Mu lumbeke Jehova Kabakala Ze Tuna Z’a ezize!
Mu lumbeke Jehova Kabakala Ze Tuna Z’a ezize!
“Moya wa ka u lumba Mulena . . . kakuli Ya-Mata u ni ezelize ze tuna.” —Luka 1:46-49.
1. Ka ku swanela, lu lumbeka Jehova kwa likezo mañi ze tuna z’a ezize?
JEHOVA wa swanela ku lumbekwa kakuli z’a ezize ki ze tuna. Mupolofita Mushe ha n’a kandekile ka za ku lukululwa kwa Maisilaele mwa Egepita, n’a zibahalize kuli: “Ki a mina meto a’ boni likezo kaufela ze tuna z’a ezize [Muñ’a] Bupilo.” (Deuteronoma 11:1-7) Ka nzila ye swana, lingeloi Gabriele ha ne li zibisize mwalyanjo Maria ka za ku pepwa kwa Jesu ko ne ku taha, Maria n’a ize: “Moya wa ka u lumba Mulena, . . . kakuli Ya-Mata u ni ezelize ze tuna.” (Luka 1:46-49) Ka ku ba Lipaki za Jehova, lu mu lumbeka kwa likezo ze tuna z’a ezize ze cwale ka ku lukulula Maisilaele kwa butanga bwa mwa Egepita ni kwa ku pepwa kwa ka makazo kwa Mwan’a hae ya lateha.
2. (a) “Mulelo wa kamita” wa Mulimu u na ni tuso mañi kwa batu ba ba ipeya ku utwa? (b) Joani n’a fumaniñi ha n’a li mwa sooli sa Patmosi?
2 Buñata bwa z’a ezize Jehova ze tuna li zamaelela ni “mulelo wa kamita” wa hae wa ku fuyaula batu ka Mesiya ni ka Mubuso wa hae. (Maefese 3:8-13) Mulelo w’o ne u nze u sweli ku petahala muapositola Joani ya na s’a supezi ha na lumelelizwe ku talima mwa lihalimu mwa munyako o kwaluzwi wa mwa pono. N’a utwile linzwi le li swana inge tolombita ha li li: “Kambamela fa, mi ni ka ku bonisa ze ka taha kwapili.” (Sinulo 4:1) Mulonga wa Roma ha ne u lundulezi Joani mwa sooli se si bizwa Patmosi “kabakala Linzwi la Mulimu, ni kabakala ku paka Jesu,” n’a filwe “sinulo ya Jesu Kreste.” Za n’a boni ni ku utwa muapositola y’o ne li zibahalize ze ñata ka za mulelo wa Mulimu wa kamita, ili ku fa monyehelo ya kwa moya ni susuezo ya ka bunako kwa Bakreste ba niti kaufela.—Sinulo 1:1, 9, 10.
3. Ki bomañi ba ba yemelwa ki ba bahulu b’a 24 ba n’a boni Joani mwa pono?
3 Mwa munyako o kwaluzwi w’o wa mwa lihalimu, Joani n’a boni ba bahulu b’a 24, be ne ba li fa mabona mi ba na ni mishukwe ya bulena. Ba wela fafasi fapil’a Mulimu, mi ba li: “Mulena ni Mulimu wa luna, ki Wena ya lukela ku fiwa kanya, ni likute, ni m’ata; kakuli ki Wena ya ezize linto kamukana, mi ha li li teñi, niha ne li bupilwe, ki ka ku lata kwa hao.” (Sinulo 4:11) Ba bahulu bao ba yemela batoziwa ba Sikreste kaufela ba ba zuhile kwa bafu, ili ba ba fumani litulo za n’a ba sepisize Mulimu. Ba susumezwa ku lumbeka Jehova kabakala z’a bupile ze tuna. Ni luna lwa komokiswa ki ze lu iponela ze li bupaki bwa ‘mata a Mulimu a kamita ni bumulimu bwa hae.’ (Maroma 1:20) Mi ka mo lu itutela hahulu ka za Jehova, ki mo lu bela ni mabaka a mañata a ku mu lumbeka kabakala ze tuna z’a ezize.
Mu Zibahaze Z’a Ezize Jehova Ze Lumbekeha!
