Lipuzo Ze Zwa kwa Babali

“Sisa se si kenile hahulu” ne si tozizwe lili, ka mo ku polofitezwi kwa Daniele 9:24?

Daniele 9:24-27 ki bupolofita bwa za ku bonahala kwa “Ya tozizwe, Mulena,” yena Kreste. Kacwalo, ku toziwa ko ne ku polofitilwe kwa “Sisa se si kenile hahulu” ha ku talusi ku toziwa kwa Sibaka se si Kenile Hahulu sa tempele ya mwa Jerusalema. Kono, pulelo ya kuli “Sisa se si kenile hahulu” i talusa sibaka sa Mulimu se si kenile sa kwa lihalimu—mwa tempeletuna ya kwa moya ya Jehova. *—Maheberu 8:1-5; 9:2-10, 23.

Tempele ya Mulimu ya kwa moya ne i kalile ku sebeza lili? Mu nyakisise se ne si ezahezi Jesu ha n’a itahisize kwa kolobezo ka 29 C.E. Ku zwelela honaf’o, Jesu n’a talelelize manzwi a Samu 40:6-8. Muapositola Paulusi hamulaho n’a bonisize kuli Jesu n’a lapezi ku Mulimu kuli: “Ha u si ka lata sitabelo nihaiba nubu, kono u ni lukiselize mubili.” (Maheberu 10:5) Jesu n’a ziba kuli Mulimu ‘n’a si ka lata’ litabelo za lifolofolo ku zwelapili ku ciswa kwa tempele ya mwa Jerusalema. Kono Jehova n’a lukisize mubili o petehile wa Jesu wa n’a ka fa sina sitabelo. Jesu n’a bonisize takazo ya hae ye zwelela kwa pilu ha n’a zwezipili kuli: “Ki na yo, na ta, (sina ha ku ñozwi za ka mwa buka,) ni t’o eza se si latwa ki Wena, Mulimu.” (Maheberu 10:7) Mi Jehova n’a alabile cwañi? Taba ya evangeli ya Mateu i li: “Jesu h’a kolobelizwe, a pakisa ku zwa mwa mezi; mi ka nako i liñwi, lihalimu la kwaluluhela yena; a bona Moya o swana sina nkwilimba u t’o ina fahalimw’a hae. Mi kwa utwahala linzwi le li zwa kwa lihalimu, le li li: Yo ki mwan’a ka ya latiwa, ye ni katelwa.”—Mateu 3:16, 17.

Jehova Mulimu ha n’a amuhezi ku tahiswa kwa mubili wa Jesu ku ba sitabelo ne ku talusize kuli ne ku tomilwe aletare ye tuna ye fita aletare tenyene ya mwa tempele ya kwa Jerusalema. Yeo ne li aletare ya ku “lata” kwa Mulimu, kamba tukiso ya ku amuhela sitabelo sa bupilo bwa butu bwa Jesu. (Maheberu 10:10) Ku toziwa kwa Jesu ka moya o kenile ne ku talusize kuli Mulimu n’a tahisize tukiso ya hae kamukan’a yona ya tempele ya kwa moya. * Kacwalo, ka nako ya n’a kolobelizwe Jesu, sibaka sa Mulimu sa kwa lihalimu ne si tozizwe, kamba ku kauhanywa, kuli si be “Sisa se si kenile hahulu” mwa tukiso ya tempeletuna ya kwa moya.

[Litaluso za kwatasi]

[Siswaniso se si fa likepe 27]

“Sisa se si kenile hahulu” ne si tozizwe Jesu ha n’a kolobelizwe