Mu Zwelepili Ku Ba ni Tabo mwa Sebelezo ya Jehova

“Mu be ba ba tabile kamita ku Mulena; hape ni kutela ni li: Mu be ba ba tabile.”—MAFILIPI 4:4.

1, 2. Muzwale yo muñwi ni lubasi lwa hae ne ba konile cwañi ku zwelapili ku ba ni tabo niha ne ba latehezwi ki lika za bona kaufela?

BO JAMES, ki Bakreste ba lilimo za buhulu ze 70 ba ba pila mwa Sierra Leone, ba sebelize ka t’ata mwa bupilo bwa bona kaufela. Mu nahane tabo ye ne ba bile ni yona kwa mafelelezo ha ne ba konile ku kwanisa mali a ku leka ndu ye likani ya mizuzu ye mine! Kono nakonyana ku zwa fo ne ba tutezi mwa ndu yeo, kwa tumbuka ndwa mwahal’a bayahi ba naha yeo, mi ndu ya bona ya ciswa lotee. Ba latehelwa ki ndu ya bona, kono bo James ni lubasi lwa bona ne ba si ka latehelwa ki tabo ya bona. Libaka?

² Bo James ni lubasi lwa bona ne ba isize mamelelo ya bona, isi kwa lika ze ne ba latehezwi ki zona, kono kwa lika ze ne ba siyalezwi ki zona. Bo James ba talusa kuli: “Nihaiba mwa nako ye maswe hahulu yeo, ne lu ezanga mikopano, ku bala Bibele, ku lapela hamoho, ni ku ikabela lika ze nyinyani ze ne lu na ni zona ni ba bañwi. Ne lu konile ku zwelapili ku ba ni tabo kakuli ne lu isize mamelelo kwa silikani se sinde se lu na ni sona ni Jehova.” Ka ku hupula lika ze  nde ze ne ba na ni zona, ili ku zona zeo ku ba ni silikani sa ka butu ni Jehova ne ili yona nto ya butokwa ka ku fitisisa, Bakreste ba ba sepahala bao ne ba konile ku ‘ina ba tabile.’ (2 Makorinte 13:11) Ki niti kuli miinelo ya bona ye maswe ne i si ye bunolo ku i tiyela. Kono ne ba si ka tuhela ku ba ba ba tabile ku Jehova.

3. Bakreste ba bañwi ba kwa makalelo ne ba zwezipili cwañi ku ba ni tabo?

³ Bakreste ba kwa makalelo ne ba bile ni miliko ye swana ni ye ne ba bile ni yona bo James ni lubasi lwa bona. Niteñi, muapositola Paulusi n’a ñolezi Bakreste ba Maheberu manzwi a: “Ha mu amuhiwa tutu ya mina ka tata, mwa lumela ka tabo.” Ku tuha f’o, Paulusi a talusa kuli se ne si tisa kuli ba tabe ki sika mañi: “Inze mu ziba kuli mu fumile bufumu bo bu fita bo kwa bunde, bo bu ina ku ya ku ile.” (Maheberu 10:34, litaku li siyamisizwe ki luna.) Ee, Bakreste ba mwa lilimo za mwanda wa pili bao ne ba na ni sepo ye tiile. Ne ba libelela ku amuhela nto ye ne ba sa koni ku amuhiwa, ili “kuwani ya bulena ya bupilo” ye sa feli mwa Mubuso wa Mulimu wa kwa lihalimu. (Sinulo 2:10) Kacenu, sepo ya luna ya Sikreste, ibe ya ku ya kwa lihalimu kamba ya fa lifasi-mubu, i kona ku lu tusa ku zwelapili ku ba ni tabo niha lu talimana ni matata.

“Mu Tabe ka Sepo”

4, 5. (a) Ki kabakalañi kelezo ya Paulusi kwa Maroma ya kuli ba “tabe mwa sepo” ha ne i tile ka bunako luli? (b) Mukreste u kona ku eziswa kiñi ku latehelwa ki muhupulo wa sepo yeo?

