Mu Be ni Buitumelo ni Ku Ba Ba Ba Tabile

PAMPILI ya makande ya mwa Canada, ye bizwa Calgary Herald ne ize: “Ku bonisa buitumelo ki kwa butokwa hahulu kwa batu.” Pampili ye bizwa Herald yeo ne i bonisize ze ne ba ñozi banana ba buhulu bwa lilimo ze 9 be ne ba kena sikolo be ne ba kupilwe ki muluti wa bona kuli ba ñole ka za lika ze ne ba itumela ka zona. Mwanana yo muñwi n’a ize kuli n’a itumela kwa lubasi lwa hae ‘kakuli ne lu mu babalezi.’ Musizana yo muñwi hape n’a itumela kwa lubasi lwa hae, ka ku bulela kuli: “Ba ni sileleza, ku tokomela buikangulo bwa ka, ba ni babalela, ba ni lata, ba ni fepa, mi kambesi bashemi ba ka, kambe ha ni yo fa lifasi fa.”

Ku sa itumela ku tahisa ñoñoleho ye tuna. Ka ku ya ka muituti wa za filosofi ni za bulapeli ya bizwa J. I. Parker, lu bupezwi ku pila ka ku itinga ku Mulimu ni ka ku itinga yo muñwi ku yo muñwi.” Seo si lu hupulisa kelezo ye butali ya mwa Bibele ye n’e ñozwi mianda-nda ya lilimo kwamulaho, ye li: “Mu be ni buitumelo.” (Makolose 3:15) Ku bonisa buitumelo bwa luli ku ba bañwi ku lu tusa ku ba ni liswalisano ze nde.

Ku tuha f’o, ka ku itebuhana ni k’u ngana ka butokwa, lu bonisa buitumelo ku Jehova, mi wa lemuha seo. Bibele i li: “Meto a [Muñ’a Bupilo] a talimisisa lifasi kaufela, kuli a tahise mata a hae ku tusa ba ba mu file lipilu za bona, kaufela zona.” (2 Makolonika 16:9) Mulimu u lu kolwisa kuli wa hupula ni ku nga ka butokwa lilato le ba bonisa batu kwa libizo la hae. (Maheberu 6:10) Ee, lwa swanela ku bonisa buitumelo ka zazi ni zazi. Buitumelo ki mukwa wa silumeli. Ha lu bu bonisa bu tahiseza Jehova tabo mi bu ekeza kwa tabo ya luna. Ku swana sina mo i bulelela Liproverbia 15:13 kuli: “Pilu ye tabile i benyisa pata.”