“Mulikan’a Hao [Ha] ku Utwisa Butuku”

MUAPOSITOLA PAULUSI n’a boni tokwahalo ya ku sikulula liputeho za Sikreste za mwa Galatia za mwa lilimo za mwanda wa pili. Mwendi ka ku bata ku tibela ndimbelela, n’a buzize kuli: “Kana ni fetuhile sila ku mina ka ku mi bulelela niti?”—Magalata 4:16.

Ka ‘ku bulela niti,’ Paulusi n’a si ka ba sila sa bona. Kono n’a eza ka ku lumelelana ni sikuka sa Bibele se si li: “Mulikan’a hao nih’a ku utwisa butuku, u eza inz’a ku sepa.” (Liproverbia 27:6) N’a zibile kuli lifosi ne ba kona ku utwa butuku kwa pilu. Niteñi, n’a lemuhile kuli ku sa fa sifosi kalimelo ya tokwa ne ku kona ku tahisa ku mu tima ponahazo ya lilato la Jehova Mulimu. (Maheberu 12:5-7) Kacwalo, ka ku ba mulikani ya sepahala y’o mwa pilu n’a lakaleza puteho bunde bo bu inelela, Paulusi n’a si ka saba ku fa sikululo.

Kacenu, Lipaki za Jehova ba sweli ku peta musebezi wa bona wa ku ‘[luta] macaba kaufela, . . . [ku ba luta] ku mamela [za] laezi [Jesu Kreste] kaufela.’ Ka ku eza cwalo, Bakreste ba ba sepahala bao ha ba zwakanyi liniti za Bibele ze patalaza ni ku nyaza mafosisa a litumelo ni mikwa y’e si ya Sikreste. (Mateu 15:9; 23:9; 28:19, 20; 1 Makorinte 6:9, 10) Mwa sibaka sa ku ba lila ze swanela ku haniwa, ba bonisa cisehelo ye fumaneha ku ba ba li balikani ba niti.

Ka ku ba ni yeloseli ye buyelezwi ki Mulimu, wa lisamu n’a ñozi kuli: “Mutu ya na ni niti h’a ni nata, ki bunde; nih’a ni kalimela, ki sina oli fa toho ya ka; toho ya ka i si ke ya pima.”—Samu 141:5.