⁴ Muapositola Paulusi n’a susuelize balumeli sina yena be ne ba li mwa Roma kuli ba “tabe ka sepo” ya bupilo bo bu sa feli. (Maroma 12:12) Kelezo yeo ne i tile ka nako ye swanela kwa Maroma. Lilimo ze lishumi li si ka kwana kale ku zwa fa n’a ba ñolezi Paulusi, ba tahelwa ki nyandiso ye tuna, mi ba bañwi ba nyandiswa ku fitela ba shwa ka taelo ya Mubusi Nero. Ku si na kuli cwañi, tumelo ya bona ya kuli Mulimu n’a ka ba fa kuwani ya bulena ya bupilo ya n’a ba sepisize ne i ba konisize ku tiyela nyandiso yeo. Luna bo kacenu?

⁵ Ka ku ba Bakreste, ni luna lu libelela ku nyandiswa. (2 Timotea 3:12) Hape lu lemuha kuli mutu ni mutu u tamwa ki “linako z’a pila ka zona, ni ki bushiko kamba bumai bwa hae.” (Muekelesia 9:11) Kozi i kona ku bulaya mutu ye lu lata. Butuku bo bu bulaya bu kona ku tahisa lifu la mushemi kamba mulikani yo mutuna. Ha lu sa beyi hahulu sepo ya luna ya Mubuso kwa pilu, buino bwa luna bwa kwa moya bu kona ku ba mwa lubeta miliko ye cwalo ha i taha. Kacwalo, ne lu ka eza hande ku ipuza kuli, ‘Kana na ‘taba ka sepo’? Ki hakai ni fumananga nako ya ku yeya ka za yona? Kana Paradaisi ye taha ki ya luli ku na? Kana na iponanga ni li ku yona? Kana ni sa bata hahulu kuli muinelo wa linto wo u fele sina mo ne ni batela cwalo ha ne ni kalile fela ku ituta niti?’ Puzo ya mafelelezo yeo i tokwa nahanisiso ye tuna. Kabakalañi? Kakuli haiba lu iketile mwa mubili, lu na ni mali a mañata, mi lu pila mwa kalulo ya lifasi mo ku si na lindwa, ku taelelwa ki lico, kamba likozi za ka taho, ne lu ka kona, nihaiba ka yona nako ye fela, ku latehelwa ki muhupulo wa kuli ku tokwahala hahulu kuli lifasi le linca la Mulimu li tahe.

6. (a) Bo Paulusi ni Silasi ha ne ba nyandisizwe, ne ba tomile kai mihupulo ya bona? (b) Mutala wa Paulusi ni Silasi u kona ku lu susueza cwañi kacenu?

⁶ Paulusi hape n’a elelize Maroma kuli ba “itiise mwa manyando.” (Maroma 12:12) Paulusi n’a ziba hande ka za manyando. Ka nako ye ñwi, mwa pono n’a boni munna ya n’a mu memile kuli a ‘silele mwa Masedonia’ kuli a yo tusa batu teñi m’o ku ituta ka za Jehova. (Likezo 16:9) Kacwalo, Paulusi, hamoho ni Luka, Silasi, ni Timotea ba funduka ku ya kwa Yurope. Balumiwa bao ne ba ka yo fumanañi teñi k’o? Nyandiso! Ha se ba kutalize mwa munzi wa Filipi wa mwa Masedonia, bo Paulusi ni Silasi ne ba shapakilwe ni ku kwalelwa mwa tolongo. Kwa bonahala hande kuli bayahi ba bañwi ba mwa Filipi ne ba sa lati lushango lwa Mubuso, mi hape ne ba lu lwanisa luli. Kana lika zeo ze ne ba fumani teñi k’o ne li ezisize balumiwa be ne ba na ni cisehelo bao ku latehelwa ki tabo ya bona? Kutokwa. Hamulaho wa ku natakiwa ni ku kwalelwa mwa tolongo, “fahali a busihu Paulusi ni  Silasi ne ba na ni milapelo, mi ne ba opelela Mulimu lipina.” (Likezo 16:25, 26, litaku li siyamisizwe ki luna.) Kaniti, butuku bwa ku natiwa ne bu si ka tahiseza bo Paulusi ni Silasi tabo, kono balumiwa ba babeli bao ne ba si ka isa lipilu za bona ku seo. Mihupulo ya bona ne i tomile ku Jehova ni ka mwa n’a ba fuyaulela. Ka ku ‘itiisa mwa manyando’ ka tabo, bo Paulusi ni Silasi ne ba bile mitala ye minde kwa mizwale ba bona be ne ba li mwa Filipi ni ko kuñwi.

