Piho ya Bashaeli Ba Mubuso

N’a Fumani Za Mulimu Z’a N’a Bata

CYPRUS ki sooli se si kwa mutulo-upa wa Liwate la Mediteranea. Mwa miteñi ya ze mwa Bibele, Cyprus (Sipera) ne i zibahala ka kopa ni likota za yona ze nde. Bo Paulusi ni Barnabasi ne ba kutalize teñi taba ye nde ya Mubuso mwa musipili wa bona wa pili wa bulumiwa. (Likezo 13:4-12) Kacenu, taba ye nde i sa tusa hahulu ba kwa Cyprus ba bañata. Kaniti, seo ki sona se ne si ezahezi ku Lucas, munna ya mwa lilimo za ma-40. U kandeka cwana:

“Ne ni pepezwi fa famu cwana fo ku utelwa likomu, mwa lubasi lwa bana ba supile. Ku zwa kwa bwanana hahulu, ne ni lata hahulu ku bala. Buka ye ne ni lata hahulu ne li hatiso ye nyinyani hahulu ya Mañolo a Sigerike a Sikreste. Ha ne ni li wa lilimo ze 10, na ni balikani ba ka ne lu kalisize ku ituta Bibele ka sikwata. Kono ne lu ezize cwalo nakonyana fela kakuli ba bahulu ba bañwi mwa munzi ne ba lu biza kuli lu bakwenuheli.

“Hasamulaho, ha ne ni li kwa sikolo mwa United States, n’a katana batu ba bulapeli bo buñata. Nto yeo ya ni lakazisa hape ku ziba za Mulimu. Ne ni tolanga mazazi a mañata mwa libulukelo la libuka la yunivesiti inze ni bala ka za bulapeli bo bu fitana-fitana. Hape ne ni yanga kwa likeleke ze ñata, kono ku si na taba ni buikatazo b’o, ne ni si ka fita luli fa ku ziba za Mulimu.

“Ha se ni felize sikolo, n’a kutela kwa Cyprus mi n’a yo fiwa musebezi wa ku ba muzamaisi wa kalulo ya sipatela ya ku tatuba za matuku. Munna-muhulu cwana ya bizwa Antonis, ili Paki ya Jehova, n’a ni potelanga kwa mubeleko. Kono ba Keleke ya Greek Orthodox ne ba mu bonanga.

“Ku si ka fita nako, muluti wa za bulapeli yo muñwi a t’o ni bulelela kuli ni si ke na ambolanga ni Lipaki za Jehova. Bakeñisa kuli ku zwa kwa bwanana ne ni lutilwe kuli Keleke ya Greek Orthodox ki yona ya niti, n’a utwa za n’a bulezi mi n’a tuhela ku ambolanga ni Antonis mi n’a kalisa ku buhisananga za Bibele ni muluti wa za bulapeli y’o. Hape ne ni yanga kwa libaka ze ñata ko ku pila ba bulapeli mwa Cyprus. Mane ne ni kile n’a ya kwa lilundu le li bizwa Mount Athos le li kwa mutulo wa Greece, le b’a nga ba keleke ya Orthodox kuli ki lilundu le li kenile ka ku fitisisa. Kono lipuzo za ka za Bibele ne li si ka alabiwa.

“Se ni lapela ku Mulimu kuli a ni tuse ku fumana niti. Hasamulahonyana, Antonis a t’o ni potela hape kwa mubeleko, mi na ikutwa kuli ne li yona kalabo kwa tapelo ya ka. Kacwalo na tuhela ku potelanga muluti wa za bulapeli y’o mi n’a kalisa ku ituta Bibele ni Antonis. N’a eza zwelopili, mi mwa October 1997, n’a bonisa buineelo bwa ka ku Jehova ka ku kolobezwa mwa mezi.

“Musal’a ka ni bana ba ka ba basizana ba bahulu ba babeli, be ne ba na ni lilimo ze 14 ni 10 ka nako yeo, pili ne ba ni lwanisanga. Kono kabakala muzamao wa ka o munde, musal’a ka a ikatulela ku fumaneha kwa mukopano kwa Ndu ya Mubuso. N’a tabisizwe hahulu ki sishemo sa Lipaki ni ku mu isa pilu ko ne ba mu bonisize. Sihulu n’a tabisizwe ki mo ne ba itusiselize Bibele. Kabakaleo, musal’a ka ni bana ba ka ba babeli ba bahulu ba lumela ku ituta Bibele ni Lipaki za Jehova. Mu nahane tabo ye ne ni bile ni yona kaufela bona ba balalu ha ne ba kolobelizwe fa Mukopano wa Sikiliti wa “Linzwi la Bupolofita la Mulimu” mwa 1999!

“Kaniti, ne ni fumani niti ye ne ni bata. Cwale lubasi kaufela, ili musal’a ka ni bana ba ka ba bane, lu swalisani mwa bulapeli bo bu kenile bwa Jehova.”