4, 5. Mu fe mitala ya ka m’o Davida n’a lumbekezi Jehova?
4 Walisamu Davida n’a lumbekile Mulimu kabakala Z’a ezize ze tuna. Ka mutala, Davida n’a opezi kuli: “Mu opele za ku lumba [Muñ’a] Bupilo ya yahile mwa Sione; mu taluseze macaba likezo za hae. Mawe [Muñ’a] Bupilo, u ni utwele butuku; shalima ziyezi ye ni tahezi ka ba ba ni toile, Wena ya ni siulula mwa munyako wa lifu; kuli ni utwahalise milumbeko ya hao mwa munzi wa mwan’a Sione, wa musizana, mi ni tabele ku pilisa kwa hao.” (Samu 9:11, 13, 14) Hamulaho wa ku fa Salumoni mwan’a hae milalo ya tempele, Davida a lumbeka Mulimu, a li: “Butuna ki bwa hao [Muñ’a] Bupilo, ni mata, ni libubo, ni ku koma, ni bulena. . . . Mubuso ki wa hao [Muñ’a] Bupilo, kakuli u pahamezi ka bulena lika kaufela. . . . Cwale Mulimu wa luna, lwa ku lumba, lu bubeka Libizo la hao le li tumile.”—1 Makolonika 29:10-13.
5 Mañolo a kuta-kutela ku lu mema, mane ni ku lu susueza kuli lu lumbeke Mulimu, sina mwa n’a ezelize Davida. Mwa buka ya Lisamu ku na ni lipulelo ze ñata ze isa tumbo ku Mulimu, mi ku bulelwa kuli ibat’o ba licika la zona lipina zeo ne li ñozwi ki Davida. N’a lumbekanga ni ku itumela ku Jehova kamita. (Samu 69:30) Mi hape ku zwelela kwa makalelo, lipina ze n’e buyelezwi ki Mulimu za Davida ni za ba bañwi se li itusisizwe mwa ku lumbeka Jehova.
6. Lisamu ze buyelezwi li bonisa cwañi ku ba ze na ni tuso ku luna?
6 Lisamu ki za butokwa luli kwa balapeli ba Jehova! Ha lu bata ku itumela ku Mulimu kwa lika ze tuna kaufela z’a lu ezelize, minahano ya luna i kona ku sikuluhela kwa lipulelo ze nde ze mwa Lisamu. Ka mutala, kakusasana ha lu zuha, lu kana lwa bata ku bulela manzwi a swana ni a: “Ku munati ku itumela ku [Muñ’a] Bupilo, ni ku opela za ku lumba Libizo la hao, Wena Muambakani-ya-Pahami, ku lumbeka sishemo sa hao isali kakusasana, ni ku sepahala kwa hao nako ya busihu, ka zazi ni zazi, . . . kakuli u ni wabelisize ka z’o ezize, Wena [Muñ’a] Bupilo. Ni itumba ka misebezi ya mazoho a hao.” (Samu 92:1-4) Ha lu konile ku tula mukwalelo o muñwi o ne u lu paleliswa ku zwelapili kwa moya, lu kana lwa bata ku bonisa tabo ni buitebuho bwa luna ka tapelo. Cwalo ki mwa n’a ezelize walisamu ha n’a opezi kuli: “A mu taheñi, lu opeleleñi [Muñ’a] Bupilo, lu lulueze ka tabo Licwe le li lu pilisa. A lu itahiseñi ku Yena ka buitumelo, mi lu utwahalise tabo ya luna ka lisamu.”—Samu 95:1, 2.
7. (a) Ki nto mañi ye lemuseha ka za buñata bwa lipina ze opelwanga ki Bakreste? (b) Ki kabakalañi ha lu swanela ku itahanelanga kwa mikopano ni ku ba teñi ku isa kwa mafelelezo?
7 Hañata lu lumbeka Jehova ha lu opela kwa mikopano ya puteho, ya mupotoloho, ni ya sikiliti. Ki nto ye lemuseha kuli buñata bwa zona lipina zeo li tomile fa mihupulo ye buyelezwi ye mwa buka ya Lisamu. Haki bunde ni b’o ha lu na ni lipina za cwale ze munati za ku lumbeka Jehova ka zona! Ku opelela Mulimu milumbeko ki libaka le linde luli le li swanela ku lu ezisa ku itahanelanga kwa mikopano ya luna ni ku fumaneha teñi ku isa kwa mafelelezo. Ha lu eza cwalo lu ka swalisana ni balapeli ba bañwi mwa ku lumbeka Jehova ka pina ni tapelo.