7. Ki kabakalañi ha lu lukela ku kopanyeleza buitumelo mwa litapelo za luna?

⁷ Paulusi n’a ñozi kuli: “Mu tundamene mwa ku lapela.” (Maroma 12:12) Kana mwa lapelanga ha mu kalezwi? Mu bulelangañi mwa litapelo za mina? Mwendi mu pundanga butata bwa mina tenyene ni ku kupa kuli Jehova a mi tuse. Kono mwa kona ku kopanya teñi ni manzwi a buitumelo kwa limbuyoti ze mu na ni zona. Ha ku taha butata, ku yeya ka za mwa lu ezeza hande Jehova ku lu tusa ku ‘taba ka sepo.’ Davida, ili y’o bupilo bwa hae ne bu tezi matata, n’a ñozi kuli: “[Muñ’a] Bupilo, Mulimu wa ka; ki ye miñata misebezi ye komokisa y’o ezize, ni z’o hupuzi ku lu ezeza; ha li konahali ku taluhanyezwa fapil’a hao; ha ni lika ku li talusa ni ku li bulela, palo ya zona ha i na mo i konelwa.” (Samu 40:5) Haiba sina Davida, lu kengeela hañata ka za limbuyoti z’a lu fa Jehova, kaniti luli lu ka ba ni tabo.

Mu Be ni Mubonelo O Munde

8. Kiñi se si tusa Mukreste ku taba h’a li mwa nyandiso?

⁸ Jesu u susueza balateleli ba hae ku ba ni mubonelo o munde ha ba talimana ni miliko. U li: “Mu ka ba ni mbuyoti [“tabo,” NW] ha ba mi tapaula kabakala ka, ha ba mi nyandisa, ba mi tameleza bumaswe kamukana ka buhata.” (Mateu 5:11) Lu na ni mabaka mañi a ku ba ni tabo mwa miinelo ye cwalo? Ku kona kwa luna ku tiyela twaniso ki nto ye bonisa kuli moya wa Mulimu u fahalimw’a luna. Muapositola Pitrosi n’a bulelezi Bakreste ka yena mwa linako za hae kuli: “Ha mu nyefulelwa Libizo la Kreste, mu na ni mbuyoti [“tabo,” NW]; kakuli Moya wa kanya, Moya wa Mulimu, u inzi fahalimu a mina.” (1 Pitrosi 4:13, 14) Ka moya wa hae, ni luna Jehova u ka lu tusa ku tiya, mi kabakaleo, ni ku zwelapili ku ba ni tabo.

