Mu Tiise Sepo ya Mina ku Jehova

Ku lelwa za ku bulaya mutu. Manduna kaufela ba naha ba ambolisani mi ba lelisani ku toma mulao o munca. Ba bata ku toma mulao wa kuli mutu kaufela ya eza bulapeli bo bu sa lumelezwi ki Muso a bulaiwe.

KANA mwa ziba taba ye? Litaba ze ezahezi li tezi mitala ya batu be ne ba lelile za lunya, mi ba li ki mulao. Taba ye bulezwi fahalimu ne i ezahezi mwa Mubuso wa Maperesia mwa miteñi ya mupolofita Daniele. Mulao, wa n’a lumelelize Mulena Dariusi, ne u ize: “Mutu kaufela ya ka eza tapelo ku mulimu u sili, kamba ku mutu, fa mazazi a mashumi a malalu, haisi ku . . . mulena, mutu yo a nepelwe mwa musima wa litau.”—Daniele 6:7-9.

Daniele n’a ka ezañi ka za mufumbo wo wa ku bulaiwa? Kana n’a ka zwelapili ku sepa Jehova, yena Mulimu wa hae, kamba n’a ka tuhela ili ku eza za n’a laezi mulena? Ze ñozwi li lu bulelela kuli: “Daniele h’a s’a utwile kuli mulena u ñozi libizo la hae kwa mulao wo, a ikela kwa ndu ya hae. Mwa ndu ya hae ya kwahalimu, mahaulo n’a kwalulezwi kwa neku la Jerusalema; a kubama mwateñi ka mañwele, halalu ka lizazi, mi a lapela, a lumbeka Mulimu wa hae, sina mw’a n’a ezezanga sapili.” (Daniele 6:10) Lwa izibela hande ze ne ezahezi hasamulaho. Daniele n’a nepezwi mwa musima wa litau kabakala tumelo ya  hae, kono Jehova n’a “tibile milomo ya litau” ni ku lamulela mutang’a hae ya sepahala y’o.—Maheberu 11:33; Daniele 6:16-22.

Nako ya ku Itatuba

Kacenu, batanga ba Jehova ba pila mwa lifasi le li situhu, ba mwa lubeta lwa kwa mubili ni kwa moya. Ka mutala, mwa linaha ze ñwi kabakala mifilifili ye ne zuhile ya ku toyana kwa mishobo, Lipaki ba bañata ba bulailwe. Ko kuñwi, Lipaki za Jehova ba talimani ni ku taela kwa lico, butata bwa za mali, likozi za ka taho, makulanu a matuna, ni miinelo ye miñwi ye lubeta. Mi hape, ba tiyezi nyandiso, sineneketo kwa mubeleko, ni miliko ye fitana-fitana ya ku eza ze maswe, mi zeo kaufela li kona ku ba palelwisa kwa moya. Kaniti, Sila se situna, yena Satani, u tukufalezwi ku timeza batanga ba Jehova ka nzila ifi kamba ifi ye konahala.—1 Pitrosi 5:8.

Ha lu talimana ni miinelo ye cwalo, lu kona ku ezañi? Hailif’o lwa kona ku saba bupilo bwa luna ha bu li mwa kozi, lwa kona ku hupula manzwi a’ tiisa pilu a muapositola Paulusi, a’ li: “Mulimu u ize: Ha ni na ku ku tuhela, ha ni na ku ku fulalela. Hakulicwalo, lu ka bulela ka pilu ye tiile, lu li: Mulena ki Yena ya ni tusa, ha ni sabi se siñwi; mutu s’a ka ni eza ki nto mañi?” (Maheberu 13:5, 6) Lwa kona ku kolwa kuli Jehova u sa ikutwa cwalo ka za batanga ba hae kacenu. Nihakulicwalo, ku ziba sepiso ya Jehova haki ku lumela kuli u ka lu lamulela. Kacwalo ki kwa butokwa hahulu kuli lu tatube se lu sepela Jehova ilikuli lu eze mo lu konela kaufela ku tiisa ni ku zwisezapili sepo yeo. Ha lu eza cwalo, “kozo ya Mulimu ye fita kutwisiso kaufela, i ka buluka lipilu za [luna] ni mihupulo ya [luna] ku Jesu Kreste.” (Mafilipi 4:7) Mi haiba litiko li taha, lu ka kona ku nahana hande ni ku li tiyela ka butali.

