Ye Tiile Ku Fita Gauda ye Kenile

GAUDA i batiwa hahulu kabakala bunde ni ku ina nako ye telele kwa yona. Libaka ha i batiwa hahulu cwalo kikuli kamita i bonahala ku ba ye zwelapili ku benya ni ku sa sinyeha. Seo si cwalo kakuli gauda ha i konwi ku sinyiwa ki mezi, moya wa oxygen, sulufula, ni buñata bwa lika ze ñwi kaufela. Buñata bwa lika ze pangilwe fa gauda ze ne fumanwi mwa lisepe ze n’e tibile ni ko kuñwi cwalo li sa zwelapili ku benya hamulaho wa lilimo ze mianda-nda.

Kono ka ku lemuseha, Bibele i bulela kuli ku na ni nto ye ñwi ye tiile ni ku fita ili “ya butokwa ku fita gauda ye fela, bo ni yona i likwa ka mulilo.” (1 Pitrosi 1:7) Gauda ye “likwa” kamba ku keniswa ka mulilo ni ka mikwa ye miñwi i kona ku ba ye kenile ku fita fa 99.9 pesenti. Niteñi, niheba gauda ye kenisizwe ya kona ku fela, kamba ku shengunuka, ha i bewa mwa mezi a kona ku i shengununa a bizwa aqua regia, ili sikopekope sa likalulo ze talu za mezi a wawata a bizwa hydrochloric acid ni kalulo i liñwi ya mezi a wawata a bizwa nitric acid. Kacwalo, Bibele i nepahezi ka ku ya ka sayansi ha i bulela kuli ‘gauda ya fela.’

Ka ku fapana, tumelo ya niti ya Sikreste ‘ya pilisa moya.’ (Maheberu 10:39) Batu ba kona ku bulaya mutu ya na ni tumelo ye tiile, ka mo ne ba bulaezi Jesu Kreste. Kono ba ba na ni tumelo ya niti ba sepiswa kuli: “U sepahale ku isa kwa lifu, mi ni ka ku fa kuwani ya bulena ya bupilo.” (Sinulo 2:10) Mulimu u ka hupula ba ba shwa inge ba na ni tumelo, mi u ka ba zusa. (Joani 5:28, 29) Gauda i be ye ñata cwañi, ha i koni ku peta seo. Kabakaleo, tumelo kaniti ki ya butokwa hahulu ku fita gauda. Kono kuli tumelo i be ya butokwa bo butuna cwalo, ni yona i lukela ku likwa. Mane, Pitrosi n’a bulezi kuli ki ‘tumelo ye likilwe’ ye li ya butokwa hahulu ku fita gauda. Lipaki za Jehova ne ba ka tabela ku mi tusa ku ituta Bibele ilikuli mu kone ku hulisa ni ku zwelapili ku ba ni tumelo ye tiile cwalo ku Mulimu wa niti, yena Jehova, ni ku Mwan’a hae, yena Jesu Kreste. Ka ku ya ka Jesu, seo si talusa “bupilo bo bu sa feli.”—Joani 17:3.