‘A Mu Lumbeke Muñ’a Bupilo’
8. Mwa linzwi la “Alleluya” ku fumanehañi, mi hañata li tolokiwanga cwañi?
8 Ku lumbeka Jehova ku fumaneha mwa linzwi la “Alleluya,” ili linzwi la Siheberu leo hañata li tolokiwanga kuli “A mu lumbeke Jah!” Ka mutala, kwa Samu 135:1-3, lu fumana memo ye, ye silikani, ili ye koñomekilwe ye li: “A mu lumbeke [Muñ’a] Bupilo. Mu lumbe Libizo la [Muñ’a] Bupilo; mu mu lumbe mina batanga ba [Muñ’a] Bupilo, mina mu inzi mwa Ndu ya [Muñ’a] Bupilo, mwa malapa a Ndu ya Mulimu wa luna. Mu lumbe [Muñ’a] Bupilo, kakuli [Muñ’a] Bupilo u na ni musa; mu opelele Libizo la hae za ku lumba, kakuli kwa kateleha.”
9. Ki lika mañi ze lu susumeza ku lumbeka Jehova?
9 Ha lu nyakisisa pupo ye komokisa ya ezize Mulimu ni za lu ezelize kaufela, buitebuho bo bu buniti bu lu ezisa ku mu lumbeka. Ha lu hupula limakazo zeo Jehova n’a ezelize batu ba hae mwa linako za kale, lipilu za luna li lu ezisa ku mu lumbeka. Mi ha lu kengeela lisepiso ka za ze tuna za ka eza Jehova kwapili, lu bata linzila za ku itebuha ku yena ni ku mu lumbeka.
10, 11. Kona ku pila kwa luna luli ku lu fa cwañi libaka la ku lumbeka Mulimu?
10 Kona ku pila kwa luna luli ku lu fa libaka le li tiile la ku lumbeka Jah. Davida n’a opezi kuli: “Ni ka itumela ku Wena [Jehova], kakuli ni ezizwe ka mukwa o sabisa, o komokisa, misebezi ya hao ya komokisa, moya wa ka u lemuha cwalo hande.” (Samu 139:14) Ee, lu “ezizwe ka mukwa o sabisa, o komokisa” mi lu na ni limpo ze nde luli ze cwale ka m’ata a ku bona, ku utwa, ni ku nahana. Kana ha lu swaneli ku pila ka nzila ye lumbeka Mubupi wa luna? Paulusi n’a bulezi ka ku swana ha n’a ñozi kuli: “Niha mu ca, niha mu nwa, niha mu eza nto ye ñwi, mu eze linto kaufela kuli Mulimu a lumbekwe ka zona.”—1 Makorinte 10:31.
11 Lu ka eza linto kaufela kuli Jehova a lumbekwe ka zona haiba lwa mu lata luli. Jesu n’a bulezi kuli taelo ya pili ki ye li: “Lata Mulena Mulimu wa hao ka pilu ya hao kaufela, ni ka moya wa hao kaufela, ni ka kutwisiso ya hao kaufela, ni ka mata a hao kaufela.” (Mareka 12:30; Deuteronoma 6:5) Kaniti luli lwa swanela ku lata Jehova ni ku mu lumbeka ka ku ba yena Mubupi wa luna ni Mufi wa “mpo ye nde kaufela, ni mpo ye petehile kaufela.” (Jakobo 1:17; Isaya 51:13; Likezo 17:28) Kwa swanela luli kuli lu eze cwalo kakuli m’ata a luna a ku nahana ni ku nyakisisa lika, muinelo wa luna wa kwa moya, ni m’ata a luna a kwa mubili—ili tulemeno ni buikoneli kaufela—li zwa ku Jehova. Ka ku ba yena Mubupi wa luna, lwa lukela ku mu lata ni ku mu lumbeka.