Ze Lu Lukela ku Sepela Jehova

Kaniti lu na ni mabaka a mañata a ku sepa Mubupi wa luna, Jehova. Libaka la pili ki la kuli Jehova ki Mulimu ya lilato ya babalela luli batanga ba hae. Ku na ni litaba ze ñata ze ñozwi mwa Bibele ze lu taluseza za pabalelo ye lilato ya Jehova kwa batanga ba hae. Mushe ha n’a talusa m’o Jehova n’a babalezi batu ba hae ba ba ketilwe, bona bana ba Isilaele, n’a ñozi kuli: “[Muñ’a] Bupilo u mu fumani mwa naha ye si na batu, mwa lihalaupa le li sabisa, la maumbunwa; a mu ambeka kafa ni kafa, a mu tokomela, a mu babalela sina taku ya liito la hae.” (Deuteronoma 32:10) Mwa miteñi ye, Jehova u zwezipili ku babalela batanga ba hae, ibe ka sikwata kamba batu ka buñwi. Ka mutala, Lipaki ba bañwi ha ne ba taelezwi ki lico ka nako ya ndwa ya mukowa mwa Bosnia, Jehova n’a boni teñi kuli ne ba fumani lico ze ne tokwahala hahulu ka buikatazo bo bu bundume bwa mizwale ba bona ba kwa Croatia ni Austria. Mizwale bao ne ba itombozi bupilo bwa bona ka ku zamaya mwa naha ye tezi hahulu likozi kuli ba iseze mizwale ba bona lituso. *

Bakeñisa kuli Jehova Mulimu ki ya M’ata Ote, kaniti wa kona ku sileleza batanga ba hae mwa miinelo ifi kamba ifi. (Isaya 33:22; Sinulo 4:8) Kono Jehova niha tuhelela ba bañwi kwa batanga ba hae kuli ba bonise busepahali ku fitela lifu, u sa ba tiisanga ni ku ba tusa ku zwelapili ku sepahala, ili ku ba konisa ku zwelapili ku tiya, ku taba, ni ku ombala ku isa kwa mafelelezo. Kacwalo lwa kona ku ba ni sepo ya n’a bile ni yona walisamu, ye li: “Mulimu ki sisabelo sa luna ni mata a luna, ki tuso ye fumanwa kapili mwa nako ya ziyezi. Kabakaleo ha lu na ku saba se siñwi, lifasi niha li ka zikinyeha, ni malundu nih’a ka sutisezwa mwahali a mawate.”—Samu 46:1, 2.

Bibele hape i patulula kuli Jehova ki Mulimu wa niti. Seo si talusa kuli kamita u talelezanga lisepiso za hae. Mane, Bibele i mu talusa kuli ki Mulimu “ya sa koni ku puma.” (Tite 1:2) Bakeñisa kuli Jehova n’a kuta-kutezi ku bonisa kuli wa lata ku babalela ni ku pilisa batanga  ba hae, lwa kona ku kolwa ka ku tala kuli wa kona mi hape u itukiselize ku taleleza lisepiso za hae.—Jobo 42:2.

Mwa ku Tiiseza Sepo ya Luna

Nihaike kuli lu na ni mabaka a mañata a ku sepa Jehova, ha lu swaneli ku nga kuli ku ka lu bela bunolo ku ba ni yona sepo yeo. Libaka ki la kuli tumelo ya ba bañata mwa lifasi ki ye nyinyani, mi moya o cwalo u kona ku fokolisa ka bunolo sepo ya luna ku Jehova. Kacwalo, lu lukela ku ikataza hahulu-hulu ku tiisa sepo yeo ni ku i kumalela. Jehova wa ziba seo hande-nde, mi u lu file linzila za mwa ku ezeza cwalo.

Pili, u lu file Linzwi la hae le li ñozwi, yona Bibele, ili mo ku ñozwi limakazo za n’a ezelize batanga ba hae. Mu nahane fela kuli ki sepo ye kuma kai ye mu kona ku ba ni yona ku mutu haiba se mu ziba fela ki libizo la hae? Mwendi haiba i teñi, ki ye nyinyani fela. Mu tokwa ku ziba linzila ni likezo za hae kuli mu be ni sepo ku yena, nji cwañi? Ha lu nze lu bala ni ku yeya litaba ze cwalo za mwa Bibele, zibo ya luna ka za Jehova ni linzila za hae ze makaza ya hula, mi lu fita fa ku lemuha hahulu kuli wa sepahala. Kacwalo sepo ya luna ku yena ya tiiswa. Walisamu n’a tomile mutala o munde hahulu ha n’a lapezi ku Mulimu kuli: “Ni ka hupulisa misebezi ya [Muñ’a] Bupilo, e, ni bulele ze komokisa za linako za kale. Ni ka hupula misebezi ya hao kaufela, ni bulele likezo za hao.”—Samu 77:11, 12.

