Ku Lutiwa ki Kota ya Nzalu

“K I SIBUPEHO se si buheha sa bunde bo bu ipitezi.” Kona mo i taluseza encyclopedia ye ñwi ya Bibele ka za mufuta wa kota ya nzalu ye bizwa date palm. Mwa miteñi ya ze mwa Bibele ni ya cwale, likota za date palm li kabisa Libala la Nile mwa Egepita, mi li fa muluti o katulusa mwa libaka ze na ni mezi za mwa Lihalaupa la Negeb.

Ka ku swana ni mifuta ye miñwi ye miñata ya likota za nzalu, kota ya date palm ki ye yemi nonga. Ze ñwi li fitanga fa butelele bo bu eza limita ze 30 mi li zwelapili ku beya miselo ka lilimo ze 150. Ee, kota ya date palm yeo ya buheha luli mi i beya hahulu miselo. Ka silimo ni silimo i beya likoyowela ze ñata-ñata za miselo. Sikoyowela si li siñwi fela si kona ku ba ni miselo y’e 1,000. Ka za miselo yeo, mutu yo muñwi n’a ñozi kuli: “Ba ba . . . ziba muselo w’o ka ku u bona fela ha u omisizwe ni ku lekiswa mwa lintolo, ha ba koni ku ziba munati wa ona ha u ciwa inze u sali o mezi.”

Kwa swanela luli Bibele ha i bapisa batu ba bañwi kwa kota ya nzalu. Kuli mutu a be ya tabisa ku Mulimu, sina kota ya nzalu ye beya miselo, u lukela ku ba ya lukile mwa muzamao mi u lukela ku zwelapili ku eza misebezi ye minde. (Mateu 7:17-20) Kabakaleo, maswaniso a betilwe a likota za nzalu n’a itusisizwe kwa ku kabisa tempele ya Salumoni ni tempele ya mwa pono ya Ezekiele. (1 Malena 6:29, 32, 35; Ezekiele 40:14-16, 20, 22) Kacwalo, kuli bulapeli bwa hae bu amuhelwe ki Mulimu, mutu u lukela ku ba ni mikwa ye kateleha ya kota date palm. Linzwi la Mulimu li talusa kuli: “Batu ba niti ba ka konda sina nzalu.”—Samu 92:12.