12. Mu ikutwa cwañi ka za z’a ezize Jehova ze tuna ni manzwi a’ kwa Samu 40:5?
12 Z’a ezize Jehova ze tuna li lu fa mabaka a mañata a ku mu lata ni ku mu lumbeka! Davida n’a opezi kuli: “[Muñ’a] Bupilo, Mulimu wa ka; ki ye miñata misebezi ye komokisa y’o ezize, ni z’o hupuzi ku lu ezeza; ha li konahali ku taluhanyezwa fapil’a hao; ha ni lika ku li talusa ni ku li bulela, palo ya zona ha i na mo i konelwa.” (Samu 40:5) Davida n’a sa koni ku taluhanya misebezi ye komokisa kaufela ya Jehova. Ni luna ha lu koni ku i taluhanya kaufel’a yona. Kono mo lu hupulisezwa kaufela ka za ze tuna lifi kamba lifi z’a ezize, lu lumbeke Mulimu.
Likezo ze Zamaelela ni Mulelo wa Mulimu wa Kamita
13. Sepo ya luna i zamaelela hahulu cwañi ni z’a ezize Mulimu ze tuna?
13 Sepo ya luna ka za nako ya kwapili i zamaelela hahulu ni likezo ze tuna ili ze lumbekeha ze ama mulelo wa Mulimu wa kamita. Hamulaho wa buipanguli bwa mwa Edeni, Jehova a fa bupolofita bwa pili bo ne bu tezi sepo. Ha n’a atulela noha, Mulimu n’a ize: “Ni ka beya toyano mwahal’a mina, ni wena ni musali, ni mwahal’a peu ya hao ni peu ya musali; peu yeo i ka ku pyata toho, wena u i lume fa lisito.” (Genese 3:15) Sepo ka za Peu ye n’e sepisizwe ya musali ne i zwezipili ku ba mwa lipilu za batu be ne ba sepahala hamulaho wa kezo ye tuna ye n’e ezizwe ki Jehova. Jehova n’a bukelelize Nuwe ni lubasi lwa hae kwa Munda o ne u talize lifasi kaufela ni ku yundisa lifasi la batu ba ba maswe. (2 Pitrosi 2:5) Lisepiso za bupolofita ze n’e filwe kwa batu be ne ba na ni tumelo ba ba cwale ka Abrahama ni Davida ne li file kutwisiso ye ñwi ya zeo Jehova n’a ka peta ka Peu yeo.—Genese 22:15-18; 2 Samuele 7:12.
14. Ki ufi mutala o mutuna ka ku fitisisa o bonisa kezo ye tuna yeo Jehova a ezelize batu?
14 Mutala o mutuna ka ku fitisisa o bonisa kuli Jehova ki yena muezi wa ze tuna ya ezeza batu lika ne u bonahezi ha n’a fanile Mwan’a hae wa libanda, yena Peu ye n’e sepisizwe, Jesu Kreste kuli a be sitabelo sa tiululo. (Joani 3:16; Likezo 2:29-36) Tiululo yeo ne i konahalisize ku kutisana ni Mulimu. (Mateu 20:28; Maroma 5:11) Jehova a kopanya be ne ba li ba pili ku kutela ku yena mwa puteho ya Sikreste, ye n’e tomilwe ka Pentekonta ya 33 C.E. Ka tuso ya moya o kenile, ba kutaza taba ye nde kai ni kai, ili ku bonisa ka m’o lifu ni zuho ya Jesu li kwalulela nzila kwa batu ba ba ipeya ku utwa kuli ba fumane limbuyoti za ku ya ku ile mwatas’a puso ya Mubuso wa Mulimu wa kwa lihalimu.
15. Jehova u ezize cwañi ka nzila ye makaza mwa linako za luna?
15 Mwa linako za luna, Jehova u ezize ka nzila ye makaza ku kubukanya ba ba siyezi kwa Bakreste ba ba tozizwe. Moya wa sinyeho u tibezwi kuli bomasiyaleti ba b’a 144,000 ba ba ka busa ni Kreste mwa lihalimu ba swaiwe. (Sinulo 7:1-4; 20:6) Mulimu u boni teñi kuli Bakreste ba ba tozizwe ba lukululwa kwa butanga bwa kwa moya bwa “Babilona yo mutuna,” yona kopano ya mwa lifasi kamukana ya bulapeli bwa buhata. (Sinulo 17:1-5) Kona ku lukululwa k’o ko ne ku ezahezi ka 1919 ni silelezo ya Mulimu ye ba bile ni yona ku zwelela honaf’o, li konisize bomasiyaleti ba ba tozizwe ku ezañi? Ku ba konisize ku benya ka ku fa bupaki bwa mafelelezo pili Jehova a si ka felisa kale muinelo wa linto wa Satani ka “ñalelwa ye tuna” ye taha i sutelezi hahulu.—Mateu 24:21; Daniele 12:3; Sinulo 7:14.