9. Kiñi se ne si tusize mizwale ba bañwi ku ba ni mabaka a ku taba ha ne ba tamezwi tumelo ya bona?

⁹ Niha lu li mwa miinelo ye maswe ka ku fitisisa, lu kona ku ba ni mabaka a ku taba. Mukreste ya bizwa Adolf n’a fumani nto yeo ku ba ya niti. U pila mwa naha m’o musebezi wa Lipaki za Jehova ne u kwalezwi ka lilimo-limo. Adolf ni balikani ba hae b’a sikai ne ba tamilwe ni ku  lengiwa mwa tolongo ka nako ye telele kakuli ne ba hanile ku fulalela litumelo za bona ze tomile fa Bibele. Bupilo bwa mwa tolongo ne bu li t’ata, kono sina bo Paulusi ni Silasi, Adolf ni balikani ba hae ne ba fumani mabaka a ku lumbeka Mulimu. Ne ba talusize kuli ku ba kwa bona mwa tolongo ne ku ba tusize ku tiisa tumelo ya bona ni ku hulisa tulemeno twa Sikreste twa butokwa, to tu cwale ka bufani, kutwelo-butuku, ni lilato kwa mizwale. Ka mutala, mutamiwa ha n’a amuhela nto ye ñwi ku zwa kwahae, n’a ikabela lika ze ku yona ni balumeli ba bañwi, be n’e b’a nga lika zeo ku ba ze zwelela ku Jehova, yena Mufi luli wa “mpo ye nde kaufela, ni mpo ye petehile kaufela.” Likezo za sishemo ze cwalo ne li tahisa tabo ku mufani hamoho ni kwa baamuheli. Kacwalo, ku kwalelwa kwa bona mwa tolongo ko ne ku lelezwi ku felisa tumelo ya bona ki kona luli ko ne ku ba tiisize ni ku fita kwa moya!—Jakobo 1:17; Likezo 20:35.

10, 11. Kaizeli yo muñwi n’a ezize cwañi ka za ku tosangiswa ko ne ku sa feli ko ne ku latelezwi ki ku tamiwa ka nako ye telele?

¹⁰ Ella, ili y’o ni yena a pila mwa naha m’o musebezi wa Mubuso n’o kwalezwi ka nako ye telele, n’a tamezwi ku abana sepo ya hae ya Sikreste ni ba bañwi. Ka likweli ze 8, n’a nze a tosangiswanga. Kwa mafelelezo ha n’a til’o zekiswa, n’a lengilwe mwa tolongo ka lilimo ze lishumi, mi n’a il’o ina mwa tolongo mo ne ku si na balapeli ba bañwi ba Jehova. Ka nako yeo, Ella n’a na ni lilimo za buhulu ze 24 fela.

¹¹ Kaniti, Ella n’a sa tabeli ku ba mwa tolongo ka nako ye n’e siyezi ya bukalibe bwa hae kaufela. Kono kakuli n’a sa koni ku cinca muinelo wa hae, a ikatulela ku cinca mubonelo wa hae. Kacwalo, a kala k’u nga tolongo ku ba kalulo ya hae ya ka butu ya simu. U li: “Ne ni patehile hahulu ku kutaza, kuli mane lilimo za mata luli.” Hamulaho wa lilimo ze fitelela liketa-lizoho, Ella n’a tosangisizwe hape. Ka ku lemuha kuli tolongo ne i si ka felisa tumelo ya hae, be ne ba mu tosangisa ba mu taluseza kuli: “Ha lu koni ku ku lukulula; ha u si ka cinca.” Ella a alaba ka ku tiya kuli: “Ni cincize! Se ni na ni mubonelo o munde ku fita o ne ni na ni ona ha ni tamiwa, mi tumelo ya ka se i tiile ni ku fita!” Mi a ekeza kuli: “Haiba ha mu lati ku ni lukulula, ni ka ina ku fitela Jehova a bona kuli na swanela ku lukululwa.” Lilimo ze keta-lizoho ni licika za ku tamiwa ne li si ka felisa tabo ya Ella! N’a itutile ku tabela miinelo ya n’a ipumana ku yona kaufela. Kana ku na ni se mu kona ku ituta kwa mutala wa hae?—Maheberu 13:5.

