Kana Ku Ituta Bibele kwa Kona Ku Mi Tusa?

“ISI ke ya balelwa ko ku si na muprisita.” Temuso yeo i fumaneha kwa makalelo a Libibele ze ñwi za Makatolika. Kay Murdy wa kwa Catholic Bible Institute kwa Los Angeles, u li: “Luna Makatolika ha lu si ka fiwa kamita kolo ya ku bala Bibele, kono nto yeo i sweli ya cinca cwale.” U bulela kuli: “Makatolika ba sa ziba fela m’o Mañolo a Kenile a kona ku amela bupilo bwa bona, ba fita fa ku nyolelwa hahulu ku bala Bibele.”

Ka za cinceho yeo, magazini ye bizwa U.S. Catholic i kutela ku bulela za n’a bulezi muzamaisi yo muñwi wa tuto ya za bulapeli ya n’a bulezi kuli Makatolika be ne ba banga mwa likwata za ba ba ituta Bibele ne ba ikutwanga kuli “ka ku ba Makatolika ne ba putelezwi, ni kuli ku na ni litaba ze ñata ze tusa mwa Bibele. Ba bata ku ipumanela ze ñwi kwa litaba ze ñata ze tusa zeo ze ne ba ikutwa kuli ne ba li yawile.”

Ka mo ku inezi kaufela, ki lifi “litaba ze ñata ze tusa” z’a kona ku fumana muituti wa Bibele? Ki ze: Kana mu bata ku ziba mwa ku tiyela lipilaelo za ka zazi? Mu kona ku pila cwañi ka kozo mwa lubasi? Ki kabakalañi kashwau ni ku sa utwana ha li atile hahulu? Kiñi ze tisa mifilifili mwahal’a ba banca kacenu? Likalabo za ngana kwa lipuzo zeo ni ze ñwi ze zinga za kona ku fumanwa mwa Linzwi la Mulimu, yona Bibele, mi luli za kona ku ba “litaba ze ñata ze tusa” isi fela kwa Makatolika kamba Maprotestanti kono ni kwa Mabuddha, Mahindu, Mamozilemu, Mashinto, mane ni ku ba ba sa lumeli kuli Mulimu u teñi kamba ba b’a nga kuli za Mulimu ha li koni ku zibwa. Sina mwa n’a bulelezi walisamu, ‘linzwi la Mulimu ne li lumonyi lwa mwa mautu a hae, ne li liseli la mwa nzila ya hae.’ La kona ku ba cwalo ni ku mina.—Samu 119:105.