ba mwa Likolo La za Buñoli (Writing Department) kwa sibaka sa tamaiso sa Lipaki za Jehova se si mwa New York, U.S.A., ba lemuha nto ye tuna ye n’e ezahezi. Karl F. Klein n’a s’a sebelize mwa bukombwa bwa ka nako ye tezi ka lilimo ze fitelela 60. Muzwale Klein a bulela ka mafulofulo kuli: “Jehova u bile yo munde hakalo ku na!” A talusa kuli n’a lata hahulu liñolo la mwa Bibele la Samu 37:4. Hasamulaho a tabisa bote ka ku liza siliziso sa hae se si bizwa Cello.

Mwa lilimo ze n’e tatami ze 15, Muzwale Klein n’a zwezipili ku sebeza ka ku ba yo muñwi wa bañoli ni ka ku ba yo muñwi wa ba Sitopa Se Si Busa sa Lipaki za Jehova. Mi la January 3, 2001, inge a na ni lilimo za buhulu ze 95, Karl Klein a feza bupilo bwa hae bwa fa lifasi-mubu ka busepahali.

Karl n’a pepezwi mwa Germany. Lubasi lwa habo lwa tutela kwa United States, mi Karl a yo hulela mwa Chicago, mwa sibaka se si bizwa Illinois. Inge ba sa li banana, bo Karl ni munyan’a hae Ted ba kala ku tabela hahulu Bibele. Karl n’a kolobelizwe ka 1918, mi lika ze nyangumuna za n’a utwile ka 1922 kwa mukopano wa Baituti ba Bibele za zusulusa ku yena lilato la ku lata bukombwa bwa mwa simu mwa bupilo bwa hae kaufela. N’a sa lati ku fitisa viki a si ka abana mwa musebezi wa ku kutaza, mi mane ni mwa liviki za mafelelezo za bupilo bwa hae, n’a abani teñi.

Ka 1925, Karl a ba yo muñwi wa babeleki ba kwa sibaka sa tamaiso, mi pili a sebeza mwa sibaka mo ku hatisezwa lika. N’a lata hahulu-hulu lipina, mi ka lilimonyana, n’a lizanga siliziso se si bizwa Cello mwa sikwata se ne si lizanga lipina fa litukiso za Sikreste za fa wayalesi. Ku tuha f’o a yo sebeza mwa Likolo la Sebelezo, (Service Department) mi sihulu a ikola swalisano ya hae ni T. J. Sullivan, ya n’a li muokameli wa lona likolo leo. Ka nako yeo, Ted n’a s’a nyezi, mi yena ni musal’a hae Doris, ne ba eza musebezi wa bulumiwa mwa Puerto Rico.

Ka lilimo ze 50, Karl Klein n’a sebelize mwa Likolo la za Buñoli, ili m’o n’a tusize hahulu kakuli n’a lata hahulu ku eza lipatisiso mi n’a na ni zibo ye tuna ka za Bibele. Ka 1963, Karl a nyala Margareta, ya n’a li mulumiwa wa Mujelemani ya n’a sebeleza mwa Bolivia. Ka tuso ya musal’a hae ye lilato, sihulu ha n’a bile ni makulanu, n’a konile ku zwelapili ku sebeza ku fitelela ni nako yeo ku yona ba bañata ba tuhelanga ku sebeza. Muinelo wa Karl wa ku bulela ka ku sa pata-pata, ko ku kopani ni mafulofulo a muopeli, ne ku tahisize kuli a fange lingambolo ze sa libalwi mwa liputeho ni kwa mikopano ye mituna. Nakonyana pili a si ka shwa kale, a zamaisa puhisano ya kakusasana ya liñolo la zazi ye eziwanga ki lubasi lo lutuna lwa fa Betele ya mwa New York. Ku zamaisa k’o ne ku tabisize ni ku tusa be ne ba li teñi kaufela.

Buñata bwa babali ba kamita ba Tora ya ku Libelela ba ka hupula likande la bupilo bwa Muzwale Klein, ili taba ye tabisa ya za n’a fitile ku zona, ze n’e hatisizwe mwa musulo wa October 1, 1984. Mu ka ikola ku bala kamba ku bala hape likande leo, ka ku hupula kuli muñoli wa lona n’a pilile lilimo ze ñwi hape ze 15 inge a li Mukreste ya sepahala ili ya ipeya ku utwa.

Ka ku ba yo muñwi wa ba ba tozizwe ba Mulena, Muzwale Klein n’a lakaza ka pilu ya hae kaufela ku yo busa ni Kreste mwa lihalimu. Lu lumela ka ku tala kuli Jehova u talelelize yona takazo yeo.—Luka 22:28-30.

[Siswaniso se si fa likepe 31]

Bo Karl ni T. J. Sullivan ka 1943, hamoho ni Bo Ted ni Doris

[Siswaniso se si fa likepe 31]

Bo Karl ni Margareta, ka October 2000