12. Kiñi se si kona ku tiseza Mukreste kozo ya munahano h’a li mwa miinelo ye t’ata?

¹² Mu si nahani kuli Ella u na ni mpo ye ñwi ye ipitezi ye mu konisa ku talimana ni lishemaeto ze cwalo. Ka za nako ya ku tosangiswa ya n’a fitile ku yona mwa likweli za pili a si ka atulwa kale, Ella u itumelela kuli: “Na hupula ku utwa meno a ka a nze a ngangama, na ikutwa inge kanyunywani ka ka sabile.” Nihakulicwalo, Ella u na ni tumelo ye tiile ku Jehova. U itutile ku mu sepa. (Liproverbia 3:5-7) Kabakaleo, Mulimu ki wa luli ku yena ku fita kwa makalelo. U talusa kuli: “Nako kaufela ha ne ni kenanga mwa muzuzu mo ne ni tosangisezwanga, ne ni ikutwanga ku kenelwa ki kozo. . . . Muinelo ha ne u ba o sabisa ni ku fita, ni kozo ne i ekezeha cwalo.” Jehova ne li yena ya n’a tahisa kozo yeo. Muapositola Paulusi u talusa kuli: “Mu si ke mwa bilaela ka se siñwi; kono mwa linto kaufela mu zibise Mulimu se mu bata ka tapelo ni ka kupo ye na ni buitumelo. Mi kozo ya Mulimu ye fita kutwisiso kaufela, i ka buluka lipilu za mina ni mihupulo ya mina ku Jesu Kreste.”—Mafilipi 4:6, 7.

13. Lu kolwiswa kiñi kuli haiba nyandiso i taha, lu ka ba ni m’ata a ku i tiyela?

¹³ Ella, ya s’a lukuluzwi ka nako ye, n’a zwezipili ku ba ni tabo niha n’a na ni butata. N’a ezize cwalo, isi ka m’ata a hae, kono ili ka m’ata a n’a mu file Jehova. Ni ku muapositola Paulusi ne ku bile cwalo, yena n’a ñozi kuli: “Ka tabo luli, ni lata ku itumba ka mifokolo ya ka, kuli ni apeswe mata a Kreste. . . . Kakuli nako ye ni fokola, ki yona nako ye ni na ni mata.”—2 Makorinte 12:9, 10.

14. Mu fe mutala wa m’o Mukreste a kona ku bela ni mubonelo o munde ka za muliko ni kuli ki lifi ze kona ku zwa mwateñi.

¹⁴ Mwendi matata e mu talimananga ni ona ka butu kacenu a shutana ni e lu buhisani fa.  Niteñi, ka mw’a tela kaufela, matata haki a bunolo ku talimana ni ona. Ka mutala, mwendi mubelekisi wa mina u lwanisa hahulu musebezi wa mina ku fita mwa lwaniseza musebezi wa babeleki ba bañwi ba bulapeli bu sili. Mwendi ha mu koni ku fumana musebezi u sili. Mu kona cwañi ku zwelapili ku ba ni tabo? Mu hupule Adolf ni balikani ba hae, bao ku beiwa kwa bona mwa tolongo ne ku ba lutile ku hulisa tulemeno twa butokwa. Ha mu lika ka t’ata ku tabisa mubelekisi wa mina, nihaiba ‘ya t’ata,’ mu ka hulisa tulemeno to tu cwale ka buitiiso ni pilu-telele. (1 Pitrosi 2:18) Hape, mu kana mwa fita fa ku ba babeleki ba butokwa, ili nto ye ka ekeza kwa ku kona kwa mina ku fumana musebezi wa ngana mwa nako ya kwapili. Cwale, ha lu buhisaneñi linzila ze ñwi zeo ka zona lu kona ku zwelapili ku ba ni tabo mwa sebelezo ya Jehova.

Ku Nolofaza Lika Ku Tahisa Tabo

15-17. Bosinyalana ba bañwi ne ba zibile kuli ki lika mañi ze n’e kona ku imulula, nihaike butata bwa bona ne bu zwelela kwa nto ye n’e sa koni ku feliselezwa?

