Diabulosi—Haki Tumelo Fela ye Si Na Mutomo Hande

“Kai ni kai mwa Testamente ye Nca, ku fumaneha shutano ye mwahal’a Mulimu ni bunde kwa neku le liñwi, ni bumaswe bo bu etelelwa ki Satani ku le liñwi. Wo haki muhupulo wa muñoli a li muñwi kamba ba babeli, kono ki taba ye ba lumela kaufela. . . . Buniti bwa Testamente ye Nca bwa iponelwa. Satani ki mutu wa luli ya maswe, ili ya lwanisa kamita Mulimu ni batu ba Mulimu.” —“The New Bible Dictionary.”

KACWALO, ki kabakalañi buñata bwa ba ba ipala kuli ki Bakreste—ba ba ipala kuli ba lumela Bibele—ha ba hana muhupulo wa kuli Diabulosi wa luli u teñi? Kakuli, kaniti fela, ha ba amuheli Bibele sina Linzwi la Mulimu. (Jeremia 8:9) Ba bulela kuli be ne ba ñozi Bibele ne ba ñozi mihupulo ya macaba a n’a ba potolohile mi ne ba si ka fitisa ka ku nepahala niti ye zwelela ku Mulimu. Ka mutala,  Hans Küng, Mukatolika ya li muituti wa za bulapeli, u ñola kuli: “Mihupulo ya matangu ya Satani ni badimona ba hae . . . ne i zwelela kwa matangu a Sibabilona mi ne i suñilwe mwa Sijuda sa kwa makalelo mi ku zwa f’o ya kena mwa Testamente ye Nca.”—On Being a Christian.

Kono Bibele haki manzwi fela a batu; kaniti luli ki Linzwi la Mulimu le li buyelezwi. Kacwalo, ne lu ka eza hande ku sa keshebisa se i bulela ka za Diabulosi.—2 Timotea 3:14-17; 2 Pitrosi 1:20, 21.

Mubonelo wa Jesu Ne Li Ufi?

Jesu Kreste n’a lumela kuli Diabulosi u teñi. Jesu n’a si ka likiwa ki bumaswe bo ne bu li ku yena. N’a likilwe ki mutu luli, y’o hamulaho n’a mu bizize kuli ki “mulena wa lifasi le.” (Joani 14:30; Mateu 4:1-11) Hape n’a lumela kuli libupiwa ze ñwi za kwa moya ne li sebelisani ni Satani mwa milelo ya hae ye maswe. N’a folisize batu be ne ba na ni “mioya ye maswe.” (Mateu 12:22-28) Mane, ni buka ya A Rationalist Encyclopædia, ye ñozwi ki ya sa lumeli za ku ba teñi kwa Mulimu, i bonisa butokwa bwa seo ha i bulela kuli: “Jesu wa mwa libuka za Evangeli n’a amuhezi tumelo ya mioya ye maswe, mi seo kamita si sitatalisize baluti ba bulapeli.” Jesu ha n’a bulezi za Diabulosi ni badimona ba hae, n’a sa kuteli fela ku bulela za litumelo ze zwelela kwa tuto ya Sibabilona. N’a ziba kuli mioya ye maswe luli i teñi.

Lu ituta ze ñata ka za Diabulosi ha lu nyakisisa za n’a bulezi Jesu kwa baluti ba za bulapeli ba mwa miteñi ya hae, ha n’a ize: “Mina mu zwa ku ndat’a mina, yena Diabulosi, mi mu lata ku eza litakazo za ndat’a mina. Ki mubulai isali kwa makalelo, mi h’a ini mwa niti, kakuli ha ku na niti ku yena; h’a bulela lishano, u bulela s’a li sona luli; kakuli ki lihata mi ki ndat’ahe lishano.”—Joani 8:44.

Ka ku ya ka pulelo yeo, Diabulosi, ili libizo le li talusa kuli “musawani,” n’a li ‘lihata ni ndat’ahe lishano.’ Ki yena sibupiwa sa pili ku puma ka za Mulimu, mi n’a ezize cwalo mwa simu ya Edeni. Jehova n’a bulezi kuli bashemi ba luna ba pili ne ba ka “shwa luli” ha ne ba ka ca kwa kota ya ku ziba bunde ni bumaswe. Ka ku itusisa noha, Satani n’a ize kuli manzwi ao n’e si a niti. (Genese 2:17; 3:4) Ka ku swanela, u bizwa kuli ki yena “noha ya kale, ye bizwa Diabulosi ni Satani.”—Sinulo 12:9.

