Tuso mwa ku Utwisisa Bibele

BIBELE ki buka ye ipitezi. Bañoli ba yona ba li ne ba susumelizwe ki Mulimu, mi litaba ze ku yona li fa bupaki bo bu likani bo bu bonisa kuli taba yeo ki ya niti. (2 Timotea 3:16) Mwahal’a ze fumaneha ku yona, Bibele i bonisa ko lu simuluha, ze lu pilela, ni ko lu libile. Kaniti yeo ki buka ye lu lukela ku nyakisisa!

Mwendi mu likile ku bala Bibele kono mwa fumana kuli ku t’ata ku i utwisisa. Mwendi ha mu zibi kwa ku bata likalabo kwa lipuzo za mina. Haiba ku cwalo, u zibe haki mina fela. Likangate la mina li swana ni la munna ya n’a pilile mwa lilimo za mwanda wa pili. N’a li mwa koloi, mwa musipili wa ku zwa kwa Jerusalema ku ya kwa naha ya habo ya Etopia. Nduna wa Muetopia y’o n’a bala ka ku tumusa mwa buka ya bupolofita ye mwa Bibele, yona ya Isaya. Buka yeo ka nako yeo ne se i kwanisize lilimo ze fitelela 700 ku zwa fo ne i ñolezwi.

Hañihañi, a ambotwa ki munna ya n’a mata kwatuko ni koloi. Munna y’o ne li Filipi, mulutiwa wa Jesu. Filipi a buza Muetopia y’o kuli: “Kana u utwisisa s’o bala?” Muetopia a alaba kuli: “Ni ka utwisisa cwañi ku si na ya ni beya mwa nzila?” Kihona a kupa Filipi ku pahama mwa koloi. Filipi a talusa liñolo la n’a bala munna y’o mi a mu “bulelela Jesu.”—Likezo 8:30-35.

Sina Filipi ha n’a tusize Muetopia yani ku utwisisa Linzwi la  Mulimu kale-kale k’o, Lipaki za Jehova ba tusa batu ku utwisisa Bibele kacenu. Ni mina ne ba ka tabela ku mi tusa. Hañata, ku banga hande ku ituta Bibele ka mukwa o lukisizwe hande, ku kala ka lituto za matatekelo ze mwa Mañolo. (Maheberu 6:1) Ha mu nze mu zwelapili, mu ka kona ku ca zeo muapositola Paulusi n’a ize ki “lico ze tiile”—ili ku talusa liniti ze tibile. (Maheberu 5:14) Nihaike kuli ki Bibele ye mu ituta, lihatiso ze ñwi—ili ze tusa mwa ku ituta Bibele—za kona ku mi tusa ku fumana mi ni ku utwisisa mañolo a Bibele fa litaba ze shutana-shutana.

Tuto hañata i kona ku lukiswa ku ezwa ka nako ni mwa sibaka se mu tabela. Ba bañwi mane ba itutelanga fa luwaile. Tuto yeo ha i eziwangi inge mo ku ezezwanga mwa kilasi; ki tukiso ya ka butu ye lukiselizwe ku zamaelela ni miinelo ya mina, hamoho ni simuluho ya mina ni fo mu felelize kwa sikolo. Ha mu tokwi ku lifela tuto ye cwalo ya Bibele. (Mateu 10:8) Ha ku na litatubo, mi ha mu na ku utwiswa maswabi. Lipuzo za mina li ka alabiwa, mi mu ka ituta mwa ku sutelela ku Mulimu. Kono ki kabakalañi ha mu swanela ku ituta Bibele? Mu nyakisise mabaka a mañwi ku ituta Bibele ha ku kona ku tahisa tabo mwa bupilo bwa mina.