Lipuzo Ze Zwa kwa Babali
Lipuzo Ze Zwa kwa Babali
Ki “pumulo” mañi ye bulelwa kwa Maheberu 4:9-11, mi mutu u kona cwañi ku “kena mwa pumulo yeo”?
Kwa Bakreste ba Maheberu ba mwa lilimo za mwanda wa pili, muapositola Paulusi n’a ñozi kuli: “Ku sa na ni pumulo ya Sabata ye siyalezi sicaba sa Mulimu. Kakuli, ya keni mwa pumulo ya Mulimu, u pumula kwa misebezi ya hae; sina Mulimu mw’a pumulezi ku ya hae. Cwale, a lu itahanele ku kena mwa pumulo yeo.”—Maheberu 4:9-11.
Paulusi ha n’a bulezi kuli Mulimu n’a pumuzi kwa misebezi ya Hae, ku bonahala kuli n’a talusa se si bulezwi kwa Genese 2:2, k’o lu bala kuli: “Ka lizazi la bu 7 Mulimu n’a s’a felize musebezi w’a n’a eza; mi ka lizazi la bu 7 a pumula kwa musebezi w’a n’a sebelize.” Ki kabakalañi Jehova ha n’a ‘pumuzi ka lizazi la bu 7’? Kaniti luli haki kuli n’a bata ku ikatulusa kwa “musebezi w’a n’a sebelize.” Timana ye tatama i fa sisupo, i li: “Mulimu a fuyola lizazi la bu 7, mi a li beya kuli ibe le li kenile; kakuli ka lona a pumula kwa misebezi kaufela y’a n’a ezize Mulimu.”—Genese 2:3; Isaya 40:26, 28.
“Lizazi la bu 7” ne li sa swani ni lizazi lifi kamba lifi kwa mazazi a mañwi a silezi a n’a fitile kakuli ne li lizazi la n’a fuyozi Mulimu ni ku li kenisa, ili ku talusa kuli, lizazi le li kauhanyizwe, kamba ku lukisezwa mulelo o ipitezi. Ne li mulelo mañi ona w’o? Kwa makalelo, Mulimu n’a zibahalize mulelo wa hae ka za batu ni lifasi. Ku munna wa pili ni musal’a hae, Mulimu n’a ize: “Mu tahise lusika, mu ate, mu tale mwa lifasi, mu buse fahalimw’a lona, mi mu buse litapi za mwa liwate, ni ze fufa mwa mbyumbyulu kaufela, ni ze pila kaufela, ni ze zamaya ka mba fafasi.” (Genese 1:28) Nihaike kuli Mulimu n’a ezize batu ni lifasi li li ze petehile, ne ku ka nga nako kuli lifasi kaufela li busiwe ni ku cinciwa ku ba paradaisi ye tezi lubasi lwa batu ba ba petehile, ka mwa n’a lelezi Mulimu. Kacwalo, fa “lizazi la bu 7,” Mulimu a pumula, kamba ku tuhela ku eza misebezi ye miñwi ka za lifasi ilikuli a tuhelele za n’a ezize kale kuli li zwelepili ka ku lumelelana ni tato ya hae. “Lizazi” leo ha li ka t’o fela, milelo kaufela ya Mulimu ikabe i petahezi. Butelele bwa pumulo yeo ikaba bo bu kuma kai?
Ka ku kutela ku za n’a bulezi muapositola Paulusi mwa Maheberu, lu lemuha kuli n’a bonisize kuli “ku sa na ni pumulo ya Sabata ye siyalezi sicaba sa Mulimu,” mi n’a susuelize Bakreste sina yena ku itahanela “ku kena mwa pumulo yeo.” Seo si bonisa kuli Paulusi ha n’a ñola manzwi ao, “lizazi la bu 7” la pumulo ya Mulimu, le ne li kalile lilimo ze bat’o ba ze 4,000 kwamulaho, ne li sa zwelapili. Li ka zwelapili ku fitela mulelo wa Mulimu ka za batu ni lifasi u talelelezwa ka ku tala kwa mafelelezo a Puso ya Jesu Kreste ya Lilimo ze Sikiti. Jesu Kreste ki yena ya li “Mulena ni wa la Pumulo.”—Mateu 12:8; Sinulo 20:1-6; 21:1-4.
