Kana Mwa Hupula?

Kana mu itebuhile ku bala misulo ya cwanoñu fa ya Tora ya ku Libelela? Haiba ku cwalo, mu bone haiba mwa kona ku alaba lipuzo ze latelela:

• Ki kabakalañi lipuzo ze buzizwe mwa Jobo kauhanyo 38 ha li lukelwa ku nyakisiswa niheba kacenu?

Buñata bwa misebezi ye komokisa yeo Mulimu n’a bulezi ha i konwi ku utwisiswa niheba ki basayansi ba mwa miteñi ye. Zeo li kopanyeleza m’o m’ata a hoha lika a konela ku ezisa lifasi ku zwelapili ku ba mwa sikuka, seo luli liseli li li sona, libaka ha ku na ni mifuta ye sa feli ya tulotoli twa litwa, mo tu pangelwa tulotoli twa pula, ni m’o m’ata a amela mishika.—4/15, makepe 4-11.

• Ki mitala ifi ya mwa Bibele ye kona ku lu tusa ku talimana ni maikuto a ku zwafa?

Asafi, Baruki, ni Naomi ne ba kile ba ba ni maikuto a ku zwafa kamba a mañwi a maswe, mi taba ya mwa Bibele ya mo ne ba konezi ku talimana ni miinelo ye cwalo ya kona ku lu tusa.—4/15, makepe 22-4.

• Ki linzila lifi ze sebeza zeo ka zona limbelwa za Sikreste li konwa ku tusiwa?

Balikani ba kona ku kupa ka musa ni ka ku utwahala haiba ba kona ku fa tuso. Lilama za lubasi kamba ba bañwi mwendi ba kona ku fa tuso ya za mali kamba za kwa mubili, haiba ku na ni butokwi luli. Bakreste ba bañwi ni bona ba kona ku tusa ka ku ba sebeleza ha silikani, ku ba tiisa kwa moya ni ku ba omba-omba.—5/1, makepe 5-7.

• Ki kabakalañi ha ku li kwa butokwa ku nyalela ‘fela ku Mulena,’ ka mo i elezela 1 Makorinte 7:39?

Manyalo ni ba ba si balumeli hañata a bile a t’ata. Hape, ku latelela kelezo ya Mulimu yeo ku bonisa busepahali ku Jehova Mulimu. Ha lu latelela Linzwi la Mulimu, lipilu za luna ha li lu nyazi. (1 Joani 3:21, 22)—5/15, makepe 20-1.

• Ka ku ba kuli Jehova ki yena ya kona ku swalela libi za luna, ki kabakalañi Bakreste ha ba zibahaza libi za bona ze tuna kwa bana-bahulu ba puteho?

Ee, Mukreste u tokwa ku kupa Jehova ku mu swalela libi za hae ze tuna. (2 Samuele 12:13) Kono sina mupolofita Natani ha n’a tusize Davida, banna-bahulu ba mwa puteho ba ba hulile kwa moya ba kona ku tusa baezalibi ba ba bakile. Ku ya kwa maeluda ku lumelelana ni ketelelo ye filwe kwa Jakobo 5:14, 15.—6/1, likepe 31.

• Ki bupaki mañi bo bu li teñi bo bu bonisa kuli lu lukela ku babalela limbelwa ni lindiala ba ba mwa butokwi?

Taba ya ze ezahezi i bonisa kuli ku fa pabalelo ye cwalo ne li poniso ya bulapeli bwa niti bwa Maheberu ba kwakale ni Bakreste ba kwa makalelo. (Exoda 22:22, 23; Magalata 2:9, 10; Jakobo 1:27) Muapositola Paulusi n’a kopanyize mwa Mañolo litaelo ze iponelwa hande za kuli Bakreste ba babalele limbelwa ba ba mwa butokwi. (1 Timotea 5:3-16)—6/15, makepe 9-11.

• Ki sifi simbule sa bupilo bwa tabo ili bo bu kolwisa?

Lu lukela ku hulisa ni ku buluka silikani sakata ni Jehova, yena Ndat’a luna wa kwa lihalimu. Ku ituta Bibele ki nto ya butokwa mwa ku ezcwalo.—7/1, makepe 4-5.

• Kana mutu ni mutu u na ni moya o sa shwi o banduka lifu?

Batu ba bañwi niha ba lumela kuli moya—isiñi moyo—ha u shwi, Bibele ha i yemeli muhupulo w’o. I bonisa kuli mutu ha shwa, u kutela kwa liluli mi ha ku na ko kuñwi kw’a inzi. Kono Mulimu u na ni m’ata a ku mu zusa, kacwalo, sepo kaufela ya ku pila hape, ili ka zuho ya bafu, i ku Mulimu. (Muekelesia 12:7)—7/15, makepe 3-6.

• Daniele n’a li kai Maheberu ba balalu ha ne ba likilwe mwa libala la Dura?

Bibele ha i talusi. Mwendi Daniele n’a siyo mwa tamo ya ku fumaneha teñi kabakala situlo sa hae, kamba mwendi n’a kana a lumilwe ko kuñwi. Kono lwa kona ku kolwa kuli n’a si ka tuhela ku sepahala ku Jehova.—8/1, likepe 31.