Piho ya Bashaeli Ba Mubuso

Ku Zwisa Nyazo Fa Libizo la Mulimu

LINZWI la Mulimu, Bibele, li bulela kuli: “Mu be ni muzamao o munde mwahali a bahedeni, kuli bakeñisa litaba ze ba mi seba ka zona, inge ki mina lisinyi, ba lemuhe misebezi ya mina ye minde, mi ba lumbe Mulimu zazi l’a ka ba potela.” (1 Pitrosi 2:12) Kacwalo, Bakreste ba niti ba satalala ku buluka muzamao o munde ili ku pima ku tahisa nyazo fa libizo la Jehova.

Mwa kalulo ye kwahule ya Zambia ye bizwa Senanga, muluti yo muñwi n’a uzwelizwe wayalesi mwa ndu ya hae. Bakeñisa kuli Lipaki za Jehova ne ba kutalize mwa sibaka seo, munna yo a ba tanda busholi. A yo biha taba kwa mapokola, ka ku bulela kuli Lipaki ba uzwize wayalesi ya hae. Ka ku fa bupaki bwa kuli Lipaki ne ba ile kwa ndu ya hae, a shokomona trakiti ya n’a fumani fafasi. Niteñi, mapokola ne ba si ka lumela. Ba mu eleza kuli a yo batisisa hande taba.

Lipaki be ne ba kutaleza mwa kalulo ya pila ku yona muluti y’o ne ba susuelizwe ki sitopa sa maeluda ku yo ambolisana ni muluti y’o ka za taba yeo. Mizwale ba bañwi ba ya ku yo ambolisana ni yena, ka ku talusa kuli ne ba bata ku zwisa nyazo fa libizo la Jehova. Mwahal’a puhisano ya bona, ba mu taluseza kuli ne ba fumani mutangana mwa ndu ya hae mi ne ba file trakiti yeo ku yena. Ka ku ya ka mutalusezo wa bona, muluti a ziba mutangana y’o. Mane, ne ba li ba bulapeli bo bu swana. Muluti a ambolisana ni mutangana y’o, kono a itatula. Kacwalo muluti a buhisana taba ni bashemi ba mutangana yo ni ku kutela kwa ndu ya hae. Mwahal’a hora i liñwi, bom’ahe mutangana ba kutisa wayalesi ye n’e uzwizwe.

Ka ku ikutwa maswabi, muluti a atumela sitopa sa maeluda ni ku yo kupa swalelo bakeñisa ku ba tama taba ka mafosisa. Maeluda ba amuhela buinyazo bwa hae kono ba mu kupa kuli ze fumanwi mwa patisiso li zibahazwe ilikuli mañi ni mañi a zibe kuli Lipaki ne ba sina mulatu. Zibiso ne i filwe fa sikolo, ili ku zwisa nyazo fa libizo la Jehova. Lipaki za Jehova ba kona ku zwelapili ku kutaza ka tukuluho mwa sibaka seo.

[Mapa/Siswaniso se si fa likepe 19]

(Kuli mu bone mo i hatiselizwe luli, mu bone hatiso)

AFRICA

Zambia

[Manzwi a bañi ba siswaniso]

Mountain High Maps® Copyright © 1997 Digital Wisdom, Inc.