Kwand’a Bibele, hape lu na ni lico ze ñata za kwa moya za mwa lihatiso za Bibele ze hasanyiwa ki kopano ya Jehova. Ze ñwi ze banga mwa lihatiso zeo fokuñwi ki litaba ze susueza za batanga ba Jehova mwa miteñi ye, ili ze bonisa m’o Jehova n’a ba tuselize ha ne ba li mwa miinelo ye t’ata. Ka mutala, Martin Poetzinger, ya n’a tilo ba silama sa Sitopa Se Si Busa sa Lipaki za Jehova, n’a kulile hahulu ha n’a li paina mwa libaka za Yurope kwahule ni habo yena. N’a si na mali, mi ne ku si na mualafi ya n’a itatela ku mu alafa. Kono Jehova n’a si ka mu fulalela. Hasamulaho, mualafi yo muhulu wa sipatela sa mwa silalanda seo a talusezwa za teñi. Ka ku ba mulumeli ya tiile wa Bibele, munna ya sishemo y’o a babalela Muzwale Poetzinger sina mwa n’a ka babalela mwan’a hae, mi a eza cwalo a sa lifiwi pene ni ye kana. Ku bala litaba ze cwalo ze ezahezi kwa batu kaniti kwa kona ku tiisa sepo ya luna ku Ndat’a luna wa kwa lihalimu.

Tuso ye ñwi ye tuna ya fanga Jehova kuli a lu tuse ku tiisa sepo ya luna ku yena ki tohonolo ye tuna ya tapelo. Muapositola Paulusi u lu bulelela ka lilato kuli: “Mu si ke mwa bilaela ka se siñwi; kono mwa linto kaufela mu zibise Mulimu se mu bata ka tapelo ni ka kupo ye na ni buitumelo.” (Mafilipi 4:6) “Linto kaufela” li kona ku kopanyeleza maikuto a luna, ze lu tokwa, z’e lu sabisa, ni lipilaelo za luna. Ha lu lapela hañata ka ku zwelela kwa pilu, lu ka ba ni sepo ku Jehova ye tiile ni ku fita.

Jesu Kreste ha n’a li fa lifasi-mubu, fokuñwi n’a yanga kwa mukunda ku y’o lapela a nosi. (Mateu 14:23; Mareka 1:35) Pili a si ka eza kale likatulo ze tuna, mane n’a tozi busihu mutumbi inz’a lapela ku Ndat’ahe. (Luka 6:12, 13) Kona libaka sepo ya Jesu ku Jehova ha ne i li ye tiile hahulu kuli mane n’a konile ku tiyela tiko ye tuna ka ku fitisisa haisali. Manzwi a hae a mafelelezo fa kota ya linyando ne li a kuli: “Ndate, ni beya moya wa ka mwa mazoho a hao.” Manzwi ao a sepo a bonisa kuli ku fitela mane fa lifu la hae, sepo ya hae ku Ndat’ahe ne i si ka fela, nihaike kuli  Jehova n’a si ka eza se siñwi kuli a mu pilise.—Luka 23:46.

Nzila ye ñwi hape ya ku tiisa ka yona sepo ku Jehova ki ka ku swalisana kamita ni ba ba sepile Jehova ka pilu kaufela. Jehova n’a laezi batu ba hae ku kopananga hamoho kuli ba itute ze ñata ka za hae ni ku susuezana. (Deuteronoma 31:12; Maheberu 10:24, 25) Swalisano ye cwalo ne i tiisize sepo ya bona ku Jehova, ili ku ba konisa ku tiyela litiko ze tuna za tumelo. Mwa naha ye ñwi ya kwa Africa m’o musebezi wa ku kutaza n’o kwalezwi, Lipaki za Jehova ne ba sa fiwi silelezo ya mapokola, litupa za ku ba konisa ku zamaya, micato, likalafo, ni mibeleko. Ndwa ya mwahal’a bayahi ha ne i tumbukile mwa sibaka se siñwi, ba mwa puteho ye fakaufi b’a 39, ku kopanyeleza cwalo ni banana, ne ba izo pila kwatas’a mutano mwa lihalaupa kuli ba sabe ndwa mwa tolopo ya bona. Mwa miinelo ye t’ata cwalo, puhisano ya bona ya ka zazi ya liñolo la zazi ni mikopano ya bona ne li ba tiisize hahulu. Kacwalo ne ba konile ku tiyela butata b’o inze ba tiile kwa moya. Taba ye i bonisa hande-nde butokwa bwa ku kopana kamita ni batu ba Jehova.