¹⁵ Mwendi ha mu koni ku iketela luli mufuta wa musebezi o mu eza kamba ko mu sebeleza, kono ku kona ku ba ni likalulo ze ñwi za bupilo bwa mina ze mu kona ku zamaisa. Mu nyakisise mutala o latelela.

¹⁶ Bosinyalana ba bañwi ba Sikreste ba mema eluda yo muñwi ku to lalela ni bona. Manzibwana ao, muzwale y’o ni musal’a hae ba talusa kuli ne ba ikutwa ku imezwa ki bupilo. Nihaike sibeli sa bona ne ba eza misebezi ya ka nako ye tezi ye n’e tokwa ku sebeza ka t’ata, ne ba sa koni ku fumana misebezi ye miñwi. Ne ba sa zibi kuli ne ba ka kona ku zwelapili cwalo ka nako ye kuma kai.

 ¹⁷ Ha ne ba kupile kelezo ku eluda y’o, a ba alaba kuli, “Mu nolofaze lika.” Ka nzila ifi? Ka zazi, munna y’o ni musal’a hae ne ba zamayanga lihora ze talu ku ya ni ku kuta kwa musebezi. Eluda y’o ya n’a ziba hande bosinyalana bao, a akaleza kuli ba nyakisise za ku tutela kwa sibaka se si li bukaufi ni sibaka sa bona sa musebezi, ilikuli ba kone ku fukuza kwa nako ye ne ba zamayanga ku ya ni ku kuta kwa musebezi ka zazi. Nako ye siyezi ne i ka itusiswa kwa ku eza lika ze ñwi za butokwa, kamba nihaiba ku pumula fela. Haiba matata a bupilo a mi amuha kwa tabo ya mina, mu bone haiba mwa kona ku ikimulula ka ku cinca lika ze ñwi.

18. Ki kabakalañi ku nahanisisa hande pili mu si ka eza kale katulo ha ku li kwa butokwa?

¹⁸ Nzila ye ñwi ya ku felisa ka yona butata ki ku nahanisisa hande pili mu si ka eza kale katulo. Ka mutala, Mukreste yo muñwi a ikatulela ku yaha ndu. A keta ndu ye n’e li t’ata ku i yaha, nihaike a sa li ku ba a yahe ndu. Cwale u lemuha kuli kambe n’a ‘talimisisize mw’a n’a hata’ pili a si ka keta kale ndu ya ku yaha, kambe n’a konile ku pima matata a mañwi. (Liproverbia 14:15) Mukreste yo muñwi n’a lumezi ku tusa mulumeli yo muñwi ku za sikoloti. Ka ku ya ka tumelelano ya bona, mukoloti y’o ha n’a ka palelwa ku lifa sikoloti seo, ya n’a mu tusa n’a ka ba mwa tamo ya ku si lifa. Kwa makalelo, lika kaufela za zamaya hande, kono nako ha n’e nze i ya, mukoloti a palelwa ku lifa. Mukolotisi a ikalelwa mi a bata kuli mutusi wa hae a life sikoloti kaufela. Nto yeo ya kenya mutusi y’o mwa butata bo butuna. Kana n’a kabe a konile ku pima nto yeo kambe n’a nahanisisize miinelo kaufela pili a si ka lumela kale ku ba ni buikalabelo kwa sikoloti?—Liproverbia 17:18.

