‘Mu Itumele kwa Lipaki Za Jehova kwa Tukuluho ya ku Lapela’

TABA ye mwa mutende o bizwa USA Today i li: “Pili mu si ka kwalela kale Lipaki za Jehova minyako ya mina, mu kutumane hanyinyani ni ku nyakisisa nyandiso ye swabisa ye ne i ba wezi kalenyana, hamoho ni ze ba ekelize ze ñata-ñata kwa Cinceho ya Pili ya Mulao wa naha ili ze tisize tukuluho ku luna kaufela.” Lipaki za Jehova ne ba nyandisizwe mwa United States mwa lilimo kaufela za ma-1940 kakuli ne ba hanile ku caela ndembela silutu ni ze ñwi cwalo.—Exoda 20:4, 5.

Litaba ze bat’o ba ze 30 ze ama Lipaki za Jehova ne li isizwe mwa Kuta ye Tuna ya United States mwahal’a lilimo ze ketalizoho, ku zwa 1938 ku isa 1943. Taba yeo i li: “Lipaki za Jehova ne ba zusize hahulu litaba ze tuna ze ama Cinceho ya Pili ya Mulao wa naha kuli mane Muatuli Harlan Fiske Stone n’a ñozi kuli, ‘Lipaki za Jehova ba lukela ku fiwa mupuzo kakuli ba tusa hahulu mwa ku zeka tukuluho ya batu.’”

Kacwalo, kwa mafelelezo a yona, taba yeo i li: “Bulapeli kaufela bu lukela ku itumela kwa Lipaki za Jehova kakuli ba ekelize kwa tukuluho [ya ku lapela].”

[Manzwi a bañi ba siswaniso fa likepe 32]

Siswaniso sa kwamulaho, muyaho: Si swanisizwe ki Josh Mathes, Collection of the Supreme Court of the United States; kwatasi ku la nzohoto, baatuli: Collection of the Supreme Court of the United States