Buka Ye Sa Tabelwi ki Buñata bwa Ba Banca

KALIBE ya bizwa Beate n’a ize: “Ni ka ziba cwañi kuli Bibele luli ki Linzwi la Mulimu? Haki buka ye ni tabisa.”

Mwa Germany, mwa pila Beate, buñata bwa ba banca ba fa maikuto a swana; kacwalo, b’a nga ku bala Bibele ku ba ko ku si kwa butokwa. Patisiso ya kwateñi k’o ya cwanoñu fa ne i bonisize kuli, ibat’o ba 1 pesenti ya ba banca ba bala Bibele hañata hahulu, 2 pesenti ba i bala hañata, 19 pesenti ka siwela, mi ibat’o ba 80 pesenti ha ba i bali. Lipalo zeo li kana za ba ze swana mwa linaha ze ñwi, mwendi mane ni mo mu pila. Kwa bonahala hande kuli Bibele ki buka ye sa tabelwi ki ba banca ba bañata.

Kacwalo, ha ku komokisi kuli ku sa ziba za Bibele ku atile mwahal’a ba banca! Kwa makalelo a silimo sa 2000, pampili ya makande ye bizwa Lausitzer Rundschau ne i bihile ka za patisiso ye n’e bonisize palo ya batu be ne ba ziba Milao ye Lishumi ni ku itusisa yona ka ku ba ketelelo mwa bupilo. Mwahal’a batu ba lilimo ze fitelela 60, ba ba eza 67 pesenti ne ba ziba milao yeo mi ne ba etelelwa ki yona; haili ba lilimo ze sa fiti fa 30, bona ne li 28 pesenti. Ee, buñata bwa ba banca ha ba zibi Linzwi la Mulimu.

Ba Bañwi Ba Na ni Mubonelo Usili

Ku tuha f’o, mwa lifasi kaufela, ku na ni bolule-lule ba banca ba ba fumani Linzwi la Mulimu ku ba la butokwa ka ku fitisisa. Ka mutala, Alexander ki wa lilimo ze 19 mi u balanga Bibele kakusasana ni kakusasana pili a si ka ya kale kwa musebezi. U li: “Ki yona nzila ye nde hahulu ya ku kala lizazi ka yona.” Sandra yena u balanga kalulo ye ñwi ya Bibele manzibwana ni manzibwana. U talusa kuli: “Se u bile mukwa wa ka wa ka zazi.” Mi Julia, y’a li wa lilimo ze 13, s’a bile kale ni mukwa wa ku no balanga kauhanyo i liñwi ya Bibele pili a si ka ya kale kwa ku lobala. “N’a ikola ku eza cwalo luli, mi ni bata ku zwelapili ku eza cwalo kwapili.”

Ki ufi mubonelo o lukile ni o butali? Kana Bibele luli ya swanela ku balwa? Kana i na ni tuso ni butokwa ku ba banca? Mu bona cwañi?