Ku Fumana Ba Ba Sa Ipumanelwi ka Bunolo
Piho ya Bashaeli ba Mubuso
Ku Fumana Ba Ba Sa Ipumanelwi ka Bunolo
LIPAKI ZA JEHOVA ba lika ka t’ata ku fitisa lushango lwa Mubuso ku mañi ni mañi. Fokuñwi, ku tokwahalanga buikatazo bo bu ipitezi kuli ba fite ku ba ba fumaneha ka siwela fa mandu. (Mareka 13:10) Kacwalo, paina ya ipitezi wa mwa naha ye ñwi ya mwa South America u kandeka ze n’e ezahezi ze latelela.
“Zazi le liñwi ne ni zibile kuli mubusisi n’a ka potela sibaka k’o na ni musal’a ka ne lu filwe ku yo sebeleza. Bakeñisa kuli n’a li yo muñwi luli wa ba ba fumaneha ka siwela fa mandu, na mu ñolela liñolo ni ku li lumela hamoho ni lihatiso li sikai ze tomile fa Bibele, ku kopanyeleza ni bukanyana ya Ki Sifi Seo Mulimu A Tokwa ku Luna? ni libuka za Mankind’s Search for God ni Zibo Ye Isa kwa Bupilo bo Bu Sa Feli. Liñolo la ka ne li talusa mulelo wa ye ñwi ni ye ñwi ya lihatiso zeo.
“Bakeñisa kuli ne ni tabela ku ziba mwa ka ikutwela ka za lihatiso zeo, na ikupela ku bonana ni yena. Hamulaho wa lisundanyana na lumelezwa ku kopana ni yena, mi na shimba cwalo ni vidio ya Jehovah’s Witnesses—The Organization Behind the Name. Mukopano w’o ne u batil’o tanda lihora ze peli. Hamulaho wa ku buha vidio yeo ni mubusisi, na mu buza mw’a hupulela ka za yona. A alaba kuli: ‘Ha ku na kopano ye swana ni ya mina mwa lifasi. Ni lakaza kuli kambe ni na ni batu ba ba swana sina mina be ne ba ka kona ku ni tusa ku peta misebezi ya ka mwa muuso!’ Mi a ni buza ka za haiba se ni kile na ya kwa sibaka se situna sa tamaiso ya kopano ya luna. Na mu bulelela kuli nihaike kuli w’o ne li mulelo wa ka ku kala ha ne ni li wa lilimo za buhulu ze 14, ha ni si ka ba ni kolo ya ku yo pota kwa sibaka se situna sa tamaiso mwa Brooklyn, kwa New York. Ne li se siñwi sa likonkwani ze li t’ata kwa ku petiwa. A ni lubukela ka nakonyana. Mi a bulela kuli n’a bata kuli ni be ni kolo yeo. A lu lukiseza za mapampili a mulao a’ lu lumeleza ku zamaya mi a lu fa mpo ya matikiti a fulai!
“Cwale mubusisi y’o s’a amuhelanga kamita limagazini za Watchtower ni Awake! Lu sepa kuli lu tuha lu kalisa tuto ya Bibele ni yena.”