Diabulosi n’a pumile ka za kota ya ku ziba bunde ni bumaswe. N’a ñañelezi kuli ku hanisa ku ca kwa kota yeo ne ku si ka luka—ne li ku itusisa maswe m’ata. N’a ize Adama ni Eva ne ba ka kona ku “ba sina Mulimu” mwa ku  ikatulela se sinde ni se si maswe. Satani n’a talusa kuli ka ku ba libupiwa ze lukuluhile, ne ba lukela ku ikatulela ka ku tala. (Genese 3:1-5, NW) Ku lwanisa mubusezo wa Mulimu kwa tumbula litaba ze tuna. Kacwalo, Jehova u file nako kuli litaba zeo li tatululwe. Seo si talusa kuli Satani u lumelelizwe ku zwelapili ku pila ka nakonyana fela. Cwale nako ya hae ye nyinyani se i zwelapili ku fukuzeha hahulu-hulu. (Sinulo 12:12) Niteñi, u sa zwelapili ku kauhanya batu ni Mulimu ka lishano ni ka ku kwasheka, ili ku itusisa batu ba ba cwale ka bañoli ni Bafalisi ba mwa miteñi ya Jesu kuli a hasanye lituto za hae.—Mateu 23:13, 15.

Jesu hape n’a bulezi kuli Diabulosi ne li ‘mubulai isali kwa makalelo’ ni kuli ‘h’a ini mwa niti.’ Seo ha si talusi kuli Jehova n’a bupile Diabulosi a li “mubulai.” N’a si ka bupiwa ku ba sibatana se si okamela sibaka mo ku cisezwa ni ku tukufaza mañi ni mañi ya hanyeza Mulimu. Linzwi la “lihele” mwa Bibele ha li talusi lihae la Satani. Lihele ki libita la batu kaufela.—Likezo 2:25-27; Sinulo 20:13, 14.

Diabulosi pili n’a inzi “mwa niti.” Ka nako ye ñwi, n’a li silama sa lubasi lwa Jehova lwa kwa lihalimu ka ku ba mwana wa moya ya petehile wa Mulimu. Kono n’a ‘si ka ina mwa niti.’ N’a iketezi linzila za hae ni likuka za hae za buhata. ‘Makalelo,’ a hae n’a bile isiñi ka nako ya n’a bupilwe sina mwana ya li lingeloi wa Mulimu, kono ha n’a ikatulezi ku ipangula ku Jehova ni ku kwasheka bo Adama ni Eva. Diabulosi u swana ni batu be ne ba fetuhezi Jehova mwa miteñi ya Mushe. Ka za bona lu bala kuli: “Ba isinyize fapil’a hae, haki bana ba hae, ki ona mulatu wa bona.” (Deuteronoma 32:5) Ni Satani u cwalo. N’a bile “mubulai” ha n’a ipanguzi ni ku tahisa lifu la bo Adama ni Eva mane ni la batu kaufela.—Maroma 5:12.

Mangeloi A Buipanguli

Mangeloi a mañwi a swalisana ni Satani mwa buipanguli bwa hae. (Luka 11:14, 15) Mangeloi ao n’a “zwile mwa litulo za ona” ni ku ipetula ku ba batu ilikuli a eze tobali ni “bana ba basizana ba batu” mwa miteñi ya Nuwe. (Juda 6; Genese 6:1-4; 1 Pitrosi 3:19, 20) “Kwa linaleli za lihalimu, kalulo ya bulalu ya zona” kamba palonyana ya libupiwa za moya, li ipanguzi.—Sinulo 12:4.

Buka ya Sinulo, yona ye tezi hahulu liswanisezo, i talusa kuli Diabulosi ki “drakoni ye fubelu, ye tuna.” (Sinulo 12:3) Libaka? Haki kabakala kuli u na ni mubili o sabisa, ili o maswe. Mane, ha lu zibi kuli libupiwa za moya li na ni mibili ye cwañi, kono mwendi Satani h’a shutani ni mangeloi a mañwi. Niteñi, “drakoni ye fubelu, ye tuna” ki taluso ye swanela ya mukwa wa Satani wa bukwañuli, ku sabisa, m’ata, ni businyi.

