Ba Itusisa Libizo la Mulimu mwa Central Africa

BATU ba bañata-ñata mwa Central Africa ba na ni tumelo ku Mulimu. Ba lumela ka ku tala kuli ki yena Mubupi wa linto kamukana. (Sinulo 4:11) Niteñi, ka ku swana ni batu ba bañata ba mwa libaka ze ñwi, hañata ha ba itusisangi libizo la hae la ka butu—lona la Jehova.

Batu ba mwa Central Africa, ka ku swana ni ba mwa likalulo ze ñwi za lifasi ba amanga kwa libizo la Mulimu mwa Tapelo ya Mulena ha ba bulelanga kuli “Libizo la hao a li be le li kenile.” (Mateu 6:9) Kono ka nako ye telele, ba bañata ne ba sa zibi libizo leo. Nihakulicwalo, mwahal’a lilimo ze felile, musebezi wa ku kutaza ka cisehelo wa Lipaki za Jehova u cincize mubonelo wa batu kwa neku la ku itusisa libizo la Mulimu. Kacenu, libizo la Mulimu li zibahala hahulu mi li amuhelwa mwa lipuo ze ñata za mwa Africa, ze cwale ka Sizulu (uJehova), Siyoruba (Jehofah), Sikoza (uYehova) ni Siswahili (Yehova). Niteñi, litoloko ze ñata za Bibele mwa lipuo zeo ha li itusisi libizo la Mulimu ni ka nako ye.

Toloko ye nde ye itusisa libizo la Mulimu ki Bibele ya Sizande, ili puo ye bulelwa mwa likalulo za Central African Republic, Sudan, ni Democratic Republic of Congo. Mwa kalulo ya lifasi yeo, Batu ba itusisa libizo la Mulimu ka ku li ñola sina Yekova mwa lipuo za bona. Ku si na taba ni m’o libizo la Mulimu li bulelelwa mwa puo ya sintu, ku itusisa lona ki kwa butokwa. Kabakalañi? Kakuli “mutu ni mutu ya biza Libizo la Mulena u ka piliswa.”—Maroma 10:13.

[Mapa/Siswaniso se si fa likepe 32]

(Kuli mu bone mo i hatiselizwe luli, mu bone hatiso)

SUDAN

CENTRAL AFRICAN REPUBLIC

DEMOCRATIC REPUBLIC OF CONGO

[Manzwi a bañi ba siswaniso]

The Complete Encyclopedia of Illustration/J. G. Heck