Kana Mwa ‘Yolisa Linako’?

MUAPOSITOLA Paulusi n’a file kelezo kwa Bakreste be ne ba li mwa Efese mwa lilimo za mwanda wa pili kuli: “Mu tokomele mo mu zamaela, mu si ke mwa ba sina likuba, kono mu be sina ba ba butali. Mu yolise linako kakuli mazazi s’a li a maswe.” (Maefese 5:15, 16) Ki kabakalañi kelezo yeo ha ne i tokwahala? Kalabo kwa puzo yeo i kona ku alabiwa fela ha se lu zibile miinelo ye ne ba li ku yona Bakreste be ne ba li mwa muleneñi wa kwaikale w’o.

Efese ne i zibahala ka ku fuma kwa yona ko kutuna, ka buhule bo bu fitelezi, ka ku ata kwa bukebenga, ni likezo ze ñwi za sihedeni ze shutana-shutana. Fahalimw’a seo, Bakreste be ne ba li teñi ne ba na ni ku tiyela mihupulo ya batu ka za nako. Magerike be ne ba si Bakreste be ne ba li mwa Efese ne ba sa lumeli kuli nako ne i zamaya fela mwa nzila i liñwi. Mihupulo ya batu ya Sigerike ne i ba lutile kuli bupilo ne bu kuta-kutela mwa mipotoloho ye sa feli. Mutu ya n’a si ka itusisa hande nako ya hae mwa bupilo bo buñwi n’a kona ku to i yolisa mwa bupilo bo bu tatama. Muhupulo o cwalo mwendi ne u ezisize Bakreste ba mwa Efese ku ba ni moya wa ku sa isa pilu kwa tomahanyo ya Jehova ya ku eza lika, ku kopanyeleza cwalo ni nako y’a tomile ya katulo ya hae. Kacwalo, kelezo ya Paulusi ya ku ‘yolisa linako’ ne li ye swanela.

Paulusi n’a sa buleli fela za nako ka nañungelele. Linzwi la Sigerike la n’a itusisize li talusa nako ye ketilwe, ili nako ye nde ye tomilwe ya ku peta mulelo o muñwi. Paulusi n’a eleza Bakreste ba mwa lilimo za mwanda wa pili kuli ba itusise hande nako ye nde, kamba nako ya ku shemubiwa ye ne ba na ni yona, pili mafelelezo a yona a si ka fita kale, mi pili sishemo sa Mulimu ni kolo ya ku puluswa ye ne ba filwe li si ka feliswa kale.—Maroma 13:11-13; 1 Matesalonika 5:6-11.

Ni luna lu pila mwa nako ye cwalo, ili nako ye nde. Ku fita ku yubaula fela nako ya ku shemubiwa ye, ye si ke ya ba teñi hape ka ku latelela minyaka ya swalelele ye fumaneha mwa lifasi, Bakreste ba eza ka butali ha ba itusisa nako ye ba na ni yona mwa ku eza “ka bulapeli” mi kacwalo ni ku tiisa silikani sa bona ni Mubupi, yena Jehova Mulimu.—2 Pitrosi 3:11; Samu 73:28; Mafilipi 1:10.