16. Kiñi se si sweli ku ezahala kabakala musebezi wa ku kutaza Mubuso o sweli ku eziwa mwa lifasi kaufela?
16 Lipaki ba ba tozizwe ba Jehova ba etelezi ka cisehelo musebezi wa mwa lifasi kamukana wa ku kutaza za Mubuso. Kacwalo, palo ye sweli ku ekezeha ya “lingu ze ñwi” ba sweli ku ba balapeli ba Jehova. (Joani 10:16) Lu nyakalala kuli ba ba ishuwa ba mwa lifasi-mubu ba sa na ni kolo ya ku swalisana ni luna mwa ku lumbeka Jehova. Ba ba amuhela memo ya ku “taha” ba ka kona ku puluswa mwa ñalelwa ye tuna, ka ku ba ni sepo ya ku lumbeka Jehova ku ya ku ile.—Sinulo 22:17.
Likiti-kiti ba Selahanela kwa Bulapeli bwa Niti
17. (a) Jehova u sweli ku eza cwañi ze tuna kwa neku la musebezi wa luna wa ku kutaza? (b) Zakaria 8:23 i sweli ku talelezwa cwañi?
17 Ka nako ye, Jehova u sweli ku eza ze tuna ili ze lumbekeha kwa neku la musebezi wa luna wa ku kutaza. (Mareka 13:10) Mwa lilimo za cwanoñu fa, u ‘kwaluzi minyako ya musebezi o zwelapili.’ (1 Makorinte 16:9) Nto yeo i konahalisize kuli taba ye nde i shaelwe mwa linahatuna kaufela m’o sapili ne ku tezi ba ba lwanisa niti. Buñata bao sapili ne ba li mwa lififi la kwa moya cwale ba sweli ku amuhela memo ya kuli ba lapele Jehova. Ba sweli ku taleleza manzwi a bupolofita a li: “[Muñ’a] Bupilo wa limpi s’a bulela ki se, u li: Mwa mazazi ao, banna ba ba lishumi, ba malimi kaufela a macaba, ba ka swalelela mungundo wa kubo ya munna wa Mujuda, ba li: Lu ka ya ni mina; kakuli lu utwile kuli [Muñ’a] Bupilo u inzi ni mina.” (Zakaria 8:23) Manzwi ao a’ bulelwa ki banna ba ba lishumi, a bulelelwa Majuda ba kwa moya, ili bomasiyaleti ba Bakreste ba ba tozizwe ba mwa nako ye. Ka ku ba kuli nombolo ya lishumi i kona ku swaniseza lika ze tezi za fa lifasi-mubu, “banna ba ba lishumi” ba yemela “buñata bo butuna” bwa batu ba ba swalisaniswa ni “Isilaele wa Mulimu.” Hamoho, likwata ze peli zeo li panga “mutapi u li muñwi.” (Sinulo 7:9, 10; Magalata 6:16) Kwa tabisa hakalo ku bona buñata bwa batu ba ba sweli ku sebeleza Mulimu hamoho ka ku ba balapeli ba Jehova Mulimu!
18, 19. Ki bupaki mañi bo bu li teñi bo bu bonisa kuli Jehova u sweli wa fuyaula musebezi wa ku kutaza?
18 Lu ba ba tabile ku bona kuli batu ba ba eza likiti ze mashumi-shumi, kamba mane ze mianda-nda, cwale ba amuhela bulapeli bwa niti mwa linaha ze n’e bonahala hahulu ku kombelelwa ki bulapeli bwa buhata kuli mane ne ku bonahala kuli batu bao ni kamuta ne ba si ke ba amuhela taba ye nde. Mu talime fela mwa Yearbook of Jehovah’s Witnesses ya cwanoñu fa, mi mu bale linaha ili zeo ka nako ya cwale li bihanga palo ye mwahal’a 100,000 ni 1,000,000 ya bahasanyi ba Mubuso. B’o ki bupaki bo bu m’ata bwa kuli Jehova u sweli ku fuyaula musebezi wa ku kutaza Mubuso.—Liproverbia 10:22.
