Lipuzo Ze Zwa kwa Babali

Makolose 1:16 i bulela ka za Mwan’a Mulimu kuli ‘linto kaufela li ezizwe ka yena, mi li ezelizwe yena.’ Ki ka kutwisiso ifi yeo lika kaufela li “ezelizwe” Mwan’a Mulimu, yena Jesu?

Jehova n’a itusisize Mwan’a hae wa libanda ku ba mubeleki yo mutuna mwa ku bupa linto ze ñwi kaufela, f’o kikuli, linto kaufela kwand’a yena Jesu ka sibili. (Liproverbia 8:27-30; Joani 1:3) Ka swanelo, Mwana u nyakalaliswa ki misebezi yeo, mi ka kutwisiso yeo li “ezelizwe” yena.

Lwa ziba kuli bashemi ba batu ni bona hañata ba libelelanga ku nyakalaliswa hahulu ki ze ba tahisa, ili bana ba bona ba bashimani ni ba basizana. Kacwalo, lishitanguti la mwa Bibele li bulela za “ndat’ahe mutu ku mwana y’a olisa.” (Liproverbia 3:12; 29:17) Ka ku swana, Jehova Mulimu n’a nyakalalisizwe ki Isilaele muta batu ba hae ne ba bile ba ba sepahala. (Samu 44:3; 119:108; 147:11) Ni ka nako ye, u nyakalaliswa ki ku sepahala kwa ba ba ishuwa.—Liproverbia 12:22; Maheberu 10:38.

Ka nzila yeo, ne ku li ko ku swanela kuli Mulimu n’a ka konisa ya n’a sebelisana ni yena, Jesu, kuli a nyakalale ka za n’a petile. Mane, Liproverbia 8:31 i bulela kuli Mwana n’a ‘tabela lifasi mo ku yahile batu. N’a wabelelwa ni bana ba batu.’ Ki ka kutwisiso yeo Makolose 1:16 ha ili: ‘Linto kaufela li ezizwe ka yena, mi li ezelizwe yena.’