Satani ni badimona ba hae ba kwalezwi hahulu cwale. Cwale ha ba sa kona ku ipetula ku ba batu ka m’o mwendi ne ba konela pili. Mubuso wa Mulimu ha se u tomilwe kwa lihalimu mwatas’a tamaiso ya Kreste ka 1914, ne ba lundulezwi fa lifasi.—Sinulo 12:7-9.

Diabulosi ki Sila Se Si M’ata

Nihakulicwalo, Diabulosi u sa li sila se si m’ata. U sweli ku “zamaya sina tau ye lila ye bata ye i ka ca.” (1 Pitrosi 5:8) Haki bumaswe fela bo bu mwa mibili ya luna ye si ka petahala. Ki niti kuli ka zazi ni zazi lu na ni ku lwanisa litengamo za luna za sibi. (Maroma 7:18-20) Kono ndwa ya luli lu i “lwana ni milonga, ni mibuso, ni malen’a lifasi le, le li lififi, ni mioya ye lunya ye mwa mabaka a kwa lihalimu.”—Maefese 6:12.

 Kukuezo ya Diabulosi i atile cwañi? Muapositola Joani u bulela kuli: “Lifasi kamukana li lapalezi mwatas’a ya maswe.” (1 Joani 5:19) Ki niti kuli ha lu lati ku nahananga hahulu za Diabulosi kamba ku tuhelela sabo ye tahiswa ki litumelo ze sa utwisisehi ka za hae ku lu ngangamisa. Kono lu eza hande ku tonela buikatazo bwa hae bwa ku lu paleliswa ku ziba niti ni ku felisa busepahali bwa luna ku Mulimu.—Jobo 2:3-5; 2 Makorinte 4:3, 4.

Haki kamita Diabulosi a itusisa mikwa ye situhu mwa ku lwanisa ba ba bata ku eza tato ya Mulimu. Fokuñwi, u iponahazanga inge “lingeloi la liseli.” Muapositola Paulusi n’a lemusize Bakreste ka za kozi yeo ha n’a ñozi kuli: “Na saba kuli, sina noha ha [ne i] pumile Eva ka mano a maswe a yona, mwendi maikuto a mina ni ona a ka sinyeha, a latehelwe ki niti ye ku Kreste.”—2 Makorinte 11:3, 14.

Kacwalo, lu tokwa ku ‘n’o iswala, ku libelela, ni ku hana ku yena ka ku tiya mwa tumelo.’ (1 Pitrosi 5:8, 9; 2 Makorinte 2:11) Mu pime ku ipeya fa ngandaleza kuli Satani a si ke a mi kwasheka. Mu eze cwalo ka ku sa lupelela mwa nto ifi kamba ifi ye swalisana ni litaba za sidimona. (Deuteronoma 18:10-12) Mu itute Linzwi la Mulimu ka tukufalelo, ka ku hupula kuli Jesu Kreste n’a kuta-kutezi ku ama kwa Linzwi la Mulimu ha n’a likilwe ki Diabulosi. (Mateu 4:4, 7, 10) Mu lapelele moya wa Mulimu. Muselo wa ona wa kona ku mi tusa ku pima misebezi ya nama, ili yeo Satani a itusisa yona hande hahulu. (Magalata 5:16-24) Hape, mu lapele ka ku tiya ku Jehova ha mu ikutwa ku sineneketwa ka nzila ye ñwi ki Diabulosi ni badimona ba hae.—Mafilipi 4:6, 7.

Diabulosi h’a tokwi ku sabiwa. Jehova u sepisa silelezo luli kwa nto ifi kamba ifi y’a kona ku tahisa Satani. (Samu 91:1-4; Liproverbia 18:10; Jakobo 4:7, 8) Muapositola Paulusi u bulela kuli: “Mu tiyele ku Mulena, ni mwa mata a hae a’ sa palelwi ki se siñwi.” Kihona mu ka ‘kona ku tiya kwa lunya lwa Diabulosi.’—Maefese 6:10, 11.

[Siswaniso se si fa likepe 5]

Jesu n’a ziba kuli Diabulosi n’a li mutu wa luli

[Siswaniso se si fa likepe 6]

“Lifasi kamukana li lapalezi mwatas’a ya maswe”

[Manzwi a bañi ba siswaniso]

Siswaniso sa NASA

[Maswaniso a fa likepe 7]

Mu hanele Diabulosi ka ku ituta Linzwi la Mulimu ni ka ku lapela kamita