Ka ku beya mwa munahano tibelelo ye makaza yeo, Paulusi n’a talusize m’o mutu n’a kona ku kenela mwa pumulo ya Mulimu. N’a ñozi kuli: “Ya keni mwa pumulo ya Mulimu, u pumula kwa misebezi ya hae.” F’o ki ku talusa kuli niha ne ba li ba ba petehile kwa makalelo, batu kaufela ha ba si ka kena mwa pumulo ya Mulimu. Libaka ne li la kuli Adama ni Eva ne ba si ka zwelapili ku mamela pumulo ya Mulimu fa “lizazi la bu 7” ka ku amuhela tukiso ya n’a ba ezelize. Kono ba ipangula mi ne ba bata ku itukulula ku Mulimu. Mane, ne ba latelezi milelo ya Satani ku fita ku amuhela ketelelo ya Mulimu ye lilato. (Genese 2:15-17) Kabakaleo, ba latehelwa ki tibelelo ya ku pila ku ya ku ile mwa paradaisi fa lifasi. Ku zwelela honaf’o, batu kaufela ba ba mwa butanga bwa sibi ni lifu.—Maroma 5:12, 14.
Buipanguli bwa batu ne bu si ka tibela mulelo wa Mulimu. Lizazi la pumulo ya hae li sa zwelapili. Kono Jehova n’a ezize tukiso ye lilato—yona ya tiululo—ka Mwan’a hae, yena Jesu Kreste, ilikuli bote ba ba i amuhela ka tumelo ba kone ku ba ni tibelelo ya ku lukululwa ni ku pumula kwa mutiyo wa sibi ni lifu. (Maroma 6:23) Kona libaka Paulusi ha n’a susuelize Bakreste sina yena ku ‘pumula kwa misebezi ya bona.’ Ne ba lukela ku amuhela tukiso ya Mulimu ya puluso mi isiñi ku lika ku mbindanela nako ya bona ya kwapili ka mo ba latela, ka mo ne ba ezelize bo Adama ni Eva. Hape ne ba lukela ku sa ikezeza misebezi ya bona ya ku ipona ku luka.
Ku sa ipatela lika ka buitati kamba za silifasi kuli mutu a eze tato ya Mulimu kaniti luli kwa wetulusa ni ku katuluswa. Jesu n’a file memo ye: “Mu tahe ku na mina kamukana ba ba katezi, ba ba imezwi, mi ni ka mi imulula. Mu itwese coko ya ka, mi mu itute ku na; kakuli ni na ni musa ni pilu ye bunolo, [mi] mu ka fumanela mioya ya mina pumulo. Kakuli coko ya ka i bubebe, mi mulwalo wa ka ha u na bukiti.”—Mateu 11:28-30.
Puhisano ya Paulusi ka za pumulo ya Mulimu ni ka m’o mutu a kona ku kena ku yona kaniti luli ne i susuelize hahulu Bakreste ba Maheberu ba mwa Jerusalema, be ne ba tiyezi manyando ni mashendo a mañata kabakala tumelo ya bona. (Likezo 8:1; 12:1-5) Ka ku swana, manzwi a Paulusi a kona ku susueza hahulu Bakreste kacenu. Ka ku lemuha kuli Mulimu u ka tuha a taleleza sepiso ya hae ya ku fetula lifasi le ku ba paradaisi mwatas’a puso ya hae ya ku luka ya Mubuso, ni luna lu lukela ku pumula kwa misebezi ya luna ni ku itahanela ku kena mwa pumulo yeo.—Mateu 6:10, 33; 2 Pitrosi 3:13.
[Maswaniso a fa likepe 31]
Sepiso ya Mulimu ya paradaisi fa lifasi le i ka talelezwa kwa mafelelezo a lizazi la pumulo ya hae