Tulo kwa Kuta ye Tuna ya Naha

LIPAKI ZA JEHOVA mwa Germany ne ba bile ni tulo ye zwile mubano kwa Kuta ye Tuna ya Naha kwa Karlsruhe. Kacwalo ne b’a ngile muhato o mutuna kwa neku la za ku fiwa tumelezo kwa bona.

Lipaki za Jehova se ba kutalize mwa Germany ka lilimo ze fitelela 100. Ne ba bandukile nyandiso ye situhu ye ne tisizwe ki babusi ba bahateleli ba mwa lilimo za mwanda wa bu 20—ili ba kopano ya ba Nazi ni ya ba Komyunizimu. Ku zwa 1990, Lipaki se ba batile kuli ba fiwe tumelezo ya ka mulao ya ku sa teliswa ni ku lumelezwa ku eza lika ze ñwi. Hamulaho wa likatulo za kwa kuta ze peli ze nde ni i liñwi ye maswe, Lipaki ba yo ipileza kwa Kuta ye Tuna ya Naha, ili ye n’e zibahalize katulo ya yona la December 19, 2000.

Katulo ya ka Swalisano ye Yemela Lipaki za Jehova

Baatuli b’a 7 kaufela ba kwa kuta yeo ba yemela Lipaki. Baatuli bao ba zwisa katulo ye n’e filwe ki Kuta ye talima za likezo za batu (Federal Administrative Court) ka 1997 ni ku laela kuta yeo kuli i nyakisise hape kupo ya Lipaki.

Kuta ye Tuna ya Naha n’e itusisize nako yeo kwa ku fa maikuto ka za swalisano ya butokwa hahulu ye mwahal’a Naha ni likwata za bulapeli. Ka mutomo, mayemo a bulapeli “ha bonwi ka litumelo za bona, kono ka mukwa wa bona.”

Hape kuta ne i talusize kuli Lipaki ha ba eza “buikambuso bwa Sikreste,” ha ba “lwanisi likuka za puso ya babusi ba ba ketilwe ki batu (demokrasi)” mi “ha ba leli ku yolisa demokrasi ka mufuta o muñwi wa mulonga.” Kacwalo, ku sa abana mwa liketisa za bupolitiki ha ku swaneli ku itusiswa mwa ku palelwisa Lipaki ku bata kwa bona tumelezo ya ka mulao.—Joani 18:36; Maroma 13:1.

Hape kuta ne i bonisize kuli mulumeli—ibe Paki kamba yo muñwi wa bulapeli busili—ka linako ze ñwi wa kona ku ipumana mwa muinelo wa kuli ze u tokwa Muso li lwanisana ni litokwahalo za bulapeli bwa hae. Haiba mutu y’o a latelela lizwalo la hae ka ku “kuteka likuka za tumelo ku fita za mulao,” Muso u kana wa m’u nga ku ba ya si na mulatu ni kuli u eza ka ku lumelelana ni tukuluho ya bulapeli.—Likezo 5:29.

Katulo ya kuta yeo n’e bile yona toho ya taba mwa mapampili a makande. Ne ku si na pampili ya makande mwa Germany ye n’e si ka biha za taba yeo. Mandu a moya a televishini ni a wailesi kaufela ne a hasanyize lipiho kamba lipuhisano zeo. Haisali libizo la Jehova ha li si ka zibahazwa cwalo mwa Germany.

[Manzwi a bañi ba siswaniso fa likepe 8]

Siswaniso sa AP/Daniel Maurer