Piho ya Bashaeli Ba Mubuso

Mulimu U Takuzi Miyoko ya Hae

BATU ba ba kalisanga ku pila ka ku lumelelana ni milao ni likuka za Jehova ba fuyaulwa hahulu. Ku eza licinceho ze tokwahala niha ku sa bangi ko ku bunolo kamita, tuso ni susuezo li kona ku fumaneha ka bunolo. (Samu 84:11) Taba ye latelela ye zwa kwa upa wa mboela wa Asia i bonisa seo.

Ha n’a li fa pumulo, Paki yo muñwi ya n’a zwa kwa France n’a ambozi ni muñ’a sintolo cwana ya n’a bizwa Kim * ka za z’a lela ku eza Jehova kwa lifasi-mubu. Paki y’o hape n’a file Kim buka ya Wa Kona Ku Pila Ku Ya Ku Ile mwa Paradaisi fa Lifasi-mubu. Ha n’a nze a talima-talima mwa buka yeo, Kim n’a fumani manzwi a li, “u ka takula miyoko kaufela kwa meto a bona.” (Sinulo 21:4) Kim h’a iheta, u li: “Liñolo leo ne li ni tabile hahulu kwa pilu. Ku ni bona ni menya-menya ni ku ambola lizazi mutumbi mwa sintolo, ki mañi ya n’a ka ziba kuli ni sa ya fela kwa ndu manzibwana, ne ni lilanga ku fitela ni ya mwa buloko?” Ka ku patulula se ne si mu tiseza masitapilu luli, u bulela kuli: “Ne ni nyezwi mapoto ku munna yo muñwi ka lilimo ze 18 mi ne ni tokwile mwangalwa ni hanyinyani kakuli n’a hanile ku ni onda. Ne ni bata ku tuhela mupilelo w’o, kono ka ku ba kuli ne ni pilile ni yena ka nako ye telele cwalo, ne ni si na bundume bwa ku eza cwalo.”

Hamulahonyana wa f’o, Kim a lumela ku ituta Bibele ni yo muñwi wa Lipaki za Jehova ya bizwa Linh. Kim u li: “Ne ni bata hahulu ku sebelisa ze i luta Bibele. Ka mutala, na tuhela ku pailela balimu ba ka, ku eza cwalo niha ne ku tisize kuli ba lubasi lwa hesu ba ni lwanise. Hape, ne ni likile ku ñolisa linyalo la luna ka mulao, kono nyazi wa ka y’o a hana ku eza cwalo. Mwa nako yeo ye t’ata, Paki y’o wa kwa France a zwelapili ku ni lumelanga lihatiso ze tomile fa Bibele, mi Linh n’a ni susuezanga luli. Pilu-telele ni tuso ye lilato ya likaizeli bao ne i ni tusize ku tiiseza ku fitela na fita fa ku ziba hande nyazi y’o ye ne ni nyezwi ku yena mapoto. Na t’o ziba kuli n’a na ni kale ni ‘basali’ baketalizoho ni bana b’a 25! Seo sa ni fa bundume bwa ku mu siya.

“Ku zwa mwa ndu ye tuna ye nde ku ya ku ye nyinyani ne ku si ko ku bunolo. Hape, munna y’o ya n’a banga nyazi ya ka n’a ni hapilikelize ku kuta ku t’o ina ni yena hape, ni ku ni bemba kuli n’a ka ni sela mezi a acid ili a wawata a n’a ka ni tahiseza buyanga. Ka tuso ya Jehova, ne ni konile ku eza se si lukile.” Kim a zwelapili ku eza zwelopili mi kwa nalulelule a kolobezwa mwa April ka 1998. Hape, likaizeli za hae ba babeli ni mwan’a hae ya sa nonoboka ba kalisa ku ituta Bibele ni Lipaki za Jehova.

Kim u li: “Ne ni hupulanga kuli bupilo bwa ka ne bu si ke bwa ba bwa ngana ni kamuta. Kono kacenu, ni ya tabile, mi ha ni sa lilanga busihu. Jehova ki kale a takula miyoko kwa meto a ka.”

[Litaluso za kwatasi]