19. Ki lifi linzila ze ñwi ze lu kona ku felisa ka zona matata mwa bupilo bwa luna?

¹⁹ Ha lu ikutwa ku katala, lu si nahani ni kamuta kuli lu kona ku ikimulula ni ku kutisa tabo ya luna ka ku fukuza kwa nako ya luna ya ku eza tuto ya Bibele ya ka butu, sebelezo ya mwa simu, ni ku fumaneha kwa mikopano. Zeo ki linzila za butokwa zeo ka zona lu kona ku amuhela moya o kenile, ili w’o kwa lika ze ñwi ze u tisa ki tabo. (Magalata 5:22) Misebezi ya Sikreste kamita ki ye katulusa mi hañata ha i katalisi hahulu. (Mateu 11:28-30) Buniti luli bu kona ku ba kuli misebezi ya silifasi kamba za ku itabisa ka zona ki zona ze lu tiseza ku katala, isiñi misebezi ya kwa moya. Ku ituta ku lobala ka nako ku kona ku lu tusa ku ikutwa ku matafazwa hape. Ku pumula ka nako ye telelenyana ku kona ku tusa hahulu. N. H. Knorr, ya n’a li yo muñwi wa Sitopa Se Si Busa sa Lipaki za Jehova ku fitela lifu la hae, n’a bulelelanga balumiwa kuli: “Ha mu ikutwa ku zwafa, nto ya pili ye mu swanela ku eza ki ku pumula. Ha se mu pumuzi hande busihu, mu ka komoka kuli ibat’o ba butata kaufela bo mu na ni bona bu ka bonahala ku ba bunolo ku bu tatulula!”

20. (a) Mu taluse ka bukuswani linzila ze ñwi zeo ka zona lu kona ku zwelapili ku taba. (b) Ki afi mabaka a mañwi e mu kona ku nahana a’ tahisa tabo? (Mu bone mwa sikwenda se si fa likepe 17.)

²⁰ Bakreste ba na ni tohonolo ya ku sebeleza “Mulimu ya tabile.” (1 Timotea 1:11, NW) Ka mo lu bonezi, lwa kona ku zwelapili ku taba niha lu tezwi ki matata a matuna. Haike lu buluke sepo ya Mubuso ye lu libelezi, lu cince mubonelo wa luna ha ku tokwahala, ni ku nolofaza bupilo bwa luna. Kacwalo, mwa muinelo kaufela o lu ka ipumana ku ona, lu ka amuhela manzwi a muapositola Paulusi a’ li: “Mu be ba ba tabile kamita ku Mulena; hape ni kutela ni li: Mu be ba ba tabile.”—Mafilipi 4:4.

Mu Nyakisise Lipuzo Ze ka Nahanisiso:

• Ki kabakalañi Bakreste ha ba swanela ku hupula kamita sepo ya Mubuso?

• Kiñi se si kona ku lu tusa ku zwelapili ku taba ha lu li mwa miinelo ye t’ata?

• Ki kabakalañi ha lu swanela ku lika ku nolofaza bupilo bwa luna?

• Ba bañwi ba nolofalize bupilo bwa bona mwa likalulo lifi?

[Lipuzo za Tuto]

[Mbokisi fa likepe 17]

Mabaka A Mañwi A Tahisa Tabo

Ka ku ba Bakreste, lu na ni mabaka a mañata a tahisa tabo. Mu nyakisise a latelela:

1. Lwa ziba Jehova.

2. Lu itutile niti ka za Linzwi la Mulimu.

3. Libi za luna za kona ku swalelwa ka tumelo ya luna mwa sitabelo sa Jesu.

4. Mubuso wa Mulimu wa busa—lifasi le linca li ka tuha li taha!

5. Jehova u lu tisize mwa paradaisi ya kwa moya.

6. Lu ikola swalisano ye nde ya Sikreste.

7. Lu na ni tohonolo ya ku abana mwa musebezi wa ku kutaza.

8. Lwa pila, mi lu na ni m’ata a mañwi.

Ki afi mabaka a mañwi a tahisa tabo e mu kona ku punda?

[Siswaniso se si fa likepe 13]

Paulusi ni Silasi ne ba tabile niha ne ba li mwa tolongo

[Maswaniso a fa likepe 15]

Kana muhupulo wa mina u tomile fa tibelelo ya tabo ya lifasi le linca la Mulimu?