Ka M’o Bumbelwa Ne Bu Amezi Basali ba Babeli

SANDRA ki mbelwa ya pila kwa Australia. Lilimonyana kwamulaho, Sandra ha n’a utwile fela kuli munn’a hae u timezi, a mbemuka hahulu. “Ku lemuha kuli ni tobezwi ka sipundumukela ki mulikan’a ka yo mutuna ni sinyalana ni na ne ku ni eshuzi hahulu. Ha ni hupuli luli mo ne ni kutezi kwa ndu ku zwa kwa sipatela kamba ze ne ni ezize fa lizazi lani mutumbi. Mwa liviki ze sikai ze n’e latelezi, na kalisa ku utwanga butuku kabakala sabo ya ka.”

Sandra u na ni mulikani yo muhulu ku yena y’a bizwa Elaine, y’o se ku fitile lilimo ze bat’o ba ze silezi a li mbelwa. Elaine n’a kulisize munn’a hae ya bizwa David ka likweli ze silezi pili butuku bwa kansa bu si ka mu bulaya kale. N’a bile ni masitapilu a matuna hahulu kuli hamulahonyana wa f’a timelela munn’a hae, a kenelwa ki bubofu ka nakonyana. Lilimo z’e peli hamulaho, a welelela fa nyangela. Dokota wa hae n’a palezwi ku fumana butuku bufi kamba bufi ku yena. Kono a lemuha kuli Elaine n’a sa bonisangi masitapilu a hae patalaza. Kacwalo, a mu eleza kuli a ye kwa ndu ni ku y’o lika ka t’ata ku lila. Elaine u itumelela kuli: “Ne ku ngile nako ye telelenyana kuli ni kone ku talimana ni masitapilu a ka,” mi u ekeza kuli ha n’a ikutwanga buinosi, “mane ne ni yanga kwa musiyo ni ku ikapesa liapalo za David kwa toho.”

Ee, lifu la sinyalana ni yena y’a lateha li kona ku ezisa batu lika ze fitana-fitana, kakuli ku ba mbelwa luli ku ama ze ñata kwand’a fela ku pila ku si na munna. Ka mutala, Sandra n’a ikutwile ka nako ye telelenyana kuli n’a si yena luli. Ka ku swana ni limbelwa ba bañwi ba bañata ba ba sa zo shwelwa ki banna ba bona, hape n’a ikutwile kutokwa silelezo. Sandra ha iheta u li: “Ka ku twaela kuli munn’a ka ki yena ya n’a ezanga likatulo za mafelelezo, ne ni siilwe ka sipundumukela mi ne ni na ni ku ezanga likatulo zeo. Ne ni sa lobalangi hande. Ne ni ikutwanga mabote ni ku katala. Ne ku li t’ata ku ziba fela sa ku eza.”

Kai ni kai mwa lifasi, makande a swana ni a Sandra ni Elaine a kuta-kutela ku bulelwa ka zazi. Makulanu, likozi, lindwa, ku bulaya ba mikowa i sili, ni mufilifili ki zona zeo sihulu li ekeza kwa palo ya limbelwa. * Buñata bwa basali bao ba shwela mwa pilu, ba sa zibi sa ku eza. Balikani ni bahabo ba kona ku ezañi kuli ba tuse ba ba talimani ni bumbelwa? Taba ye tatama i na ni liakalezo ze kana za tusa.

[Litaluso za kwatasi]