19 Ka ku ba batu ba Jehova, lwa mu lumbeka ni ku itebuha ku Ndat’a luna wa kwa lihalimu kakuli u lu file mulelo wa ku pilela luli, musebezi o kolwisa mwa sebelezo ya hae, ni tibelelo ye nde ya nako ya kwapili. Lu pila ka tibelelo ye tuna ya talelezo ya lisepiso kaufela za n’a ezize Mulimu mi lu tundamena ku ‘tiiseza mwa lilato la Mulimu, kuli lu bone bupilo bo bu sa feli.’ (Juda 20, 21) Lu ba ba tabile luli kuli buñata bo butuna bo bu lumbeka Jehova cwale se bu bat’o fita fa palo ye eza 6,000,000! Ka mbuyoti ya Jehova ye bonahala, bomasiyaleti ba batoziwa hamoho ni balikani ba bona ba ba li lingu ze ñwi ba kopanyizwe mwa liputeho ze bat’o ba 91,000 mwa linaha ze 235. Kaufel’a luna lu sweli ku fepiwa hande ka buikatazo bwa ka ku sa katala bwa “mutanga ya sepahala, ya na ni kutwisiso.” (Mateu 24:45) Kopano ya teokratiki ye zwelapili, ye okamela ka lilato, i okamela misebezi ya Mubuso ka liofisi za mitai ze 110 za Lipaki za Jehova. Lu itebuha kuli Jehova u ezisize lipilu za batanga ba hae kuli ba ‘mu kuteke ka tutu ya bona.’ (Liproverbia 3:9, 10) Kacwalo, musebezi wa luna wa ku kutaza mwa lifasi kaufela wa zwelapili mi ka mo ku tokwahalela, ku sweli kwa yahiwa libaka za ku hatiseza teñi, mahae a Betele ni a balumiwa, Mandu a Mubuso, ni Mandu a Mikopano ye mituna.
20. Ku hupula z’a ezize Jehova ze tuna ni ze lumbekeha ku swanela ku lu ezisañi?
20 Ha ku konahali kuli lu taluse misebezi kaufela ya Jehova ye komokisa ili ye lumbekeha. Kono kana ku na ni wa pilu ye lukile ya kona ku tokolomoha ku swalisana ni ba bañata ba ba lumbeka Jehova? Kutokwa! Kacwalo, haike ba ba lata Jehova kaufela ba huweleze ka tabo kuli: “A mu lumbeke [Muñ’a] Bupilo. A mu lumbeke [Muñ’a] Bupilo mwa mahalimu, mu mu lumbe mwa mabaka a’ lumbile. Mu mu lumbeke mina mangeloi a hae kaufela . . . batangana hamoho ni likalibe; ni macembele, ni banana; a ba lumbeke Libizo la [Muñ’a] Bupilo; kakuli libizo la hae ki lona li nosi le li lumbiwa; kanya ya hae i pahami fahalimw’a lifasi ni a lihalimu.” (Samu 148:1, 2, 12, 13) Ee, cwale ni ku ya ku ile, lu lumbeke Jehova kabakala z’a ezize ze tuna!
Ne Mu Ka Alaba Cwañi?
• Ki lifi ze ñwi z’a ezize Jehova ze lumbekeha?
• Ki kabakalañi ha mu ikutwa ku susumezwa ku lumbeka Jehova?
• Sepo ya luna i zamaelela cwañi ni z’a ezize Mulimu ze tuna?
• Jehova u sweli ku eza cwañi lika ze lumbekeha kwa neku la musebezi wa ku kutaza Mubuso?
[Lipuzo za Tuto]
[Siswaniso se si fa likepe 10]
Kana mwa abananga ka pilu kaufela mwa ku opelela Jehova milumbeko?
[Maswaniso a fa likepe 13]
Lwa tabela kuli kolo i sa li teñi ya kuli ba ba ishuwa ba swalisane ni luna mwa ku lumbeka Jehova