Lipuzo Ze Zwa kwa Babali

Likota ze ne lwaliswa aleka ya bulikani ne li beilwe cwañi, kakuli 1 Malena 8:8 i bonisa kuli ne li bonahala mwa Ndu ye kenile?

Jehova ha n’a file Mushe litikanyo za tabernakele mwa lihalaupa, kalulo ye tuna hahulu ne li aleka ya bulikani. Aleka yeo ne li likwati le ne li basizwe ka gauda, ili mo ne ku beilwe matapa a Mulao ni ze ñwi cwalo. Ne li bulukwa mwa kalulo ya mwahali ka ku fitisisa, sona Sibaka se si kenile hahulu. Fa sikwahelo sa Aleka, ne ku na ni likerubimi za gauda ze yanduluzi mafufa a zona. Kwa lineku ni lineku la Aleka, ne ku na ni mauti ilikuli i kone ku lwaliwa ka likota ze peli, za akeshya ze apesizwe gauda. Kacwalo, likota zeo ne li comekiwa mwa mauti ao ni ku fita Aleka mwa butelele bwa yona. Kacwalo, Aleka ha ne i beilwe mwa sibaka sa yona ili mwa Sibaka se si kenile hahulu sa tabernakele, ye ne talimezi kwa upa, likota zona ne li talimezi kwa mutulo ni mboela. Ne ku bile cwalo hasamulaho Aleka ha ne i beilwe mwa tempele ya n’a yahile Salumoni.—Exoda 25:10-22; 37:4-9; 40:17-21. *

Lisila ne li aluhanya Sibaka se si kenile hahulu ni Sibaka se si kenile (muzuzu wa kwande). Baprisita mwa Sibaka se si kenile ne ba sa koni ku bona mwa Sibaka se si kenile hahulu ni ku bona Aleka, ili yeo Mulimu n’a itahisa ku yona. (Maheberu 9:1-7) Kacwalo, 1 Malena 8:8 i kana ya ba ye komokisa, ha i li: “Likota ze ne lwaliswa Aleka, kakuli n’e li ze telele hahulu, lingo za zona ne li bonahalela mwa Ndu ye kenile, ye fapil’a Ndu ye kenile hahulu; kono likota ne li sa bonwi ki ba ba inzi kwande.” Ni kwa 2 Makolonika 5:9 ku bulelwa cwalo. Likota zeo ne li bonahala cwañi ku mutu kaufela ya n’a li mwa Sibaka se si kenile sa tempele?

Ba bañwi ba nahanile kuli likota zeo ne li ngunyuta kwa lisila, ili ku bunjuka fa lisila. Kono ne ku si ke kwa ba cwalo kambe likota zeo ne li talimezi kwa mutulo ni mboela, lisila ni lona li nze li talimezi mo ku talimezi likota. (Numere 3:38) Ku na ni taluso ye ñwi ye utwahala hande ni ku fita. Likota zeo mwendi ne li bonahala haiba ne ku na ni lisuba mwahal’a lisila ni limota la tempele kamba muprisita yo mutuna ha na kena mwa Sibaka se si kenile hahulu. Lisila leo ne li kwahezi yona Aleka ka sibili kuli i si ke ya bonwa, kono likota ze ne punyeza kwa lineku ni lineku ne li kana li bonahala mwa lisuba. Hailif’o taluso yeo ya utwahala hande, ha lu koni ku i ñañelela kuli ki yona fela ya niti.

Kwa iponelwa kuli ku sa na ni litaba ze ñata zeo mwendi lu ka ituta za zona. Muapositola Paulusi n’a bulezi likalulo li sikai za teñi mwa liñolo la hae kwa Maheberu. Mi a bulela kuli: “Nako ha i yo, ya ku bulela zeo ka i li ñwi, ka i li ñwi.” (Maheberu 9:5) Nako ye taha ya zuho ya basepahali i ka fa kolo ye tabisa ya ku ituta kwa batu ba ba cwale ka Mushe, Aruni, Bezaleele, ni ba bañwi be ne ba tekelezi litikanyo ni misebezi ya tabernakele.—Exoda 36:1.

[Litaluso za kwatasi]