“Kana Luli Mulimu Wa Atulelanga Batu Ku Yo Ca mwa Lihele?”

“Kana mu baituti ba za bulapeli?”

Bo Carl ni Joel ne ba komokisizwe ki puzo yeo. Mitangana ba babeli bao ki baitateli ba ba sebeleza kwa sibaka sa tamaiso sa Lipaki za Jehova se si kwa Brooklyn, mwa New York. Ne ba nze ba talima-talima libuka ze lekiswa mwa sintolo sa libuka se si li bukaufi. Joel ha n’a nze a tatuba libuka ze na ni mikoloko ya manzwi a fumaneha mwa Bibele, Carl n’a sweli ku mu kandekela za puhisano ya n’a bile ni yona mwa bukombwa. Munna yo muñwi ha s’a utwile likalulo ze ñwi za likande la bona, a ba atumela.

Kono munna y’o n’a sa bati fela ku ziba haiba mitangana bao ne ba ituta za bulapeli. N’a na ni pilaelo ya ka butu. A talusa kuli: “Ni Mujuda, mi balikani ba ka ba bañwi ba ba li Bakreste ba ni taluselize kuli ni ka yo ca mwa lihele kakuli Majuda ne ba hanile Jesu. Nto yeo ya ni kataza luli. Ha ku bonahali ku ba ko ku lukile kuli Mulimu ya lilato a fe koto ye cwalo. Kana luli Mulimu wa atulelanga batu ku yo ca mwa lihele?

Joel ni Carl ba taluseza munna ya sepahala y’o kuli ne ba li baituti ba batuna ba Bibele. Ba mu bonisa ku zwelela mwa Bibele kuli ba ba shwile ha ku na se ba ziba ni kuli ba lobezi mwa lifu mi ba libelela zuho. Kacwalo, ha ba tukufazwi kamba ku utwa butuku mwa lihele. (Samu 146:3, 4; Muekelesia 9:5, 10; Daniele 12:13; Joani 11:11-14, 23-26) Kwa mafelelezo a puhisano ya bona ye n’e tandile mizuzu ye 45, munna y’o a fa Joel ni Carl keyala ya hae mi a kupa litaba ze ekezehile.

Kambe lihele ki sibaka sa tukufazo ya ka mulilo, kana ku na ni mutu ya n’a ka ikupela ku iswa teñi? Kono Jobo, ya n’a li toho ya lubasi, ha n’a bata ku banduka manyando a hae, a kupa kuli: “Ki mañi ya ka ni lumelela se, kuli kambe n’o ka ni bukeleza mwa lihele, ni ku ni pata mane buhali bwa hao bu fela?” (Jobo 14:13, toloko ya Douay Version) Kwa bonahala hande kuli Jobo n’a sa lumeli kuli lihele ki sibaka sa tukufazo. Kono n’a batile kuli a silelezwe teñi. Lifu ki muinelo wa ku sa ba teñi, mi lihele le li bulelwa mwa Bibele ki mabita a batu.

Haiba ne mu ka tabela litaba ze ñwi hape ka za se si ezahala ku luna ha lu shwa ni sepo ye kona ku ba teñi ka za hamulaho wa lifu, mu kupiwa hahulu kuli mu amuhele memo ye latelela.