Sa mafelelezo, kuli lu tiise sepo ya luna ku Jehova, lu lukela ku satalala kamita mwa musebezi wa ku kutaza Mubuso, ili ku itukiseza kamita ku bulelela ba bañwi taba ye nde. Nto yeo ne i bonisizwe ki likande le li nyangumuna la muhasanyi wa mwanana ya mafulofulo wa kwa Canada ya n’a kula butuku bwa leukemia bo ne bu sa foli. Ku si na taba ni ku kula hahulu, kaizeli y’o n’a bata ku ba paina wa kamita, f’o kikuli, sikombwa sa ka nako ye tezi. Ka nakonyana, n’a ikutwile kwateñi hande mi a iñolisa bupaina bwa ku tusa ka kweli i liñwi. Hasamulaho, a kalisa ku kula hahulu hape, mi a shwa hamulaho wa likwelinyana. Niteñi, n’a shwile a li ya tiile kwa moya, mi sepo ya hae ku Jehova ne i si ka zikinyeha nihaiba hanyinyani. Bom’ahe ba hupula kuli: “Ku fitela a shwa, n’a iyakatwile hahulu za ba bañwi ku fita za hae. N’a ba susuezanga ku ituta Bibele, ni ku ba taluseza kuli, ‘Lu ka ba hamoho mwa Paradaisi.’”

Ku Bonisa Sepo ya Luna ku Jehova

“Mo ku inezi ka mubili, kuli ha u si na moya u shwile; ku cwalo ni ka tumelo, ha i si na misebezi, i shwile.” (Jakobo 2:26) Za n’a bulezi Jakobo ka za tumelo ku Mulimu li kona ku bulelwa ni ka za sepo ya luna ku Yena. Ni ko lu ka bulela cwañi kuli lu sepile Mulimu, ha lu sa bonisi sepo yeo ka likezo, ha ku na tuso. Abrahama n’a sepile Jehova ka ku tala mi n’a bonisize sepo yeo ka ku utwa ka ku tala litaelo za hae, mane ku fita ni fa ku itukiseza ku fana mwan’a hae Isaka kuli a be sitabelo. Kabakala sepo ni ku utwa ko ku cwalo, Abrahama a bizwa mulatiwa wa Jehova.—Maheberu 11:8-10, 17-19; Jakobo 2:23.

Ha lu tokwi ku libelela kuli lu be ni tiko ye tuna kuli lu bonise sepo ya luna ku Jehova. Jesu n’a bulelezi balutiwa ba hae kuli: “Ya sepahala ku ze nyinyani, u ka sepahala ni ku ze tuna; mi ya sa sepahali ku ze nyinyani, h’a na ku sepahala ku ze tuna.” (Luka 16:10) Lu swanela ku ituta ku sepa Jehova mwa likezo za luna kaufela za ka zazi, ili ku mu utwa nihaiba mwa lika ze lu bona bunyinyani. Ha lu iponela lituso ze zwa mwa ku utwa ko ku cwalo, sepo ya luna ku Ndat’a luna wa kwa lihalimu ya tiiswa, ili ku lu konisa ku tiyela miliko ye mituna kamba ye miñata.

Lifasi ha li nze li ya kwa sinyeho ya lona, batu ba Jehova ba tamehile ku tahelwa ki litiko ni likozi ze ñata. (Likezo 14:22; 2 Timotea 3:12) Ka ku hulisa sepo ye tiile ili ye tezi ku Jehova cwale, lwa kona ku libelela ku piliswa mwa lifasi le linca l’a sepisize—ibe ka ku pululeza ñalelwa ye tuna kamba ka ku zusiwa kwa bafu. (2 Pitrosi 3:13) Haike lu si tuheleli ku sa ba ni sepo kufi kamba kufi ku sinya silikani sa luna sa butokwa ni Jehova. Fohe, ze ne bulezwi ka za Daniele ha s’a lamulezwi mwa musima wa litau li ka bulelwa ka za luna, kuli: “Ha ku si ka fumanwa sikelelanyana ku yena, kakuli n’a sepile Mulimu wa hae.”—Daniele 6:23.

[Litaluso za kwatasi]

[Siswaniso se si fa likepe 9]

Ku bala litaba za batanga ba Jehova ba ba sepahala, ba ba cwale ka Martin Poetzinger, kwa tiisa tumelo